ਆਸਟ੍ਰੇਲੀਆ ਹਮਲੇ 'ਚ ਵਾਲ-ਵਾਲ ਬਚਿਆ ਸਾਬਕਾ ਕਪਤਾਨ, ਰੈਸਟੋਰੈਂਟ 'ਚ ਲੁਕ ਕੇ...

ਵੈੱਬ ਡੈਸਕ : ਆਸਟ੍ਰੇਲੀਆ ਦਾ ਸ਼ਹਿਰ ਸਿਡਨੀ, ਜੋ ਕਿ ਦੁਨੀਆ ਦੀਆਂ ਸਭ ਤੋਂ ਸੁਰੱਖਿਅਤ ਥਾਵਾਂ ਵਿੱਚੋਂ ਇੱਕ ਹੈ, ਉੱਥੇ ਐਤਵਾਰ (14 ਦਸੰਬਰ 2025) ਨੂੰ ਬੌਂਡੀ ਬੀਚ 'ਤੇ ਕੁਝ ਹਮਲਾਵਰਾਂ ਨੇ ਅੰਨ੍ਹੇਵਾਹ ਗੋਲੀਆਂ ਚਲਾ ਦਿੱਤੀਆਂ। ਇਸ ਘਟਨਾ ਵਿੱਚ 10 ਤੋਂ ਵੱਧ ਲੋਕਾਂ ਦੀ ਜਾਨ ਚਲੀ ਗਈ, ਜਿਨ੍ਹਾਂ ਵਿੱਚ ਦੋ ਪੁਲਸ ਵਾਲੇ ਵੀ ਸ਼ਾਮਲ ਹਨ।

ਇਸ ਹਮਲੇ ਦੌਰਾਨ, ਇੰਗਲੈਂਡ ਦੇ ਸਾਬਕਾ ਕਪਤਾਨ ਮਾਈਕਲ ਵੌਨ ਵੀ ਬੌਂਡੀ ਬੀਚ ਖੇਤਰ ਵਿੱਚ ਹੀ ਮੌਜੂਦ ਸਨ। ਵੌਨ ਇਸ ਹਮਲੇ ਵਿੱਚ ਵਾਲ-ਵਾਲ ਬਚ ਗਏ ਹਨ। ਉਨ੍ਹਾਂ ਨੇ ਸੋਸ਼ਲ ਮੀਡੀਆ ਰਾਹੀਂ ਇਸ ਦੀ ਜਾਣਕਾਰੀ ਦਿੱਤੀ। ਵੌਨ ਨੇ ਦੱਸਿਆ ਕਿ ਉਨ੍ਹਾਂ ਨੇ ਇੱਕ ਰੈਸਟੋਰੈਂਟ ਵਿੱਚ ਲੁਕ ਕੇ ਆਪਣੀ ਜਾਨ ਬਚਾਈ ਅਤੇ ਉਹ ਹੁਣ ਪੂਰੀ ਤਰ੍ਹਾਂ ਸੁਰੱਖਿਅਤ ਹਨ।

Being locked in a restaurant in Bondi was scary .. Now home safe .. but thanks so much to the emergency services and the guy who confronted the terrorist .. thoughts with all who have been affected .. xxx

— Michael Vaughan (@MichaelVaughan) December 14, 2025

ਮਾਈਕਲ ਵੌਨ ਨੇ ਟਵੀਟ ਕਰਕੇ ਇਸ ਅਨੁਭਵ ਨੂੰ ਭਿਆਨਕ ਦੱਸਿਆ ਤੇ ਲਿਖਿਆ ਕਿ 'ਬੌਂਡੀ 'ਚ ਇੱਕ ਰੈਸਟੋਰੈਂਟ 'ਚ ਬੰਦ ਰਹਿਣਾ ਆਪਣੇ ਆਪ ਵਿੱਚ ਇੱਕ ਭਿਆਨਕ ਅਨੁਭਵ ਸੀ'। ਉਨ੍ਹਾਂ ਨੇ ਐਮਰਜੈਂਸੀ ਸੇਵਾਵਾਂ ਅਤੇ ਉਸ ਵਿਅਕਤੀ ਦਾ ਧੰਨਵਾਦ ਕੀਤਾ ਜਿਸ ਨੇ ਅੱਤਵਾਦੀ ਦਾ ਮੁਕਾਬਲਾ ਕੀਤਾ। 

ਇਸ ਗੋਲੀਬਾਰੀ ਤੋਂ ਬਾਅਦ ਆਸਟ੍ਰੇਲੀਆ ਵਿੱਚ ਸੁਰੱਖਿਆ ਸਖ਼ਤ ਕਰ ਦਿੱਤੀ ਗਈ ਹੈ। ਆਸਟ੍ਰੇਲੀਆ ਦੇ ਸਲਾਮੀ ਬੱਲੇਬਾਜ਼ ਉਸਮਾਨ ਖਵਾਜਾ ਸਮੇਤ ਕਈ ਦਿੱਗਜ ਖਿਡਾਰੀਆਂ ਨੇ ਇਸ ਹਮਲੇ ਦੀ ਸਖ਼ਤ ਨਿੰਦਾ ਕੀਤੀ ਹੈ। ਖਵਾਜਾ ਨੇ ਸੋਸ਼ਲ ਮੀਡੀਆ 'ਤੇ ਪੋਸਟ ਕਰਕੇ ਇਸ ਘਟਨਾ ਨੂੰ ਦੁਖਦ ਦੱਸਿਆ ਅਤੇ ਲਿਖਿਆ ਕਿ ਉਹ ਇਸ ਹਮਲੇ ਤੋਂ ਨਿਸ਼ਬਦ ਹਨ ਅਤੇ ਉਨ੍ਹਾਂ ਦਾ ਦਿਲ ਟੁੱਟ ਗਿਆ ਹੈ।

ਜ਼ਿਕਰਯੋਗ ਹੈ ਕਿ ਮਾਈਕਲ ਵੌਨ ਨੇ 2005 ਵਿੱਚ ਆਪਣੀ ਕਪਤਾਨੀ ਹੇਠ ਇੰਗਲੈਂਡ ਨੂੰ 2-1 ਨਾਲ ਐਸ਼ੇਜ਼ ਸੀਰੀਜ਼ ਜਿਤਵਾਈ ਸੀ। ਉਨ੍ਹਾਂ ਦੀ ਕਪਤਾਨੀ ਵਿੱਚ ਇੰਗਲੈਂਡ ਦੁਨੀਆ ਦੀ ਨੰਬਰ 1 ਟੈਸਟ ਟੀਮ ਵੀ ਬਣਿਆ ਸੀ।