ਕੰਗਾਲ ਪਾਕਿਸਤਾਨ ਖ਼ਤਮ ਕਰੇਗਾ 150000 ਸਰਕਾਰੀ ਨੌਕਰੀਆਂ, 6 ਮੰਤਰਾਲੇ ਹੋਣਗੇ ਬੰਦ

ਇਸਲਾਮਾਬਾਦ- ਗਰੀਬੀ 'ਚ ਘਿਰਿਆ ਪਾਕਿਸਤਾਨ ਖਰਚਿਆਂ ਨੂੰ ਘੱਟ ਕਰਨ ਲਈ ਦੇਸ਼ 'ਚ 1,50,000 ਸਰਕਾਰੀ ਅਸਾਮੀਆਂ ਨੂੰ ਖ਼ਤਮ ਕਰਨ ਜਾ ਰਿਹਾ ਹੈ। ਇਸ ਦੇ ਨਾਲ ਹੀ ਛੇ ਮੰਤਰਾਲਿਆਂ ਨੂੰ ਬੰਦ ਕਰ ਦਿੱਤਾ ਜਾਵੇਗਾ ਅਤੇ ਦੋ ਹੋਰਾਂ ਦਾ ਰਲੇਵਾਂ ਕੀਤਾ ਜਾਵੇਗਾ। ਪਾਕਿਸਤਾਨੀ ਵਿੱਤ ਮੰਤਰੀ ਮੁਹੰਮਦ ਔਰੰਗਜ਼ੇਬ ਨੇ ਐਤਵਾਰ ਨੂੰ ਬਦਲਾਅ ਦੀ ਘੋਸ਼ਣਾ ਕੀਤੀ, ਜੋ ਅੰਤਰਰਾਸ਼ਟਰੀ ਮੁਦਰਾ ਫੰਡ (ਆਈ.ਐਮ.ਐਫ) ਨਾਲ 7 ਬਿਲੀਅਨ ਅਮਰੀਕੀ ਡਾਲਰ ਲੋਨ ਸੌਦੇ ਦਾ ਹਿੱਸਾ ਹਨ। ਪਾਕਿਸਤਾਨੀ ਵਿੱਤ ਮੰਤਰੀ ਨੇ ਕਿਹਾ ਕਿ ਆਈ.ਐਮ.ਐਫ ਨਾਲ ਇੱਕ ਪ੍ਰੋਗਰਾਮ ਨੂੰ ਅੰਤਿਮ ਰੂਪ ਦਿੱਤਾ ਗਿਆ ਹੈ, ਜੋ ਪਾਕਿਸਤਾਨ ਲਈ ਆਖਰੀ ਕਰਜ਼ਾ ਪ੍ਰੋਗਰਾਮ ਹੋਵੇਗਾ।

26 ਸਤੰਬਰ ਨੂੰ IMF ਨੇ ਪਾਕਿਸਤਾਨ ਲਈ 7 ਅਰਬ ਡਾਲਰ ਦੇ ਸਹਾਇਤਾ ਪੈਕੇਜ ਨੂੰ ਮਨਜ਼ੂਰੀ ਦਿੱਤੀ ਸੀ। IMF ਨੇ ਕਰਜ਼ੇ ਦੀ ਪਹਿਲੀ ਕਿਸ਼ਤ ਵਜੋਂ 1 ਬਿਲੀਅਨ ਡਾਲਰ ਜਾਰੀ ਕੀਤੇ ਹਨ। ਪਾਕਿਸਤਾਨ ਸਰਕਾਰ ਨੇ ਕਰਜ਼ੇ ਦੇ ਬਦਲੇ ਸੁਧਾਰਾਂ ਦਾ ਵਾਅਦਾ ਕੀਤਾ ਹੈ, ਜਿਸ ਵਿੱਚ ਖਰਚ ਵਿੱਚ ਕਟੌਤੀ, ਟੈਕਸ-ਜੀ.ਡੀ.ਪੀ ਅਨੁਪਾਤ ਨੂੰ ਵਧਾਉਣਾ, ਖੇਤੀਬਾੜੀ ਅਤੇ ਰੀਅਲ ਅਸਟੇਟ ਵਰਗੇ ਗੈਰ-ਰਵਾਇਤੀ ਖੇਤਰਾਂ 'ਤੇ ਟੈਕਸ ਲਗਾਉਣਾ ਅਤੇ ਸਬਸਿਡੀਆਂ ਨੂੰ ਸੀਮਤ ਕਰਨਾ ਸ਼ਾਮਲ ਹੈ। ਪਾਕਿਸਤਾਨੀ ਵਿੱਤ ਮੰਤਰੀ ਨੇ ਕਿਹਾ, 'ਸਾਨੂੰ ਇਹ ਸਾਬਤ ਕਰਨ ਲਈ ਆਪਣੀਆਂ ਨੀਤੀਆਂ ਲਾਗੂ ਕਰਨ ਦੀ ਲੋੜ ਹੈ ਕਿ ਇਹ ਆਖਰੀ ਪ੍ਰੋਗਰਾਮ ਹੈ।' ਉਨ੍ਹਾਂ ਇਹ ਵੀ ਕਿਹਾ ਕਿ ਸਹੀ ਆਕਾਰ ਦਾ ਫ਼ੈਸਲਾ ਕਰਨ ਲਈ ਮੰਤਰਾਲਿਆਂ ਦੇ ਅੰਦਰ ਕੰਮ ਚੱਲ ਰਿਹਾ ਹੈ। ਛੇ ਮੰਤਰਾਲਿਆਂ ਨੂੰ ਬੰਦ ਕਰਨ ਦਾ ਫ਼ੈਸਲਾ ਲਾਗੂ ਕੀਤਾ ਜਾਣਾ ਹੈ, ਜਦਕਿ ਦੋ ਮੰਤਰਾਲਿਆਂ ਦਾ ਰਲੇਵਾਂ ਕੀਤਾ ਜਾਵੇਗਾ।

