ਅਰੁੰਧਤੀ ਰਾਏ ਤੇ ਹਾਨ ਕਾਂਗ ਅਮਰੀਕੀ ‘ਕ੍ਰਿਟਿਕਸ ਸਰਕਲ’ ਪੁਰਸਕਾਰ ਨਾਲ ਸਨਮਾਨਿਤ

ਵਾਸ਼ਿੰਗਟਨ (ਭਾਸ਼ਾ) : ਨੋਬਲ ਪੁਰਸਕਾਰ ਜੇਤੂ ਹਾਨ ਕਾਂਗ ਦੇ ਇਕ ਨਾਵਲ, ਆਰਟੀਫੀਸ਼ੀਅਲ ਇੰਟੈਲੀਜੈਂਸ (ਏ. ਆਈ.) ਅਤੇ ਓਪਨ ਏ. ਆਈ. ’ਤੇ ਕਰੇਨ ਹਾਓ ਦੀ ਖੋਜ ਅਤੇ ਲੇਖਿਕਾ ਅਰੁੰਧਤੀ ਰਾਏ ਦੀ ਇਕ ਸਵੈ-ਜੀਵਨੀ ਨੂੰ ਅਮਰੀਕਾ ਦੇ ਸਾਲਾਨਾ ‘ਨੈਸ਼ਨਲ ਬੁੱਕ ਕ੍ਰਿਟਿਕਸ ਸਰਕਲ’ ਪੁਰਸਕਾਰਾਂ ਨਾਲ ਸਨਮਾਨਿਤ ਕੀਤਾ ਗਿਆ ਹੈ।

ਹਾਨ ਦਾ ਨਾਵਲ ‘ਵੀ ਡੂ ਨੌਟ ਪਾਰਟ’ ਕੋਰੀਆਈ ਮੁੱਖ ਭੂਮੀ ਦੇ ਦੱਖਣ ਵਿਚ ਸਥਿਤ ਜੇਜੂ ਟਾਪੂ ਵਿਚ 1948-1949 ਦੇ ਵਿਦਰੋਹ ਦੀ ਕਹਾਣੀ ਹੈ, ਜਿਸ ਵਿਚ ਹਜ਼ਾਰਾਂ ਲੋਕ ਮਾਰੇ ਗਏ ਸਨ। ਇਸ ਨਾਵਲ ਦਾ ਅਨੁਵਾਦ ਈ. ਯੇਵੋਨ ਅਤੇ ਪੈਜ ਅਨੀਆਹ ਮੌਰਿਸ ਨੇ ਕੀਤਾ ਹੈ। ਪੁਰਸਕਾਰਾਂ ਦੀ ਕਥਾ ਕਮੇਟੀ ਦੀ ਪ੍ਰਧਾਨ ਹੀਥਰ ਸਕੌਟ ਪਾਰਟਿੰਗਟਨ ਨੇ ਇਸ ਨਾਵਲ ਬਾਰੇ ਕਿਹਾ ਕਿ ਇਸ ਦੀ ਕਹਾਣੀ ‘ਇਕ ਪ੍ਰਭਾਵਸ਼ਾਲੀ ਅਤੇ ਕੀਲ ਲੈਣ ਵਾਲੇ ਸੁਪਨੇ ਵਾਂਗ ਮਨ ਵਿਚ ਵੱਸ ਜਾਂਦੀ ਹੈ।’

‘ਲਾਈਫਟਾਈਮ ਅਚੀਵਮੈਂਟ’ ਸ਼੍ਰੇਣੀ ਦਾ ਪੁਰਸਕਾਰ ਲੇਖਿਕਾ ਅਤੇ ਪੱਤਰਕਾਰ ਫ੍ਰਾਂਸਿਸ ਫਿਟਜ਼ਗੇਰਾਲਡ ਨੂੰ ਦਿੱਤਾ ਗਿਆ, ਜਿਨ੍ਹਾਂ ਦੀ ਵੀਅਤਨਾਮ ਯੁੱਧ ’ਤੇ ਅਾਧਾਰਤ 1972 ਦੀ ਪੁਸਤਕ ‘ਫਾਇਰ ਇਨ ਦ ਲੇਕ’ ਕਾਫੀ ਚਰਚਿਤ ਹੈ। ‘ਨੈਸ਼ਨਲ ਪਬਲਿਕ ਰੇਡੀਓ। (ਐੱਨ. ਪੀ. ਆਰ.) ਅਤੇ ‘ਪਬਲਿਕ ਬ੍ਰੌਡਕਾਸਟਿੰਗ ਸਰਵਿਸ’ (ਪੀ. ਬੀ. ਐੱਸ.) ਨੂੰ ਉਨ੍ਹਾਂ ਸੰਸਥਾਵਾਂ ਵਜੋਂ ਪੁਰਸਕ੍ਰਿਤ ਕੀਤਾ ਗਿਆ, ਜਿਨ੍ਹਾਂ ਨੇ ਪੁਸਤਕ ਸੱਭਿਆਚਾਰ ਵਿਚ ਮਹੱਤਵਪੂਰਨ ਯੋਗਦਾਨ ਪਾਇਆ ਹੈ। ਅਰੁੰਧਤੀ ਰਾਏ ਨੂੰ ਉਨ੍ਹਾਂ ਦੀ ਕਿਰਤ ‘ਮਦਰ ਮੈਰੀ ਕਮਜ਼ ਟੂ ਮੀ’ ਲਈ ਸਵੈ-ਜੀਵਨੀ ਸ਼੍ਰੇਣੀ ਵਿਚ ਸਨਮਾਨਿਤ ਕੀਤਾ ਗਿਆ।