ਟਰੰਪ ਦਾ ''ਆਪ੍ਰੇਸ਼ਨ 5G'' ਤਿਆਰ, ਈਰਾਨ ਦੀ ਤਬਾਹੀ ਦਾ ਬਲੂਪ੍ਰਿੰਟ ਲੀਕ

ਵਾਸ਼ਿੰਗਟਨ : ਅਮਰੀਕਾ ਅਤੇ ਈਰਾਨ ਵਿਚਾਲੇ ਜਾਰੀ ਤਣਾਅ ਹੁਣ ਇੱਕ ਭਿਆਨਕ ਜ਼ਮੀਨੀ ਜੰਗ ਦਾ ਰੂਪ ਲੈਣ ਵਾਲਾ ਹੈ। ਮਿਲੀ ਜਾਣਕਾਰੀ ਅਨੁਸਾਰ, ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਈਰਾਨ ਵਿੱਚ ਇੱਕ ਵੱਡੇ ਜ਼ਮੀਨੀ ਆਪ੍ਰੇਸ਼ਨ ਦੀ ਤਿਆਰੀ ਕਰ ਲਈ ਹੈ, ਜਿਸ ਨੂੰ 'ਆਪ੍ਰੇਸ਼ਨ 5G' ਦਾ ਨਾਂ ਦਿੱਤਾ ਗਿਆ ਹੈ। ਇਸ ਰਣਨੀਤੀ ਦਾ ਮੁੱਖ ਉਦੇਸ਼ ਈਰਾਨ ਦੇ ਫੌਜੀ ਟਿਕਾਣਿਆਂ 'ਤੇ ਕਬਜ਼ਾ ਕਰਨਾ ਅਤੇ ਉਸ ਦੀ ਚੋਟੀ ਦੀ ਲੀਡਰਸ਼ਿਪ ਨੂੰ ਨਿਸ਼ਾਨਾ ਬਣਾਉਣਾ ਹੈ।

USS ਤ੍ਰਿਪੋਲੀ ਮੱਧ-ਪੂਰਬ ਪਹੁੰਚਿਆ, 10 ਹਜ਼ਾਰ ਸੈਨਿਕ ਹੋਣਗੇ ਤਾਇਨਾਤ
ਪੈਂਟਾਗਨ ਵਿੱਚ ਹੋਈ ਇੱਕ ਹੰਗਾਮੀ ਮੀਟਿੰਗ ਤੋਂ ਸੰਕੇਤ ਮਿਲੇ ਹਨ ਕਿ ਈਰਾਨ ਵਿੱਚ ਕਿਸੇ ਵੀ ਸਮੇਂ ਗਰਾਊਂਡ ਆਪ੍ਰੇਸ਼ਨ ਸ਼ੁਰੂ ਹੋ ਸਕਦਾ ਹੈ। USS ਤ੍ਰਿਪੋਲੀ ਪਹਿਲਾਂ ਹੀ ਮੱਧ-ਪੂਰਬ ਪਹੁੰਚ ਚੁੱਕਾ ਹੈ ਅਤੇ ਖ਼ਬਰਾਂ ਹਨ ਕਿ ਟਰੰਪ ਨੇ ਇਸ ਆਪ੍ਰੇਸ਼ਨ ਦੇ ਬਲੂਪ੍ਰਿੰਟ ਨੂੰ ਹਰੀ ਝੰਡੀ ਦੇ ਦਿੱਤੀ ਹੈ। ਯੋਜਨਾ ਮੁਤਾਬਕ, ਹੋਰਮੁਜ਼ ਜਲਡਮਰੂ (Strait of Hormuz) ਵਿੱਚ ਲਗਭਗ 10,000 ਅਮਰੀਕੀ ਸੈਨਿਕ ਤਾਇਨਾਤ ਕੀਤੇ ਜਾ ਸਕਦੇ ਹਨ ਅਤੇ ਸਭ ਤੋਂ ਪਹਿਲਾਂ ਈਰਾਨ ਦੇ 'ਖਾਰਗ ਟਾਪੂ' (Kharg Island) 'ਤੇ ਕਬਜ਼ਾ ਕੀਤਾ ਜਾਵੇਗਾ।

