BLA ਨੇ ਡੈੱਥ ਸਕੁਆਡ ਦੇ ਕਮਾਂਡਰ ਸ਼ਫੀਕ ਮੇਂਗਲ ਦੇ ''ਕਿਲ੍ਹੇ'' ''ਤੇ ਕਰ''ਤਾ ਹਮਲਾ ! ਕਈ ਲੋਕਾਂ ਦੀ ਮੌਤ

ਇੰਟਰਨੈਸ਼ਨਲ ਡੈਸਕ : ਬਲੋਚਿਸਤਾਨ ਦੇ ਖੁਜ਼ਦਾਰ 'ਚ ਬਲੋਚ ਲਿਬਰੇਸ਼ਨ ਆਰਮੀ (BLA) ਦੇ ਮਜੀਦ ਬ੍ਰਿਗੇਡ ਨੇ ਪਾਕਿਸਤਾਨ ਪੀਪਲਜ਼ ਪਾਰਟੀ ਦੇ ਸਥਾਨਕ ਆਗੂ ਅਤੇ ਕਥਿਤ ‘ਡੈੱਥ ਸਕੁਐਡ’ ਕਮਾਂਡਰ ਸ਼ਫੀਕ ਉਰ ਰਹਿਮਾਨ ਮੇਂਗਲ ਦੇ ਭਾਰੀ ਸੁਰੱਖਿਆ ਵਾਲੇ ਕੰਪਾਊਂਡ 'ਤੇ ਇੱਕ ਜ਼ਬਰਦਸਤ ਆਤਮਘਾਤੀ ਹਮਲਾ ਕੀਤਾ ਹੈ। 8 ਜੁਲਾਈ ਨੂੰ ਹੋਈ ਇਸ ਭਿਆਨਕ ਲੜਾਈ ਵਿੱਚ ਵੱਡੀ ਗਿਣਤੀ ਵਿੱਚ ਜਾਨੀ ਨੁਕਸਾਨ ਹੋਣ ਦੀ ਖ਼ਬਰ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਵਿਸਫੋਟਕਾਂ ਨਾਲ ਭਰੀ ਇੱਕ ਗੱਡੀ ਨੇ ਮੇਂਗਲ ਦੇ ਮਜ਼ਬੂਤ ਕੰਪਾਊਂਡ ਦੇ ਮੁੱਖ ਗੇਟ ਨੂੰ ਟੱਕਰ ਮਾਰੀ, ਜਿਸ ਨਾਲ ਸੁਰੱਖਿਆ ਚੌਕੀਆਂ ਅਤੇ ਇਮਾਰਤ ਦਾ ਇੱਕ ਹਿੱਸਾ ਪੂਰੀ ਤਰ੍ਹਾਂ ਤਬਾਹ ਹੋ ਗਿਆ। ਇਸ ਧਮਾਕੇ ਤੋਂ ਬਾਅਦ ਹਥਿਆਰਬੰਦ ਲੜਾਕੇ ਕੰਪਾਊਂਡ ਵਿੱਚ ਦਾਖਲ ਹੋ ਗਏ ਅਤੇ ਲਗਭਗ ਤਿੰਨ ਘੰਟੇ ਤੱਕ ਰਾਕਟਾਂ, ਗ੍ਰਨੇਡਾਂ ਅਤੇ ਭਾਰੀ ਹਥਿਆਰਾਂ ਨਾਲ ਜੰਗ ਜਾਰੀ ਰਹੀ।

ਪਾਕਿਸਤਾਨੀ ਮੀਡੀਆ ਅਨੁਸਾਰ ਇਸ ਹਮਲੇ ਵਿੱਚ ਘੱਟੋ-ਘੱਟ 17 ਲੋਕ ਮਾਰੇ ਗਏ ਹਨ, ਜਿਨ੍ਹਾਂ ਵਿੱਚ ਸੁਰੱਖਿਆ ਗਾਰਡ ਅਤੇ ਪੁਲਿਸ ਕਰਮੀ ਸ਼ਾਮਲ ਹਨ, ਜਦਕਿ 30 ਦੇ ਕਰੀਬ ਲੋਕ ਜ਼ਖਮੀ ਹੋਏ ਹਨ। ਦੂਜੇ ਪਾਸੇ, ਬੀ.ਐਲ.ਏ. ਨੇ ਦਾਅਵਾ ਕੀਤਾ ਹੈ ਕਿ ਉਨ੍ਹਾਂ ਨੇ ਮੇਂਗਲ ਦੇ ਨੈਟਵਰਕ ਦੇ 34 ਮੈਂਬਰਾਂ ਨੂੰ ਮਾਰ ਦਿੱਤਾ ਹੈ, ਜਿਨ੍ਹਾਂ ਵਿੱਚ ਇਸਲਾਮਿਕ ਸਟੇਟ ਖੁਰਾਸਾਨ (ISIS-K) ਅਤੇ ਲਸ਼ਕਰ-ਏ-ਤੋਇਬਾ ਨਾਲ ਜੁੜੇ ਕਾਰਕੁਨ ਵੀ ਸ਼ਾਮਲ ਸਨ। ਸ਼ਫੀਕ ਮੇਂਗਲ ਇਸ ਹਮਲੇ ਵਿੱਚ ਬਚ ਨਿਕਲਣ ਵਿੱਚ ਕਾਮਯਾਬ ਰਿਹਾ।ਸ਼ਫੀਕ ਮੇਂਗਲ ਪਾਕਿਸਤਾਨ ਦੇ ਸਾਬਕਾ ਸੰਘੀ ਮੰਤਰੀ ਨਸੀਰ ਮੇਂਗਲ ਦਾ ਪੁੱਤਰ ਹੈ। ਬਲੋਚ ਰਾਸ਼ਟਰਵਾਦੀਆਂ ਅਤੇ ਮਨੁੱਖੀ ਅਧਿਕਾਰ ਕਾਰਕੁਨਾਂ ਵੱਲੋਂ ਉਸ ਨੂੰ ਪਾਕਿਸਤਾਨੀ ਸੁਰੱਖਿਆ ਏਜੰਸੀਆਂ ਦੁਆਰਾ ਸਪਾਂਸਰ ਕੀਤੇ ਗਏ ਉਸ ‘ਡੈੱਥ ਸਕੁਐਡ’ ਸਿਸਟਮ ਦਾ ਮੁੱਖ ਕਮਾਂਡਰ ਮੰਨਿਆ ਜਾਂਦਾ ਹੈ, ਜੋ ਬਲੋਚਿਸਤਾਨ ਵਿੱਚ ਕਥਿਤ ਤੌਰ 'ਤੇ ਲੋਕਾਂ ਨੂੰ ਅਗਵਾ ਕਰਨ, ਤਸ਼ੱਦਦ ਕਰਨ ਅਤੇ ਕਤਲ ਕਰਨ ਲਈ ਜ਼ਿੰਮੇਵਾਰ ਹੈ। ਉਸ ਦਾ ਨਾਮ 2014 ਵਿੱਚ ਟੂਟਕ ਵਿੱਚ ਮਿਲੀਆਂ ਸਮੂਹਿਕ ਕਬਰਾਂ ਨਾਲ ਵੀ ਜੁੜਿਆ ਸੀ।

ਮਾਹਰਾਂ ਅਨੁਸਾਰ, ਇਹ ਹਮਲਾ ਸਿਰਫ਼ ਇੱਕ ਸਿਆਸੀ ਹਮਲਾ ਨਹੀਂ ਸੀ, ਸਗੋਂ ਪਾਕਿਸਤਾਨ ਦੇ ਉਸ ਸੁਰੱਖਿਆ ਢਾਂਚੇ 'ਤੇ ਸਿੱਧੀ ਚੋਟ ਹੈ ਜੋ ਬਲੋਚ ਰਾਸ਼ਟਰਵਾਦ ਨੂੰ ਦਬਾਉਣ ਲਈ ਸਥਾਨਕ ਹਥਿਆਰਬੰਦ ਗਿਰੋਹਾਂ ਅਤੇ ਜਿਹਾਦੀ ਸੰਗਠਨਾਂ ਦੀ ਵਰਤੋਂ ਕਰਦਾ ਹੈ। ਮੇਂਗਲ ਦੇ ਕੰਪਾਊਂਡ ਨੂੰ ਅਕਸਰ 'ਰਾਜ ਦੇ ਅੰਦਰ ਰਾਜ' ਵਜੋਂ ਦੇਖਿਆ ਜਾਂਦਾ ਸੀ, ਜਿੱਥੇ ਕਥਿਤ ਤੌਰ 'ਤੇ ਨਿੱਜੀ ਜੇਲ੍ਹਾਂ ਚਲਾਈਆਂ ਜਾਂਦੀਆਂ ਸਨ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8