ਨਿਊਜ਼ੀਲੈਡ ਨੇ ਰੂਸੀ ਬਿੱਟਕੁਆਇਨ ਧੋਖਾਧੜੀ ਮਾਮਲੇ ''ਚ 90 ਮਿਲੀਅਨ ਡਾਲਰ ਕੀਤੇ ਜ਼ਬਤ

06/22/2020 2:26:41 PM

ਵੈਲਿੰਗਟਨ (ਭਾਸ਼ਾ): ਨਿਊਜ਼ੀਲੈਂਡ ਦੀ ਪੁਲਿਸ ਨੇ ਸੋਮਵਾਰ ਨੂੰ ਕਿਹਾ ਕਿ ਉਨ੍ਹਾਂ ਨੇ ਇੱਕ ਰੂਸੀ ਬਿੱਟਕੁਆਇਨ ਧੋਖਾਧੜੀ ਦੇ ਸ਼ੱਕੀ  ਅਲੈਗਜ਼ੈਂਡਰ ਵਿਨਿਕ ਕੋਲੋਂ 90 ਮਿਲੀਅਨ ਡਾਲਰ ਜ਼ਬਤ ਕੀਤੇ ਹਨ, ਜੋ ਫ੍ਰਾਂਸੀਸੀ ਹਿਰਾਸਤ ਵਿੱਚ ਹਨ ਪਰ ਉਹ ਸੰਯੁਕਤ ਰਾਜ ਵਿੱਚ ਵੀ ਲੋੜੀਂਦਾ ਹੈ।

ਨਿਊਜ਼ੀਲੈਂਡ ਦੇ ਪੁਲਿਸ ਕਮਿਸ਼ਨਰ ਐਂਡਰਿਊ ਕੋਸਟਰ ਨੇ ਕਿਹਾ ਕਿ ਉਸਨੇ ਇਸ ਮਾਮਲੇ ਵਿੱਚ ਸਯੁੰਕਤ ਰਾਜ ਦੀ ਅੰਦਰੂਨੀ ਮਾਲ ਸੇਵਾ ਨਾਲ ਮਿਲ ਕੇ ਕੰਮ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਰਾਸ਼ੀ ਹਜ਼ਾਰਾਂ ਪੀੜਤਾਂ ਦੇ ਨਾਜਾਇਜ਼ ਮੁਨਾਫਿਆਂ ਨੂੰ ਦਰਸਾਉਂਦੀ ਹੈ।ਇਹ ਨਿਊਜ਼ੀਲੈਂਡ ਦੀ ਪੁਲਿਸ ਵੱਲੋਂ ਜ਼ਬਤ ਕੀਤੀ ਗਈ ਹੁਣ ਤੱਕ ਦੀ ਸਭ ਤੋਂ ਵੱਡੀ ਰਾਸ਼ੀ ਹੈ। ਸੰਯੁਕਤ ਰਾਜ ਨੇ ਵਿਨੀਕ 'ਤੇ BTC-e ਜ਼ਰੀਏ ਅਰਬਾਂ ਡਾਲਰ ਦੀ ਧੋਖਾਧੜੀ ਕਰਨ ਦਾ ਦੋਸ਼ ਲਗਾਇਆ ਹੈ, ਜੋ ਵਿਸ਼ਵ ਦੀ ਸਭ ਤੋਂ ਵੱਡੀ ਡਿਜੀਟਲ ਕਰੰਸੀ ਐਕਸਚੇਂਜਾਂ ਵਿੱਚੋਂ ਇੱਕ ਹੈ। ਉਸ ਦਾ ਜੱਦੀ ਰੂਸ ਵੀ ਉਸ 'ਤੇ ਮੁਕੱਦਮਾ ਚਲਾਉਣਾ ਚਾਹੁੰਦਾ ਹੈ। 

ਵਿਨਿਕ ਦਾ ਕਹਿਣਾ ਹੈ ਕਿ ਉਸਨੇ ਬੀਟੀਸੀ-ਈ ਪਲੇਟਫਾਰਮ ਲਈ ਤਕਨੀਕੀ ਸਲਾਹਕਾਰ ਵਜੋਂ ਕੰਮ ਕੀਤਾ ਸੀ ਅਤੇ ਉਸਨੂੰ ਕਿਸੇ ਵੀ ਗੈਰਕਾਨੂੰਨੀ ਗਤੀਵਿਧੀ ਬਾਰੇ ਜਾਣਕਾਰੀ ਨਹੀਂ ਸੀ।ਵਿਨਿਕ ਨੂੰ ਅਮਰੀਕੀ ਅਧਿਕਾਰੀਆਂ ਦੀ ਬੇਨਤੀ 'ਤੇ, ਉੱਤਰੀ ਗ੍ਰੀਸ ਵਿੱਚ ਇੱਕ ਪਰਿਵਾਰਕ ਛੁੱਟੀ 'ਤੇ ਰਹਿਣ ਦੌਰਾਨ, 2017 ਦੀਆਂ ਗਰਮੀਆਂ ਵਿੱਚ ਗ੍ਰਿਫਤਾਰ ਕੀਤਾ ਗਿਆ ਸੀ। ਦੋ ਸਾਲਾਂ ਦੀ ਕਾਨੂੰਨੀ ਲੜਾਈ ਤੋਂ ਬਾਅਦ, ਵਿਨਿਕ ਨੂੰ ਯੂਨਾਨ ਤੋਂ ਫਰਾਂਸ ਭੇਜ ਦਿੱਤਾ ਗਿਆ। ਫਰੈਂਚ ਅਧਿਕਾਰੀਆਂ ਨੇ ਜਨਵਰੀ ਵਿੱਚ ਵਿਨਿਕ ਵਿਰੁੱਧ ਮਨੀ ਲਾਂਡਰਿੰਗ ਅਤੇ ਜ਼ਬਰੀ ਵਸੂਲੀ ਦੇ ਮੁੱਢਲੇ ਦੋਸ਼ ਲਗਾਏ ਸਨ। 

