ਚੀਨ ''ਚ ਦੁਨੀਆ ਦੀ ਸਭ ਤੋਂ ਵੱਡੀ ਹਿਜਰਤ: ''ਲੂਨਰ ਨਿਊ ਈਅਰ'' ''ਤੇ 9.5 ਅਰਬ ਲੋਕ ਕਰਨਗੇ ਸਫ਼ਰ

ਬੀਜਿੰਗ : ਚੀਨ ਵਿੱਚ ਲੂਨਰ ਨਿਊ ਈਅਰ (ਚੀਨੀ ਨਵਾਂ ਸਾਲ) ਤੋਂ ਪਹਿਲਾਂ ਦੁਨੀਆ ਦੀ ਸਭ ਤੋਂ ਵੱਡੀ ਮਨੁੱਖੀ ਹਿਜਰਤ ਸ਼ੁਰੂ ਹੋ ਚੁੱਕੀ ਹੈ। ਇਸ ਸਾਲ ਲੋਕ ਆਪਣੇ ਪਰਿਵਾਰਾਂ ਨੂੰ ਮਿਲਣ ਲਈ ਇੰਨੀ ਵੱਡੀ ਗਿਣਤੀ ਵਿੱਚ ਘਰਾਂ ਨੂੰ ਪਰਤ ਰਹੇ ਹਨ ਕਿ ਯਾਤਰਾ ਦੇ ਸਾਰੇ ਪਿਛਲੇ ਰਿਕਾਰਡ ਟੁੱਟਣ ਦੀ ਉਮੀਦ ਹੈ। ਚੀਨ ਵਿੱਚ ਯਾਤਰਾ ਦੇ ਇਸ ਦੌਰ ਨੂੰ 'ਚੁਨਯੁਨ' ਕਿਹਾ ਜਾਂਦਾ ਹੈ।

40 ਦਿਨਾਂ ਵਿੱਚ 9.5 ਅਰਬ ਯਾਤਰਾਵਾਂ 
ਚੀਨ ਸਰਕਾਰ ਦੇ ਅਨੁਮਾਨ ਅਨੁਸਾਰ, ਲੂਨਰ ਨਿਊ ਈਅਰ ਦੇ ਆਲੇ-ਦੁਆਲੇ 40 ਦਿਨਾਂ ਦੇ ਸਮੇਂ ਦੌਰਾਨ ਲਗਭਗ 9.5 ਅਰਬ ਯਾਤਰਾਵਾਂ ਹੋਣਗੀਆਂ। ਇਹ ਹੁਣ ਤੱਕ ਦਾ ਸਭ ਤੋਂ ਵੱਡਾ ਰਿਕਾਰਡ ਹੈ। ਅੰਕੜਿਆਂ ਮੁਤਾਬਕ:
• ਲਗਭਗ 54 ਕਰੋੜ ਲੋਕ ਰੇਲਗੱਡੀ ਰਾਹੀਂ ਸਫ਼ਰ ਕਰਨਗੇ।
• 9.5 ਕਰੋੜ ਲੋਕ ਹਵਾਈ ਜਹਾਜ਼ ਰਾਹੀਂ ਆਪਣੇ ਟਿਕਾਣਿਆਂ 'ਤੇ ਪਹੁੰਚਣਗੇ।
• ਬਾਕੀ ਬਚੇ ਲੋਕ ਸੜਕੀ ਰਸਤਿਆਂ ਰਾਹੀਂ ਯਾਤਰਾ ਕਰਨਗੇ।

