ਭਾਰਤੀ ਮੂਲ ਦੇ ਕਾਂਗਰਸਮੈਨ ਥਾਣੇਦਾਰ ਦਾ ਅਹਿਮ ਐਲਾਨ, ਅਮਰੀਕੀ ਸੰਸਦ 'ਚ ਬਣੇਗਾ 'ਹਿੰਦੂ ਕਾਕਸ'

ਵਾਸ਼ਿੰਗਟਨ (ਭਾਸ਼ਾ)- ਭਾਰਤੀ-ਅਮਰੀਕੀ ਸੰਸਦ ਮੈਂਬਰ ਸ੍ਰੀ ਥਾਣੇਦਾਰ ਨੇ ਅਮਰੀਕੀ ਕਾਂਗਰਸ ਵਿੱਚ ਇੱਕ ‘ਹਿੰਦੂ ਕਾਕਸ’ ਬਣਾਉਣ ਦੀ ਯੋਜਨਾ ਦਾ ਐਲਾਨ ਕੀਤਾ ਹੈ, ਜੋ ਸਮਾਨ ਵਿਚਾਰਧਾਰਾ ਵਾਲੇ ਸੰਸਦ ਮੈਂਬਰਾਂ ਨੂੰ ਇਕੱਠੇ ਕਰੇਗਾ ਤਾਂ ਜੋ ਇਹ ਯਕੀਨੀ ਬਣਾਇਆ ਜਾ ਸਕੇ ਕਿ ਦੇਸ਼ ਵਿੱਚ ਹਿੰਦੂਆਂ ਖ਼ਿਲਾਫ਼ ਕੋਈ ਨਫ਼ਰਤ ਅਤੇ ਕੱਟੜਤਾ ਨਾ ਹੋਵੇ। ਮਿਸ਼ੀਗਨ ਦੇ 13ਵੇਂ ਜ਼ਿਲ੍ਹੇ ਦੀ ਨੁਮਾਇੰਦਗੀ ਕਰਨ ਵਾਲੇ ਥਾਣੇਦਾਰ ਨੇ ਬੁੱਧਵਾਰ ਨੂੰ ਕੈਪੀਟਲ ਵਿਜ਼ਟਰ ਸੈਂਟਰ ਵਿੱਚ ਪਹਿਲੇ ਹਿੰਦੂ-ਅਮਰੀਕਨ ਸੰਮੇਲਨ ਵਿੱਚ ਇਹ ਐਲਾਨ ਕੀਤਾ। 

ਥਾਣੇਦਾਰ ਨੇ ਕਿਹਾ ਕਿ ਇਹ ਜ਼ਰੂਰੀ ਹੈ ਕਿ ਹਰੇਕ ਵਿਅਕਤੀ ਨੂੰ ਬਿਨਾਂ ਕਿਸੇ ਜ਼ਬਰ ਦੇ ਧਰਮ ਚੁਣਨ ਅਤੇ ਉਸ ਪਰਮਾਤਮਾ ਦੀ ਪੂਜਾ ਕਰਨ ਦਾ ਅਧਿਕਾਰ ਹੋਵੇ। ਨਾਲ ਹੀ ਰੱਬ ਨੂੰ ਨਾ ਮੰਨਣ ਵਾਲਿਆਂ ਪ੍ਰਤੀ ਕੋਈ ਵਿਤਕਰਾ ਜਾਂ ਨਫ਼ਰਤ ਨਹੀਂ ਹੋਣੀ ਚਾਹੀਦੀ। ਥਾਣੇਦਾਰ ਨੇ ਕਿਹਾ ਕਿ “ਇਹ ਬੁਨਿਆਦੀ ਆਜ਼ਾਦੀਆਂ ਹਨ। ਇਹ ਬੁਨਿਆਦੀ ਮਨੁੱਖੀ ਅਧਿਕਾਰ ਹਨ।” ਜਾਰਜੀਆ ਦੇ 6ਵੇਂ ਜ਼ਿਲ੍ਹੇ ਦੀ ਨੁਮਾਇੰਦਗੀ ਕਰਨ ਵਾਲੇ ਇੱਕ ਰਿਪਬਲਿਕਨ ਰਿਚ ਮੈਕਕਾਰਮਿਕ ਨੇ ਅਗਸਤ ਵਿੱਚ ਸੰਮੇਲਨ ਵਿੱਚ ਭਾਰਤ ਲਈ ਇੱਕ ਦੋ-ਪੱਖੀ ਕਾਂਗਰਸ ਦੇ ਵਫ਼ਦ ਦੀ ਘੋਸ਼ਣਾ ਕੀਤੀ। 

ਪੜ੍ਹੋ ਇਹ ਅਹਿਮ ਖ਼ਬਰ-ਆਸਟ੍ਰੇਲੀਆ 'ਚ ਡਰੱਗ ਭੇਜਣ ਦੇ ਮਾਮਲੇ 'ਚ 6 ਵਿਅਕਤੀਆਂ 'ਤੇ ਲੱਗੇ ਦੋਸ਼

ਮੈਕਕਾਰਮਿਕ ਨੇ ਕਿਹਾ ਕਿ ''ਮੇਰੇ ਮਨ ਵਿਚ ਇਸ ਪ੍ਰਵਾਸੀ ਆਬਾਦੀ ਲਈ ਬਹੁਤ ਸਨਮਾਨ ਹੈ ਜਿਸ ਨੇ ਅਮਰੀਕਾ 'ਚ ਬਹੁਤ ਕੁਝ ਕੀਤਾ ਹੈ।'' ਮੈਕਕਾਰਮਿਕ ਨੇ ਕਿਹਾ ਕਿ ਉਨ੍ਹਾਂ ਨੇ ਵਾਰ-ਵਾਰ ਕਿਹਾ ਹੈ ਕਿ ਭਾਈਚਾਰਾ ਜਾਗਰੂਕ ਹੈ ਅਤੇ ਮਹਿਸੂਸ ਕਰਦਾ ਹੈ ਕਿ ਉਨ੍ਹਾਂ ਕੋਲ ਅਸਲ 'ਚ ਅਮਰੀਕਾ ਦੇ ਅਗਲੇ ਰਾਸ਼ਟਰਪਤੀ ਨੂੰ ਚੁਣਨ ਦੀ ਸ਼ਕਤੀ ਹੈ। ਉਸ ਨੇ ਕਿਹਾ ਕਿ “ਮੈਂ ਇਹ ਸਿਰਫ਼ ਕਹਿਣ ਲਈ ਨਹੀਂ ਕਹਿ ਰਿਹਾ। ਤੁਹਾਡੇ ਕੋਲ ਅਸਲ ਸ਼ਕਤੀ ਹੈ।” 'ਅਮਰੀਕਨ 4 ਹਿੰਦੂਸ' ਦੁਆਰਾ ਆਯੋਜਿਤ ਅਤੇ 20 ਹੋਰ ਸੰਗਠਨਾਂ ਦੁਆਰਾ ਸਮਰਥਨ ਪ੍ਰਾਪਤ ਇਸ ਸੰਮੇਲਨ ਵਿੱਚ ਦੇਸ਼ ਭਰ ਦੇ ਹਿੰਦੂ ਭਾਈਚਾਰੇ ਦੇ ਨੇਤਾਵਾਂ ਨੇ ਭਾਗ ਲਿਆ।

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।