ਚੀਨ 'ਚ ਵਧੀ ਪਾਕਿਸਤਾਨੀ ਗਧਿਆਂ ਦੀ ਡਿਮਾਂਡ! 3 ਲੱਖ ਤਕ ਪਹੁੰਚੀ ਕੀਮਤ

ਇਸਲਾਮਾਬਾਦ : ਪਾਕਿਸਤਾਨ 'ਚ ਗਧਿਆਂ ਦੀ ਭਾਰੀ ਮੰਗ ਹੈ, ਜਿਸ ਕਾਰਨ ਇਨ੍ਹਾਂ ਦੀਆਂ ਕੀਮਤਾਂ ਅਸਮਾਨ ਨੂੰ ਛੂਹ ਰਹੀਆਂ ਹਨ। ਗਧਿਆਂ ਦੀਆਂ ਵਧਦੀਆਂ ਕੀਮਤਾਂ ਦਾ ਕਾਰਨ ਪਾਕਿਸਤਾਨ ਦਾ ਸਭ ਤੋਂ ਚੰਗਾ ਮਿੱਤਰ ਚੀਨ ਹੈ, ਜਿੱਥੇ ਰਵਾਇਤੀ ਦਵਾਈਆਂ ਅਤੇ ਸ਼ਿੰਗਾਰ ਸਮੱਗਰੀ ਵਿੱਚ ਗਧੇ ਦੀ ਚਮੜੀ ਦੀ ਵਰਤੋਂ ਵੱਧ ਰਹੀ ਹੈ। ਪਾਕਿਸਤਾਨ ਦੀ 'ਆਜ ਨਿਊਜ਼' ਦੀ ਰਿਪੋਰਟ ਮੁਤਾਬਕ ਇੱਕ ਗਧੇ ਦੀ ਕੀਮਤ 300,000 ਪਾਕਿਸਤਾਨੀ ਰੁਪਏ ਤੱਕ ਪਹੁੰਚ ਗਈ ਹੈ। ਇਹ ਇੱਕ ਜੀਵ ਲਈ ਵੱਡੀ ਰਕਮ ਹੈ ਜੋ ਜ਼ਿਆਦਾਤਰ ਮਾਲ ਢੋਆ-ਢੁਆਈ ਲਈ ਵਰਤੀ ਜਾਂਦੀ ਹੈ। ਪਰ ਇਸ ਦੀ ਵਧਦੀ ਕੀਮਤ ਨੇ ਉਨ੍ਹਾਂ ਲੋਕਾਂ ਲਈ ਵੱਡਾ ਸੰਕਟ ਖੜ੍ਹਾ ਕਰ ਦਿੱਤਾ ਹੈ ਜੋ ਗਧਾ ਗੱਡੀ ਚਲਾ ਕੇ ਆਪਣਾ ਅਤੇ ਆਪਣੇ ਪਰਿਵਾਰ ਦਾ ਗੁਜ਼ਾਰਾ ਕਰਦੇ ਹਨ।

ਰਿਪੋਰਟ ਵਿਚ ਕਿਹਾ ਗਿਆ ਹੈ ਕਿ ਕਰਾਚੀ ਦੇ ਲਿਆਰੀ ਜ਼ਿਲ੍ਹੇ ਵਿਚ ਹਫਤਾਵਾਰੀ ਗਧਾ ਬਾਜ਼ਾਰ ਵਿਚ ਕੀਮਤਾਂ ਵਧਣ ਕਾਰਨ ਸਥਾਨਕ ਖਰੀਦਦਾਰਾਂ ਦੀ ਗਿਣਤੀ ਵਿਚ ਤੇਜ਼ੀ ਨਾਲ ਗਿਰਾਵਟ ਦੇਖਣ ਨੂੰ ਮਿਲ ਰਹੀ ਹੈ। ਗਧੇ ਦੇ ਵਪਾਰ ਵਿਚ ਲੱਗੇ ਲੋਕ ਕੀਮਤਾਂ ਵਿੱਚ ਵਾਧੇ ਦਾ ਕਾਰਨ ਚੀਨ ਤੋਂ ਵਧਦੀ ਮੰਗ ਨੂੰ ਮੰਨਦੇ ਹਨ। ਇਸ ਵਿਚ ਕਿਹਾ ਗਿਆ ਹੈ ਕਿ ਚੀਨ ਵਿਚ ਗਧੇ ਦੀ ਚਮੜੀ ਦੀ ਵਰਤੋਂ ਵੱਖ-ਵੱਖ ਸ਼ਿੰਗਾਰ ਸਮੱਗਰੀ ਅਤੇ ਅਜੀਆਓ ਨਾਮਕ ਇਕ ਰਵਾਇਤੀ ਚੀਨੀ ਦਵਾਈ ਦੇ ਉਤਪਾਦਨ ਵਿਚ ਕੀਤੀ ਜਾਂਦੀ ਹੈ। ਇਸ ਮੰਗ ਕਾਰਨ ਚੀਨ ਵਿੱਚ ਹਰ ਸਾਲ ਲੱਖਾਂ ਗਧੇ ਮਾਰੇ ਜਾਂਦੇ ਹਨ।

