UAE ''ਚ ਈਦ ਦੀਆਂ ਛੁੱਟੀਆਂ ਕਾਰਨ ਵਧੇ ਹਵਾਈ ਕਿਰਾਏ, ਭਾਰਤੀਆਂ ਦੀ ਜੇਬ ''ਤੇ ਸਭ ਤੋਂ ਜ਼ਿਆਦਾ ਅਸਰ

ਦੁਬਈ (ਬਿਊਰੋ): ਸੰਯੁਕਤ ਅਰਬ ਅਮੀਰਾਤ (ਯੂਏਈ)  ਵਿੱਚ 1 ਤੋਂ 5 ਮਈ ਤੱਕ ਈਦ-ਉਲ-ਫਿਤਰ ਦੀਆਂ ਛੁੱਟੀਆਂ ਦਾ ਐਲਾਨ ਕੀਤਾ ਗਿਆ ਹੈ, ਜਿਸ ਤੋਂ ਬਾਅਦ ਜ਼ਿਆਦਾਤਰ ਲੋਕ ਇੱਥੇ ਆਉਣ ਦੀ ਯੋਜਨਾ ਬਣਾ ਰਹੇ ਹਨ। ਇਸ ਕਾਰਨ ਕਈ ਥਾਵਾਂ 'ਤੇ ਹਵਾਈ ਕਿਰਾਏ 40 ਤੋਂ 60 ਫੀਸਦੀ ਤੱਕ ਵਧ ਗਏ ਹਨ। ਇਸ ਵਧੇ ਕਿਰਾਏ (UAE to India Fligth Ticket) ਦਾ ਸਭ ਤੋਂ ਵੱਡਾ ਬੋਝ ਭਾਰਤੀਆਂ 'ਤੇ ਵੀ ਪੈਣ ਵਾਲਾ ਹੈ।

ਭਾਰਤ ਦੇ ਨਾਲ-ਨਾਲ ਯੂਏਈ ਤੋਂ ਪਾਕਿਸਤਾਨ, ਬੰਗਲਾਦੇਸ਼ ਅਤੇ ਨੇਪਾਲ ਜਾਣ ਵਾਲੇ ਜਹਾਜ਼ਾਂ ਦਾ ਕਿਰਾਇਆ ਵੀ ਵਧ ਗਿਆ ਹੈ। ਇਨ੍ਹਾਂ ਦੇਸ਼ਾਂ ਲਈ ਫਲਾਈਟ ਟਿਕਟ 25,000 ਰੁਪਏ ਤੋਂ ਲੈ ਕੇ 42,000 ਰੁਪਏ ਤੱਕ ਹੈ। ਆਮ ਦਿਨਾਂ 'ਤੇ ਇਹ ਕਿਰਾਇਆ ਕਰੀਬ 17-30 ਹਜ਼ਾਰ ਰੁਪਏ ਤੱਕ ਹੁੰਦਾ ਹੈ। ਦੂਜੇ ਪਾਸੇ ਜੇਕਰ ਤੁਸੀਂ ਫਿਲੀਪੀਨਜ਼ ਵਰਗੀਆਂ ਥਾਵਾਂ ਲਈ ਹਵਾਈ ਕਿਰਾਏ ਦੀ ਤੁਲਨਾ ਕਰਦੇ ਹੋ, ਤਾਂ ਇਹ ਫਰਵਰੀ ਅਤੇ ਮਾਰਚ ਦੇ ਮਹੀਨਿਆਂ ਨਾਲੋਂ ਘੱਟ ਹੈ। ਇਸ ਦੇ ਨਾਲ ਹੀ ਸ਼੍ਰੀਲੰਕਾ ਦਾ ਹਵਾਈ ਕਿਰਾਇਆ ਵੀ ਬਹੁਤ ਘੱਟ ਹੈ। ਡੇਰਾ ਟਰੈਵਲ ਐਂਡ ਟੂਰਿਸਟ ਏਜੰਸੀ ਦੇ ਜੀਐਮ ਟੀਪੀ ਸੁਧੀਸ਼ ਨੇ ਦੱਸਿਆ ਕਿ ਉੱਥੇ ਚੱਲ ਰਹੇ ਆਰਥਿਕ ਸੰਕਟ ਕਾਰਨ ਸ਼੍ਰੀਲੰਕਾ ਦਾ ਕਿਰਾਇਆ ਘੱਟ ਹੈ।

ਪੜ੍ਹੋ ਇਹ ਅਹਿਮ ਖ਼ਬਰ- ਬ੍ਰਿਟਿਸ਼ ਅਦਾਲਤ ਦਾ ਵੱਡਾ ਫ਼ੈਸਲਾ, ਅਸਾਂਜੇ ਦੀ ਅਮਰੀਕਾ ਹਵਾਲਗੀ ਨੂੰ ਮਨਜ਼ੂਰੀ, ਹੋਵੇਗੀ 175 ਸਾਲ ਦੀ ਸਜਾ 

