ਸੂਡਾਨ ''ਚ ਆਰ.ਐਸ.ਐਫ ਦੇ ਹਮਲੇ, ਮਾਰੇ ਗਏ 32 ਨਾਗਰਿਕ

ਖਾਰਤੂਮ (ਯੂ.ਐਨ.ਆਈ.)- ਸੂਡਾਨੀ ਫੌਜ ਨੇ ਕਿਹਾ ਕਿ ਉੱਤਰੀ ਦਾਰਫੁਰ ਰਾਜ ਦੀ ਰਾਜਧਾਨੀ ਅਲ ਫਾਸ਼ਰ 'ਤੇ ਬਾਗੀ ਅਰਧ ਸੈਨਿਕ ਰੈਪਿਡ ਸਪੋਰਟ ਫੋਰਸਿਜ਼ (ਆਰ.ਐਸ.ਐਫ.) ਦੇ ਹਮਲੇ ਵਿੱਚ ਘੱਟੋ-ਘੱਟ 32 ਨਾਗਰਿਕ ਮਾਰੇ ਗਏ। ਸੂਡਾਨੀਜ਼ ਆਰਮਡ ਫੋਰਸਿਜ਼ (SAF) ਦੇ 6ਵੇਂ ਇਨਫੈਂਟਰੀ ਡਿਵੀਜ਼ਨ ਦੀ ਕਮਾਂਡ ਨੇ ਸ਼ੁੱਕਰਵਾਰ ਨੂੰ ਇੱਕ ਬਿਆਨ ਵਿੱਚ ਕਿਹਾ, "ਮਿਲੀਸ਼ੀਆ ਨੇ ਅੱਜ ਅਲ ਫਾਸ਼ਰ 'ਤੇ ਕਈ ਆਤਮਘਾਤੀ ਡਰੋਨ ਲਾਂਚ ਕੀਤੇ, ਨਾਲ ਹੀ ਸ਼ਹਿਰ 'ਤੇ ਗੋਲਾਬਾਰੀ ਕੀਤੀ।" ਫੌਜ ਨੇ ਕਿਹਾ ਕਿ ਮ੍ਰਿਤਕਾਂ ਵਿੱਚ ਚਾਰ ਔਰਤਾਂ ਅਤੇ 10 ਬੱਚੇ ਸ਼ਾਮਲ ਹਨ, ਜਦੋਂ ਕਿ 17 ਹੋਰ ਜ਼ਖਮੀ ਹੋਏ ਹਨ ਅਤੇ ਉਨ੍ਹਾਂ ਨੂੰ ਹਸਪਤਾਲ ਲਿਜਾਇਆ ਗਿਆ ਹੈ।       

ਐਲ ਫਾਸ਼ਰ ਵਿੱਚ ਇੱਕ ਸਥਾਨਕ ਵਲੰਟੀਅਰ ਸਮੂਹ ਨੇ ਆਰ.ਐਸ.ਐਫ ਹਮਲੇ ਦੀ ਪੁਸ਼ਟੀ ਕੀਤੀ ਅਤੇ ਕਿਹਾ ਕਿ ਡਰੋਨ ਅਤੇ ਤੋਪਖਾਨੇ ਨੇ ਸ਼ਹਿਰ ਦੇ ਉੱਤਰੀ ਅਤੇ ਪੂਰਬੀ ਹਿੱਸਿਆਂ ਨੂੰ ਨਿਸ਼ਾਨਾ ਬਣਾਇਆ। ਸਮੂਹ ਨੇ ਸ਼ਹਿਰ ਵਿੱਚ ਚੱਲ ਰਹੀ ਡਰੋਨ ਗਤੀਵਿਧੀ ਦੇ ਕਾਰਨ ਵਸਨੀਕਾਂ ਨੂੰ ਸੜਕਾਂ ਤੋਂ ਦੂਰ ਰਹਿਣ ਲਈ ਕਿਹਾ। ਸੂਡਾਨੀਜ਼ ਡਾਕਟਰਜ਼ ਨੈੱਟਵਰਕ ਨੇ ਅਲ ਫਾਸ਼ਰ ਨੇੜੇ ਜ਼ਮਜ਼ਮ ਵਿਸਥਾਪਨ ਕੈਂਪ 'ਤੇ ਦੂਜੇ ਆਰ.ਐਸ.ਐਫ ਹਮਲੇ ਦੀ ਰਿਪੋਰਟ ਕੀਤੀ, ਹਾਲਾਂਕਿ ਕਿਸੇ ਵੀ ਜਾਨੀ ਨੁਕਸਾਨ ਦੀ ਰਿਪੋਰਟ ਨਹੀਂ ਹੈ। ਨੈੱਟਵਰਕ ਨੇ ਹਮਲੇ ਦੇ ਨਾਲ ਹੋਈ ਭਾਰੀ ਗੋਲੀਬਾਰੀ ਦੀ ਸਖ਼ਤ ਨਿੰਦਾ ਕੀਤੀ।      

