ਯੂਕ੍ਰੇਨ ''ਤੇ ਰੂਸੀ ਡਰੋਨ ਅਤੇ ਮਿਜ਼ਾਈਲ ਹਮਲੇ, 12 ਲੋਕਾਂ ਦੀ ਮੌਤ

ਕੀਵ (ਏਪੀ): ਰੂਸ ਨੇ ਲਗਾਤਾਰ ਦੂਜੀ ਰਾਤ ਯੂਕ੍ਰੇਨ ਦੀ ਰਾਜਧਾਨੀ ਕੀਵ ਅਤੇ ਦੇਸ਼ ਦੇ ਹੋਰ ਖੇਤਰਾਂ 'ਤੇ ਵੱਡੇ ਪੱਧਰ 'ਤੇ ਡਰੋਨ ਅਤੇ ਮਿਜ਼ਾਈਲ ਹਮਲੇ ਕੀਤੇ, ਜਿਸ ਵਿੱਚ ਘੱਟੋ-ਘੱਟ 12 ਲੋਕ ਮਾਰੇ ਗਏ ਅਤੇ ਕਈ ਹੋਰ ਜ਼ਖਮੀ ਹੋ ਗਏ। ਅਧਿਕਾਰੀਆਂ ਨੇ ਇਹ ਜਾਣਕਾਰੀ ਦਿੱਤੀ। ਯੂਕ੍ਰੇਨੀ ਹਵਾਈ ਸੈਨਾ ਦੇ ਬੁਲਾਰੇ ਯੂਰੀ ਇਗਨੈਟ ਅਨੁਸਾਰ ਰੂਸ ਨੇ ਯੂਕ੍ਰੇਨ 'ਤੇ ਕੁੱਲ 367 ਡਰੋਨ ਅਤੇ ਮਿਜ਼ਾਈਲਾਂ ਦਾਗੀਆਂ। ਇਹ ਪੂਰੇ ਯੁੱਧ (ਜੋ ਕਿ ਤਿੰਨ ਸਾਲਾਂ ਤੋਂ ਵੱਧ ਸਮੇਂ ਤੋਂ ਚੱਲ ਰਿਹਾ ਸੀ) ਦਾ ਸਭ ਤੋਂ ਵੱਡਾ ਇੱਕਲਾ ਹਮਲਾ ਸੀ। ਯੂਰੀ ਇਗਨੈਟ ਨੇ ਐਸੋਸੀਏਟਿਡ ਪ੍ਰੈਸ ਨੂੰ ਦੱਸਿਆ ਕਿ ਰੂਸ ਨੇ ਵੱਖ-ਵੱਖ ਕਿਸਮਾਂ ਦੀਆਂ 69 ਮਿਜ਼ਾਈਲਾਂ ਅਤੇ 298 ਡਰੋਨਾਂ ਦੀ ਵਰਤੋਂ ਕੀਤੀ, ਜਿਨ੍ਹਾਂ ਵਿੱਚ ਈਰਾਨੀ-ਡਿਜ਼ਾਈਨ ਕੀਤੇ ਸ਼ਾਹਿਦ ਡਰੋਨ ਵੀ ਸ਼ਾਮਲ ਹਨ। ਇਗਨੈਟ ਨੇ ਕਿਹਾ ਕਿ 2022 ਵਿੱਚ ਯੁੱਧ ਸ਼ੁਰੂ ਹੋਣ ਤੋਂ ਬਾਅਦ ਇਹ ਯੂਕ੍ਰੇਨ ਵਿੱਚ ਸਭ ਤੋਂ ਵੱਡਾ ਹਵਾਈ ਹਮਲਾ ਸੀ। 

ਯੂਕ੍ਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਂਸਕੀ ਨੇ ਕਿਹਾ ਕਿ ਰੂਸੀ ਮਿਜ਼ਾਈਲਾਂ ਅਤੇ ਡਰੋਨਾਂ ਨੇ 30 ਤੋਂ ਵੱਧ ਯੂਕ੍ਰੇਨੀ ਕਸਬਿਆਂ ਅਤੇ ਪਿੰਡਾਂ ਨੂੰ ਨਿਸ਼ਾਨਾ ਬਣਾਇਆ ਹੈ। ਜ਼ੇਲੇਂਸਕੀ ਨੇ ਮੰਗ ਕੀਤੀ ਕਿ ਪੱਛਮੀ ਦੇਸ਼ ਰੂਸ 'ਤੇ ਲਗਾਈਆਂ ਗਈਆਂ ਪਾਬੰਦੀਆਂ ਨੂੰ ਹੋਰ ਸਖ਼ਤ ਕਰਨ। ਇਹ ਯੂਕ੍ਰੇਨੀ ਨੇਤਾ ਦੀ ਲੰਬੇ ਸਮੇਂ ਤੋਂ ਮੰਗ ਰਹੀ ਹੈ, ਪਰ ਅਮਰੀਕਾ ਅਤੇ ਯੂਰਪ ਵੱਲੋਂ ਮਾਸਕੋ ਨੂੰ ਚੇਤਾਵਨੀਆਂ ਦੇਣ ਦੇ ਬਾਵਜੂਦ ਕੋਈ ਵੀ ਕਾਰਵਾਈ ਨਹੀਂ ਕੀਤੀ ਗਈ ਜੋ ਰੂਸ ਨੂੰ ਰੋਕ ਸਕੇ। ਜ਼ੇਲੇਂਸਕੀ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ 'ਐਕਸ' 'ਤੇ ਲਿਖਿਆ ਕਿ ਐਤਵਾਰ ਨੂੰ ਕੀਵ, ਜ਼ੀਤੋਮੀਰ, ਖਮੇਲਨੀਤਸਕੀ, ਟੇਰਨੋਪਿਲ, ਚੇਰਨੀਹੀਵ, ਸੁਮੀ, ਓਡੇਸਾ, ਪੋਲਟਾਵਾ, ਡਨੀਪਰੋ, ਮਾਈਕੋਲਾ, ਖਾਰਕੀਵ ਅਤੇ ਚੈਰਕਾਸੀ ਖੇਤਰਾਂ 'ਚ ਹਮਲੇ ਕੀਤੇ ਗਏ। ਉਸ ਨੇ ਕਿਹਾ,"ਇਹ ਹਮਲੇ ਸ਼ਹਿਰਾਂ 'ਤੇ ਜਾਣਬੁੱਝ ਕੇ ਕੀਤੇ ਗਏ ਸਨ। ਰਿਹਾਇਸ਼ੀ ਇਮਾਰਤਾਂ ਨੂੰ ਤਬਾਹ ਕੀਤਾ ਗਿਆ ਅਤੇ ਨੁਕਸਾਨ ਪਹੁੰਚਾਇਆ ਗਿਆ।" 

ਪੜ੍ਹੋ ਇਹ ਅਹਿਮ ਖ਼ਬਰ-ਪਾਕਿਸਤਾਨ 'ਚ ਗੜੇਮਾਰੀ, 19 ਲੋਕਾਂ ਦੀ ਮੌਤ

ਜ਼ੇਲੇਂਸਕੀ ਨੇ ਕਿਹਾ,"ਰੂਸੀ ਲੀਡਰਸ਼ਿਪ 'ਤੇ ਸਖ਼ਤ ਦਬਾਅ ਤੋਂ ਬਿਨਾਂ ਇਸ ਬੇਰਹਿਮੀ ਨੂੰ ਰੋਕਿਆ ਨਹੀਂ ਜਾ ਸਕਦਾ। ਪਾਬੰਦੀਆਂ ਜ਼ਰੂਰ ਮਦਦ ਕਰਨਗੀਆਂ।" ਉਸਨੇ ਅੱਗੇ ਕਿਹਾ,"ਹੁਣ ਜੋ ਮਾਇਨੇ ਰੱਖਦਾ ਹੈ ਉਹ ਹੈ ਅਮਰੀਕਾ ਦਾ ਇਰਾਦਾ, ਯੂਰਪੀ ਦੇਸ਼ਾਂ ਦਾ ਇਰਾਦਾ ਅਤੇ ਉਨ੍ਹਾਂ ਸਾਰਿਆਂ ਦਾ ਇਰਾਦਾ ਜੋ ਪੂਰੀ ਦੁਨੀਆ ਵਿੱਚ ਸ਼ਾਂਤੀ ਚਾਹੁੰਦੇ ਹਨ।" ਇਸ ਦੌਰਾਨ ਰੂਸ ਦੇ ਰੱਖਿਆ ਮੰਤਰਾਲੇ ਨੇ ਕਿਹਾ ਕਿ ਉਸ ਦੇ ਹਵਾਈ ਰੱਖਿਆ ਪ੍ਰਣਾਲੀਆਂ ਨੇ ਰਾਤੋ-ਰਾਤ 110 ਯੂਕ੍ਰੇਨੀ ਡਰੋਨਾਂ ਨੂੰ ਡੇਗ ਦਿੱਤਾ। 

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਆਪਣੀ ਰਾਏ।