ਪਾਕਿਸਤਾਨ ''ਚ ਪਿਛਲੇ 19 ਸਾਲਾਂ ਅੰਦਰ ਜਨਸੰਖਿਆ ''ਚ ਹੋਇਆ 57 ਫੀਸਦੀ ਦਾ ਵਾਧਾ: ਜਨਗਣਨਾ

ਇਸਲਾਮਾਬਾਦ— ਪਾਕਿਸਤਾਨ ਦੀ ਆਬਾਦੀ ਸਾਲ 1998 ਵਿਚ ਹੋਈ ਪਿੱਛਲੀ ਜਨਗਣਨਾ ਦੇ ਮੁਕਾਬਲੇ 57 ਫੀਸਦੀ ਵਧ ਕੇ 20.78 ਕਰੋੜ ਹੋ ਗਈ ਹੈ । ਇਹ ਜਾਣਕਾਰੀ ਸ਼ੁੱਕਰਵਾਰ ਨੂੰ ਜਾਰੀ ਜਨਗਣਨਾ ਦੇ ਅਸਥਾਈ ਅੰਕੜਿਆਂ ਵਿਚ ਦਿੱਤੀ ਗਈ । ਕੌਂਸਲ ਆਫ ਕਾਮਨ ਇੰਟਰੈਸਟ (ਸੀ.ਸੀ.ਆਈ) ਨੂੰ ਸੌਂਪੇ ਗਏ ਅਸਥਾਈ ਅੰਕੜਿਆਂ ਅਨੁਸਾਰ ਪਾਕਿਸਤਾਨ ਵਿਚ 10.645 ਕਰੋੜ ਆਦਮੀ, 10.131 ਕਰੋੜ ਔਰਤਾਂ ਅਤੇ 10 ਹਜ਼ਾਰ 418 ਟਰਾਂਸਜੈਂਡਰ ਹਨ । ਪੰਜਵੀਂ ਜਨਗਣਨਾ ਦੇ ਨਤੀਜਿਆਂ ਨਾਲ ਤੁਲਣਾ ਕਰਨ ਉੱਤੇ ਆਬਾਦੀ ਵਿਚ 2.4 ਫੀਸਦੀ ਦੀ ਸਾਲਾਨਾ ਦਰ ਨਾਲ 57 ਫੀਸਦੀ ਦਾ ਵਾਧਾ ਹੋਇਆ ਹੈ । ਪਾਕਿਸਤਾਨ ਵਿਚ 1998 ਵਿਚ ਕਰਾਈ ਗਈ ਜਨਗਣਨਾ ਅਨੁਸਾਰ ਪਾਕਿਸਤਾਨ ਦੀ ਆਬਾਦੀ 13. 2 ਕਰੋੜ ਤੋਂ ਜ਼ਿਆਦਾ ਸੀ । ਇਕ ਰਿਪੋਰਟ ਅਨੁਸਾਰ 6ਵੀ ਜਨਸੰਖਿਆ ਅਤੇ ਆਵਾਸ ਜਨਗਣਨਾ 2017 ਦੇ ਅਸਥਾਈ ਸਾਰ ਅੰਸ਼ ਨਤੀਜਿਆਂ ਮੁਤਾਬਕ ਪਾਕਿਸਤਾਨ ਦੀ ਆਬਾਦੀ ਵਧ ਕੇ 20.78 ਕਰੋੜ ਹੋ ਗਈ ਹੈ । 19 ਸਾਲਾਂ ਅੰਦਰ ਦੇਸ਼ ਦੀ ਆਬਾਦੀ ਵਿਚ 7.54 ਕਰੋੜ ਦਾ ਵਾਧਾ ਹੋਇਆ ਹੈ । ਰਿਪੋਰਟ ਵਿਚ ਕਿਹਾ ਗਿਆ ਹੈ ਕਿ ਸੀ. ਸੀ. ਆਈ. ਇਕ ਸੰਵਿਧਾਨਕ ਸੰਸਥਾ ਹੈ । ਇਸਦੀ ਅਗਵਾਈ ਪ੍ਰਧਾਨ ਮੰਤਰੀ ਕਰਦੇ ਹਨ ਅਤੇ ਚਾਰ ਮੁੱਖ ਮੰਤਰੀ ਇਸ ਦੇ ਮੈਂਬਰ ਹੁੰਦੇ ਹਨ । ਸੀ. ਸੀ. ਆਈ ਨੇ ਅੱਜ ਜਨਗਣਨਾ ਦੇ ਅਸਥਾਈ ਅੰਕੜਿਆਂ ਨੂੰ ਮਨਜ਼ੂਰੀ ਦੇ ਦਿੱਤੀ । ਹਾਲਾਂਕਿ ਆਖਰੀ ਨਤੀਜੇ ਅਗਲੇ ਸਾਲ ਉਪਲੱਬਧ ਹੋਣਗੇ । 
