ਭ੍ਰਿਸ਼ਟਾਚਾਰ ਦੇ ਮਾਮਲੇ ''ਚ ਫਸੇ ਸਾਬਕਾ PM ਜ਼ਾਪਤੇਰੋ! ਏਅਰਲਾਈਨ ਨੂੰ ਸਰਕਾਰੀ ਮਦਦ ਦੇਣ ਦਾ ਇਲਜ਼ਾਮ

ਮੈਡ੍ਰਿਡ: ਸਪੇਨ ਦੀ ਇੱਕ ਅਦਾਲਤ ਨੇ ਦੇਸ਼ ਦੇ ਸਾਬਕਾ ਪ੍ਰਧਾਨ ਮੰਤਰੀ ਜੋਸ ਲੁਈਸ ਰੋਡਰਿਗਜ਼ ਜ਼ਾਪਾਤੇਰੋ ਵਿਰੁੱਧ ਕਥਿਤ ਅਹੁਦੇ ਦੀ ਦੁਰਵਰਤੋਂ ਅਤੇ ਸਰਕਾਰੀ ਫੰਡਾਂ ਦੀ ਦੁਰਵਰਤੋਂ ਦੇ ਮਾਮਲੇ 'ਚ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਇਹ ਜਾਂਚ ਸਪੇਨ ਦੀ 'ਪਲੱਸ ਅਲਟਰਾ' (Plus Ultra) ਏਅਰਲਾਈਨ ਨੂੰ 2021 ਵਿੱਚ ਦਿੱਤੇ ਗਏ 53 ਮਿਲੀਅਨ ਯੂਰੋ (ਲਗਭਗ 62 ਮਿਲੀਅਨ ਡਾਲਰ) ਦੇ ਸਰਕਾਰੀ ਬੇਲਆਊਟ (ਆਰਥਿਕ ਮਦਦ) ਨਾਲ ਸਬੰਧਤ ਹੈ।

ਕੀ ਹੈ ਪੂਰਾ ਮਾਮਲਾ?
ਮੈਡ੍ਰਿਡ ਦੀ ਨੈਸ਼ਨਲ ਕੋਰਟ ਇਸ ਗੱਲ ਦੀ ਜਾਂਚ ਕਰ ਰਹੀ ਹੈ ਕਿ ਕੀ ਕੋਵਿਡ-19 ਰਿਕਵਰੀ ਫੰਡਾਂ ਵਿੱਚੋਂ ਇਸ ਏਅਰਲਾਈਨ ਨੂੰ ਦਿੱਤੀ ਗਈ ਵੱਡੀ ਰਕਮ ਵਿੱਚ ਕੋਈ ਵਿੱਤੀ ਹੇਰਾਫੇਰੀ ਹੋਈ ਸੀ। ਅਦਾਲਤ ਨੇ ਜ਼ਾਪਾਤੇਰੋ ਨੂੰ 2 ਜੂਨ ਨੂੰ ਜੱਜ ਦੇ ਸਵਾਲਾਂ ਦੇ ਜਵਾਬ ਦੇਣ ਲਈ ਤਲਬ ਕੀਤਾ ਹੈ। ਇਸ ਮਾਮਲੇ ਦੇ ਸਬੰਧ ਵਿੱਚ ਪੁਲਸ ਵੱਲੋਂ ਜ਼ਾਪਾਤੇਰੋ ਦੇ ਦਫਤਰ ਦੀ ਤਲਾਸ਼ੀ ਵੀ ਲਈ ਗਈ ਹੈ।

ਵੈਨੇਜ਼ੁਏਲਾ ਨਾਲ ਸਬੰਧਾਂ 'ਤੇ ਉੱਠੇ ਸਵਾਲ
ਪਲੱਸ ਅਲਟਰਾ ਇੱਕ ਸਪੇਨੀ ਏਅਰਲਾਈਨ ਹੈ, ਪਰ ਇਸ 'ਚ ਵੈਨੇਜ਼ੁਏਲਾ ਦੇ ਨਿਵੇਸ਼ਕਾਂ ਦਾ ਪੈਸਾ ਲੱਗਾ ਹੋਇਆ ਹੈ। ਇਹ ਕੰਪਨੀ ਖਾਸ ਤੌਰ 'ਤੇ ਸਪੇਨ ਅਤੇ ਵੈਨੇਜ਼ੁਏਲਾ, ਪੇਰੂ ਅਤੇ ਇਕਵਾਡੋਰ ਵਿਚਕਾਰ ਉਡਾਣਾਂ ਚਲਾਉਂਦੀ ਹੈ। ਜ਼ਾਪਾਤੇਰੋ, ਜੋ 2004 ਤੋਂ 2011 ਤੱਕ ਪ੍ਰਧਾਨ ਮੰਤਰੀ ਰਹੇ ਸਨ, ਦੇ ਵੈਨੇਜ਼ੁਏਲਾ ਦੀ ਮੌਜੂਦਾ ਸਰਕਾਰ ਨਾਲ ਨਜ਼ਦੀਕੀ ਸਬੰਧ ਮੰਨੇ ਜਾਂਦੇ ਹਨ। 

ਜ਼ਾਪਾਤੇਰੋ ਵੱਲੋਂ ਦੋਸ਼ਾਂ ਦਾ ਖੰਡਨ
65 ਸਾਲਾ ਸਾਬਕਾ ਪ੍ਰਧਾਨ ਮੰਤਰੀ ਨੇ ਇਨ੍ਹਾਂ ਸਾਰੇ ਦੋਸ਼ਾਂ ਨੂੰ ਸਿਰੇ ਤੋਂ ਨਕਾਰ ਦਿੱਤਾ ਹੈ। ਮਾਰਚ ਵਿੱਚ ਇੱਕ ਸੁਣਵਾਈ ਦੌਰਾਨ ਉਨ੍ਹਾਂ ਸਪੱਸ਼ਟ ਕੀਤਾ ਸੀ ਕਿ ਉਨ੍ਹਾਂ ਨੇ ਇਸ ਏਅਰਲਾਈਨ ਤੋਂ ਕਦੇ ਵੀ ਕੋਈ ਕਮਿਸ਼ਨ ਨਹੀਂ ਲਿਆ। ਦੱਸਣਯੋਗ ਹੈ ਕਿ ਜ਼ਾਪਾਤੇਰੋ ਮੌਜੂਦਾ ਪ੍ਰਧਾਨ ਮੰਤਰੀ ਪੇਡਰੋ ਸਾਂਚੇਜ਼ ਦੀ ਸੋਸ਼ਲਿਸਟ ਪਾਰਟੀ ਦੇ ਮੈਂਬਰ ਹਨ ਅਤੇ ਉਨ੍ਹਾਂ ਦੇ ਕਰੀਬੀ ਸਹਿਯੋਗੀ ਮੰਨੇ ਜਾਂਦੇ ਹਨ। ਸਾਂਚੇਜ਼ ਦੀ ਪਾਰਟੀ ਪਹਿਲਾਂ ਹੀ ਪਿਛਲੇ ਦੋ ਸਾਲਾਂ ਤੋਂ ਵੱਖ-ਵੱਖ ਭ੍ਰਿਸ਼ਟਾਚਾਰ ਦੇ ਘੁਟਾਲਿਆਂ ਕਾਰਨ ਵਿਰੋਧੀਆਂ ਦੇ ਨਿਸ਼ਾਨੇ 'ਤੇ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e