ਪਤੀ ਨੇ ਕੀਤਾ 45 ਕੁੜੀਆਂ ਨਾਲ ਰੇਪ, ਵੀਡੀਓ ਬਣਾ ਕੇ ਵੇਚਦੀ ਸੀ ਪਤਨੀ
08/24/2019 8:46:20 PM
ਇਸਲਾਮਾਬਾਦ— ਪਾਕਿਸਤਾਨ 'ਚ ਇਕ ਨੌਜਵਾਨ ਵਲੋਂ ਕਈ ਲੜਕੀਆਂ ਦਾ ਸਰੀਰਕ ਸ਼ੋਸ਼ਣ ਤੇ ਬਲਾਤਕਾਰ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇਹ ਹੀ ਨਹੀਂ ਬਲਕਿ ਨੌਜਵਾਨ ਦੀ ਪਤਨੀ ਵੀ ਇਸ ਜੁਰਮ 'ਚ ਸ਼ਾਮਲ ਸੀ। ਇਹ ਮਾਮਲਾ ਪਾਕਿਸਤਾਨ ਦੇ ਰਾਵਲਪਿੰਡੀ ਦਾ ਹੈ।
ਰਿਪੋਰਟ ਅਨੁਸਾਰ ਮੁਲਜ਼ਮ ਕਾਸੀਮ ਜਹਾਂਗੀਰ ਨੇ 45 ਲੜਕੀਆਂ ਨਾਲ ਜਿਨਸੀ ਸ਼ੋਸ਼ਣ ਦੀ ਗੱਲ ਕਬੂਲ ਕੀਤੀ ਹੈ। ਪੁਲਸ ਨੇ ਮੁਲਜ਼ਮ ਕਾਸਿਮ ਜਹਾਂਗੀਰ ਤੇ ਉਸਦੀ ਪਤਨੀ ਕਿਰਨ ਮਹਿਮੂਦ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਕੁੜੀਆਂ ਦੇ ਜਿਨਸੀ ਸ਼ੋਸ਼ਣ ਦੌਰਾਨ ਜੋੜਾ ਫੋਟੋਆਂ ਤੇ ਵੀਡੀਓ ਬਣਾਉਂਦਾ ਸੀ ਤੇ ਬਾਲਗ ਸਾਈਟਾਂ ਤੇ ਵੇਚਦਾ ਸੀ। ਟ੍ਰਿਬਿਊਨ ਐਕਸਪ੍ਰੈੱਸ ਦੀ ਰਿਪੋਰਟ ਦੇ ਅਨੁਸਾਰ ਦੋਸ਼ੀ ਕਪਲ ਨੇ ਘੱਟੋ ਘੱਟ 10 ਪੀੜਤਾਂ ਦੀ ਵੀਡੀਓ ਬਣਾਉਣ ਦੀ ਗੱਲ ਕਬੂਲ ਕੀਤੀ ਹੈ। ਸਥਾਨਕ ਪੁਲਸ ਅਧਿਕਾਰੀ ਮੁਹੰਮਦ ਫੈਸਲ ਰਾਣਾ ਨੇ ਕਿਹਾ ਹੈ ਕਿ ਅੱਲਾਮਾ ਇਕਬਾਲ ਓਪਨ ਯੂਨੀਵਰਸਿਟੀ ਦੇ ਐੱਮ.ਐੱਸ.ਸੀ. ਵਿਦਿਆਰਥਣ ਦੀ ਸ਼ਿਕਾਇਤ ਮਿਲਣ ਤੋਂ ਬਾਅਦ ਪੁਲਸ ਨੇ ਇਹ ਕਾਰਵਾਈ ਕੀਤੀ ਹੈ।
