ਔਰਤਾਂ ਦੀਆਂ ਕਬਰਾਂ ''ਤੇ ਰੱਖਦਾ ਸੀ ਨਜ਼ਰ, ਰਾਤ ​​ਹੁੰਦੇ ਹੀ ਲਾਸ਼ਾਂ ਨਾਲ ਕਰਦਾ ਸੀ ਸੈ...

ਕਰਾਚੀ : ਪੁਲਸ ਨੇ ਸ਼ੁੱਕਰਵਾਰ ਨੂੰ ਇਕ 40 ਸਾਲਾ ਵਿਅਕਤੀ ਨੂੰ ਗ੍ਰਿਫਤਾਰ ਕੀਤਾ, ਜਿਸ 'ਤੇ ਕੋਰੰਗੀ ਕਬਰਸਤਾਨ ਵਿਚ ਹਾਲ ਹੀ ਵਿਚ ਦਫਨਾਈ ਗਈ ਇਕ ਔਰਤ ਦੀ ਕਬਰ ਖੋਦਣ ਅਤੇ ਲਾਸ਼ ਦਾ ਜਿਨਸੀ ਸ਼ੋਸ਼ਣ ਕਰਨ ਦਾ ਸ਼ੱਕ ਹੈ। ਪੁਲਸ ਨੇ ਉਕਤ ਵਿਅਕਤੀ ਖਿਲਾਫ ਮਾਮਲਾ ਵੀ ਦਰਜ ਕਰ ਲਿਆ ਹੈ। ਅਵਾਮੀ ਕਲੋਨੀ ਪੁਲਸ ਨੇ ਮ੍ਰਿਤਕ ਔਰਤ ਦੇ ਬੇਟੇ ਦੀ ਸ਼ਿਕਾਇਤ 'ਤੇ ਫੜੇ ਗਏ ਸ਼ੱਕੀ ਵਿਅਕਤੀ 'ਤੇ ਧਾਰਾ 297 (ਕਬਰਸਤਾਨ ਵਿਚ ਦਾਖਲ ਹੋਣਾ ਆਦਿ), 376 (ਬਲਾਤਕਾਰ ਦੀ ਸਜ਼ਾ) ਅਤੇ 354 (ਕਿਸੇ ਔਰਤ ਦੀ ਮਰਿਆਦਾ ਨੂੰ ਠੇਸ ਪਹੁੰਚਾਉਣਾ) ਦੇ ਤਹਿਤ ਮਾਮਲਾ ਦਰਜ ਕੀਤਾ ਹੈ। ਪਾਕਿਸਤਾਨ ਪੀਨਲ ਕੋਡ ਦਾ ਮੁਕੱਦਮਾ ਹਮਲਾ ਜਾਂ ਅਪਰਾਧਿਕ ਤਾਕਤ ਦੀ ਵਰਤੋਂ ਦੇ ਤਹਿਤ ਦਰਜ ਕੀਤਾ ਗਿਆ ਹੈ।

ਸ਼ਿਕਾਇਤਕਰਤਾ ਨੇ ਐੱਫਆਈਆਰ ਵਿਚ ਕਿਹਾ ਕਿ ਮੈਂ ਵੀਰਵਾਰ ਸ਼ਾਮ ਨੂੰ ਆਪਣੀ ਮਾਂ ਨੂੰ ਕਬਰਸਤਾਨ ਵਿੱਚ ਦਫ਼ਨਾਇਆ ਸੀ। ਰਾਤ ਕਰੀਬ 10:30 ਵਜੇ ਉਨ੍ਹਾਂ ਨੂੰ ਪਤਾ ਲੱਗਾ ਕਿ ਸ਼ੱਕੀ ਵਿਅਕਤੀ ਨੇ ਕਬਰ ਨੂੰ ਨੁਕਸਾਨ ਪਹੁੰਚਾਇਆ ਹੈ ਅਤੇ ਲਾਸ਼ ਨਾਲ ਛੇੜਛਾੜ ਕੀਤੀ ਹੈ। ਹਾਲਾਂਕਿ ਇਲਾਕੇ ਦੇ ਕੁਝ ਲੋਕਾਂ ਨੇ ਉਸ ਨੂੰ ਫੜ ਲਿਆ। ਉਨ੍ਹਾਂ ਨੇ ਉਸ ਦੀ ਕੁੱਟਮਾਰ ਕੀਤੀ ਅਤੇ ਇਸ ਦੌਰਾਨ ਸਥਾਨਕ ਪੁਲਸ ਮੌਕੇ 'ਤੇ ਪਹੁੰਚ ਗਈ ਅਤੇ ਸ਼ੱਕੀ ਵਿਅਕਤੀ ਨੂੰ ਹਿਰਾਸਤ 'ਚ ਲੈ ਲਿਆ।