ਪੜ੍ਹੋ ਇਹ ਅਹਿਮ ਖ਼ਬਰ-ਅਮਰੀਕਾ 'ਚ ਰਹਿਣ ਸਬੰਧੀ ਨਵਾਂ ਨਿਯਮ ਲਾਗੂ, ਭਾਰਤੀਆਂ ਦੀ ਵਧੇਗੀ ਮੁਸ਼ਕਲ  

ਉੱਤਰੀ ਦਾਰਫੁਰ ਦੇ ਸਿਹਤ ਮੰਤਰਾਲੇ ਦੇ ਡਾਇਰੈਕਟਰ ਜਨਰਲ ਇਬਰਾਹਿਮ ਖੈਤਿਰ ਨੇ ਜ਼ਮਜ਼ਮ ਕੈਂਪ 'ਤੇ ਹਮਲੇ ਦੀ ਪੁਸ਼ਟੀ ਕੀਤੀ ਅਤੇ ਕਿਹਾ ਕਿ ਸ਼ਹਿਰ ਤੋਂ ਦੂਰੀ ਅਤੇ ਸੰਚਾਰ ਸਮੱਸਿਆਵਾਂ ਕਾਰਨ ਮ੍ਰਿਤਕਾਂ ਦੀ ਗਿਣਤੀ ਅਜੇ ਪਤਾ ਨਹੀਂ ਹੈ। ਗੌਰਤਲਬ ਹੈ ਕਿ 10 ਮਈ, 2024 ਤੋਂ ਅਲ ਫਾਸ਼ਰ ਵਿੱਚ ਸੂਡਾਨੀ ਫੌਜ ਅਤੇ ਆਰ.ਐਸ.ਐਫ ਵਿਚਕਾਰ ਭਿਆਨਕ ਲੜਾਈ ਚੱਲ ਰਹੀ ਹੈ, ਜੋ ਕਿ ਅਪ੍ਰੈਲ 2023 ਤੋਂ ਸੂਡਾਨ ਵਿੱਚ ਚੱਲ ਰਹੇ ਵਿਸ਼ਾਲ ਸੰਘਰਸ਼ ਦਾ ਹਿੱਸਾ ਹੈ। ਸੰਯੁਕਤ ਰਾਸ਼ਟਰ ਦੁਆਰਾ ਹਵਾਲਾ ਦਿੱਤੇ ਗਏ ਆਰਮਡ ਕਨਫਲਿਕਟ ਲੋਕੇਸ਼ਨ ਐਂਡ ਇਵੈਂਟ ਡੇਟਾ ਪ੍ਰੋਜੈਕਟ ਅਨੁਸਾਰ ਦੋਵਾਂ ਧੜਿਆਂ ਵਿਚਕਾਰ ਹੋਏ ਟਕਰਾਅ ਵਿੱਚ 29,683 ਤੋਂ ਵੱਧ ਲੋਕ ਮਾਰੇ ਗਏ ਹਨ। ਇੰਟਰਨੈਸ਼ਨਲ ਆਰਗੇਨਾਈਜ਼ੇਸ਼ਨ ਫਾਰ ਮਾਈਗ੍ਰੇਸ਼ਨ ਦੀ ਰਿਪੋਰਟ ਅਨੁਸਾਰ ਇਸ ਕਾਰਨ 1.5 ਕਰੋੜ ਤੋਂ ਵੱਧ ਲੋਕ ਬੇਘਰ ਹੋਏ ਹਨ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਆਪਣੀ ਰਾਏ।