ਪੰਜ ਪੜਾਵਾਂ ਵਿੱਚ ਹੋਵੇਗੀ ਤਬਾਹੀ:
1.  ਪਹਿਲਾ ਪੜਾਅ: ਈਰਾਨ ਦੀ ਤੱਟਵਰਤੀ ਲਾਈਨ 'ਤੇ ਮੌਜੂਦ ਫੌਜੀ ਟਿਕਾਣਿਆਂ ਨੂੰ ਐਂਟੀ-ਸ਼ਿਪ ਮਿਸਾਈਲਾਂ ਅਤੇ ਸੀ-ਡਰੋਨਾਂ ਰਾਹੀਂ ਤਬਾਹ ਕੀਤਾ ਜਾਵੇਗਾ।
2.  ਦੂਜਾ ਪੜਾਅ: ਫਾਰਸ ਦੀ ਖਾੜੀ ਵਿੱਚ ਸਥਿਤ ਟਾਪੂਆਂ ਦਾ ਈਰਾਨ ਨਾਲੋਂ ਸੰਪਰਕ ਕੱਟ ਕੇ ਉਨ੍ਹਾਂ 'ਤੇ ਅਮਰੀਕੀ ਕਬਜ਼ਾ ਯਕੀਨੀ ਬਣਾਇਆ ਜਾਵੇਗਾ।
3.  ਤੀਜਾ ਪੜਾਅ: ਬ੍ਰਿਟੇਨ ਦੇ 'ਮਾਈਨਸ ਬ੍ਰੇਕਰ ਸ਼ਿਪ' ਦੀ ਮਦਦ ਨਾਲ ਹੋਰਮੁਜ਼ ਜਲਡਮਰੂ ਵਿੱਚ ਵਿਛਾਈਆਂ ਗਈਆਂ ਸਮੁੰਦਰੀ ਸੁਰੰਗਾਂ ਨੂੰ ਹਟਾਇਆ ਜਾਵੇਗਾ।
4.  ਚੌਥਾ ਪੜਾਅ: ਮਰੀਨ ਕਮਾਂਡੋਜ਼ ਨੂੰ ਉਤਾਰ ਕੇ ਖਾਰਗ ਸਮੇਤ ਹੋਰ ਅਹਿਮ ਟਾਪੂਆਂ 'ਤੇ ਕੰਟਰੋਲ ਕੀਤਾ ਜਾਵੇਗਾ।
5.  ਪੰਜਵਾਂ ਪੜਾਅ: ਕਮਾਂਡੋਜ਼ ਨੂੰ ਹੈਲੀਕਾਪਟਰਾਂ ਜਾਂ ਪੈਰਾਸ਼ੂਟ ਰਾਹੀਂ ਸਿੱਧਾ ਈਰਾਨ ਦੀ ਧਰਤੀ 'ਤੇ ਉਤਾਰਿਆ ਜਾਵੇਗਾ ਤਾਂ ਜੋ ਅੰਦਰੂਨੀ ਟਿਕਾਣਿਆਂ ਨੂੰ ਤਬਾਹ ਕੀਤਾ ਜਾ ਸਕੇ।

ਈਰਾਨ ਦੀ ਚੇਤਾਵਨੀ- "ਨਰਕ ਵਿੱਚ ਤੁਹਾਡਾ ਸਵਾਗਤ ਹੈ"
ਅਮਰੀਕਾ ਦੀ ਇਸ ਤਿਆਰੀ ਦੇ ਜਵਾਬ ਵਿੱਚ ਈਰਾਨੀ ਮੀਡੀਆ ਨੇ ਸਖ਼ਤ ਲਹਿਜ਼ੇ ਵਿੱਚ ਕਿਹਾ ਹੈ ਕਿ ਅਮਰੀਕੀ ਸੈਨਿਕ ਜਿਉਂਦੇ ਵਾਪਸ ਨਹੀਂ ਮੁੜਨਗੇ। ਈਰਾਨ ਨੇ ਗੁਰੀਲਾ ਯੁੱਧ ਅਤੇ ਸੁਰੰਗਾਂ ਦੇ ਜਾਲ ਰਾਹੀਂ ਜਵਾਬੀ ਹਮਲੇ ਦੀ ਪੂਰੀ ਤਿਆਰੀ ਕੀਤੀ ਹੋਈ ਹੈ। ਈਰਾਨ ਕੋਲ ਅਜੇ ਵੀ 70 ਫੀਸਦੀ ਮਿਸਾਈਲ ਸਟਾਕ ਮੌਜੂਦ ਹੈ ਅਤੇ ਉਸ ਨੇ ਆਪਣੇ ਬੰਦਰਗਾਹਾਂ 'ਤੇ ਮਿਸਾਈਲ ਲਾਂਚਰ ਤਾਇਨਾਤ ਕਰ ਦਿੱਤੇ ਹਨ।

ਨਵਾਂ 'ਵੀਅਤਨਾਮ' ਬਣਨ ਦਾ ਖ਼ਤਰਾ
ਰੱਖਿਆ ਮਾਹਿਰਾਂ ਦਾ ਮੰਨਣਾ ਹੈ ਕਿ ਈਰਾਨ ਵਿੱਚ ਜ਼ਮੀਨੀ ਜੰਗ ਅਮਰੀਕਾ ਲਈ ਇੱਕ ਵੱਡੀ ਚੁਣੌਤੀ ਸਾਬਤ ਹੋ ਸਕਦੀ ਹੈ। ਜੇਕਰ ਇਹ ਆਪ੍ਰੇਸ਼ਨ ਲੰਬਾ ਖਿੱਚਿਆ ਗਿਆ, ਤਾਂ ਇਹ ਅਮਰੀਕਾ ਲਈ ਨਵਾਂ ਵੀਅਤਨਾਮ ਜਾਂ ਅਫਗਾਨਿਸਤਾਨ ਸਾਬਤ ਹੋ ਸਕਦਾ ਹੈ, ਜਿੱਥੇ ਅਮਰੀਕਾ ਨੂੰ ਭਾਰੀ ਨੁਕਸਾਨ ਉਠਾਉਣਾ ਪਿਆ ਸੀ।