ਆਰਥਿਕ ਤੰਗੀ 'ਤੇ ਭਾਰੀ ਪਿਆ ਪਰਿਵਾਰਕ ਮੋਹ 
ਚੀਨ ਦੀ ਕਮਜ਼ੋਰ ਹੁੰਦੀ ਆਰਥਿਕਤਾ ਅਤੇ ਮਹਿੰਗਾਈ ਦੇ ਬਾਵਜੂਦ ਲੋਕਾਂ ਦੇ ਉਤਸ਼ਾਹ ਵਿੱਚ ਕੋਈ ਕਮੀ ਨਹੀਂ ਦਿਖ ਰਹੀ। ਬੀਜਿੰਗ ਵਿੱਚ ਕੰਮ ਕਰਨ ਵਾਲੇ ਲਿਊ ਝੀਕਵਾਨ ਵਰਗੇ ਕਈ ਮਜ਼ਦੂਰ ਪੈਸੇ ਬਚਾਉਣ ਲਈ 9 ਘੰਟੇ ਦੀ ਹਾਈ-ਸਪੀਡ ਟ੍ਰੇਨ ਦੀ ਬਜਾਏ 30 ਘੰਟੇ ਦੀ ਹੌਲੀ ਟ੍ਰੇਨ ਦੀ ਚੋਣ ਕਰ ਰਹੇ ਹਨ ਕਿਉਂਕਿ ਉਸਦਾ ਕਿਰਾਇਆ ਅੱਧਾ ਹੈ। ਲੋਕਾਂ ਦਾ ਕਹਿਣਾ ਹੈ ਕਿ ਭਾਵੇਂ ਪੈਸੇ ਕਮਾਉਣਾ ਮੁਸ਼ਕਿਲ ਹੋ ਗਿਆ ਹੈ, ਪਰ ਸਾਲ ਵਿੱਚ ਇੱਕ ਵਾਰ ਪਰਿਵਾਰ ਨਾਲ ਮਿਲਣਾ ਸਭ ਤੋਂ ਜ਼ਰੂਰੀ ਹੈ।

ਤਿਉਹਾਰ ਦੀ ਅਹਿਮੀਅਤ 
ਚੀਨ ਵਿੱਚ ਲੋਕ ਸਾਰਾ ਸਾਲ ਸਖ਼ਤ ਮਿਹਨਤ ਕਰਦੇ ਹਨ ਅਤੇ ਛੁੱਟੀਆਂ ਬਹੁਤ ਘੱਟ ਹੁੰਦੀਆਂ ਹਨ। ਅਜਿਹੇ ਵਿੱਚ ਲੂਨਰ ਨਿਊ ਈਅਰ ਹੀ ਅਜਿਹਾ ਮੌਕਾ ਹੁੰਦਾ ਹੈ ਜਦੋਂ ਮਜ਼ਦੂਰ, ਮੁਲਾਜ਼ਮ ਅਤੇ ਵਿਦਿਆਰਥੀ ਲੰਬੀ ਛੁੱਟੀ ਲੈ ਕੇ ਆਪਣੇ ਪਿੰਡਾਂ ਜਾਂ ਸ਼ਹਿਰਾਂ ਨੂੰ ਜਾਂਦੇ ਹਨ। ਬੀਜਿੰਗ ਦੇ ਰੇਲਵੇ ਸਟੇਸ਼ਨਾਂ 'ਤੇ ਭਾਰੀ ਭੀੜ ਦੇਖੀ ਜਾ ਰਹੀ ਹੈ, ਜਿੱਥੇ ਯਾਤਰੀ ਵੱਡੇ-ਵੱਡੇ ਬੈਗ ਲੈ ਕੇ ਆਪਣੀਆਂ ਟ੍ਰੇਨਾਂ ਦਾ ਇੰਤਜ਼ਾਰ ਕਰ ਰਹੇ ਹਨ। ਦੱਸ ਦੇਈਏ ਕਿ ਇਸ ਵਾਰ ਲੂਨਰ ਨਿਊ ਈਅਰ 17 ਫਰਵਰੀ ਨੂੰ ਮਨਾਇਆ ਜਾਵੇਗਾ, ਜਿਸ ਲਈ ਪੂਰੇ ਚੀਨ ਵਿੱਚ ਜਸ਼ਨ ਅਤੇ ਯਾਤਰਾਵਾਂ ਦਾ ਮਾਹੌਲ ਬਣਿਆ ਹੋਇਆ ਹੈ।