ਵੈੱਬ ਡੈਸਕ - ਵਾਲਾਂ ਨੂੰ ਲੰਬਾ, ਸੰਘਣਾ ਅਤੇ ਸਟਾਈਲਿਸ਼ ਦਿਖਾਉਣ ਲਈ ਅੱਜ-ਕੱਲ੍ਹ ਹੇਅਰ ਐਕਸਟੈਂਸ਼ਨ ਦਾ ਰੁਝਾਨ ਤੇਜ਼ੀ ਨਾਲ ਵਧ ਰਿਹਾ ਹੈ ਪਰ ਹਾਲ ਹੀ 'ਚ ਹੋਈ ਇਕ ਖੋਜ ਨੇ ਇਸ ਸੁੰਦਰਤਾ ਦੇ ਰੁਝਾਨ ਨੂੰ ਲੈ ਕੇ ਗੰਭੀਰ ਚਿੰਤਾਵਾਂ ਪੈਦਾ ਕਰ ਦਿੱਤੀਆਂ ਹਨ। ਅਧਿਐਨ ਮੁਤਾਬਕ ਬਾਜ਼ਾਰ 'ਚ ਮਿਲਣ ਵਾਲੇ ਕਈ ਹੇਅਰ ਐਕਸਟੈਂਸ਼ਨ ਉਤਪਾਦਾਂ 'ਚ ਅਜਿਹੇ ਖ਼ਤਰਨਾਕ ਕੈਮੀਕਲ ਪਾਏ ਗਏ ਹਨ, ਜੋ ਕੈਂਸਰ, ਹਾਰਮੋਨਲ ਗੜਬੜੀ ਅਤੇ ਬਾਂਝਪਨ ਵਰਗੀਆਂ ਜਾਨਲੇਵਾ ਬਿਮਾਰੀਆਂ ਦਾ ਕਾਰਨ ਬਣ ਸਕਦੇ ਹਨ।

ਕੀ ਕਹਿੰਦੀ ਹੈ ਖੋਜ?

ਇਸ ਖੋਜ 'ਚ ਖੋਜਕਰਤਾਵਾਂ ਨੇ 43 ਵੱਖ-ਵੱਖ ਕਿਸਮਾਂ ਦੇ ਹੇਅਰ ਐਕਸਟੈਂਸ਼ਨਾਂ (ਸਿੰਥੈਟਿਕ, ਇਨਸਾਨੀ ਵਾਲ ਅਤੇ ਆਈਲੈਸ਼ ਐਕਸਟੈਂਸ਼ਨ) ਦੀ ਜਾਂਚ ਕੀਤੀ, ਜਿਸ 'ਚ 900 ਤੋਂ ਵੱਧ ਕੈਮੀਕਲ ਪਾਏ ਗਏ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਇਨ੍ਹਾਂ 'ਚੋਂ ਸਿਰਫ਼ 169 ਕੈਮੀਕਲਾਂ ਦੀ ਹੀ ਪਛਾਣ ਹੋ ਸਕੀ ਹੈ, ਜਦਕਿ 80% ਤੋਂ ਵੱਧ ਕੈਮੀਕਲਾਂ ਦਾ ਕੋਈ ਵਿਗਿਆਨਕ ਰਿਕਾਰਡ ਹੀ ਮੌਜੂਦ ਨਹੀਂ ਹੈ। ਲਗਭਗ ਹਰ ਸੈਂਪਲ 'ਚ ਕੈਂਸਰ ਨਾਲ ਸਬੰਧਤ ਘੱਟੋ-ਘੱਟ ਇੱਕ ਕੈਮੀਕਲ ਜ਼ਰੂਰ ਮਿਲਿਆ ਹੈ।

