ਰੂਸ ਦੌਰੇ ਕਾਰਨ ਘਰ ''ਚ ਹੀ ਘਿਰੇ ਇਮਰਾਨ ਖਾਨ, ਪਾਕਿਸਤਾਨੀ ਮੀਡੀਆ ਨੇ ਲਗਾਈ ਕਲਾਸ

ਇਸਲਾਮਾਬਾਦ : ਯੂਕਰੇਨ-ਰੂਸ ਜੰਗ ਦਰਮਿਆਨ ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਇਮਰਾਨ ਖ਼ਾਨ ਦਾ ਮਾਸਕੋ ਦੌਰਾ ਕਰਨਾ ਇੱਕ ਮੁਸੀਬਤ ਬਣ ਗਿਆ ਹੈ। ਖ਼ਾਨ ਨੂੰ ਆਪਣੇ ਰੂਸ ਦੌਰੇ ਨੂੰ ਲੇ ਕੇ ਆਪਣੇ ਹੀ ਦੇਸ਼ ਵਿੱਚ ਕਾਫੀ ਆਲੋਚਨਾ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਇਸ ਮਾਮਲੇ 'ਚ ਪਾਕਿਸਤਾਨੀ ਮੀਡੀਆ ਨੇ ਇਮਰਾਨ ਨੂੰ ਤਾੜਨਾ ਕੀਤੀ ਅਤੇ ਉਨ੍ਹਾਂ ਦੇ ਦੌਰੇ ਨੂੰ ਗਲਤ ਕੂਟਨੀਤੀ ਅਤੇ ਗਲਤ ਸਮੇਂ 'ਤੇ ਲਿਆ ਗਿਆ ਮੂਰਖਤਾ ਭਰਿਆ ਫੈਸਲਾ ਦੱਸਿਆ। 'ਇਨਸਾਈਡ ਓਵਰ' 'ਚ ਫੈਡਰਿਕੋ ਗਿਉਲਿਆਨੀ ਨੇ ਕਿਹਾ ਕਿ ਜਦੋਂ ਇਮਰਾਨ ਖਾਨ ਨੂੰ ਆਪਣੇ ਦੇਸ਼ 'ਚ ਬੇਭਰੋਸਗੀ ਮਤੇ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ ਤਾਂ ਪੁਤਿਨ ਨਾਲ ਨੇੜਤਾ ਵਧਾਉਣ ਲਈ ਯੂਕਰੇਨ ਸੰਕਟ ਦੇ ਸਮੇਂ ਰੂਸ ਜਾਣ ਦਾ ਫ਼ੈਸਲਾ ਬਚਕਾਨਾ ਫ਼ੈਸਲਾ ਸੀ।

ਉਨ੍ਹਾਂ ਲਿਖਿਆ ਕਿ ਯੁੱਧ ਕਰ ਰਹੇ ਰੂਸ ਤੋਂ ਕਰਜ਼ਾ ਮੰਗਣਾ ਵੀ ਗਲਤ ਹੈ। ਇਸ ਲੇਖ ਵਿਚ ਕਿਹਾ ਗਿਆ ਹੈ ਕਿ ਇਮਰਾਨ ਅਤੇ ਪੁਤਿਨ ਦੀ ਮੁਲਾਕਾਤ ਵਿਚ ਉਨ੍ਹਾਂ ਨੂੰ ਕੋਈ ਵੱਡੀ ਗੱਲ ਦਾ ਵਾਅਦਾ ਵੀ ਨਹੀਂ ਕੀਤਾ ਗਿਆ ਹੈ। ਇਸ ਦੇ ਨਾਲ ਹੀ ਇਸ ਗੱਲ ਦੀ ਕੋਈ ਉਮੀਦ ਨਹੀਂ ਹੈ ਕਿ ਰੂਸ ਉਨ੍ਹਾਂ ਨੂੰ ਕੋਈ ਕਰਜ਼ਾ ਦੇਣਾ ਯਕੀਨੀ ਬਣਾਏਗਾ। ਲੇਖ ਵਿਚ ਕਿਹਾ ਗਿਆ ਹੈ ਕਿ ਇਮਰਾਨ ਖਾਨ ਨੇ ਪਾਕਿਸਤਾਨੀ ਰਿਹਾਇਸ਼ 'ਤੇ ਤਸੱਲੀ ਦਿੱਤੀ ਕਿ ਉਹ ਰੂਸ ਅਤੇ ਭਾਰਤ ਵਿਚਾਲੇ ਦੂਰੀ ਲਿਆਉਣ ਵਿਚ ਸਫਲ ਰਹੇ ਹਨ। ਹਾਲਾਂਕਿ ਸਾਰੇ ਜਾਣਦੇ ਹਨ ਕਿ ਭਾਰਤ ਅਤੇ ਰੂਸ ਦੇ ਵੱਖ ਹੋਣ ਦਾ ਵਿਚਾਰ ਵੀ ਮੂਰਖਤਾ ਭਰਿਆ ਹੈ। ਖਾਸ ਤੌਰ 'ਤੇ ਜਦੋਂ ਭਾਰਤ ਰੂਸ ਤੋਂ ਰੱਖਿਆ ਉਪਕਰਨਾਂ ਦਾ ਸਭ ਤੋਂ ਵੱਡਾ ਖਰੀਦਦਾਰ ਹੈ।

