ਵੱਡਾ ਜਾਸੂਸੀ ਰੈਕੇਟ ਬੇਨਕਾਬ! ਚੀਨ ਨੇ ਭਾਰਤ ਦੇ Strategic Assets ਦੀ CCTV ਜਾਣਕਾਰੀ ਪਾਕਿ ਨੂੰ ਭੇਜੀ

ਨਵੀਂ ਦਿੱਲੀ: ਦਿੱਲੀ ਪੁਲਸ ਦੇ ਸਪੈਸ਼ਲ ਸੈੱਲ ਨੇ ਇਕ ਅਜਿਹੇ ਖ਼ਤਰਨਾਕ ਜਾਸੂਸੀ ਰੈਕੇਟ ਦਾ ਪਰਦਾਫਾਸ਼ ਕੀਤਾ ਹੈ, ਜਿਸ ਰਾਹੀਂ ਚੀਨ ਵਿੱਚ ਬਣੇ ਸੀਸੀਟੀਵੀ (CCTV) ਕੈਮਰਿਆਂ ਦੀ ਵਰਤੋਂ ਕਰਕੇ ਭਾਰਤ ਦੀਆਂ ਅਹਿਮ ਸੁਰੱਖਿਆ ਸਥਾਪਨਾਵਾਂ ਦੀ ਲਾਈਵ ਫੀਡ ਪਾਕਿਸਤਾਨ ਦੀ ਖੁਫੀਆ ਏਜੰਸੀ ISI ਨੂੰ ਭੇਜੀ ਜਾ ਰਹੀ ਸੀ। ਇਸ ਮਾਮਲੇ ਵਿੱਚ ਪੁਲਸ ਨੇ ਪੰਜਾਬ ਅਤੇ ਦਿੱਲੀ ਤੋਂ ਛੇ ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ, ਜੋ ISI ਅਤੇ ਅੱਤਵਾਦੀ ਸੰਗਠਨ ਬੱਬਰ ਖ਼ਾਲਸਾ ਇੰਟਰਨੈਸ਼ਨਲ (BKI) ਦੇ ਜਾਸੂਸੀ ਮਾਡਿਊਲ ਦਾ ਹਿੱਸਾ ਸਨ।

ਪੰਜਾਬ ਦੇ ਕਈ ਸ਼ਹਿਰ ਨਿਸ਼ਾਨੇ 'ਤੇ
ਸੂਤਰਾਂ ਅਨੁਸਾਰ, ਇਹ ਜਾਸੂਸੀ ਕੈਮਰੇ ਪੰਜਾਬ ਦੇ ਕਪੂਰਥਲਾ, ਜਲੰਧਰ, ਪਠਾਨਕੋਟ, ਪਟਿਆਲਾ ਅਤੇ ਮੋਗਾ ਵਰਗੇ ਸੰਵੇਦਨਸ਼ੀਲ ਇਲਾਕਿਆਂ ਵਿੱਚ ਲਗਾਏ ਗਏ ਸਨ। ਇਸ ਤੋਂ ਇਲਾਵਾ ਹਰਿਆਣਾ ਦੇ ਅੰਬਾਲਾ, ਰਾਜਸਥਾਨ ਦੇ ਬੀਕਾਨੇਰ ਅਤੇ ਅਲਵਰ, ਅਤੇ ਜੰਮੂ-ਕਸ਼ਮੀਰ ਦੇ ਕਠੂਆ ਵਿੱਚ ਵੀ ਅਜਿਹੇ ਡਿਵਾਈਸ ਲਗਾਏ ਗਏ ਸਨ। ਇਹ ਕੈਮਰੇ ਭਾਰਤ-ਪਾਕਿਸਤਾਨ ਸਰਹੱਦ ਦੇ ਨੇੜੇ ਅਤੇ ਰਣਨੀਤਕ ਰੱਖਿਆ ਸਥਾਨਾਂ ਦੇ ਬਿਲਕੁਲ ਬਾਹਰ ਸਥਾਪਿਤ ਕੀਤੇ ਗਏ ਸਨ ਤਾਂ ਜੋ ਫੌਜੀ ਗਤੀਵਿਧੀਆਂ ਤੇ ਹਥਿਆਰਾਂ ਦੀ ਆਵਾਜਾਈ 'ਤੇ ਨਜ਼ਰ ਰੱਖੀ ਜਾ ਸਕੇ।

