ਅਮਰੀਕਾ ਨੇ ਕਿਊਬਾ ਸਥਿਤ ਦੂਤਘਰ ''ਚ ਵੀਜ਼ਾ ਅਤੇ ਕੌਂਸਲਰ ਸੇਵਾਵਾਂ ਕੀਤੀਆਂ ਬਹਾਲ

ਹਵਾਨਾ (ਏਜੰਸੀ): ਕਿਊਬਾ ਵਿੱਚ ਅਮਰੀਕੀ ਦੂਤਘਰ ਵਿੱਚ ਵੀਜ਼ਾ ਅਤੇ ਕੌਂਸਲਰ ਸੇਵਾਵਾਂ ਬੁੱਧਵਾਰ ਤੋਂ ਬਹਾਲ ਹੋ ਜਾਣਗੀਆਂ। ਸਾਲ 2017 ਵਿਚ ਅਮਰੀਕਾ ਦੇ ਕੂਟਨੀਤਕ ਕਰਮਚਾਰੀਆਂ ਵਿੱਚ ਸਿਹਤ ਸਮੱਸਿਆਵਾਂ ਦੇ ਕਈ ਮਾਮਲਿਆਂ ਮਗਰੋਂ ਹਵਾਨਾ ਵਿਚ ਅਮਰੀਕੀ ਕਰਮਚਾਰੀਆਂ ਦੀ ਗਿਣਤੀ ਘਟਾਉਣ ਦੇ ਬਾਅਦ ਪਹਿਲੀ ਵਾਰ ਇਹ ਸੇਵਾਵਾਂ ਬਹਾਲ ਕੀਤੀਆਂ ਗਈਆਂ ਹਨ। ਦੂਤਘਰ ਨੇ ਇਸ ਹਫ਼ਤੇ ਐਲਾਨ ਕੀਤਾ ਸੀ ਕਿ ਉਹ ਇਮੀਗ੍ਰੇਸ਼ਨ ਵੀਜ਼ਿਆਂ ਦੀ ਪ੍ਰਕਿਰਿਆ ਸ਼ੁਰੂ ਕਰੇਗਾ। ਇਸ ਵਿੱਚ ਕਿਊਬਾ ਦੇ ਲੋਕਾਂ ਨੂੰ ਅਮਰੀਕਾ ਵਿੱਚ ਰਹਿ ਰਹੇ ਉਨ੍ਹਾਂ ਦੇ ਰਿਸ਼ਤੇਦਾਰਾਂ ਨਾਲ ਦੁਬਾਰਾ ਮਿਲਾਉਣ ਨੂੰ ਪਹਿਲ ਦਿੱਤੀ ਜਾਵੇਗੀ। 

ਸੇਵਾ ਦੀ ਮੁੜ ਸ਼ੁਰੂਆਤ ਦਹਾਕਿਆਂ ਬਾਅਦ ਕਿਊਬਾ ਤੋਂ ਵੱਡੀ ਗਿਣਤੀ ਵਿੱਚ ਪ੍ਰਵਾਸੀਆਂ ਨੂੰ ਲੈ ਕੇ ਜਾਣ ਵਾਲੀ ਇੱਕ ਫਲਾਈਟ ਦੇ ਆਗਮਨ ਦੇ ਵਿਚਕਾਰ ਆਈ ਹੈ। ਫਲਾਈਟ ਦੇ ਆਉਣ ਨਾਲ ਬਾਈਡੇਨ ਪ੍ਰਸ਼ਾਸਨ 'ਤੇ ਦਬਾਅ ਵਧ ਗਿਆ ਹੈ ਕਿ ਉਹ ਕਿਊਬਨ ਲਈ ਕਾਨੂੰਨੀ ਰਾਹ ਖੋਲ੍ਹਣ ਅਤੇ ਪਹਿਲਾਂ ਤਣਾਅਪੂਰਨ ਸਬੰਧਾਂ ਦੇ ਬਾਵਜੂਦ ਕਿਊਬਾ ਸਰਕਾਰ ਨਾਲ ਗੱਲਬਾਤ ਸ਼ੁਰੂ ਕਰੇ। ਦੂਤਘਰ ਦੇ ਹਰ ਸਾਲ ਘੱਟੋ-ਘੱਟ 20,000 ਵੀਜ਼ੇ ਜਾਰੀ ਕਰਨ ਦਾ ਅੰਦਾਜ਼ਾ ਹੈ, ਹਾਲਾਂਕਿ ਪ੍ਰਵਾਸੀਆਂ ਦੀ ਗਿਣਤੀ ਦੇ ਮੱਦੇਨਜ਼ਰ ਇਹ ਬਹੁਤ ਘੱਟ ਹੈ। ਕਿਊਬਾ ਵਿੱਚ ਵਧਦੇ ਆਰਥਿਕ ਅਤੇ ਸਿਆਸੀ ਸੰਕਟ ਕਾਰਨ ਵੱਡੀ ਗਿਣਤੀ ਵਿੱਚ ਪ੍ਰਵਾਸੀ ਅਮਰੀਕਾ ਜਾਣਾ ਚਾਹੁੰਦੇ ਹਨ। 