ਚੀਨ ਦੀ ਅਜੀਆਓ ਦਵਾਈ ਬਣੀ ਗਧਿਆਂ ਦਾ ਕਾਲ
ਅਜੀਆਓ ਇੱਕ ਰਵਾਇਤੀ ਚੀਨੀ ਦਵਾਈ ਹੈ। ਇਹ ਗਧੇ ਦੀ ਚਮੜੀ ਤੋਂ ਕੱਢੇ ਗਏ ਕੋਲੇਜਨ ਤੋਂ ਬਣਾਈ ਜਾਂਦੀ ਹੈ। ਸੁੰਦਰਤਾ ਉਤਪਾਦਾਂ ਵਿੱਚ ਗੋਲੀਆਂ ਜਾਂ ਤਰਲ ਬਣਾਉਣ ਲਈ ਕੋਲੇਜਨ ਨੂੰ ਜੜੀ-ਬੂਟੀਆਂ ਅਤੇ ਹੋਰ ਸਮੱਗਰੀਆਂ ਨਾਲ ਮਿਲਾਇਆ ਜਾਂਦਾ ਹੈ। ਅਜੀਆਓ ਉਦਯੋਗ 'ਚ ਪਿਛਲੇ ਇੱਕ ਦਹਾਕੇ ਵਿਚ ਤੇਜ਼ੀ ਨਾਲ ਵਾਧਾ ਦੇਖਿਆ ਗਿਆ ਹੈ। 2013 ਤੇ 2016 ਦੇ ਵਿਚਕਾਰ, ਅਜੀਆਓ ਦਾ ਸਾਲਾਨਾ ਉਤਪਾਦਨ 3,200 ਤੋਂ 5,600 ਟਨ ਤੱਕ 20 ਫੀਸਦੀ ਸਾਲਾਨਾ ਵਧਿਆ। 2016 ਤੋਂ 2021 ਦਰਮਿਆਨ ਅਜੀਆਓ ਉਤਪਾਦਨ 160 ਫੀਸਦੀ ਵਧਿਆ ਹੈ। ਜੇਕਰ ਮੌਜੂਦਾ ਰੁਝਾਨ ਜਾਰੀ ਰਿਹਾ ਤਾਂ 2027 ਤੱਕ ਇਹ 200 ਫੀਸਦੀ ਵਧ ਜਾਵੇਗਾ।

ਗਧਾ ਗੱਡੀ ਚਲਾਉਣ ਵਾਲਿਆਂ ਲਈ ਬਣੀ ਮੁਸੀਬਤ
ਪਾਕਿਸਤਾਨ ਵਿਚ ਗਧਾ ਗੱਡੀਆਂ ਚਲਾਉਣ ਵਾਲੇ ਇਸ ਗੱਲ ਦਾ ਅਫਸੋਸ ਕਰ ਰਹੇ ਹਨ ਕਿ ਕਦੇ 8000 ਤੋਂ 12000 ਰੁਪਏ ਵਿੱਚ ਵਿਕਣ ਵਾਲੇ ਗਧੇ ਹੁਣ ਬਹੁਤ ਹੀ ਮਹਿੰਗੇ ਮੁੱਲ 'ਤੇ ਵਿਕ ਰਹੇ ਹਨ। ਇਸ ਕਾਰਨ ਇਨ੍ਹਾਂ ਵਾਹਨ ਚਾਲਕਾਂ ਦਾ ਜਿਊਣਾ ਮੁਸ਼ਕਲ ਹੋ ਗਿਆ ਹੈ। 2024 ਦਾ ਆਰਥਿਕ ਸਰਵੇਖਣ ਦਰਸਾਉਂਦਾ ਹੈ ਕਿ ਪਾਕਿਸਤਾਨ ਵਿੱਚ ਗਧਿਆਂ ਦੀ ਗਿਣਤੀ ਵਿੱਚ ਕਾਫੀ ਵਾਧਾ ਹੋਇਆ ਹੈ। ਦੇਸ਼ ਵਿੱਚ 660,000 ਗਧੇ ਹਨ। ਸੀਨੇਟ ਦੀ ਸਥਾਈ ਕਮੇਟੀ ਆਨ ਟਰੇਡ ਨੂੰ ਦੱਸਿਆ ਗਿਆ ਹੈ ਕਿ ਚੀਨ ਨੂੰ ਗਧੇ ਦੀ ਖੱਲ ਅਤੇ ਮਾਸ ਨਿਰਯਾਤ ਕਰਨ ਲਈ ਇੱਕ ਪ੍ਰੋਟੋਕੋਲ ਨੂੰ ਅੰਤਿਮ ਰੂਪ ਦਿੱਤਾ ਗਿਆ ਹੈ।