ਡੁੱਬ ਗਏ 42,12,24,09,500 ! ਸਪੇਸ ਲੇਜ਼ਰ ਨਹੀਂ ਆਏ ਕੰਮ, ਰਿਪਬਲਿਕਨਾਂ ਦੀ ਹਾਰ 'ਤੇ ਮਸਕ ਨੇ ਕੱਸਿਆ ਤੰਜ਼

ਇੰਟਰਨੈਸ਼ਨਲ ਡੈਸਕ: ਟੈਕਨਾਲੋਜੀ ਦੇ ਦਿੱਗਜ ਅਰਬਪਤੀ ਐਲਨ ਮਸਕ ਦੁਆਰਾ ਅਮਰੀਕੀ ਮੱਧਕਾਲੀ ਚੋਣਾਂ ਵਿੱਚ ਰਿਪਬਲਿਕਨ ਪਾਰਟੀ ਦੇ ਉਮੀਦਵਾਰਾਂ 'ਤੇ ਲਗਾਇਆ ਗਿਆ 445 ਮਿਲੀਅਨ ਡਾਲਰ (ਲਗਭਗ 44.5 ਕਰੋੜ ਡਾਲਰ) ਦਾ ਰਿਕਾਰਡ ਤੋੜ ਦਾਅ ਫੇਲ੍ਹ ਸਾਬਤ ਹੋਇਆ ਹੈ। ਮਸਕ ਦੁਆਰਾ ਸਮਰਥਿਤ ਕਈ ਪ੍ਰਮੁੱਖ ਰਿਪਬਲਿਕਨ ਉਮੀਦਵਾਰਾਂ ਨੂੰ ਹਾਰ ਦਾ ਸਾਹਮਣਾ ਕਰਨਾ ਪਿਆ ਹੈ, ਜਿਸ ਨਾਲ ਨਾ ਕੇਵਲ ਮਸਕ ਦੇ ਰਾਜਨੀਤਿਕ ਪ੍ਰਭਾਵ ਨੂੰ ਵੱਡਾ ਝਟਕਾ ਲੱਗਾ ਹੈ, ਸਗੋਂ ਟੈਕਸਾਸ ਵਿੱਚ ਉਨ੍ਹਾਂ ਦੇ ਅਭਿਲਾਸ਼ੀ ਡਾਟਾ ਸੈਂਟਰ ਪ੍ਰੋਜੈਕਟਾਂ 'ਤੇ ਵੀ ਅਨਿਸ਼ਚਿਤਤਾ ਦੇ ਬਾਦਲ ਛਾ ਗਏ ਹਨ। ਰਿਪਬਲਿਕਨਾਂ ਦੀ ਹਾਰ ਸਪੱਸ਼ਟ ਹੁੰਦਿਆਂ ਹੀ ਐਲਨ ਮਸਕ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ 'ਐਕਸ' (X) 'ਤੇ ਤੰਜ਼ ਕੱਸਦਿਆਂ ਲਿਖਿਆ, "ਲੱਗਦਾ ਹੈ ਚੋਣਾਂ 'ਚ ਦਖ਼ਲ ਦੇਣ ਵਾਲੇ ਮੇਰੇ ਸਪੇਸ ਲੇਜ਼ਰ ਇਸ ਵਾਰ ਕੰਮ ਨਹੀਂ ਆਏ ।" ਇਸ ਤੋਂ ਤੁਰੰਤ ਬਾਅਦ ਡਾਟਾ ਸੈਂਟਰਾਂ ਬਾਰੇ ਚਿੰਤਾ ਪ੍ਰਗਟਾਉਂਦਿਆਂ ਉਨ੍ਹਾਂ ਇੱਕ ਹੋਰ ਪੋਸਟ 'ਚ ਲਿਖਿਆ, "ਹੁਣ ਸਪੇਸ ਵਿੱਚ ਡਾਟਾ ਸੈਂਟਰ ਬਣਾਉਣਾ ਕਾਫ਼ੀ ਆਕਰਸ਼ਕ ਲੱਗ ਰਿਹਾ ਹੈ।"