ਸਿਹਤ 'ਤੇ ਪੈਣ ਵਾਲੇ ਬੁਰੇ ਪ੍ਰਭਾਵ

ਰਿਪੋਰਟ 'ਚ ਦੱਸਿਆ ਗਿਆ ਹੈ ਕਿ ਇਨ੍ਹਾਂ ਉਤਪਾਦਾਂ 'ਚ ਮੌਜੂਦ ਕੈਮੀਕਲ ਕਈ ਸਿਹਤ ਸਮੱਸਿਆਵਾਂ ਪੈਦਾ ਕਰ ਸਕਦੇ ਹਨ, ਜਿਵੇਂ ਕਿ :-
 ਸਕੈਲਪ (ਸਿਰ ਦੀ ਚਮੜੀ) 'ਚ ਜਲਣ, ਖੁਜਲੀ ਅਤੇ ਰੈਸ਼ੇਜ਼।
 ਹਾਰਮੋਨਲ ਅਸੰਤੁਲਨ ਅਤੇ ਪ੍ਰਜਨਨ ਸਮਰੱਥਾ 'ਤੇ ਅਸਰ।
 ਬੱਚਿਆਂ ਵਿੱਚ ਸਮੇਂ ਤੋਂ ਪਹਿਲਾਂ ਪਿਊਬਰਟੀ (ਜਵਾਨੀ) ਆਉਣਾ।
 ਮੋਟਾਪਾ ਅਤੇ ਨਰਵਸ ਸਿਸਟਮ 'ਤੇ ਮਾੜਾ ਅਸਰ।
 ਯੂਟੇਰਿਨ ਫਾਈਬਰੋਇਡਜ਼ (ਬੱਚੇਦਾਨੀ ਦੀਆਂ ਰਸੌਲੀਆਂ) ਦਾ ਖ਼ਤਰਾ।

ਖੋਜ 'ਚ ਆਰਗੈਨੋਟਿਨ, ਫਥਾਲੇਟਸ ਅਤੇ ਸਟਾਈਰੀਨ ਵਰਗੇ ਕੈਮੀਕਲਾਂ ਨੂੰ ਬਹੁਤ ਚਿੰਤਾਜਨਕ ਦੱਸਿਆ ਗਿਆ ਹੈ।

ਹੀਟ ਸਟਾਈਲਿੰਗ ਨਾਲ ਵਧਦਾ ਹੈ ਜ਼ਹਿਰ

ਮਾਹਿਰਾਂ ਅਨੁਸਾਰ ਜਦੋਂ ਹੇਅਰ ਐਕਸਟੈਂਸ਼ਨਾਂ ਨੂੰ ਸੈੱਟ ਕਰਨ ਲਈ ਸਟ੍ਰੇਟਨਰ ਜਾਂ ਬਲੋ ਡਰਾਇਰ ਵਰਗੇ ਹੀਟ ਸਟਾਈਲਿੰਗ ਟੂਲਜ਼ ਦੀ ਵਰਤੋਂ ਕੀਤੀ ਜਾਂਦੀ ਹੈ, ਤਾਂ ਇਨ੍ਹਾਂ 'ਚੋਂ ਜ਼ਹਿਰੀਲੀਆਂ ਗੈਸਾਂ ਨਿਕਲ ਸਕਦੀਆਂ ਹਨ। ਇਸ ਨਾਲ ਅੱਖਾਂ, ਨੱਕ ਅਤੇ ਗਲੇ 'ਚ ਜਲਣ ਦੇ ਨਾਲ-ਨਾਲ ਸਿਰਦਰਦ ਵਰਗੀਆਂ ਸਮੱਸਿਆਵਾਂ ਹੋ ਸਕਦੀਆਂ ਹਨ।

ਕੌਣ ਹੈ ਸਭ ਤੋਂ ਵੱਧ ਖ਼ਤਰੇ 'ਚ?
ਇਹ ਸਮੱਸਿਆ ਖਾਸ ਤੌਰ 'ਤੇ ਬਲੈਕ ਔਰਤਾਂ 'ਚ ਜ਼ਿਆਦਾ ਦੇਖੀ ਜਾ ਰਹੀ ਹੈ, ਕਿਉਂਕਿ ਉਨ੍ਹਾਂ ਵਿੱਚੋਂ 70% ਤੋਂ ਵੱਧ ਸਾਲ 'ਚ ਘੱਟੋ-ਘੱਟ ਇਕ ਵਾਰ ਹੇਅਰ ਐਕਸਟੈਂਸ਼ਨ ਦੀ ਵਰਤੋਂ ਕਰਦੀਆਂ ਹਨ ਅਤੇ ਅਕਸਰ ਇਨ੍ਹਾਂ ਨੂੰ ਕਈ ਹਫ਼ਤਿਆਂ ਤੱਕ ਲਗਾ ਕੇ ਰੱਖਦੀਆਂ ