ਪਾਕਿਸਤਾਨ ''ਚ ਬਾਲ ਸ਼ੋਸ਼ਣ ਦੇ ਅੰਕੜੇ ਚਿੰਤਾਜਨਕ: ਛੇ ਮਹੀਨਿਆਂ ''ਚ 1,914 ਮਾਮਲੇ ਦਰਜ

ਇਸਲਾਮਾਬਾਦ : ਚਾਈਲਡ ਪ੍ਰੋਟੈਕਸ਼ਨ ਐਨਜੀਓ 'ਸਾਹਿਲ' ਦੀ ਤਾਜ਼ਾ ਰਿਪੋਰਟ ਅਨੁਸਾਰ, ਇਸ ਸਾਲ ਦੇ ਪਹਿਲੇ ਛੇ ਮਹੀਨਿਆਂ (ਜਨਵਰੀ ਤੋਂ ਜੂਨ 2026) ਦੌਰਾਨ ਪਾਕਿਸਤਾਨ ਵਿੱਚ ਬਾਲ ਸ਼ੋਸ਼ਣ ਦੇ 1,914 ਮਾਮਲੇ ਸਾਹਮਣੇ ਆਏ ਹਨ। ਇਹਨਾਂ ਵਿੱਚ 49 ਅਜਿਹੇ ਮਾਮਲੇ ਵੀ ਸ਼ਾਮਲ ਹਨ ਜਿੱਥੇ ਨਵਜੰਮੇ ਬੱਚਿਆਂ ਨੂੰ ਸੜਕ ਕਿਨਾਰੇ ਲਾਵਾਰਿਸ ਛੱਡ ਦਿੱਤਾ ਗਿਆ ਸੀ।

ਇਹ ਰਿਪੋਰਟ ਦੇਸ਼ ਦੇ ਚਾਰਾਂ ਸੂਬਿਆਂ, ਇਸਲਾਮਾਬਾਦ, ਪਾਕਿ ਮਕਬੂਜ਼ਾ ਜੰਮੂ-ਕਸ਼ਮੀਰ ਅਤੇ ਗਿਲਗਿਤ-ਬਲਤਿਸਤਾਨ  ਦੇ ਰਾਸ਼ਟਰੀ ਅਤੇ ਖੇਤਰੀ ਅਖਬਾਰਾਂ ਤੋਂ ਇਕੱਠੇ ਕੀਤੇ ਡਾਟੇ ਦੇ ਆਧਾਰ 'ਤੇ ਤਿਆਰ ਕੀਤੀ ਗਈ ਹੈ।

ਅਪਰਾਧਾਂ ਦਾ ਵੇਰਵਾ

ਜਿਨਸੀ ਸ਼ੋਸ਼ਣ: 1,015 ਮਾਮਲੇ
ਅਗਵਾ: 558 ਮਾਮਲੇ
ਗੁੰਮਸ਼ੁਦਾ ਬੱਚੇ: 101 ਮਾਮਲੇ
ਬਾਲ ਵਿਆਹ: 35 ਮਾਮਲੇ
ਪੋਰਨੋਗ੍ਰਾਫੀ: ਜਿਨਸੀ ਸ਼ੋਸ਼ਣ ਤੋਂ ਬਾਅਦ ਪੋਰਨੋਗ੍ਰਾਫੀ ਦੇ 98 ਮਾਮਲੇ

ਪੀੜਤਾਂ ਦੀ ਉਮਰ ਅਤੇ ਲਿੰਗ

ਕੁੱਲ ਦਰਜ ਮਾਮਲਿਆਂ ਵਿੱਚੋਂ 58 ਫੀਸਦੀ ਪੀੜਤ ਕੁੜੀਆਂ ਸਨ। ਰਿਪੋਰਟ ਮੁਤਾਬਕ 11 ਤੋਂ 15 ਸਾਲ ਦੀ ਉਮਰ ਦੇ ਬੱਚੇ ਸਭ ਤੋਂ ਵੱਧ ਸ਼ਿਕਾਰ ਹੋਏ ਹਨ।

