ਭਾਰਤੀ ਮੁੰਡੇ ਨੇ ਨਿਊਜ਼ੀਲੈਂਡ ''ਚ ਰਚਾਇਆ ਅਨੋਖਾ ਵਿਆਹ

ਆਕਲੈਂਡ— ਕੁੜੀਆਂ ਅਕਸਰ ਕਹਿੰਦੀਆਂ ਹਨ ਕਿ ਅਸੀਂ ਕਿਹੜਾ ਮੁੰਡਿਆਂ ਨਾਲੋਂ ਘੱਟ ਆ ਪਰ ਹੁਣ ਲੱਗਦਾ ਹੈ ਕਿ ਕੁਝ ਪੜ੍ਹੇ ਲਿਖੇ ਮੁੰਡੇ ਵੀ ਸ਼ਾਇਦ ਇਸ ਦਾ ਜਵਾਬ ਦੇਣ ਲੱਗ ਪਏ ਹਨ। ਨਿਊਜ਼ੀਲੈਂਡ ਦੇ ਇਕ ਰਾਸ਼ਟਰੀ ਟੀ. ਚੈਨੇਲ ਨਾਲ ਕੰਮ ਕਰ ਚੁੱਕੇ 32 ਸਾਲਾਂ ਅਰੂਣ ਸੋਮਾ  ਜੋ ਕਿ ਭਾਰਤੀ ਮੂਲ ਦੇ ਹਨ ਤੇ ਇਸ ਵੇਲੇ ਬੀ.ਬੀ.ਸੀ. ਯੂ.ਕੇ. ਨਾਲ ਕੰਮ ਕਰਦੇ ਹਨ। ਉਨ੍ਹਾਂ ਨੇ ਬੀਤੇ ਸ਼ਨੀਵਾਰ ਵਲਿੰਗਟਨ ਵਿਖੇ ਪਾਣੀ ਦੇ ਕਿਨਾਰੇ ਆਪਣੇ 7 ਸਾਲਾਂ ਤੋਂ ਚੱਲੇ ਆ ਰਹੇ 35 ਸਾਲਾਂ ਦੌਸਤ ਜੈਕਬ ਵੋਲਗ੍ਰੇਟ ਨਾਲ ਵਿਆਹ ਰਚਾ ਲਿਆ। ਇਸ ਤੋਂ ਪਹਿਲਾਂ ਉਨ੍ਹਾਂ ਨੇ ਭਾਰਤੀ ਰੀਤੀ ਰਿਵਾਜ਼ਾਂ ਮੁਤਾਬਕ ਆਪਣੇ ਹੱਥਾਂ 'ਤੇ ਮਹਿੰਦੀ ਲਗਾ, ਮੱਥੇ 'ਤੇ ਟਿੱਕੇ ਲਗਾ ਕੇ ਵਿਆਹ ਦੇ ਸ਼ਗਨ ਪੂਰੇ ਕੀਤੇ। ਦੋਹਾਂ ਨੇ ਮਹਿੰਦੀ ਲਗਾ ਇਕ-ਇਕ ਹੱਥ ਇਕੱਠੇ ਰੱਖ ਕੇ ਇਕ ਤਸਵੀਰ ਵੀ ਟਵੀਟ ਕੀਤੀ ਤੇ ਵਿਆਹ ਦਾ ਰਸਮੀ ਐਲਾਨ ਕੀਤਾ।



 

ਇਹ ਵਿਆਹ ਉਨ੍ਹਾਂ ਨੇ 'ਵਲਿੰਗਟਨ ਪ੍ਰਾਈਡ ਫੈਸਟੀਵਲ' ਸ਼ੁਰੂ ਹੋਣ ਦੇ ਪਹਿਲੇ ਦਿਨ ਰਚਾ ਕੇ ਇਸ ਨੂੰ ਇਕ ਯਾਦਗਾਰੀ ਸਮਾਗਮ 'ਚ ਬਦਲਾਅ ਕਰਨ ਦੀ ਆਪਣੀ ਤਮੰਨਾ ਪੂਰੀ ਕੀਤੀ। ਇਸ ਵਿਆਹ ਸਮਾਗਮ 'ਚ 170 ਦੇ ਕਰੀਬ ਲੋਕ ਸ਼ਾਮਲ ਹੋਏ ਜਿਸ 'ਚ ਮੀਡੀਆ ਕਰਮੀ ਤੇ ਹੋਰ ਖਾਸ ਲੋਕ ਸਨ। ਲੜਕੇ ਅਰੂਣ ਸੋਮਾ ਦਾ ਪਿਤਾ ਪ੍ਰਕਾਸ਼ ਸੋਮਾ ਤੇ ਮਾਂ ਲਲਿਤਾ ਤੇ ਲੜਕੇ ਜੈਕਬ ਦੇ ਮਾਪੇ ਜੈਨੀ ਤੇ ਜਿਮ ਵੋਲਗ੍ਰੇਟ ਇਸ ਮੌਕੇ ਸ਼ਾਮਲ ਸਨ। ਵਿਆਹ ਦੌਰਾਨ ਹਿੰਦੂ ਤੇ ਈਸਾਈ ਰਸਮਾਂ ਮੁਤਾਬਕ ਵਿਆਹ ਦੇ ਸਾਰੇ ਸੰਸਕਾਰ ਪੂਰੇ ਕੀਤੇ ਗਏ।
ਜ਼ਿਕਰਯੋਗ ਹੈ ਕਿ ਨਿਊਜੀਲੈਂਡ 'ਚ ਸਮਲਿੰਗੀ ਵਿਆਹ ਨੂੰ 19 ਅਗਸਤ 2013 ਤੋਂ ਮਾਨਤਾ ਪ੍ਰਾਪਤ ਹੈ। ਇਸ ਸੰਬੰਧੀ ਇਕ ਬਿੱਲ 17 ਅਪ੍ਰੈਲ 2013 ਨੂੰ 77-44 ਵੋਟਾਂ ਦੇ ਫਰਕ ਨਾਲ ਪਾਸ ਹੋ ਗਿਆ ਸੀ ਤੇ ਇੰਟਰਨਲ ਵਿਭਾਗ ਵੱਲੋਂ ਜ਼ਰੂਰੀ ਤਬਦੀਲੀਆਂ ਤੋਂ ਬਾਅਦ 19 ਅਗਸਤ ਨੂੰ ਅਮਲ 'ਚ ਆ ਗਿਆ ਸੀ।