ਇਮਰਾਨ ਦੇ ਦੋ ਦਿਨਾਂ ਰੂਸ ਦੌਰੇ ਨੂੰ ਲੈ ਕੇ ਪਾਕਿਸਤਾਨੀ ਮੀਡੀਆ 'ਚ ਕਾਫੀ ਹੰਗਾਮਾ ਹੋਇਆ ਹੈ। ਦਰਅਸਲ ਮਾਸਕੋ ਏਅਰਪੋਰਟ 'ਤੇ ਪਹੁੰਚਦੇ ਹੀ ਉਨ੍ਹਾਂ ਨੇ ਮੀਡੀਆ ਦੇ ਸਾਹਮਣੇ ਕਿਹਾ ਸੀ ਕਿ ਉਹ ਬਿਲਕੁਲ ਸਹੀ ਸਮੇਂ 'ਤੇ ਪਹੁੰਚ ਕੇ ਬਹੁਤ ਰੋਮਾਂਚਿਤ ਮਹਿਸੂਸ ਕਰ ਰਹੇ ਹਨ। ਜਦਕਿ ਉਸੇ ਸਮੇਂ ਰੂਸ ਨੇ ਯੂਕਰੇਨ ਵਿਰੁੱਧ ਜੰਗ ਛੇੜ ਦਿੱਤੀ ਸੀ। ਪਾਕਿਸਤਾਨੀ ਪੱਤਰਕਾਰ ਮੁਤਰਜ਼ਾ ਸੋਲਾਂਗੀ ਨੇ ਕਿਹਾ ਕਿ ਉਹ ਆਪਣੀ ਹਉਮੈ ਨੂੰ ਸੰਤੁਸ਼ਟ ਕਰਨ ਲਈ ਹੀ ਰੂਸੀ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨੂੰ ਮਿਲਣ ਗਿਆ ਸੀ। ਟੀਵੀ ਪੱਤਰਕਾਰ ਰਜ਼ਾ ਰੂਮੀ ਨੇ ਪੁੱਛਿਆ ਕਿ ਇਮਰਾਨ ਖ਼ਾਨ ਨੂੰ ਕਿਉਂ ਲੱਗਦਾ ਹੈ ਕਿ ਉਹ ਰੂਸ ਅਤੇ ਯੂਕਰੇਨ ਦਰਮਿਆਨ ਸੁਲ੍ਹਾ-ਸਫ਼ਾਈ ਕਰਵਾਉਣ ਵਿੱਚ ਭੂਮਿਕਾ ਨਿਭਾ ਸਕਦਾ ਹੈ। ਜਦੋਂ ਕਿ ਉਹ ਕਦੇ ਆਪਣੇ ਦੇਸ਼ ਵਿੱਚ ਵਿਰੋਧੀ ਧਿਰ ਨਾਲ ਗੱਲ ਵੀ ਨਹੀਂ ਕਰਦਾ। ਕਰਜ਼ਾ ਲੈਣ ਦੇ ਇਰਾਦੇ ਨਾਲ ਰੂਸ ਦਾ ਦੌਰਾ ਕਰਨ ਨੂੰ ਲੈ ਕੇ ਵੀ ਇਮਰਾਨ ਦੀ ਖਿਚਾਈ ਹੋ ਰਹੀ ਹੈ।

ਇਹ ਵੀ ਪੜ੍ਹੋ : ਪਾਕਿਸਤਾਨ 'ਚ ਆਨਰ ਕਿਲਿੰਗ ਦੇ ਮਾਮਲੇ ਵਧੇ, ਬਲੋਚਿਸਤਾਨ 'ਚ ਇਕ ਦਿਨ 'ਚ 5 ਕਤਲ

ਨੋਟ - ਇਸ ਖ਼ਬਰ ਬਾਰੇ ਆਪਣੇ ਵਿਚਾਰ ਕੁਮੈਂਟ ਬਾਕਸ ਵਿਚ ਜ਼ਰੂਰ ਸਾਂਝੇ ਕਰੋ।