150,000 ਸਰਕਾਰੀ ਅਸਾਮੀਆਂ ਹੋਣਗੀਆਂ ਖ਼ਤਮ

ਔਰੰਗਜ਼ੇਬ ਨੇ ਕਿਹਾ, 'ਇਸ ਤੋਂ ਇਲਾਵਾ ਵੱਖ-ਵੱਖ ਮੰਤਰਾਲਿਆਂ 'ਚ 1,50,000 ਅਸਾਮੀਆਂ ਨੂੰ ਖ਼ਤਮ ਕਰ ਦਿੱਤਾ ਜਾਵੇਗਾ।' ਪਾਕਿਸਤਾਨੀ ਵਿੱਤ ਮੰਤਰੀ ਨੇ ਕਿਹਾ ਕਿ ਇੱਕ ਸਾਲ ਵਿੱਚ ਟੈਕਸ ਦਾਤਾਵਾਂ ਦੀ ਗਿਣਤੀ ਦੁੱਗਣੀ ਤੋਂ ਵੱਧ ਗਈ ਹੈ ਅਤੇ ਪਿਛਲੇ ਸਾਲ 3 ਲੱਖ ਦੇ ਮੁਕਾਬਲੇ ਇਸ ਸਾਲ ਹੁਣ ਤੱਕ 7.32 ਲੱਖ ਨਵੇਂ ਟੈਕਸਦਾਤਾ ਰਜਿਸਟਰਡ ਹੋਏ ਹਨ। ਔਰੰਗਜ਼ੇਬ ਨੇ ਇਹ ਵੀ ਕਿਹਾ ਕਿ ਜਿਹੜੇ ਲੋਕ ਟੈਕਸ ਨਹੀਂ ਭਰਦੇ ਉਹ ਹੁਣ ਜਾਇਦਾਦ ਜਾਂ ਵਾਹਨ ਨਹੀਂ ਖਰੀਦ ਸਕਣਗੇ।

ਪੜ੍ਹੋ ਇਹ ਅਹਿਮ ਖ਼ਬਰ- ਡੌਂਕੀ ਲਾ ਕੇ ਇਟਲੀ ਪਹੁੰਚੇ 3 ਭਾਰਤੀ ਮੁੰਡੇ, ਪਾਕਿਸਤਾਨੀਆਂ ਨੇ ਕਰ ਲਏ ਅਗਵਾ, ਮੰਗੀ 15000 ਯੂਰੋ ਫਿਰੌਤੀ

ਆਰਥਿਕ ਸੰਕਟ ਦਾ ਸਾਹਮਣਾ ਕਰ ਰਿਹਾ ਪਾਕਿਸਤਾਨ

ਮੰਤਰੀ ਨੇ ਦਾਅਵਾ ਕੀਤਾ ਕਿ ਪਾਕਿਸਤਾਨ ਦੀ ਆਰਥਿਕਤਾ ਸੁਧਰ ਰਹੀ ਹੈ ਅਤੇ ਸਹੀ ਦਿਸ਼ਾ ਵੱਲ ਵਧ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਦੇਸ਼ ਦਾ ਵਿਦੇਸ਼ੀ ਮੁਦਰਾ ਭੰਡਾਰ ਸਭ ਤੋਂ ਉੱਚੇ ਪੱਧਰ 'ਤੇ ਪਹੁੰਚ ਗਿਆ ਹੈ। ਪਾਕਿਸਤਾਨ ਪਿਛਲੇ ਕਈ ਸਾਲਾਂ ਤੋਂ ਆਰਥਿਕ ਸੰਕਟ ਨਾਲ ਜੂਝ ਰਿਹਾ ਹੈ। ਇਹ ਸਾਲ 2023 ਵਿੱਚ ਦੀਵਾਲੀਆਪਨ ਦੀ ਕਗਾਰ 'ਤੇ ਸੀ, ਪਰ IMF ਤੋਂ 3 ਬਿਲੀਅਨ ਡਾਲਰ ਦੇ ਸਮੇਂ ਸਿਰ ਕਰਜ਼ੇ ਨੇ ਇਸਨੂੰ ਬਚਾ ਲਿਆ। ਪਾਕਿਸਤਾਨ ਨੇ IMF ਨਾਲ ਇੱਕ ਨਵੇਂ ਕਰਜ਼ੇ ਲਈ ਗੱਲਬਾਤ ਕੀਤੀ ਹੈ ਅਤੇ ਉਮੀਦ ਹੈ ਕਿ ਇਹ ਉਸਦਾ ਆਖਰੀ ਕਰਜ਼ਾ ਹੋਵੇਗਾ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।