11 ਤੋਂ 15 ਸਾਲ: 598 ਬੱਚੇ
16 ਤੋਂ 18 ਸਾਲ: 356 ਬੱਚੇ
6 ਤੋਂ 10 ਸਾਲ: 329 ਬੱਚੇ
0 ਤੋਂ 5 ਸਾਲ: 95 ਬੱਚੇ
(487 ਮਾਮਲਿਆਂ ਵਿੱਚ ਬੱਚਿਆਂ ਦੀ ਉਮਰ ਦਾ ਜ਼ਿਕਰ ਨਹੀਂ ਸੀ।)

ਦੋਸ਼ੀ ਅਤੇ ਘਟਨਾ ਸਥਾਨ
43 ਫੀਸਦੀ ਮਾਮਲਿਆਂ ਵਿੱਚ ਸ਼ੋਸ਼ਣ ਕਰਨ ਵਾਲੇ ਪੀੜਤ ਦੇ ਜਾਣਕਾਰ/ਪਛਾਣੂ ਸਨ, ਜਦੋਂ ਕਿ 34 ਫੀਸਦੀ ਮਾਮਲਿਆਂ ਵਿੱਚ ਅਣਜਾਣ ਵਿਅਕਤੀ ਸ਼ਾਮਲ ਸਨ। 45 ਫੀਸਦੀ ਘਟਨਾਵਾਂ ਪੀੜਤਾਂ ਦੇ ਆਪਣੇ ਘਰਾਂ ਵਿੱਚ ਅਤੇ 18 ਫੀਸਦੀ ਦੋਸ਼ੀਆਂ ਦੇ ਘਰਾਂ ਵਿੱਚ ਵਾਪਰੀਆਂ। 3 ਫੀਸਦੀ ਮਾਮਲੇ ਖੁੱਲ੍ਹੇ ਖੇਤਾਂ ਵਿੱਚ ਹੋਏ, ਜਦਕਿ 21 ਫੀਸਦੀ ਵਿੱਚ ਜਗ੍ਹਾ ਦਾ ਵੇਰਵਾ ਨਹੀਂ ਸੀ। 57 ਫੀਸਦੀ ਮਾਮਲੇ ਸ਼ਹਿਰੀ ਖੇਤਰਾਂ ਵਿੱਚ ਅਤੇ 43 ਫੀਸਦੀ ਗ੍ਰਾਮੀਣ ਖੇਤਰਾਂ ਵਿੱਚ ਦਰਜ ਕੀਤੇ ਗਏ।

ਖੇਤਰੀ ਵੰਡ ਅਤੇ ਪੁਲਸ ਕਾਰਵਾਈ
ਸਭ ਤੋਂ ਵੱਧ 80 ਫੀਸਦੀ ਮਾਮਲੇ ਪੰਜਾਬ ਸੂਬੇ ਤੋਂ ਸਾਹਮਣੇ ਆਏ ਹਨ, ਜਦੋਂ ਕਿ ਸਿੰਧ ਵਿੱਚ 15 ਫੀਸਦੀ ਮਾਮਲੇ ਰਿਕਾਰਡ ਕੀਤੇ ਗਏ। ਬਾਕੀ 5 ਫੀਸਦੀ ਮਾਮਲੇ ਦੇਸ਼ ਦੇ ਹੋਰ ਹਿੱਸਿਆਂ ਤੋਂ ਹਨ। ਅੰਕੜਿਆਂ ਅਨੁਸਾਰ 89 ਫੀਸਦੀ ਮਾਮਲੇ ਪੁਲਿਸ ਕੋਲ ਦਰਜ ਕਰਵਾਏ ਗਏ। 7 ਮਾਮਲੇ ਪੁਲਿਸ ਕੋਲ ਦਰਜ ਨਹੀਂ ਹੋ ਸਕੇ ਅਤੇ 1 ਮਾਮਲੇ ਵਿੱਚ ਪੁਲਸ ਨੇ ਕੇਸ ਦਰਜ ਕਰਨ ਤੋਂ ਇਨਕਾਰ ਕਰ ਦਿੱਤਾ ਸੀ।