ਚੀਨੀ ਸੌਫਟਵੇਅਰ ਰਾਹੀਂ ਹੋ ਰਹੀ ਸੀ ਜਾਸੂਸੀ
ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਇਹ ਸਾਰਾ ਨੈੱਟਵਰਕ ਚੀਨੀ ਕੰਪਨੀ 'ਗੁਆਂਗਜ਼ੂ ਜੁਆਨ ਇੰਟੈਲੀਜੈਂਟ ਟੈਕ ਜੁਆਇੰਟ ਸਟਾਕ ਕੋ ਲਿਮਟਿਡ' ਦੁਆਰਾ ਵਿਕਸਿਤ ਕੀਤੇ ਗਏ 'EseeCloud' ਸੌਫਟਵੇਅਰ ਰਾਹੀਂ ਚੱਲ ਰਿਹਾ ਸੀ। ਸੂਰਜੀ ਊਰਜਾ (Solar-powered) ਅਤੇ ਸਿਮ ਕਾਰਡ ਨਾਲ ਚੱਲਣ ਵਾਲੇ ਇਹ ਕੈਮਰੇ ਲਾਈਵ ਵੀਡੀਓ ਫੁਟੇਜ ਚੀਨ ਦੇ ਡਾਟਾ ਸੈਂਟਰਾਂ ਨੂੰ ਭੇਜਦੇ ਸਨ, ਜਿੱਥੋਂ ਇਹ ਜਾਣਕਾਰੀ ਪਾਕਿਸਤਾਨ ਵਿੱਚ ਬੈਠੇ ISI ਹੈਂਡਲਰਾਂ ਤੱਕ ਪਹੁੰਚਾਈ ਜਾਂਦੀ ਸੀ।

ਦੁਬਈ ਤੋਂ ਚੱਲ ਰਿਹਾ ਸੀ ਰੈਕੇਟ
ਇਸ ਪੂਰੇ ਆਪ੍ਰੇਸ਼ਨ ਦਾ ਮਾਸਟਰਮਾਈਂਡ ਦੁਬਈ ਵਿੱਚ ਬੈਠਾ ਇੱਕ ਭਾਰਤੀ ਆਪਰੇਟਰ ਦੱਸਿਆ ਜਾ ਰਿਹਾ ਹੈ, ਜੋ ਟਰਾਂਸਪੋਰਟ ਕਾਰੋਬਾਰ ਦੇ ਬਹਾਨੇ ਇਹ ਕੈਮਰੇ ਲਗਵਾ ਰਿਹਾ ਸੀ। ਪਾਕਿਸਤਾਨੀ ਖੁਫੀਆ ਏਜੰਸੀ ਦਾ ਇਕ ਹੈਂਡਲਰ, ਜਿਸਦਾ ਕੋਡ ਨਾਮ 'ਕੈਪਟਨ ਰਾਣਾ' ਹੈ, ਇਸ ਪੂਰੇ ਮਾਡਿਊਲ ਦੀ ਨਿਗਰਾਨੀ ਕਰ ਰਿਹਾ ਸੀ। ਪਿਛਲੇ ਤਿੰਨ ਮਹੀਨਿਆਂ ਤੋਂ ISI ਭਾਰਤ ਦੀਆਂ ਫੌਜੀ ਹਰਕਤਾਂ ਦੀ ਲਾਈਵ ਜਾਣਕਾਰੀ ਹਾਸਲ ਕਰ ਰਹੀ ਸੀ, ਜਿਸਦਾ ਮੁੱਖ ਮਕਸਦ ਜੰਗ ਵਰਗੀ ਸਥਿਤੀ ਵਿੱਚ ਭਾਰਤ ਨੂੰ ਨੁਕਸਾਨ ਪਹੁੰਚਾਉਣਾ ਸੀ।

ਦਿੱਲੀ ਪੁਲਸ ਦੇ ਐਡੀਸ਼ਨਲ ਕਮਿਸ਼ਨਰ (ਸਪੈਸ਼ਲ ਸੈੱਲ) ਪ੍ਰਮੋਦ ਸਿੰਘ ਕੁਸ਼ਵਾਹਾ ਨੇ ਦੱਸਿਆ ਕਿ ਪੁਲਸ ਨੇ ਮੌਕੇ ਤੋਂ 9 ਚੀਨੀ ਸੀਸੀਟੀਵੀ ਕੈਮਰੇ ਬਰਾਮਦ ਕੀਤੇ ਹਨ। ਸੁਰੱਖਿਆ ਏਜੰਸੀਆਂ ਨੇ ਹੁਣ ਹਥਿਆਰਬੰਦ ਬਲਾਂ ਨੂੰ ਚੌਕਸ ਕਰ ਦਿੱਤਾ ਹੈ ਕਿ ਉਹ ਆਪਣੀਆਂ ਸਥਾਪਨਾਵਾਂ ਦੇ ਅੰਦਰ ਅਤੇ ਬਾਹਰ ਲੱਗੇ ਚੀਨੀ ਕੈਮਰਿਆਂ ਦੀ ਸੁਰੱਖਿਆ ਜਾਂਚ ਕਰਨ ਤਾਂ ਜੋ ਰਾਸ਼ਟਰੀ ਸੁਰੱਖਿਆ ਨੂੰ ਹੋਰ ਖ਼ਤਰਾ ਨਾ ਹੋਵੇ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e