ਐੱਮ.ਐੱਸ.ਸੀ. 'ਚ ਪੜ੍ਹਦੀ ਵਿਆਹੁਤਾ ਵਿਦਿਆਰਥੀ ਨੇ ਸ਼ਿਕਾਇਤ 'ਚ ਕਿਹਾ ਸੀ ਕਿ ਉਸ ਨੂੰ ਕਾਲਜ ਦੇ ਬਾਹਰੋਂ ਅਗਵਾ ਕੀਤਾ ਗਿਆ ਤੇ ਚਾਕੂ ਦੀ ਨੋਕ 'ਤੇ ਉਸ ਨੂੰ ਮੁਲਜ਼ਮ ਦੇ ਘਰ ਲਿਆਂਦਾ ਗਿਆ, ਜਿਥੇ ਕਾਸਿਮ ਨੇ ਉਸ ਨਾਲ ਬਲਾਤਕਾਰ ਕੀਤਾ। ਕਿਰਨ ਨੇ ਇਸ ਦੌਰਾਨ ਵੀਡੀਓ ਬਣਾਈ। ਬਾਅਦ 'ਚ ਪੀੜਤ ਵਿਦਿਆਰਥਣ ਨੂੰ ਵੀਡੀਓ ਅਤੇ ਫੋਟੋਆਂ ਦਿਖਾ ਕੇ ਬਲੈਕਮੇਲ ਕੀਤਾ ਗਿਆ ਤੇ ਰਾਤ ਨੂੰ ਛੱਡ ਦਿੱਤਾ ਗਿਆ। ਮੀਡੀਆ ਰਿਪੋਰਟ ਦੇ ਅਨੁਸਾਰ, ਦੋਸ਼ੀ ਨੇ ਮੰਨਿਆ ਹੈ ਕਿ ਉਹ 8 ਤੋਂ 12 ਸਾਲ ਦੀਆਂ ਲੜਕੀਆਂ ਦਾ ਵੀ ਸਰੀਰਕ ਸ਼ੋਸ਼ਣ ਕੀਤਾ ਸੀ। ਪੁਲਸ ਨੇ ਮੁਲਜ਼ਮ ਦੇ ਘਰੋਂ ਕੁੜੀਆਂ ਦੀਆਂ ਇਤਰਾਜ਼ਯੋਗ ਵੀਡੀਓਜ਼ ਤੇ ਫੋਟੋਆਂ ਬਰਾਮਦ ਕੀਤੀਆਂ ਹਨ। ਪੁਲਸ ਅਧਿਕਾਰੀ ਨੇ ਦੱਸਿਆ ਕਿ ਇਸ ਜੋੜੀ ਨੇ ਇਕ ਅੰਤਰਰਾਸ਼ਟਰੀ ਪੋਰਨ ਵੈਬਸਾਈਟ ਨੂੰ ਵੀਡੀਓ ਤੇ ਫੋਟੋਆਂ ਵੇਚੀਆਂ ਸਨ।
ਕਿਰਨ ਨੂੰ ਨਿਆਂਇਕ ਹਿਰਾਸਤ 'ਚ ਅਡਿਆਲਾ ਜੇਲ੍ਹ ਭੇਜਿਆ ਗਿਆ ਤੇ ਕਾਸਿਮ ਨੂੰ ਪੁਲਸ ਰਿਮਾਂਡ 'ਚ ਰੱਖਿਆ ਗਿਆ। ਪੁਲਸ ਅਧਿਕਾਰੀ ਨੇ ਜੋੜੇ ਨਾਲ ਜੁੜੀਆਂ ਘਟਨਾਵਾਂ ਲਈ ਵੱਖਰੇ ਕੇਸ ਦਰਜ ਕਰਨ ਦੇ ਆਦੇਸ਼ ਦਿੱਤੇ ਹਨ। ਪੁਲਸ ਨੇ ਦੱਸਿਆ ਕਿ ਲੈਪਟਾਪ, ਹਾਰਡ ਡਿਸਕ, 2 ਮੋਬਾਈਲ ਫੋਨ ਜ਼ਬਤ ਕੀਤੇ ਗਏ ਹਨ ਤੇ ਇਨ੍ਹਾਂ ਨੂੰ ਫੌਰੈਂਸਿਕ ਜਾਂਚ ਲਈ ਭੇਜਿਆ ਗਿਆ ਹੈ। ਬੈੱਡ ਸ਼ੀਟ, ਟਿਸ਼ੂ ਪੇਪਰ ਅਤੇ ਹੋਰ ਕਾਗਜ਼ਾਤ ਵੀ ਡੀ.ਐੱਨ.ਏ. ਟੈਸਟ ਲਈ ਦਿੱਤੇ ਗਏ ਹਨ।
ਪੁਲਸ ਦੇ ਅਨੁਸਾਰ, ਜੋੜੇ ਵਲੋਂ ਇਨ੍ਹਾਂ ਜੁਰਮਾਂ ਨੂੰ ਅੰਜਾਮ ਦੇਣ ਦੇ ਪਿੱਛੇ ਦੋ ਉਦੇਸ਼ ਸਨ- ਪੀੜਤ ਪਰਿਵਾਰਾਂ ਤੋਂ ਪੈਸੇ ਹਾਸਲ ਕਰਨਾ ਤੇ ਅੰਤਰਰਾਸ਼ਟਰੀ ਸੈਕਸ ਟ੍ਰੇਡਰਾਂ ਨੂੰ ਵੀਡੀਓ ਸਪਲਾਈ ਕਰਨਾ। ਜੋੜਾ ਪੀੜਤ ਲੜਕੀਆਂ ਨੂੰ ਧਮਕੀਆਂ ਦਿੰਦਾ ਸੀ ਕਿ ਜੇ ਉਹ ਕਿਸੇ ਨਾਲ ਇਸ ਘਟਨਾ ਬਾਰੇ ਗੱਲ ਕਰਨਗੇ ਤਾਂ ਉਨ੍ਹਾਂ ਦਾ ਪੂਰਾ ਪਰਿਵਾਰ ਮਾਰ ਦਿੱਤਾ ਜਾਵੇਗਾ। ਇਸ ਦੇ ਨਾਲ ਹੀ, ਜ਼ਿਆਦਾਤਰ ਮਾਮਲਿਆਂ 'ਚ, ਪੀੜਤ ਪਰਿਵਾਰ ਉਸ ਦੀ ਸ਼ਿਕਾਇਤ ਕਰਨ ਲਈ ਤਿਆਰ ਨਹੀਂ ਸਨ। ਪਾਕਿਸਤਾਨ 'ਚ ਇਕ ਨਾਬਾਲਿਗ ਨਾਲ ਬਲਾਤਕਾਰ ਦੇ ਮਾਮਲਿਆਂ 'ਚ ਫਾਂਸੀ ਜਾਂ ਉਮਰ ਕੈਦ ਦੀ ਵਿਵਸਥਾ ਹੈ। ਜਦਕਿ ਅਗਵਾ ਕਰਨ 'ਤੇ 7 ਸਾਲ ਦੀ ਸਜ਼ਾ ਹੋ ਸਕਦੀ ਹੈ।
ਇਕ ਪੁਲਸ ਬੁਲਾਰੇ ਨੇ ਦੱਸਿਆ ਕਿ ਇਸ ਕੇਸ ਦੀ ਸੰਵੇਦਨਸ਼ੀਲਤਾ ਦੇ ਮੱਦੇਨਜ਼ਰ ਪੁਲਸ ਇਸ ਕੇਸ 'ਤੇ ਲਗਾਤਾਰ ਕੰਮ ਕਰ ਰਹੀ ਹੈ। ਅੰਤਰਰਾਸ਼ਟਰੀ ਸੈਕਸ ਵਪਾਰ ਨਾਲ ਜੁੜੇ ਮਾਮਲਿਆਂ ਦੀ ਤਲ ਤੱਕ ਜਾਂਚ ਕੀਤੀ ਜਾਏਗੀ। ਇਸ ਦੇ ਨਾਲ ਹੀ ਰਾਵਲਪਿੰਡੀ ਦੇ ਅੰਦਰੂਨੀ ਸੁਰੱਖਿਆ ਮਾਹਰ ਇਸਰਾਰ ਅਹਿਮਦ ਰਾਜਾ ਨੇ ਕਿਹਾ ਹੈ ਕਿ ਕਸੂਰ 'ਚ ਜ਼ੈਨਬ ਦੀ ਹੱਤਿਆ ਤੋਂ ਬਾਅਦ ਹਾਲ ਦੇ ਸਾਲਾਂ 'ਚ ਇਹ ਕੇਸ ਸਭ ਤੋਂ ਵੱਡਾ ਸੈਕਸ ਸਕੈਂਡਲ ਹੈ। ਉਨ੍ਹਾਂ ਸ਼ੱਕ ਜ਼ਾਹਰ ਕੀਤਾ ਕਿ ਸ਼ੱਕੀ ਵਿਅਕਤੀ ਦੁਆਰਾ ਜਿਨਸੀ ਸ਼ੋਸ਼ਣ ਕਰਨ ਵਾਲੀਆਂ ਕੁੜੀਆਂ ਦੀ ਗਿਣਤੀ 150 ਤੱਕ ਹੋ ਸਕਦੀ ਹੈ। ਰਾਜਾ ਦਾ ਕਹਿਣਾ ਹੈ ਕਿ ਕਿਉਂਕਿ ਪੁਲਸ ਕੋਲ ਤਕਨੀਕੀ ਸਿਖਲਾਈ, ਨਵੀਂ ਟੈਕਨਾਲੌਜੀ ਨਹੀਂ ਹੈ, ਇਸ ਲਈ ਜਾਂਚ ਅਧਿਕਾਰੀਆਂ ਲਈ ਅਜਿਹੇ ਮਾਮਲਿਆਂ ਨੂੰ ਸਾਬਤ ਕਰਨਾ ਅਕਸਰ ਮੁਸ਼ਕਲ ਹੁੰਦਾ ਹੈ। ਅਜਿਹੀ ਸਥਿਤੀ 'ਚ ਸ਼ੱਕੀ ਨੂੰ ਅਦਾਲਤ ਤੋਂ ਰਿਹਾਅ ਕੀਤੇ ਜਾਣ ਦਾ ਖ਼ਤਰਾ ਹੈ।
