ਬਾਰੀ ਸ਼ਹਿਰ ਵਿਖੇ ਲੱਗੇ ਪਾਸਪੋਰਟ ਕੈਂਪ ''ਚ 300 ਭਾਰਤੀਆਂ ਨੇ ਲਿਆ ਲਾਭ

ਰੋਮ (ਦਲਵੀਰ ਸਿੰਘ ਕੈਂਥ)- ਭਾਰਤੀ ਅੰਬੈਸੀ ਰੋਮ ਨੇ ਰਾਜਦੂਤ ਮੈਡਮ ਵਾਣੀ ਰਾਓ ਦੇ ਦਿਸ਼ਾ-ਨਿਰਦੇਸ਼ ਤਹਿਤ ਵਿਸ਼ੇਸ਼ ਪਾਸਪੋਰਟ ਕੈਂਪ ਲਗਾਉਣੇ ਸ਼ੁਰੂ ਕੀਤੇ ਹਨ ਤਾਂ ਜੋ ਜਿਹੜੇ ਭਾਰਤੀ ਕੰਮਾਂ ਦੇ ਰੁਝੇਵਿਆਂ ਕਾਰਨ ਜਾਂ ਦੂਰ-ਦੁਰਾਡੇ ਇਲਾਕਿਆਂ ਵਿੱਚ ਰਹਿੰਦੇ ਹੋਣ ਕਾਰਨ ਅੰਬੈਸੀ ਦੀਆਂ ਪੇਪਰਾਂ ਸੰਬਧੀ ਸੇਵਾਵਾਂ ਲੈਣ ਲਈ ਅਸਮੱਰਥ ਹੁੰਦੇ ਹਨ, ਉਹ ਬਿਨ੍ਹਾਂ ਆਪਣੇ ਕੰਮ ਦਾ ਨੁਕਸਾਨ ਕੀਤੇ ਅੰਬੈਸੀ ਦੀਆਂ ਸੇਵਾਵਾਂ ਨਿਰਵਿਘਨ ਇਨ੍ਹਾਂ ਕੈਂਪਾਂ ਵਿਚ ਪ੍ਰਾਪਤ ਕਰ ਸਕਣ।

ਭਾਰਤੀ ਅੰਬੈਸੀ ਰੋਮ ਨੇ ਹਾਲ ਹੀ ਵਿੱਚ ਰਿਜੋਕਲਾਬਰੀਆ ਤੇ ਸਲੇਰਨੋ ਆਦਿ ਇਲਾਕਿਆਂ ਵਿੱਚ ਪਾਸਪੋਰਟ ਕੈਂਪ ਲਗਾ ਕੇ ਭਾਰਤੀ ਭਾਈਚਾਰੇ ਦੀ ਭਰਪੂਰ ਸੇਵਾ ਕੀਤੀ। ਇਸੇ ਤਰ੍ਹਾਂ ਸ਼ਹਿਰ ਬਾਰੀ ਵਿਖੇ ਵਿਸ਼ੇਸ਼ ਪਾਸਪੋਰਟ ਕੈਂਪ ਸਥਾਨਕ ਨਗਰ ਕੌਂਸਲ ਦੇ ਸਹਿਯੋਗ ਨਾਲ ਲਗਾਇਆ, ਜਿਸ ਵਿੱਚ ਭਾਰਤੀ ਅੰਬੈਸੀ ਰੋਮ ਦੇ ਫ਼ਸਟ ਸੈਕਟਰੀ ਅਤੇ ਹੋਰ ਅਧਿਕਾਰੀਆਂ ਤੋਂ ਇਲਾਵਾ ਬਾਰੀ ਦੇ ਮੇਅਰ ਵੀਤੋ ਲੇਚੇਜੇ ਨੇ ਵੀ ਸ਼ਿਰਕਤ ਕੀਤੀ। ਮੇਅਰ ਵੱਲੋਂ ਫ਼ਸਟ ਸੈਕਟਰੀ ਦਾ ਜਿੱਥੇ ਨਿੱਘਾ ਸਵਾਗਤ ਕੀਤਾ ਗਿਆ, ਉੱਥੇ ਹੀ ਵਿਸ਼ੇਸ਼ ਸਨਮਾਨ ਵੀ ਕੀਤਾ। ਇਸ ਕੈਂਪ ਵਿਚ 300 ਦੇ ਕਰੀਬ ਭਾਰਤੀਆਂ ਨੇ ਲਾਭ ਲਿਆ। ਇਸ ਮੌਕੇ ਭਾਰਤੀਆਂ ਨੂੰ ਨਵੇਂ ਬਣੇ ਪਾਸਪੋਰਟ ਦੇਣ,ਓ. ਸੀ. ਆਈ. ਕਾਰਡ ਦੇ ਨਾਲ ਹੋਰ ਵੀ ਕਈ ਤਰ੍ਹਾਂ ਦੀਆਂ ਸੇਵਾਵਾਂ ਪ੍ਰਦਾਨ ਕੀਤੀਆ ਗਈਆਂ।