ਬ੍ਰਿਟੇਨ ''ਚ ਮਹਾਤਮਾ ਗਾਂਧੀ ਦੀ ਯਾਦ ''ਚ ਜਾਰੀ ਕੀਤਾ ਜਾਵੇਗਾ ''ਸਿੱਕਾ''

ਲੰਡਨ (ਏਪੀ): ਭਾਰਤੀ ਸੁਤੰਤਰਤਾ ਅੰਦੋਲਨ ਦੌਰਾਨ ਵਿਸ਼ਵ ਨੂੰ ਅਹਿੰਸਾ ਦਾ ਉਪਦੇਸ਼ ਦੇਣ ਵਾਲੇ ਮਹਾਤਮਾ ਗਾਂਧੀ ਦੇ ਜੀਵਨ ਅਤੇ ਵਿਰਾਸਤ ਨੂੰ ਬਰਤਾਨੀਆ ਵਿੱਚ ਪਹਿਲੀ ਵਾਰ ਵਿਸ਼ੇਸ਼ ਕੁਲੈਕਟਰ ਸਿੱਕੇ ਰਾਹੀਂ ਯਾਦ ਕੀਤਾ ਜਾਵੇਗਾ। ਬ੍ਰਿਟੇਨ ਦੇ ਵਿੱਤ ਮੰਤਰੀ ਰਿਸ਼ੀ ਸੁਨਕ ਨੇ ਵੀਰਵਾਰ ਨੂੰ ਇਹ ਐਲਾਨ ਕੀਤਾ। ਇਹ ਗੋਲ ਸਿੱਕਾ ਹਿੰਦੂ ਤਿਉਹਾਰ ਦੀਵਾਲੀ ਦੀ ਯਾਦ ਵਿੱਚ ਰਾਇਲ ਟਕਸਾਲ ਦੇ ਸੰਗ੍ਰਹਿ ਦਾ ਹਿੱਸਾ ਹੋਵੇਗਾ, ਜਿਸ ਵਿੱਚ ਭਾਰਤ ਦਾ ਰਾਸ਼ਟਰੀ ਫੁੱਲ ਕਮਲ ਅਤੇ ਮਸ਼ਹੂਰ ਗਾਂਧੀ ਦੇ ਸ਼ਬਦ "ਮੇਰਾ ਜੀਵਨ ਹੀ ਮੇਰਾ ਸੰਦੇਸ਼ ਹੈ" ਅੰਕਿਤ ਹੈ। 

ਇਹ ਪਹਿਲੀ ਵਾਰ ਹੈ ਜਦੋਂ ਕਿਸੇ ਅਧਿਕਾਰਤ ਬ੍ਰਿਟਿਸ਼ ਸਿੱਕੇ ਰਾਹੀਂ ਗਾਂਧੀ ਨੂੰ ਯਾਦ ਕੀਤਾ ਜਾਵੇਗਾ। ਸੁਨਕ ਨੇ ਇੱਕ ਬਿਆਨ ਵਿੱਚ ਕਿਹਾ, "ਇੱਕ ਹਿੰਦੂ ਹੋਣ ਦੇ ਨਾਤੇ, ਮੈਂ ਦੀਵਾਲੀ 'ਤੇ ਇਸ ਸਿੱਕੇ ਨੂੰ ਜਾਰੀ ਕਰਕੇ ਮਾਣ ਮਹਿਸੂਸ ਕਰ ਰਿਹਾ ਹਾਂ। ਮਹਾਤਮਾ ਗਾਂਧੀ ਨੇ ਭਾਰਤ ਦੇ ਸੁਤੰਤਰਤਾ ਅੰਦੋਲਨ ਵਿੱਚ ਇੱਕ ਮਹੱਤਵਪੂਰਨ ਭੂਮਿਕਾ ਨਿਭਾਈ ਸੀ ਅਤੇ ਉਹਨਾਂ ਦੇ ਸ਼ਾਨਦਾਰ ਜੀਵਨ ਦੀ ਯਾਦ ਵਿੱਚ ਪਹਿਲੀ ਵਾਰ ਇੱਕ ਬ੍ਰਿਟਿਸ਼ ਸਿੱਕੇ ਦੁਆਰਾ ਯਾਦ ਕੀਤਾ ਜਾਣਾ ਸ਼ਾਨਦਾਰ ਹੈ।'' ਪੰਜ ਪੌਂਡ ਦਾ ਇਹ ਸਿੱਕਾ ਸੋਨੇ ਅਤੇ ਚਾਂਦੀ ਨਾਲ ਬਣਾਇਆ ਜਾਵੇਗਾ ਅਤੇ ਇਹ ਵੈਧ ਮੁਦਰਾ ਹੈ ਹਾਲਾਂਕਿ ਇਹ ਆਮ ਮੁਦਰਾ ਪ੍ਰਚਲਣ ਲਈ ਤਿਆਰ ਨਹੀਂ ਕੀਤਾ ਗਿਆ ਹੈ।  

ਪੜ੍ਹੋ ਇਹ ਅਹਿਮ ਖਬਰ - ਕੋਪ 26 ਸੰਮੇਲਨ 'ਚ ਭਾਰਤੀ ਵਿਦਿਆਰਥਣ ਨੇ ਕੀਤਾ ਸੰਬੋਧਿਤ, ਵਿਸ਼ਵ ਨੇਤਾਵਾਂ ਨੂੰ ਕੀਤੀ ਇਹ ਅਪੀਲ

ਦੀਵਾਲੀ ਦੇ ਮੌਕੇ 'ਤੇ ਇਹ ਸਿੱਕਾ ਵੀਰਵਾਰ ਤੋਂ ਵਿਕਰੀ ਲਈ ਉਪਲਬਧ ਹੋਵੇਗਾ। ਇਸ ਦੇ ਨਾਲ ਹੀ ਇੱਕ ਗ੍ਰਾਮ ਅਤੇ ਪੰਜ ਗ੍ਰਾਮ ਦੀਆਂ ਸੋਨੇ ਦੀਆਂ ਪੱਟੀਆਂ ਅਤੇ ਹਿੰਦੂ ਧਨ ਦੀ ਦੇਵੀ ਲਕਸ਼ਮੀ ਨੂੰ ਦਰਸਾਉਂਦੀ ਪਹਿਲੀ ਬ੍ਰਿਟਿਸ਼ ਸੋਨੇ ਦੀ ਪੱਟੀ ਵੀ ਵਿਕਰੀ ਲਈ ਉਪਲਬਧ ਹੋਵੇਗੀ। ਸੁਨਕ ਨੇ ਜੀਵਨ ਦੇ ਸਾਰੇ ਖੇਤਰਾਂ ਵਿੱਚ ਘੱਟ ਗਿਣਤੀ ਭਾਈਚਾਰਿਆਂ ਦੇ ਯੋਗਦਾਨ ਨੂੰ ਸਹੀ ਢੰਗ ਨਾਲ ਪੇਸ਼ ਕਰਨ ਦੀ ਮੁਹਿੰਮ ਦੇ ਹਿੱਸੇ ਵਜੋਂ ਪਿਛਲੇ ਸਾਲ ਇੱਕ ਨਵਾਂ "ਡਾਈਵਰਸਿਟੀ ਬਿਲਟ ਬ੍ਰਿਟੇਨ" ਸਿੱਕਾ ਜਾਰੀ ਕੀਤਾ ਸੀ। ਬ੍ਰਿਟੇਨ ਦੇ ਵਿਭਿੰਨ ਇਤਿਹਾਸ ਦਾ ਜਸ਼ਨ ਮਨਾਉਣ ਵਾਲੇ ਲਗਭਗ 10 ਮਿਲੀਅਨ ਸਿੱਕੇ ਅਕਤੂਬਰ 2020 ਵਿੱਚ ਪ੍ਰਚਲਨ ਵਿੱਚ ਆਏ।

ਨੋਟ- ਉਕਤ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।