ਹੁਣ ਕਿਮ ਜੋਂਗ ਉਨ ਨਾਲ ਪੰਗਾ ਲੈਣਾ ਚਾਹੁੰਦਾ ਹੈ ਅਮਰੀਕਾ! South Korea ਨਾਲ ਸ਼ੁਰੂ ਕੀਤਾ ਵੱਡਾ ਜੰਗੀ ਅਭਿਆਸ

ਸਿਓਲ/ਵਾਸ਼ਿੰਗਟਨ (ਏਪੀ) : ਇੱਕ ਪਾਸੇ ਜਿੱਥੇ ਅਮਰੀਕਾ ਮੱਧ ਪੂਰਬ ਵਿੱਚ ਈਰਾਨ ਖਿਲਾਫ ਜੰਗ ਵਿੱਚ ਉਲਝਿਆ ਹੋਇਆ ਹੈ, ਉੱਥੇ ਹੀ ਦੂਜੇ ਪਾਸੇ ਉਸਨੇ ਸੋਮਵਾਰ ਤੋਂ ਦੱਖਣੀ ਕੋਰੀਆ ਦੇ ਨਾਲ ਮਿਲ ਕੇ ਵੱਡੇ ਪੱਧਰ 'ਤੇ ਸਾਂਝਾ ਫੌਜੀ ਅਭਿਆਸ 'ਫ੍ਰੀਡਮ ਸ਼ੀਲਡ' (Freedom Shield) ਸ਼ੁਰੂ ਕਰ ਦਿੱਤਾ ਹੈ। ਇਸ ਅਭਿਆਸ ਵਿੱਚ ਹਜ਼ਾਰਾਂ ਦੀ ਗਿਣਤੀ ਵਿੱਚ ਸੈਨਿਕ ਹਿੱਸਾ ਲੈ ਰਹੇ ਹਨ, ਜਿਸ ਕਾਰਨ ਕੋਰੀਆਈ ਪ੍ਰਾਇਦੀਪ ਵਿੱਚ ਤਣਾਅ ਵਧਣ ਦੀ ਸੰਭਾਵਨਾ ਜਤਾਈ ਜਾ ਰਹੀ ਹੈ। 

19 ਮਾਰਚ ਤੱਕ ਚੱਲੇਗਾ ਅਭਿਆਸ

ਦੱਖਣੀ ਕੋਰੀਆ ਦੇ ਜੁਆਇੰਟ ਚੀਫਸ ਆਫ ਸਟਾਫ ਅਨੁਸਾਰ, ਇਹ ਜੰਗੀ ਅਭਿਆਸ ਅੱਜ (ਸੋਮਵਾਰ) ਤੋਂ ਸ਼ੁਰੂ ਹੋ ਕੇ 19 ਮਾਰਚ ਤੱਕ ਚੱਲੇਗਾ। ਇਸ ਵਿੱਚ ਲਗਭਗ 18,000 ਕੋਰੀਆਈ ਸੈਨਿਕ ਹਿੱਸਾ ਲੈਣਗੇ। ਹਾਲਾਂਕਿ, ਅਮਰੀਕੀ ਫੋਰਸਿਜ਼ ਕੋਰੀਆ (USFK) ਨੇ ਅਜੇ ਤੱਕ ਆਪਣੇ ਸੈਨਿਕਾਂ ਦੀ ਸਹੀ ਗਿਣਤੀ ਦੀ ਪੁਸ਼ਟੀ ਨਹੀਂ ਕੀਤੀ ਹੈ। ਇਸ ਵਾਰ 'ਵਾਰੀਅਰ ਸ਼ੀਲਡ' ਪ੍ਰੋਗਰਾਮ ਤਹਿਤ 22 ਫੀਲਡ ਅਭਿਆਸ ਕੀਤੇ ਜਾਣਗੇ।

