ਕਾਠਮੰਡੂ ਬੱਸ ਹਾਦਸੇ ''ਚ ਹੁਣ ਤੱਕ 27 ਮੌਤਾਂ, ਮਹਾਰਾਸ਼ਟਰ ਤੋਂ ਨੇਪਾਲ ਘੁੰਮਣ ਗਿਆ ਸੀ 104 ਲੋਕਾਂ ਦਾ ਗਰੁੱਪ

ਕਾਠਮੰਡੂ : ਨੇਪਾਲ ਦੇ ਤਾਨਾਹੁਨ ਜ਼ਿਲ੍ਹੇ ਦੇ ਆਇਨਾ ਪਹਾੜਾ ਵਿੱਚ ਇੱਕ ਦਰਦਨਾਕ ਬੱਸ ਹਾਦਸਾ ਵਾਪਰਿਆ। ਇੱਕ ਭਾਰਤੀ ਸੈਲਾਨੀ ਬੱਸ ਹਾਈਵੇਅ ਤੋਂ ਕਰੀਬ 150 ਮੀਟਰ ਹੇਠਾਂ ਮਰਸਯਾਂਗਦੀ ਨਦੀ ਵਿੱਚ ਡਿੱਗ ਗਈ। ਇਸ ਹਾਦਸੇ 'ਚ 27 ਲੋਕਾਂ ਦੀ ਮੌਤ ਹੋ ਗਈ, ਜਦਕਿ ਬਾਕੀਆਂ ਨੂੰ ਬਚਾ ਲਿਆ ਗਿਆ ਹੈ। ਬੱਸ ਵਿੱਚ ਡਰਾਈਵਰ ਅਤੇ ਕੰਡਕਟਰ ਸਮੇਤ 43 ਲੋਕ ਸਵਾਰ ਸਨ। ਟੂਰਿਸਟ ਬੱਸ ਪੋਖਰਾ ਦੇ ਰਿਜ਼ੋਰਟ ਤੋਂ ਕਾਠਮੰਡੂ ਵੱਲ ਜਾ ਰਹੀ ਸੀ। ਭਾਰਤੀ ਦੂਤਘਰ ਨੇ ਟਵਿੱਟਰ 'ਤੇ ਇਕ ਪੋਸਟ 'ਚ ਕਿਹਾ ਕਿ 43 ਭਾਰਤੀਆਂ ਨਾਲ ਪੋਖਰਾ ਤੋਂ ਕਾਠਮੰਡੂ ਜਾ ਰਹੀ ਇਕ ਭਾਰਤੀ ਯਾਤਰੀ ਬੱਸ 150 ਮੀਟਰ ਹੇਠਾਂ ਨਦੀ 'ਚ ਡਿੱਗ ਗਈ। ਬੱਸ ਦਾ ਰਜਿਸਟ੍ਰੇਸ਼ਨ ਨੰਬਰ UP 53 FT 7623 ਸੀ।

ਇਸ ਹਾਦਸੇ ਬਾਰੇ ਮਹਾਰਾਸ਼ਟਰ ਸਰਕਾਰ ਦੇ ਮੰਤਰੀ ਗਿਰੀਸ਼ ਮਹਾਜਨ ਨੇ ਦੱਸਿਆ ਕਿ ਨੇਪਾਲ ਦੀ ਯਾਤਰਾ 'ਤੇ ਗਏ ਸਾਰੇ ਲੋਕ ਮਹਾਰਾਸ਼ਟਰ ਦੇ ਭੁਸਾਵਲ ਦੇ ਧਰਾਨਗਾਂਵ ਇਲਾਕੇ ਦੇ ਰਹਿਣ ਵਾਲੇ ਸਨ। ਉਹ ਸੈਰ ਸਪਾਟੇ ਲਈ ਨੇਪਾਲ ਗਏ ਸਨ। ਸਾਰੇ ਗੋਰਖਪੁਰ ਤੋਂ ਬੱਸਾਂ ਰਾਹੀਂ ਰਵਾਨਾ ਹੋਏ ਸਨ।