ਪਾਕਿਸਤਾਨ ਬਿਊਰੋ ਆਫ ਸਟੈਟਿਸਟਿਕਸ (ਪੀ.ਬੀ.ਐਸ) ਨੇ ਇਸ ਸਾਲ ਦੀ ਸ਼ੁਰੂਆਤ ਵਿਚ ਪਾਕਿਸਤਾਨ ਵਿਚ ਤਕਰੀਬਨ ਦੋ ਦਹਾਕਿਆਂ ਦੇ ਅੰਤਰਾਲ ਤੋਂ ਬਾਅਦ ਛੇਵੀਂ ਜਨਗਣਨਾ ਕਰਾਈ ਸੀ । ਇਸ ਵਿਚ ਖੈਬਰ ਪਖਤੂਨਖਵਾ,  ਬਲੂਚਿਸਤਾਨ ਅਤੇ ਸੰਘ ਪ੍ਰਸ਼ਾਸਿਤ ਕਬਾਇਲੀ ਖੇਤਰ (ਫਾਟਾ) ਵਿਚ ਜਨਸੰਖਿਆ ਵਾਧਾ ਦਰ ਵਿਚ ਵਾਧਾ ਹੋਇਆ ਹੈ ਜਦੋਂ ਕਿ ਪੰਜਾਬ ਅਤੇ ਸਿੰਧ ਵਿਚ ਪਿਛਲੇ ਨਤੀਜਿਆਂ ਦੇ ਮੁਕਾਬਲੇ ਜਨਸੰਖਿਆ ਵਾਧਾ ਦਰ ਵਿਚ ਗਿਰਾਵਟ ਆਈ ਹੈ । ਇਕ ਖਬਰ ਅਨੁਸਾਰ ਨਤੀਜੇ ਦਰਸਾਉਂਦੇ ਹਨ ਕਿ ਖੈਬਰ ਪਖਤੂਨਖਵਾ ਵਿਚ 3.05 ਕਰੋੜ, ਫਾਟਾ ਵਿਚ 50 ਲੱਖ, ਸਿੰਧ ਵਿਚ 4.79 ਕਰੋੜ, ਬਲੂਚਿਸਤਾਨ ਵਿਚ 1.23 ਕਰੋੜ, ਇਸਲਾਮਾਬਾਦ ਵਿਚ 20 ਲੱਖ ਜਦੋਂ ਕਿ ਆਬਾਦੀ ਦੇ ਹਿਸਾਬ ਨਾਲ ਸਭ ਤੋਂ ਵੱਡੇ ਸੂਬੇ ਪੰਜਾਬ ਵਿਚ 11 ਕਰੋੜ ਲੋਕ ਰਹਿੰਦੇ ਹਨ । ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਸ਼ਾਹਿਦ ਖਾਕਾਨ ਅੱਬਾਸੀ ਨੇ ਦੇਸ਼ ਦੀ ਜਨਗਣਨਾ ਸਮੇਂ ਨਾਲ ਪੂਰੀ ਕਰਨ ਨੂੰ ਲੈ ਕੇ ਕਾਨੂੰਨ ਪਰਿਵਰਤਨ ਏਜੰਸੀਆਂ ਦੀ ਸਰਾਹਨਾ ਕੀਤੀ । ਉਨ੍ਹਾਂ ਪਾਕਿਸਤਾਨ ਬਿਊਰੋ ਆਫ ਸਟੈਟਿਸਟਿਕਸ ਸਟਾਫ ਅਤੇ ਮਿਨੀਸਟਰੀ ਆਫ ਸਟੈਟਿਸਟਿਕਸ ਨੂੰ ਇਹ ਯਕੀਨੀ ਕਰਨ ਦੀ ਅਪੀਲ ਦੀ ਕਿ ਅੰਤਮ ਅੰਕੜੇ ਛੇਤੀ ਜਾਰੀ ਹੋਣ ਤਾਂ ਕਿ ਉਸ ਅਨੁਸਾਰ ਦੇਸ਼ ਦੀ ਆਰਥਿਕ ਅਤੇ ਸਾਮਾਜਿਕ ਯੋਜਨਾ ਬਣਾਈ ਜਾ ਸਕੇ ।