ਬਾਅਦ ਵਿੱਚ ਕੋਰੰਗੀ ਪੁਲਸ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਸ਼ੱਕੀ ਨੂੰ ਬਾਗ-ਏ-ਕੋਰੰਗੀ ਕਬਰਸਤਾਨ ਵਿੱਚ 'ਬਲਾਤਕਾਰ ਦੇ ਦੋਸ਼ ਵਿੱਚ' ਗ੍ਰਿਫਤਾਰ ਕੀਤਾ ਗਿਆ ਸੀ। ਪੁੱਛਗਿੱਛ ਦੌਰਾਨ ਉਸ ਨੇ ਪੁਲਸ ਨੂੰ ਦੱਸਿਆ ਕਿ ਉਹ ਕਬਰਸਤਾਨ 'ਚ ਔਰਤਾਂ ਨੂੰ ਦਫਨਾਉਣ 'ਤੇ ਨਜ਼ਰ ਰੱਖਦਾ ਸੀ ਅਤੇ ਰਾਤ ਨੂੰ ਕਬਰਾਂ ਪੁੱਟ ਕੇ ਮ੍ਰਿਤਕਾਂ ਨਾਲ ਘਿਨਾਉਣੇ ਅਪਰਾਧ ਕਰਦਾ ਸੀ। ਪੁਲਸ ਦੇ ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਉਸਨੇ ਖੁਲਾਸਾ ਕੀਤਾ ਕਿ ਉਸਨੇ ਚਾਰ ਔਰਤਾਂ ਦੀਆਂ ਲਾਸ਼ਾਂ ਨਾਲ ਜਿਨਸੀ ਸ਼ੋਸ਼ਣ ਕੀਤਾ ਸੀ।

ਸ਼ੱਕੀ ਵਿਅਕਤੀ ਨੂੰ ਇਸ ਤੋਂ ਪਹਿਲਾਂ ਕਰੀਬ ਅੱਠ ਸਾਲ ਪਹਿਲਾਂ ਕੋਰੰਗੀ ਦੇ ਇੱਕ ਕਬਰਿਸਤਾਨ ਵਿਚ ਅਜਿਹਾ ਅਪਰਾਧ ਕਰਨ ਲਈ ਲੋਕਾਂ ਨੇ ਫੜਿਆ ਸੀ। ਇਸ ਦੌਰਾਨ ਡਾਨ 'ਚ ਪ੍ਰਕਾਸ਼ਿਤ ਖਬਰ ਮੁਤਾਬਕ ਪੁਲਸ ਸਰਜਨ ਸੁਮੱਈਆ ਸਈਦ ਨੇ ਡਾਨ ਨੂੰ ਦੱਸਿਆ ਕਿ ਗ੍ਰਿਫਤਾਰ ਸ਼ੱਕੀ ਨੂੰ ਮੈਡੀਕਲ ਜਾਂਚ ਲਈ ਜਿਨਾਹ ਪੋਸਟ ਗ੍ਰੈਜੂਏਟ ਮੈਡੀਕਲ ਸੈਂਟਰ ਲਿਆਂਦਾ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਮ੍ਰਿਤਕ ਔਰਤ ਦੇ ਪਰਿਵਾਰਕ ਮੈਂਬਰਾਂ ਨੇ ਲਾਸ਼ ਨੂੰ ਦੁਬਾਰਾ ਦਫ਼ਨਾਇਆ ਹੈ ਅਤੇ ਪੁਲਸ ਨੂੰ ਅਗਲੇਰੀ ਜਾਂਚ ਲਈ ਲਾਸ਼ ਨੂੰ ਕੱਢਣ ਲਈ ਜੁਡੀਸ਼ੀਅਲ ਮੈਜਿਸਟ੍ਰੇਟ ਤੋਂ ਇਜਾਜ਼ਤ ਦੀ ਲੋੜ ਹੈ।