ਉਨ੍ਹਾਂ ਦੱਸਿਆ ਕਿ ਪੋਖਰਾ ਤੋਂ ਕਾਠਮੰਡੂ ਲਈ 3 ਬੱਸਾਂ ਰਵਾਨਾ ਹੋਈਆਂ। ਇਨ੍ਹਾਂ ਵਿੱਚ 104 ਲੋਕ ਸਵਾਰ ਸਨ। ਇਨ੍ਹਾਂ ਤਿੰਨ ਬੱਸਾਂ ਵਿੱਚੋਂ ਇੱਕ ਬੱਸ ਮਰਸਯਾਂਗੜੀ ਨਦੀ ਵਿੱਚ ਡਿੱਗ ਗਈ। ਹਾਦਸੇ ਤੋਂ ਤੁਰੰਤ ਬਾਅਦ ਬਚਾਅ ਕਾਰਜ ਸ਼ੁਰੂ ਕਰ ਦਿੱਤਾ ਗਿਆ ਹੈ। ਗਿਰੀਸ਼ ਮਹਾਜਨ ਨੇ ਕਿਹਾ ਕਿ ਮਹਾਰਾਸ਼ਟਰ ਸਰਕਾਰ ਨੇਪਾਲ ਦੇ ਸਬੰਧਤ ਅਧਿਕਾਰੀਆਂ ਅਤੇ ਦੂਤਾਵਾਸ ਦੇ ਸੰਪਰਕ ਵਿੱਚ ਹੈ। ਉਨ੍ਹਾਂ ਕਿਹਾ ਕਿ ਭੁਸਾਵਲ ਦੇ ਵਿਧਾਇਕ ਸੰਜੇ ਸਾਵਕਾਰੇ ਅਤੇ ਭਾਜਪਾ ਦੇ ਜ਼ਿਲ੍ਹਾ ਪ੍ਰਧਾਨ ਅਮੋਲ ਜਾਵਲੇ ਨੇਪਾਲ ਲਈ ਰਵਾਨਾ ਹੋ ਗਏ ਹਨ। ਉਹ ਨੇਪਾਲ ਜਾ ਕੇ ਪ੍ਰਬੰਧ ਸੰਭਾਲਣਗੇ।

ਪੀਟੀਆਈ ਮੁਤਾਬਕ ਆਰਮਡ ਪੁਲਸ ਫੋਰਸ (ਏਪੀਐੱਫ) ਦੇ ਡਿਪਟੀ ਐੱਸਪੀ ਸ਼ੈਲੇਂਦਰ ਥਾਪਾ ਨੇ ਦੱਸਿਆ ਕਿ ਹਾਦਸੇ ਵਾਲੀ ਥਾਂ ਤੋਂ 27 ਲਾਸ਼ਾਂ ਬਰਾਮਦ ਕੀਤੀਆਂ ਗਈਆਂ ਹਨ। ਜਦਕਿ ਜ਼ਖਮੀਆਂ ਨੂੰ ਸਥਾਨਕ ਹਸਪਤਾਲ ਲਿਜਾਇਆ ਗਿਆ ਹੈ। ਬੱਸ ਬੁਰੀ ਤਰ੍ਹਾਂ ਨੁਕਸਾਨੀ ਗਈ ਹੈ। ਸਥਾਨਕ ਮੀਡੀਆ ਦੇ ਅਨੁਸਾਰ, ਨੇਪਾਲ ਸੈਨਾ ਦਾ ਇੱਕ ਐੱਮਆਈ 17 ਹੈਲੀਕਾਪਟਰ ਬਚਾਅ ਲਈ ਇੱਕ ਮੈਡੀਕਲ ਟੀਮ ਦੇ ਨਾਲ ਤਨਹੂਨ ਜ਼ਿਲ੍ਹੇ ਦੇ ਅੰਬੂ ਖੈਰੇਨੀ ਵਿੱਚ ਦੁਰਘਟਨਾ ਵਾਲੀ ਥਾਂ ਲਈ ਰਵਾਨਾ ਹੋ ਗਿਆ ਹੈ।

ਪੋਖਰਾ ਦੇ ਗੰਡਕੀ ਸੂਬੇ ਦੇ ਪੁਲਸ ਦਫ਼ਤਰ ਨੇ ਕਿਹਾ ਹੈ ਕਿ ਹਾਦਸੇ ਵਿੱਚ ਬਚਾਏ ਗਏ ਲੋਕਾਂ ਵਿੱਚੋਂ ਕਈ ਬੋਲਣ ਦੀ ਹਾਲਤ ਵਿੱਚ ਹਨ। ਪਹਾੜੀ ਖੇਤਰ ਦੇ ਕਾਰਨ, ਨੇਪਾਲ ਦੀਆਂ ਨਦੀਆਂ ਆਮ ਤੌਰ 'ਤੇ ਤੇਜ਼ ਵਗਦੀਆਂ ਹਨ। ਪਿਛਲੇ ਕੁਝ ਦਿਨਾਂ ਤੋਂ ਹੋ ਰਹੀ ਮਾਨਸੂਨ ਦੀ ਭਾਰੀ ਬਾਰਿਸ਼ ਕਾਰਨ ਨਦੀਆਂ 'ਚ ਉਛਾਲ ਹੈ। ਜਿਸ ਕਾਰਨ ਮਲਬਾ ਦੇਖਣਾ ਹੋਰ ਵੀ ਔਖਾ ਹੋ ਗਿਆ ਹੈ।