ਚੋਣਾਂ ਦੌਰਾਨ ਐਲਨ ਮਸਕ  ਰਿਪਬਲਿਕਨਾਂ ਦੇ ਸਭ ਤੋਂ ਵੱਡੇ ਵਿਅਕਤੀਗਤ ਚੰਦਾ ਦਾਤਾ ਵਜੋਂ ਉੱਭਰੇ ਸਨ। ਉਨ੍ਹਾਂ ਨੇ ਕੁੱਲ 445 ਮਿਲੀਅਨ ਡਾਲਰ ਖ਼ਰਚ ਕੀਤੇ, ਜਿਨ੍ਹਾਂ ਵਿੱਚੋਂ 200 ਮਿਲੀਅਨ ਡਾਲਰ ਤੋਂ ਵੱਧ ਇਕੱਲੇ ਟੈਕਸਾਸ ਰਾਜ ਵਿੱਚ ਖ਼ਰਚੇ ਗਏ ਸਨ। ਇਹ ਅਮਰੀਕੀ ਇਤਿਹਾਸ ਵਿੱਚ ਕਿਸੇ ਗੈਰ-ਉਮੀਦਵਾਰ ਦੁਆਰਾ ਚੋਣ ਚੱਕਰ ਵਿੱਚ ਖ਼ਰਚ ਕੀਤੀ ਗਈ ਹੁਣ ਤੱਕ ਦੀ ਸਭ ਤੋਂ ਵੱਡੀ ਰਕਮ ਦਾ ਰਿਕਾਰਡ ਹੈ। ਇਸ ਭਾਰੀ ਖ਼ਰਚ ਦੇ ਬਾਵਜੂਦ ਮਸਕ ਦੇ ਪਸੰਦੀਦਾ ਉਮੀਦਵਾਰ ਪ੍ਰਮੁੱਖ ਚੋਣ ਮੁਕਾਬਲਿਆਂ ਵਿੱਚ ਹਾਰ ਗਏ ਹਨ। ਜਿਨ੍ਹਾਂ ਵਿਚ ਟੈਕਸਾਸ ਤੋਂ ਕੇਨ ਪੈਕਸਟਨ ਦੀ ਸੀਨੇਟ ਚੋਣ ਵਿੱਚ ਹਾਰ ਹੋਈ । ਓਹੀਓ ਵਿਚ ਵਿਵੇਕ ਰਾਮਾਸਵਾਮੀ ਦੀ ਗਵਰਨਰ ਚੋਣ ਵਿੱਚ ਹਾਰ ਗਏ।  ਸਭ ਤੋਂ ਵੱਡਾ ਉਲਟਫੇਰ ਟੈਕਸਾਸ ਵਿੱਚ ਦੇਖਣ ਨੂੰ ਮਿਲਿਆ, ਜਿੱਥੇ  ਤਿੰਨ ਦਹਾਕਿਆਂ ਤੋਂ ਵੱਧ ਸਮੇਂ ਬਾਅਦ ਡੈਮੋਕ੍ਰੇਟਿਕ ਉਮੀਦਵਾਰ ਜੀਨਾ ਹਿਨੋਹੋਸਾ ਨੇ ਮੌਜੂਦਾ ਰਿਪਬਲਿਕਨ ਗਵਰਨਰ ਗ੍ਰੈਗ ਐਬਟ ਨੂੰ ਹਰਾ ਕੇ ਹੈਰਾਨੀਜਨਕ ਜਿੱਤ ਦਰਜ ਕੀਤੀ। ਇਹ ਅਮਰੀਕੀ ਇਤਿਹਾਸ ਦੀਆਂ ਸਭ ਤੋਂ ਮਹਿੰਗੀਆਂ ਸੀਨੇਟ ਚੋਣਾਂ ਵਿੱਚੋਂ ਇੱਕ ਸੀ।

