ਵਾਲਟਰ ਕੱਪ ਫਾਈਨਲ ਦੇ ਪਹਿਲੇ ਮੁਕਾਬਲੇ ‘ਚ ਮਾਂਟਰੀਅਲ ਵਿਕਤੁਆਰ ਦੀ ਰੋਮਾਂਚਕ ਜਿੱਤ
Friday, May 15, 2026 - 09:05 PM (IST)
ਵੈਨਕੂਵਰ, (ਮਲਕੀਤ ਸਿੰਘ)– ਆਲ-ਕੈਨੇਡੀਅਨ ਵਾਲਟਰ ਕੱਪ ਫਾਈਨਲ ਦੇ ਪਹਿਲੇ ਮੁਕਾਬਲੇ ਦੌਰਾਨ ਮਾਂਟਰੀਅਲ ਵਿਕਤੁਆਰ ਨੇ ਸ਼ਾਨਦਾਰ ਵਾਪਸੀ ਕਰਦਿਆਂ ਓਵਰਟਾਈਮ ਵਿੱਚ ਜਿੱਤ ਦਰਜ ਕਰ ਲਈ। ਰੋਮਾਂਚ ਨਾਲ ਭਰੇ ਇਸ ਮੁਕਾਬਲੇ ਵਿੱਚ ਵਿਕਤੁਆਰ ਨੇ ਓਟਾਵਾ ਚਾਰਜ ਨੂੰ ਹਰਾ ਕੇ ਸੀਰੀਜ਼ ਵਿੱਚ ਬੜ੍ਹਤ ਹਾਸਲ ਕਰ ਲਈ ਹੈ।
ਮੁਕਾਬਲੇ ਦੌਰਾਨ ਇੱਕ ਸਮੇਂ ਮਾਂਟਰੀਅਲ ਦੀ ਟੀਮ ਹਾਰ ਦੇ ਨੇੜੇ ਦਿਖਾਈ ਦੇ ਰਹੀ ਸੀ, ਪਰ ਨਿਕੋਲ ਗੋਸਲਿੰਗ ਨੇ ਨਿਯਮਿਤ ਸਮੇਂ ਦੇ ਖਤਮ ਹੋਣ ਤੋਂ ਕੇਵਲ 2.1 ਸਕਿੰਟ ਪਹਿਲਾਂ ਬਰਾਬਰੀ ਵਾਲਾ ਗੋਲ ਕਰਕੇ ਟੀਮ ਨੂੰ ਮੁੜ ਮੁਕਾਬਲੇ ਵਿੱਚ ਲਿਆ ਦਿੱਤਾ। ਇਸ ਗੋਲ ਮਗਰੋਂ ਸਟੇਡੀਅਮ ਵਿੱਚ ਮੌਜੂਦ ਦਰਸ਼ਕਾਂ ਵਿੱਚ ਜ਼ਬਰਦਸਤ ਜੋਸ਼ ਵੇਖਣ ਨੂੰ ਮਿਲਿਆ।
ਓਵਰਟਾਈਮ ਦੌਰਾਨ ਫਿਰ ਰੋਕ ਵੱਲੋਂ ਜੇਤੂ ਗੋਲ ਕਰਕੇ ਮਾਂਟਰੀਅਲ ਵਿਕਤੁਆਰ ਨੂੰ ਯਾਦਗਾਰ ਜਿੱਤ ਦਿਵਾਈ ਗਈ। ਖਿਡਾਰੀਆਂ ਅਤੇ ਪ੍ਰਸ਼ੰਸਕਾਂ ਨੇ ਇਸ ਜਿੱਤ ਦਾ ਖੂਬ ਜਸ਼ਨ ਮਨਾਇਆ।
ਖੇਡ ਮਾਹਿਰਾਂ ਅਨੁਸਾਰ ਇਹ ਮੁਕਾਬਲਾ ਮਹਿਲਾ ਹਾਕੀ ਦੇ ਸਭ ਤੋਂ ਰੋਮਾਂਚਕ ਮੁਕਾਬਲਿਆਂ ਵਿੱਚੋਂ ਇੱਕ ਮੰਨਿਆ ਜਾ ਰਿਹਾ ਹੈ। ਦੋਵਾਂ ਟੀਮਾਂ ਨੇ ਤੇਜ਼ ਰਫ਼ਤਾਰ ਅਤੇ ਉੱਚ ਪੱਧਰੀ ਖੇਡ ਦਾ ਪ੍ਰਦਰਸ਼ਨ ਕੀਤਾ, ਜਿਸ ਨਾਲ ਪ੍ਰਸ਼ੰਸਕਾਂ ਨੂੰ ਅੰਤ ਤੱਕ ਸਖ਼ਤ ਟੱਕਰ ਵੇਖਣ ਨੂੰ ਮਿਲੀ।
ਹੁਣ ਹਾਕੀ ਪ੍ਰੇਮੀਆਂ ਦੀਆਂ ਨਜ਼ਰਾਂ ਸੀਰੀਜ਼ ਦੇ ਅਗਲੇ ਮੁਕਾਬਲਿਆਂ ‘ਤੇ ਟਿਕ ਗਈਆਂ ਹਨ, ਜਿੱਥੇ ਦੋਵੇਂ ਟੀਮਾਂ ਵਾਲਟਰ ਕੱਪ ਆਪਣੇ ਨਾਮ ਕਰਨ ਲਈ ਪੂਰਾ ਜ਼ੋਰ ਲਗਾਉਣਗੀਆਂ।