ਪੜ੍ਹੋ ਇਹ ਅਹਿਮ ਖ਼ਬਰ-ਅਮਰੀਕਾ : ਕਾਰ ਹਾਦਸੇ 'ਚ ਵਾਲ-ਵਾਲ ਬਚਿਆ ਭਾਰਤੀ ਮੂਲ ਦਾ ਪਰਿਵਾਰ, ਪਿਤਾ ਗ੍ਰਿਫ਼ਤਾਰ 

ਦਸੰਬਰ 2022 ਦੇ ਅੰਤ ਵਿੱਚ ਯੂਐਸ ਅਧਿਕਾਰੀਆਂ ਨੇ ਦੱਸਿਆ ਕਿ ਅਕਤੂਬਰ ਵਿੱਚ 28,848 ਦੇ ਮੁਕਾਬਲੇ ਨਵੰਬਰ ਵਿੱਚ ਮੈਕਸੀਕੋ ਦੀ ਸਰਹੱਦ 'ਤੇ ਕਿਊਬਨ ਨੂੰ 34,675 ਵਾਰ ਰੋਕਿਆ ਗਿਆ ਸੀ। ਅਮਰੀਕੀ ਕਸਟਮਜ਼ ਅਤੇ ਬਾਰਡਰ ਪ੍ਰੋਟੈਕਸ਼ਨ ਦੇ ਅੰਕੜਿਆਂ ਅਨੁਸਾਰ ਮਹੀਨਾ-ਦਰ-ਮਹੀਨਾ ਇਹ ਗਿਣਤੀ ਵਧੀ ਹੈ। ਕਿਊਬਾ ਮੈਕਸੀਕੋ ਤੋਂ ਬਾਅਦ ਸਰਹੱਦ 'ਤੇ ਸਭ ਤੋਂ ਵੱਧ ਨਾਗਰਿਕਾਂ ਵਾਲਾ ਦੇਸ਼ ਬਣ ਗਿਆ ਹੈ। ਆਰਥਿਕ, ਊਰਜਾ ਅਤੇ ਰਾਜਨੀਤਿਕ ਸੰਕਟਾਂ ਦੇ ਨਾਲ-ਨਾਲ ਕਿਊਬਾ ਵਾਸੀਆਂ ਵਿੱਚ ਡੂੰਘੀ ਅਸੰਤੁਸ਼ਟੀ ਕਾਰਨ ਪਰਵਾਸ ਵਧ ਰਿਹਾ ਹੈ। ਕਿਊਬਾ ਤੋਂ ਇਲਾਵਾ ਹੈਤੀ ਅਤੇ ਵੈਨੇਜ਼ੁਏਲਾ ਤੋਂ ਵੀ ਅਮਰੀਕਾ ਆਉਣ ਵਾਲੇ ਪ੍ਰਵਾਸੀਆਂ ਦੀ ਗਿਣਤੀ ਵਧ ਰਹੀ ਹੈ, ਜਿਸ ਕਾਰਨ ਅਮਰੀਕੀ ਸਰਕਾਰ ਨੂੰ ਆਪਣੀ ਦੱਖਣੀ ਸਰਹੱਦ 'ਤੇ ਮੁਸ਼ਕਲ ਹਾਲਾਤ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।