ਉੱਧਰ ਵਿਨਿਕ ਕਿਸੇ ਵੀ ਗ਼ਲਤ ਕੰਮ ਤੋਂ ਇਨਕਾਰ ਕਰਦਾ ਹੈ ਅਤੇ 35 ਦਿਨਾਂ ਤੱਕ ਫਰਾਂਸ ਵਿਚ ਆਪਣੀ ਹਵਾਲਗੀ ਦੇ ਵਿਰੋਧ ਵਿਚ ਭੁੱਖ ਹੜਤਾਲ 'ਤੇ ਰਿਹਾ। ਉਹ ਇਸ ਦੀ ਬਜਾਏ ਰੂਸ ਜਾਣਾ ਚਾਹੁੰਦਾ ਸੀ, ਜਿੱਥੇ ਉਸਨੂੰ ਘੱਟ ਖਰਚਿਆਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਵਿਨਿਕ ਦੇ ਵਕੀਲ ਨੇ ਕਿਹਾ ਕਿ ਭੁੱਖ ਹੜਤਾਲ ਕਾਰਨ ਉਸ ਦਾ ਕਲਾਈਂਟ ਫਰਾਂਸ ਪਹੁੰਚਣ 'ਤੇ ਹਸਪਤਾਲ ਦਾਖਲ ਹੋਇਆ ਸੀ।ਯੂਨਾਨ ਦੇ ਅਧਿਕਾਰੀਆਂ ਨੇ ਫੈਸਲਾ ਕੀਤਾ ਸੀ ਕਿ ਵਿਨਿਕ ਨੂੰ ਪਹਿਲਾਂ ਫਰਾਂਸ, ਫਿਰ ਸੰਯੁਕਤ ਰਾਜ ਅਮਰੀਕਾ ਅਤੇ ਅਖੀਰ ਵਿਚ ਰੂਸ ਦੇ ਹਵਾਲੇ ਕਰ ਦਿੱਤਾ ਜਾਵੇ।
ਨਿਊਜ਼ੀਲੈਂਡ ਦੀ ਪੁਲਿਸ ਨੇ ਸੋਮਵਾਰ ਨੂੰ ਕਿਹਾ ਕਿ ਉਨ੍ਹਾਂ ਨੇ ਕੈਂਟਨ ਬਿਜ਼ਨਸ ਕਾਰਪੋਰੇਸ਼ਨ ਅਤੇ ਇਸ ਦੇ ਮਾਲਕ ਵਿਨਿਕ, ਜਿਸ ਨੇ ਨਿਊਜ਼ੀਲੈਂਡ ਦੀ ਇੱਕ ਕੰਪਨੀ ਵਿੱਚ ਫੰਡ ਰੱਖੇ ਹੋਏ ਸਨ, ਤੋਂ 140 ਮਿਲੀਅਨ ਨਿਊਜ਼ੀਲੈਂਡ ਡਾਲਰ (90 ਮਿਲੀਅਨ ਡਾਲਰ) ਵਸੂਲੇ ਸਨ।

ਪੜ੍ਹੋ ਇਹ ਅਹਿਮ ਖਬਰ- ਚੀਨ ਜੂਨ ਦੇ ਅਖੀਰ ਤੱਕ ਲਾਗੂ ਕਰ ਸਕਦਾ ਹੈ ਹਾਂਗਕਾਂਗ ਸੁਰੱਖਿਆ ਕਾਨੂੰਨ

ਨਿਊਜ਼ੀਲੈਂਡ ਦੀਆਂ ਕੰਪਨੀਆਂ ਦਾ ਰਜਿਸਟਰ ਦਰਸਾਉਂਦਾ ਹੈ ਕਿ ਵਿਨਿਕ ਕੋਲ 2008 ਤੋਂ ਲੈ ਕੇ 2012 ਤੱਕ WME ਕੈਪੀਟਲ ਮੈਨੇਜਮੈਂਟ ਨਾਮ ਦੀ ਇੱਕ ਕੰਪਨੀ ਦੀ ਮਲਕੀਅਤ ਸੀ, ਭਾਵੇਂਕਿ ਰਜਿਸਟਰ ਉਸ ਨੂੰ ਉਸ ਤਰੀਕ ਤੋਂ ਬਾਅਦ ਕਿਸੇ ਵੀ ਕੰਪਨੀ ਵਿੱਚ ਹਿੱਸੇਦਾਰ ਵਜੋਂ  ਸੂਚੀਬੱਧ ਨਹੀਂ ਕਰਦਾ। ਇਹ ਰਾਸ਼ੀ ਨਿਊਜ਼ੀਲੈਂਡ ਪੁਲਿਸ ਨੇ ਜਮ੍ਹਾ ਕਰ ਦਿੱਤੀ ਹੈ, ਜਿਹਨਾਂ ਨੇ ਕਿਹਾ ਕਿ ਉਨ੍ਹਾਂ ਨੇ ਹਾਈ ਕੋਰਟ ਵਿਚ ਅਰਜ਼ੀ ਦੇਣ ਦੀ ਯੋਜਨਾ ਬਣਾਈ ਹੈ ਤਾਂ ਜੋ ਇਸ ਨੂੰ ਜ਼ਬਤ ਕੀਤਾ ਜਾ ਸਕੇ।


Vandana

Content Editor

Related News