BLA ਦਾ ਪਹਿਲਾ ਸਮੁੰਦਰੀ ਹਮਲਾ, ਪਾਕਿਸਤਾਨੀ ਕੋਸਟ ਗਾਰਡ ਦੇ 3 ਜਵਾਨਾਂ ਦੀ ਮੌਤ

ਕਰਾਚੀ/ਬਲੂਚਿਸਤਾਨ : ਪਾਕਿਸਤਾਨ ਵਿੱਚ ਸਰਗਰਮ ਬਲੂਚ ਲਿਬਰੇਸ਼ਨ ਆਰਮੀ (BLA) ਨੇ ਪਾਕਿਸਤਾਨੀ ਸੁਰੱਖਿਆ ਬਲਾਂ 'ਤੇ ਆਪਣੇ ਪਹਿਲੇ ਸਮੁੰਦਰੀ ਹਮਲੇ ਦੀ ਜ਼ਿੰਮੇਵਾਰੀ ਲਈ ਹੈ। ਇਸ ਹਮਲੇ ਵਿੱਚ ਕੋਸਟ ਗਾਰਡ ਦੇ ਤਿੰਨ ਜਵਾਨ ਮਾਰੇ ਗਏ ਹਨ, ਜਿਸ ਨੂੰ ਬਲੂਚ ਬਾਗੀਆਂ ਦੀ ਰਣਨੀਤੀ ਵਿੱਚ ਇੱਕ ਵੱਡਾ ਬਦਲਾਅ ਮੰਨਿਆ ਜਾ ਰਿਹਾ ਹੈ।

ਬਲੂਚ ਬਾਗੀਆਂ ਨੇ ਇਹ ਹਮਲਾ ਬਲੂਚਿਸਤਾਨ ਦੇ ਤੱਟੀ ਸ਼ਹਿਰ ਜਿਵਾਨੀ ਦੇ ਨੇੜੇ ਅਰਬ ਸਾਗਰ ਵਿੱਚ ਕੀਤਾ। BLA ਦੀ ਮੀਡੀਆ ਵਿੰਗ 'ਹੱਕਲ' ਦੁਆਰਾ ਜਾਰੀ ਕੀਤੇ ਗਏ ਇੱਕ ਵੀਡੀਓ ਵਿੱਚ ਬਾਗੀ ਇੱਕ ਸਪੀਡ ਬੋਟ 'ਤੇ ਸਵਾਰ ਹੋ ਕੇ ਪਾਕਿਸਤਾਨੀ ਕੋਸਟ ਗਾਰਡ ਦੀ ਗਸ਼ਤੀ ਕਿਸ਼ਤੀ 'ਤੇ ਮਸ਼ੀਨ ਗਨ ਨਾਲ ਅੰਨ੍ਹੇਵਾਹ ਗੋਲੀਆਂ ਚਲਾਉਂਦੇ ਦਿਖਾਈ ਦੇ ਰਹੇ ਹਨ। ਇਹ ਹਮਲਾ ਉਸ ਸਮੇਂ ਹੋਇਆ ਜਦੋਂ ਕਿਸ਼ਤੀ ਪਾਕਿਸਤਾਨ-ਈਰਾਨ ਸਮੁੰਦਰੀ ਸੀਮਾ ਦੇ ਨੇੜੇ ਨਿਯਮਿਤ ਗਸ਼ਤ 'ਤੇ ਸੀ।