ਜੀਨਾ ਹਿਨੋਹੋਸਾ ਦੀ ਇਸ ਇਤਿਹਾਸਕ ਜਿੱਤ ਨੇ ਟੈਕਸਾਸ ਵਿੱਚ ਆਰਟੀਫਿਸ਼ੀਅਲ ਇੰਟੈਲੀਜੈਂਸ (AI) ਅਤੇ ਡਾਟਾ ਸੈਂਟਰ ਪ੍ਰੋਜੈਕਟਾਂ ਦੇ ਨਿਯਮਕ ਮਾਹੌਲ 'ਤੇ ਸਵਾਲੀਆ ਨਿਸ਼ਾਨ ਲਗਾ ਦਿੱਤਾ ਹੈ। ਪੂਰੇ ਅਮਰੀਕਾ ਵਿੱਚ ਡਾਟਾ ਸੈਂਟਰਾਂ ਵਿਰੁੱਧ ਬਣ ਰਹੇ ਮਾਹੌਲ ਦਰਮਿਆਨ ਟੈਕਸਾਸ ਨੂੰ ਏ.ਆਈ. ਨਿਵੇਸ਼ਕਾਂ ਲਈ ਇੱਕ ਸੁਰੱਖਿਅਤ ਪਨਾਹਗਾਹ ਮੰਨਿਆ ਜਾਂਦਾ ਸੀ, ਜਿੱਥੇ ਮਸਕ ਦੀਆਂ ਕੰਪਨੀਆਂ ਦੀਆਂ ਵੱਡੀਆਂ ਯੋਜਨਾਵਾਂ ਸਨ। 'ਹੰਟਰਬਰੂਕ ਮੀਡੀਆ' ਦੇ ਪ੍ਰਕਾਸ਼ਕ ਸੈਮ ਕੋਪਲਮੈਨ ਨੇ ਪੋਲਿਟਿਕੋ ਨੂੰ ਦੱਸਿਆ, "ਦੇਸ਼ ਭਰ ਵਿੱਚ ਡਾਟਾ ਸੈਂਟਰਾਂ ਵਿਰੁੱਧ ਚੱਲ ਰਹੇ ਵਿਰੋਧ ਦੇ ਵਿਚਕਾਰ ਟੈਕਸਾਸ ਇੱਕ ਅਜਿਹੀ ਥਾਂ ਮੰਨਿਆ ਜਾਂਦਾ ਸੀ ਜਿੱਥੇ ਬਿਨਾਂ ਰੁਕਾਵਟ ਡਾਟਾ ਸੈਂਟਰ ਬਣਾਏ ਜਾ ਸਕਦੇ ਸਨ, ਪਰ ਇਸ ਚੋਣ ਨਤੀਜੇ ਨੇ ਸਭ ਕੁਝ ਬਦਲ ਕੇ ਰੱਖ ਦਿੱਤਾ ਹੈ।"

ਪੜ੍ਹੋ ਇਹ ਅਹਿਮ ਖ਼ਬਰ-  ਚੋਣਾਂ 'ਚ ਹਾਰ ਮਗਰੋਂ ਫੁੱਟਿਆ ਟਰੰਪ ਦਾ ਗੁੱਸਾ, ਦੇ'ਤੀ  'ਵੀਟੋ' ਚੇਤਾਵਨੀ

ਅਮਰੀਕੀ ਸੰਸਦ (ਕਾਂਗਰਸ) ਦੇ ਦੋਵਾਂ ਸਦਨਾਂ ਵਿੱਚ ਡੈਮੋਕ੍ਰੇਟਿਕ ਪਾਰਟੀ ਦਾ ਬਹੁਮਤ ਹੋਣ ਦੀ ਸੰਭਾਵਨਾ ਕਾਰਨ ਮਸਕ ਸਮੇਤ ਵੱਡੇ ਟੈਕਨਾਲੋਜੀ ਅਰਬਪਤੀਆਂ 'ਤੇ ਰਾਜਨੀਤਿਕ ਪ੍ਰਭਾਵ ਲਈ ਜਾਂਚ ਦਾ ਸ਼ਿਕੰਜਾ ਕੱਸ ਸਕਦਾ ਹੈ।ਟੈਕਸਾਸ ਤੋਂ ਡੈਮੋਕ੍ਰੇਟਿਕ ਸੰਸਦ ਮੈਂਬਰ ਗ੍ਰੈਗ ਕਾਸਾਰ ਨੇ ਕਿਹਾ, "ਵੋਟਰਾਂ ਨੇ ਰਿਪਬਲਿਕਨਾਂ ਨੂੰ ਇਸ ਲਈ ਨਕਾਰ ਦਿੱਤਾ ਹੈ ਕਿਉਂਕਿ ਉਹ ਏ.ਆਈ. ਅਰਬਪਤੀਆਂ ਦੁਆਰਾ ਖਰੀਦੇ ਗਏ ਸਨ। ਡੈਮੋਕ੍ਰੇਟਸ ਨੂੰ ਹੁਣ ਚੈੱਕ ਕੈਸ਼ ਕਰਵਾਉਣ ਦੀ ਬਜਾਏ ਉਨ੍ਹਾਂ ਦੀ ਜਵਾਬਦੇਹੀ ਤੈਅ ਕਰਨੀ ਚਾਹੀਦੀ ਹੈ।"

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।