ਅਫਗਾਨਿਸਤਾਨ ਵਿੱਚ 1,500 ਬੱਚੇ ਡਾਈਰੀਆ ਨਾਲ ਪੀੜਤ

ਕਾਬੁਲ, (ਏਜੰਸੀ) : ਉੱਤਰੀ ਤਖਾਰ ਸੂਬੇ ਵਿੱਚ ਪਿਛਲੇ ਹਫ਼ਤੇ ਦੌਰਾਨ 1500 ਅਫ਼ਗਾਨ ਬੱਚੇ ਡਾਈਰੀਆ ਨਾਲ ਪੀੜਤ ਪਾਏ ਗਏ ਹਨ। ਇੱਕ ਸਥਾਨਕ ਸਿਹਤ ਅਧਿਕਾਰੀ ਨੇ ਬੁੱਧਵਾਰ ਨੂੰ ਇਸ ਦੀ ਜਾਣਕਾਰੀ ਦਿੱਤੀ। ਅਧਿਕਾਰੀ ਨੇ ਸਿਨਹੂਆ ਨਿਊਜ਼ ਏਜੰਸੀ ਨੂੰ ਦੱਸਿਆ, "ਪੀੜਤ ਬੱਚਿਆਂ ਨੂੰ ਸੂਬਾਈ ਹਸਪਤਾਲ ਲਿਜਾਇਆ ਗਿਆ ਹੈ, ਜਿੱਥੇ ਅੱਠ ਸਾਲ ਤੋਂ ਘੱਟ ਉਮਰ ਦੇ ਜ਼ਿਆਦਾਤਰ ਬੱਚਿਆਂ ਦਾ ਇਲਾਜ ਕੀਤਾ ਗਿਆ ਹੈ।"

ਉਨ੍ਹਾਂ ਕਿਹਾ ਕਿ ਬੀਮਾਰੀ ਅਜੇ ਕੰਟਰੋਲ 'ਚ ਹੈ। ਸੂਤਰਾਂ ਅਨੁਸਾਰ ਗਰਮ ਮੌਸਮ, ਦੂਸ਼ਿਤ ਪਾਣੀ ਪੀਣ ਅਤੇ ਸਿਹਤ ਸੰਭਾਲ ਸੁਝਾਵਾਂ ਦੀ ਪਾਲਣਾ ਕਰਨ ਵਿੱਚ ਪਰਿਵਾਰਾਂ ਦੀ ਅਸਫਲਤਾ ਸੂਬੇ ਵਿੱਚ ਬੀਮਾਰੀ ਫੈਲਣ ਦੇ ਕਾਰਨ ਹਨ। ਦੋ ਹਫ਼ਤੇ ਪਹਿਲਾਂ ਕੰਧਾਰ ਪ੍ਰਾਂਤ ਵਿੱਚ ਦਸਤ ਨਾਲ ਪੀੜਤ ਕੁੱਲ 9,500 ਲੋਕਾਂ ਨੂੰ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ ਸੀ, ਜਿਨ੍ਹਾਂ ਵਿੱਚੋਂ 667 ਲੋਕ ਹੈਜ਼ਾ ਨਾਲ ਪੀੜਤ ਸਨ।