ਉੱਤਰੀ ਕੋਰੀਆ ਨੇ ਜਤਾਇਆ ਇਤਰਾਜ਼ 

ਉੱਤਰੀ ਕੋਰੀਆ ਦੇ ਨੇਤਾ ਕਿਮ ਜੋਂਗ ਉਨ ਹਮੇਸ਼ਾ ਇਨ੍ਹਾਂ ਅਭਿਆਸਾਂ ਦਾ ਵਿਰੋਧ ਕਰਦੇ ਰਹੇ ਹਨ, ਕਿਉਂਕਿ ਉਹ ਇਨ੍ਹਾਂ ਨੂੰ ਆਪਣੇ ਦੇਸ਼ 'ਤੇ ਹਮਲੇ ਦੀ ਤਿਆਰੀ ਵਜੋਂ ਦੇਖਦੇ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਕਿਮ ਜੋਂਗ ਉਨ ਨੇ ਰੂਸ ਨਾਲ ਆਪਣੇ ਫੌਜੀ ਸਬੰਧਾਂ ਨੂੰ ਹੋਰ ਮਜ਼ਬੂਤ ਕੀਤਾ ਹੈ ਅਤੇ ਯੂਕਰੇਨ ਜੰਗ ਲਈ ਰੂਸ ਨੂੰ ਹਥਿਆਰ ਅਤੇ ਸੈਨਿਕ ਵੀ ਭੇਜੇ ਹਨ। 2019 ਵਿੱਚ ਡੋਨਾਲਡ ਟਰੰਪ ਅਤੇ ਕਿਮ ਜੋਂਗ ਉਨ ਵਿਚਕਾਰ ਹੋਈ ਸ਼ਿਖਰ ਵਾਰਤਾ ਦੀ ਅਸਫਲਤਾ ਤੋਂ ਬਾਅਦ ਦੋਵਾਂ ਦੇਸ਼ਾਂ ਵਿਚਾਲੇ ਗੱਲਬਾਤ ਲਗਭਗ ਬੰਦ ਹੈ।

ਇਹ ਵੀ ਪੜ੍ਹੋ : ਅਜਮੇਰ 'ਚ World Cup ਦੀ ਜਿੱਤ ਦਾ ਜਸ਼ਨ ਪਿਆ ਭਾਰੀ, ਆਤਿਸ਼ਬਾਜ਼ੀ ਕਾਰਨ ਮੋਬਾਈਲ ਐਸੈਸਰੀਜ਼ ਦੀ ਦੁਕਾਨ ਨੂੰ ਅੱਗ 

ਹਥਿਆਰਾਂ ਦੇ ਤਬਾਦਲੇ ਦੀਆਂ ਅਟਕਲਾਂ 

ਇਸ ਅਭਿਆਸ ਦੇ ਵਿਚਕਾਰ ਅਜਿਹੀਆਂ ਅਟਕਲਾਂ ਵੀ ਤੇਜ਼ ਹਨ ਕਿ ਵਾਸ਼ਿੰਗਟਨ ਦੱਖਣੀ ਕੋਰੀਆ ਤੋਂ ਕੁਝ ਮਿਜ਼ਾਈਲ ਰੋਧੀ ਸਿਸਟਮ (ਪੈਟ੍ਰਿਅਟ ਸਿਸਟਮ) ਹਟਾ ਕੇ ਈਰਾਨ ਵਿਰੁੱਧ ਜੰਗ ਵਿੱਚ ਵਰਤ ਸਕਦਾ ਹੈ। ਹਾਲਾਂਕਿ, ਦੱਖਣੀ ਕੋਰੀਆਈ ਅਧਿਕਾਰੀਆਂ ਨੇ ਇਨ੍ਹਾਂ ਰਿਪੋਰਟਾਂ 'ਤੇ ਕੋਈ ਸਿੱਧੀ ਟਿੱਪਣੀ ਕਰਨ ਤੋਂ ਇਨਕਾਰ ਕਰ ਦਿੱਤਾ ਹੈ, ਪਰ ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਸ ਨਾਲ ਦੋਵਾਂ ਦੇਸ਼ਾਂ ਦੀ ਰੱਖਿਆ ਰਣਨੀਤੀ 'ਤੇ ਕੋਈ ਖਾਸ ਅਸਰ ਨਹੀਂ ਪਵੇਗਾ। 

ਕੂਟਨੀਤਕ ਰਸਤਾ ਲੱਭਣ ਦੀ ਕੋਸ਼ਿਸ਼ 

ਦੱਖਣੀ ਕੋਰੀਆ ਦੇ ਰਾਸ਼ਟਰਪਤੀ ਲੀ ਜੇ-ਮਿਉਂਗ ਨੇ ਇਸ ਤਣਾਅ ਦੇ ਵਿਚਕਾਰ ਕੂਟਨੀਤੀ ਦੀ ਇੱਛਾ ਜਤਾਈ ਹੈ। ਕੁਝ ਉੱਚ ਅਧਿਕਾਰੀਆਂ ਨੂੰ ਉਮੀਦ ਹੈ ਕਿ ਮਾਰਚ ਦੇ ਅੰਤ ਜਾਂ ਅਪ੍ਰੈਲ ਵਿੱਚ ਡੋਨਾਲਡ ਟਰੰਪ ਦੀ ਚੀਨ ਯਾਤਰਾ ਨਾਲ ਉੱਤਰੀ ਕੋਰੀਆ ਨਾਲ ਗੱਲਬਾਤ ਦਾ ਕੋਈ ਨਵਾਂ ਰਸਤਾ ਖੁੱਲ੍ਹ ਸਕਦਾ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8