ਯਾਤਰੀਆਂ ਦੀ ਗਿਣਤੀ ਵਧਣ ਕਾਰਨ ਵਧੇ ਕਿਰਾਏ
ਸੁਧੀਸ਼ ਨੇ ਦੱਸਿਆ ਕਿ ਸ਼੍ਰੀਲੰਕਾ ਨੂੰ ਛੱਡ ਕੇ ਲਗਭਗ ਸਾਰੀਆਂ ਥਾਵਾਂ 'ਤੇ ਕਿਰਾਏ ਵਿੱਚ 40-60 ਪ੍ਰਤੀਸ਼ਤ ਦਾ ਵਾਧਾ ਹੋਇਆ ਹੈ। ਇਸ ਸਮੇਂ ਦੌਰਾਨ ਤਿਉਹਾਰ ਵੀ ਹਨ। ਸੈਲਾਨੀਆਂ ਦੀ ਆਵਾਜਾਈ ਲਗਭਗ ਮਹਾਮਾਰੀ ਤੋਂ ਪਹਿਲਾਂ ਦੇ ਪੱਧਰ 'ਤੇ ਪਹੁੰਚ ਗਈ ਹੈ। ਉਨ੍ਹਾਂ ਨੇ ਅੱਗੇ ਕਿਹਾ ਕਿ ਉੰਨੇ ਜਹਾਜ਼ ਨਹੀਂ ਹਨ ਜਿੰਨੀ ਯਾਤਰੀਆਂ ਦੀ ਮੰਗ ਹੈ, ਇਸ ਕਾਰਨ ਟਿਕਟਾਂ ਦੀਆਂ ਕੀਮਤਾਂ ਵਧ ਗਈਆਂ ਹਨ। ਓਮਾਨ ਅਤੇ ਸਾਊਦੀ ਅਰਬ ਲਈ ਕਿਰਾਏ ਵੀ ਵਧ ਗਏ ਹਨ। ਯੂਕੇ ਅਤੇ ਜਾਰਜੀਆ ਲਈ ਵੀ ਟਿਕਟਾਂ ਦੀਆਂ ਕੀਮਤਾਂ ਵਧ ਗਈਆਂ ਹਨ।

ਭਾਰਤ ਲਈ ਇੰਨਾ ਵਧਿਆ ਕਿਰਾਇਆ
ਵਧੇ ਕਿਰਾਏ ਦੀ ਗੱਲ ਕਰੀਏ ਤਾਂ 1 ਤੋਂ 6 ਮਈ ਤੱਕ ਦੁਬਈ ਤੋਂ ਮੁੰਬਈ ਦਾ ਕਿਰਾਇਆ 28,500 ਰੁਪਏ ਦੇ ਕਰੀਬ ਹੈ। ਉੱਥੇ ਹੀ ਸ਼ਾਰਜਾਹ ਤੋਂ ਮੁੰਬਈ ਦਾ ਕਿਰਾਇਆ 28,000 ਰੁਪਏ ਹੈ। ਦੁਬਈ ਤੋਂ ਕੋਚੀ ਦਾ ਕਿਰਾਇਆ ਲਗਭਗ 42,000 ਰੁਪਏ ਹੈ। ਟਰੈਵਲ ਏਜੰਟਾਂ ਨੇ ਦੱਸਿਆ ਕਿ ਕੇਰਲ ਵਰਗੇ ਦੱਖਣੀ ਭਾਰਤੀ ਰਾਜਾਂ ਲਈ ਕਿਰਾਏ ਬਹੁਤ ਜ਼ਿਆਦਾ ਹਨ। ਈਦ ਦੀਆਂ ਛੁੱਟੀਆਂ ਦੌਰਾਨ ਕੋਚੀ, ਕੋਝੀਕੋਡ, ਕੰਨੂਰ ਅਤੇ ਤਿਰੂਵਨੰਤਪੁਰਮ ਵਰਗੇ ਹਵਾਈ ਅੱਡਿਆਂ ਲਈ ਟਿਕਟਾਂ ਲਗਭਗ 40,000 ਰੁਪਏ ਤੋਂ ਵਧ ਹੈ। ਦਿੱਲੀ, ਲਖਨਊ ਅਤੇ ਕਾਨਪੁਰ ਲਈ ਵੀ ਕਿਰਾਏ ਵੱਧ ਹਨ।

ਜਾਣੋ ਪਾਕਿਸਤਾਨ ਦਾ ਕਿਰਾਇਆ
ਪਾਕਿਸਤਾਨ ਜਾਣ ਵਾਲੇ ਜਹਾਜ਼ ਦੀਆਂ ਟਿਕਟਾਂ ਦੀਆਂ ਕੀਮਤਾਂ ਵੀ ਵਧ ਗਈਆਂ ਹਨ। ਸ਼ਾਰਜਾਹ ਤੋਂ ਕਰਾਚੀ ਦੀ ਟਿਕਟ ਦੀ ਕੀਮਤ 19460 ਭਾਰਤੀ ਰੁਪਏ ਹੈ। ਦੁਬਈ ਤੋਂ ਕਰਾਚੀ ਅਤੇ ਲਾਹੌਰ ਦਾ ਕਿਰਾਇਆ ਵੀ 24 ਹਜ਼ਾਰ ਤੋਂ 26 ਹਜ਼ਾਰ ਦੇ ਕਰੀਬ ਹੈ।

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।