ਵ੍ਹਾਈਟ ਹਾਊਸ ਨੇ TikTok ''ਤੇ ਬਣਾਇਆ ਆਪਣਾ ਅਕਾਊਂਟ

ਵਾਸ਼ਿੰਗਟਨ (ਏਜੰਸੀ)- ਅਮਰੀਕਾ ਵਿੱਚ 'ਵ੍ਹਾਈਟ ਹਾਊਸ' ਨੇ ਮੰਗਲਵਾਰ ਨੂੰ ਅਧਿਕਾਰਤ ਤੌਰ 'ਤੇ ਆਪਣਾ TikTok ਅਕਾਊਂਟ ਲਾਂਚ ਕੀਤਾ। ਇਹ ਧਿਆਨ ਦੇਣ ਯੋਗ ਹੈ ਕਿ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਵੱਲੋਂ ਇਸ ਸੋਸ਼ਲ ਮੀਡੀਆ ਐਪ ਨੂੰ ਸਤੰਬਰ ਤੱਕ ਨਵਾਂ ਮਾਲਕ ਲੱਭਣ ਜਾਂ ਫਿਰ ਦੇਸ਼ ਵਿੱਚ ਪਾਬੰਦੀ ਦਾ ਸਾਹਮਣਾ ਕਰਨ ਦੀ ਸਮਾਂ ਸੀਮਾ ਸਬੰਧੀ ਦਿੱਤੀ ਗਈ ਧਮਕੀ ਦੇ ਵਿਚਕਾਰ ਹੋਇਆ ਹੈ। ਇਸ ਅਕਾਊਂਟ 'ਤੇ ਪਹਿਲਾ ਵੀਡੀਓ ਮੰਗਲਵਾਰ ਦੁਪਹਿਰ ਨੂੰ ਪੋਸਟ ਕੀਤਾ ਗਿਆ ਸੀ। ਇਹ 27-ਸਕਿੰਟ ਦੀ ਕਲਿੱਪ ਹੈ ਜਿਸ ਵਿੱਚ ਟਰੰਪ ਨੂੰ ਆਪਣੇ ਸਮਰਥਕਾਂ ਨਾਲ ਗੱਲਬਾਤ ਕਰਦੇ ਦਿਖਾਇਆ ਗਿਆ ਹੈ। ਇਸ ਵਿੱਚ 2016 ਦੇ ਰਿਪਬਲੀਕਨ ਨੈਸ਼ਨਲ ਕਨਵੈਨਸ਼ਨ ਵਿੱਚ ਉਨ੍ਹਾਂ ਦੇ ਸਵੀਕ੍ਰਿਤੀ ਭਾਸ਼ਣ ਦਾ ਆਡੀਓ ਵੀ ਹੈ। ਇਸ ਵੀਡੀਓ ਦੇ ਕੁਝ ਘੰਟਿਆਂ ਬਾਅਦ ਹੀ ਅਕਾਊਂਟ ਨੂੰ 57,000 ਤੋਂ ਵੱਧ ਫਾਲੋਅਰਜ਼ ਮਿਲ ਗਏ, ਜਦੋਂ ਕਿ ਟਰੰਪ ਦੁਆਰਾ ਪਿਛਲੇ ਸਾਲ ਆਪਣੀ ਰਾਸ਼ਟਰਪਤੀ ਚੋਣ ਮੁਹਿੰਮ ਲਈ ਵਰਤੇ ਗਏ TikTok ਅਕਾਊਂਟ ਦੇ 1.5 ਕਰੋੜ ਤੋਂ ਵੱਧ ਫਾਲੋਅਰਜ਼ ਹਨ।

ਜ਼ਿਕਰਯੋਗ ਹੈ ਕਿ ਆਪਣੇ ਪਹਿਲੇ ਰਾਸ਼ਟਰਪਤੀ ਕਾਰਜਕਾਲ ਵਿੱਚ, ਟਰੰਪ ਨੇ ਇੱਕ ਕਾਰਜਕਾਰੀ ਆਦੇਸ਼ 'ਤੇ ਦਸਤਖਤ ਕੀਤੇ ਸਨ, ਜਿਸ ਤਹਿਤ ਚੀਨੀ ਕੰਪਨੀ 'ਬਾਈਟਡਾਂਸ' ਦੀ ਮਲਕੀਅਤ ਵਾਲੀ ਇਸ ਐਪ ਨੂੰ ਦੇਸ਼ ਵਿੱਚ ਉਦੋਂ ਤੱਕ ਪਾਬੰਦੀ ਲਗਾਉਣ ਦੀ ਮੰਗ ਕੀਤੀ ਗਈ ਸੀ ਜਦੋਂ ਤੱਕ ਬਾਈਟਡਾਂਸ ਆਪਣੇ ਅਮਰੀਕੀ ਸੰਚਾਲਨ ਨੂੰ ਇੱਕ ਅਮਰੀਕੀ ਕੰਪਨੀ ਨੂੰ ਨਹੀਂ ਵੇਚ ਦਿੰਦਾ। ਹਾਲਾਂਕਿ, ਕਾਨੂੰਨੀ ਚੁਣੌਤੀਆਂ ਕਾਰਨ ਇਹ ਹੁਕਮ ਲਾਗੂ ਨਹੀਂ ਕੀਤਾ ਜਾ ਸਕਿਆ। ਹੁਣ ਆਪਣੇ ਦੂਜੇ ਕਾਰਜਕਾਲ ਵਿੱਚ, ਟਰੰਪ ਨੇ ਇਸ ਸਮਾਂ ਸੀਮਾ ਨੂੰ 2 ਵਾਰ ਕ੍ਰਮਵਾਰ 20 ਜਨਵਰੀ ਅਤੇ 4 ਅਪ੍ਰੈਲ ਨੂੰ 75 ਦਿਨਾਂ ਲਈ ਵਧਾ ਦਿੱਤਾ ਹੈ। ਇਸ ਤੋਂ ਬਾਅਦ, 19 ਜੂਨ ਨੂੰ ਟਰੰਪ ਨੇ ਅਮਰੀਕਾ ਵਿੱਚ TikTok ਨੂੰ ਹੋਰ 90 ਦਿਨਾਂ ਲਈ ਚਾਲੂ ਰੱਖਣ ਲਈ ਇੱਕ ਕਾਰਜਕਾਰੀ ਆਦੇਸ਼ 'ਤੇ ਦਸਤਖਤ ਕੀਤੇ, ਜਿਸ ਨਾਲ ਇਸ ਸਮਾਂ ਸੀਮਾ ਦੀ ਮਿਆਦ 17 ਸਤੰਬਰ ਤੱਕ ਵਧਾ ਦਿੱਤੀ ਗਈ ਹੈ।