ਮੈਲਬੌਰਨ ਕ੍ਰਿਕਟ ਗਰਾਊਂਡ ਦੇ ਬਾਹਰ ਹੋਇਆ ਸ਼ਾਂਤਮਈ ਪ੍ਰਦਰਸ਼ਨ

ਮੈਲਬੌਰਨ,( ਮਨਦੀਪ ਸਿੰਘ ਸੈਣੀ) - ਖੇਤੀ  ਬਿੱਲਾਂ ਖ਼ਿਲਾਫ਼  ਦੇਸ਼ਾਂ-ਵਿਦੇਸ਼ਾਂ ਵਿੱਚ ਲਗਾਤਾਰ  ਰੋਸ ਪ੍ਰਦਰਸ਼ਨ ਕੀਤੇ ਜਾ ਰਹੇ ਹਨ  ਤੇ ਅੱਜ ਸ਼ਨੀਵਾਰ ਨੂੰ  ਮੈਲਬਰਨ ਕ੍ਰਿਕਟ ਗਰਾਊਂਡ ਦੇ ਬਾਹਰ  ਕਿਸਾਨ ਹਮਾਇਤੀਆਂ ਵੱਲੋਂ  ਵੱਡੇ ਪੱਧਰ 'ਤੇ ਕਿਸਾਨਾਂ ਦੇ ਹੱਕ ਵਿਚ ਸ਼ਾਂਤਮਈ ਪ੍ਰਦਰਸ਼ਨ ਕੀਤਾ ਗਿਆ । ਜ਼ਿਕਰਯੋਗ ਹੈ ਕਿ ਮੈਲਬਰਨ ਕ੍ਰਿਕਟ ਗਰਾਊਂਡ ਵਿੱਚ   ਭਾਰਤ ਅਤੇ ਆਸਟ੍ਰੇਲੀਆ ਵਿਚਕਾਰ ਖੇਡੇ ਜਾ ਰਹੇ ਟੈਸਟ ਮੈਚ ਦਾ ਅੱਜ  ਪਹਿਲਾ ਦਿਨ ਸੀ  ਤੇ ਕਿਸਾਨਾਂ ਦੀ ਆਵਾਜ਼ ਨੂੰ ਅੰਤਰਰਾਸ਼ਟਰੀ ਪੱਧਰ ਤੇ ਹੋਰ ਬੁਲੰਦ ਕਰਨ ਲਈ  ਸ਼ਾਂਤਮਈ ਪ੍ਰਦਰਸ਼ਨ  ਲਈ  ਇਹ ਦਿਨ ਚੁਣਿਆ ਗਿਆ ਸੀ  ।

 ਇਸ ਸ਼ਾਂਤਮਈ ਮੁਜ਼ਾਹਰੇ ਵਿੱਚ  ਪੰਜਾਬੀ  ਭਾਈਚਾਰੇ ਤੋਂ ਇਲਾਵਾ  ਬੰਗਾਲ ਐਸੋਸੀਏਸ਼ਨ ਵਿਕਟੋਰੀਆ  , ਮਹਾਂਰਾਸ਼ਟਰ ਮੰਡਲ ਵਿਕਟੋਰੀਆ  , ਤਾਮਿਲ ਅਤੇ ਕੰਨੜ ਭਾਈਚਾਰੇ  ਦੇ ਨੁਮਾਇੰਦਿਆਂ ਸਮੇਤ ਵੱਖ ਵੱਖ  ਭਾਈਚਾਰੇ   ਦੇ ਲੋਕਾਂ ਨੇ  ਏਕਤਾ ਦਾ ਸਬੂਤ ਦਿੰਦੇ ਹੋਏ   ਕਿਸਾਨਾਂ ਦੇ ਹੱਕ ਵਿੱਚ ਨਾਅਰਾ ਮਾਰਿਆ  ।

ਇਸ ਮੁਜ਼ਾਹਰੇ ਦੀ ਖਾਸ ਗੱਲ ਇਹ ਰਹੀ ਕਿ  ਇੱਥੋਂ ਦੇ ਜੰਮਪਲ ਬੱਚੇ ਅਤੇ ਨੌਜਵਾਨ  ਵੀ ਵੱਡੀ ਗਿਣਤੀ ਵਿੱਚ ਸ਼ਾਮਲ ਹੋਏ । ਮੁਜ਼ਾਹਰਾ ਕਰ ਰਹੇ ਲੋਕਾਂ ਦੇ ਹੱਥਾਂ ਵਿੱਚ  ਕਿਸਾਨਾਂ ਦੀ ਹਮਾਇਤ ਕਰਦੀਆਂ ਤਖ਼ਤੀਆਂ ਅਤੇ ਬੈਨਰ  ਫੜੇ ਹੋਏ  ਸਨ । ਆਸਟ੍ਰੇਲੀਆ ਵਿੱਚ  ਪੈਰ ਪਸਾਰ ਰਹੇ  ਅਡਾਨੀ ਗਰੁੱਪ ,ਅੰਬਾਨੀ  ਗਰੁੱਪ ਅਤੇ   ਮੋਦੀ ਸਰਕਾਰ ਦੇ ਖ਼ਿਲਾਫ਼ ਵੀ ਨਾਅਰੇਬਾਜ਼ੀ ਕੀਤੀ ਗਈ ।

ਇਸ ਮੌਕੇ ਦਿੱਲੀ ਸੰਘਰਸ਼ ਮੋਰਚੇ ਵਿੱਚ ਬੈਠੇ ਕਿਸਾਨਾਂ ਦੀ ਚਡ਼੍ਹਦੀ ਕਲਾ ਲਈ ਅਰਦਾਸ ਵੀ ਕੀਤੀ ਗਈ  ।ਕਿਸਾਨ ਹਮਾਇਤੀਆਂ ਨੇ ਭਾਰਤੀ ਹਕੂਮਤ ਵੱਲੋਂ  ਕੀਤੀ ਜਾ ਰਹੀ ਧੱਕੇਸ਼ਾਹੀ ਨੂੰ ਲੋਕਤੰਤਰ ਦਾ ਘਾਣ ਕਰਾਰ ਦਿੱਤਾ । ਇਸ ਮੌਕੇ ਵੱਖ ਵੱਖ  ਬੁਲਾਰਿਆਂ ਨੇ ਆਪਣੀਆਂ ਤਕਰੀਰਾਂ  ਰਾਹੀਂ  ਕਿਸਾਨਾਂ ਦੇ ਨਾਲ  ਮੋਢੇ ਨਾਲ ਮੋਢਾ ਜੋੜ ਕੇ  ਖੜ੍ਹਨ ਦੀ ਵਚਨਬੱਧਤਾ  ਦਾ ਪ੍ਰਗਟਾਵਾ ਕੀਤਾ  ਗਿਆ।  ਗੁਰਦੁਆਰਾ ਸ੍ਰੀ ਗੁਰੂ ਸਿੰਘ ਸਭਾ ਕਰੇਗੀਬਰਨ  , ਖਾਲਸਾ ਛਾਉਣੀ ਪਲੰਪਟਨ ਅਤੇ  ਖ਼ਾਲਸਾ ਏਡ ਵੱਲੋਂ  ਲੰਗਰਾਂ ਦੀ ਸੇਵਾ ਕੀਤੀ ਗਈ ।