300 ਲੋਕਾਂ ਨੂੰ ਲਿਜਾ ਰਹੀ ਕਿਸ਼ਤੀ ਪਲਟੀ, 100 ਤੋਂ ਵੱਧ ਲੋਕ ਲਾਪਤਾ; 11 ਲਾਸ਼ਾਂ ਬਰਾਮਦ

ਅਬੂਜਾ — ਉੱਤਰੀ-ਪੱਛਮੀ ਨਾਈਜੀਰੀਆ 'ਚ ਇਕ ਓਵਰਲੋਡ ਕਿਸ਼ਤੀ ਦੇ ਪਲਟਣ ਕਾਰਨ 100 ਤੋਂ ਵੱਧ ਲੋਕ ਲਾਪਤਾ ਹਨ, ਜਿਨ੍ਹਾਂ 'ਚ ਜ਼ਿਆਦਾਤਰ ਔਰਤਾਂ ਅਤੇ ਬੱਚੇ ਹਨ। ਅਧਿਕਾਰੀਆਂ ਨੇ ਬੁੱਧਵਾਰ ਨੂੰ ਇਹ ਜਾਣਕਾਰੀ ਦਿੱਤੀ। ਨਾਈਜਰ ਸਟੇਟ ਐਮਰਜੈਂਸੀ ਮੈਨੇਜਮੈਂਟ ਏਜੰਸੀ ਦੇ ਅਨੁਸਾਰ, ਸਥਾਨਕ ਤੌਰ 'ਤੇ ਬਣਾਈ ਗਈ ਕਿਸ਼ਤੀ ਵਿੱਚ 100 ਯਾਤਰੀਆਂ ਦੀ ਸਮਰੱਥਾ ਸੀ ਪਰ ਹਾਦਸੇ ਦੇ ਸਮੇਂ ਇਸ ਵਿੱਚ ਲਗਭਗ 300 ਲੋਕ ਸਵਾਰ ਸਨ। ਸੋਮਵਾਰ ਰਾਤ ਨਾਈਜਰ ਰਾਜ ਦੇ ਮੋਕਵਾ ਜ਼ਿਲ੍ਹੇ ਵਿੱਚ ਨਾਈਜਰ ਨਦੀ ਵਿੱਚ ਕਿਸ਼ਤੀ ਪਲਟ ਗਈ। ਸਥਾਨਕ ਮੀਡੀਆ ਨੇ ਦੱਸਿਆ ਕਿ ਹੁਣ ਤੱਕ ਨਦੀ 'ਚੋਂ 11 ਲਾਸ਼ਾਂ ਬਰਾਮਦ ਕੀਤੀਆਂ ਗਈਆਂ ਹਨ, ਜਿਨ੍ਹਾਂ 'ਚ ਨੌਂ ਪੁਰਸ਼ ਅਤੇ ਦੋ ਔਰਤਾਂ ਸ਼ਾਮਲ ਹਨ। ਨਾਈਜਰ ਰਾਜ ਦੀਆਂ ਐਮਰਜੈਂਸੀ ਸੇਵਾਵਾਂ ਦੇ ਮੁਖੀ ਅਬਦੁੱਲਾਹੀ ਬਾਬਾ-ਅਰਾਹ ਦੇ ਅਨੁਸਾਰ, ਸਥਾਨਕ ਗੋਤਾਖੋਰਾਂ ਅਤੇ ਵਲੰਟੀਅਰਾਂ ਨੇ ਬੁੱਧਵਾਰ ਸਵੇਰ ਤੱਕ ਘੱਟੋ-ਘੱਟ 150 ਲੋਕਾਂ ਨੂੰ ਬਚਾਇਆ।