BLA ਨੇ ਦਾਵਾ ਕੀਤਾ ਹੈ ਕਿ ਇਸ ਹਮਲੇ ਵਿੱਚ ਮਾਰੇ ਗਏ ਤਿੰਨੋਂ ਜਵਾਨਾਂ ਦੀ ਪਛਾਣ ਨਾਇਕ ਅਫਜ਼ਲ, ਸਿਪਾਹੀ ਜਮੀਲ ਅਤੇ ਸਿਪਾਹੀ ਉਮਰ ਵਜੋਂ ਹੋਈ ਹੈ। ਪਾਕਿਸਤਾਨੀ ਖੁਫੀਆ ਅਤੇ ਪੁਲਸ ਅਧਿਕਾਰੀਆਂ ਨੇ ਵੀ ਪੁਸ਼ਟੀ ਕੀਤੀ ਹੈ ਕਿ ਜਦੋਂ ਬਾਗੀਆਂ ਨੇ ਗੋਲੀਬਾਰੀ ਸ਼ੁਰੂ ਕੀਤੀ ਤਾਂ ਕਿਸ਼ਤੀ ਤੱਟੀ ਇਲਾਕੇ ਵਿੱਚ ਗਸ਼ਤ ਕਰ ਰਹੀ ਸੀ।

BLA ਦੇ ਬੁਲਾਰੇ ਜੀਯਾਂਦ ਬਲੂਚ ਨੇ ਇੱਕ ਬਿਆਨ ਜਾਰੀ ਕਰਦਿਆਂ ਕਿਹਾ ਕਿ ਸਮੂਹ ਨੇ ਆਪਣੀ ਅਧਿਕਾਰਤ ਨੌਸੈਨਿਕ ਸ਼ਾਖਾ ਦੇ ਰੂਪ ਵਿੱਚ 'ਹੰਮਲ ਮੈਰੀਟਾਈਮ ਡਿਫੈਂਸ ਫੋਰਸ' (HMDF) ਦਾ ਗਠਨ ਕੀਤਾ ਹੈ। ਉਨ੍ਹਾਂ ਇਸ ਨੂੰ 'ਰਾਸ਼ਟਰੀ ਨੌਸੈਨਾ' ਦੀ ਸ਼ੁਰੂਆਤ ਦੱਸਿਆ, ਜਿਸ ਦਾ ਮਕਸਦ ਸਮੁੰਦਰੀ ਰਸਤਿਆਂ ਰਾਹੀਂ ਬਲੂਚ ਸਰੋਤਾਂ ਦੀ ਕਥਿਤ ਲੁੱਟ ਨੂੰ ਰੋਕਣਾ ਅਤੇ ਦੁਸ਼ਮਣ ਨੂੰ ਹਰ ਮੋਰਚੇ 'ਤੇ ਨੁਕਸਾਨ ਪਹੁੰਚਾਉਣਾ ਹੈ।

ਇਹ ਹਮਲਾ ਰਣਨੀਤਕ ਤੌਰ 'ਤੇ ਮਹੱਤਵਪੂਰਨ ਗਵਾਦਰ ਬੰਦਰਗਾਹ ਦੇ ਨੇੜੇ ਹੋਇਆ ਹੈ, ਜੋ ਚੀਨ-ਪਾਕਿਸਤਾਨ ਆਰਥਿਕ ਗਲਿਆਰੇ (CPEC) ਦਾ ਇੱਕ ਅਹਿਮ ਹਿੱਸਾ ਹੈ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਸ ਸਮੁੰਦਰੀ ਹਮਲੇ ਨਾਲ ਇਲਾਕੇ ਵਿੱਚ ਬੁਨਿਆਦੀ ਢਾਂਚੇ ਦੀ ਸੁਰੱਖਿਆ ਨੂੰ ਲੈ ਕੇ ਚਿੰਤਾਵਾਂ ਵਧ ਗਈਆਂ ਹਨ, ਕਿਉਂਕਿ ਹੁਣ ਵਿਦਰੋਹੀ ਜ਼ਮੀਨ ਦੇ ਨਾਲ-ਨਾਲ ਸਮੁੰਦਰ ਵਿੱਚ ਵੀ ਨਵੇਂ ਮੋਰਚੇ ਖੋਲ੍ਹ ਰਹੇ ਹਨ। ਹਮਲੇ ਤੋਂ ਬਾਅਦ ਪਾਕਿਸਤਾਨੀ ਅਧਿਕਾਰੀਆਂ ਨੇ ਤੱਟੀ ਸੁਰੱਖਿਆ ਵਧਾ ਦਿੱਤੀ ਹੈ ਅਤੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।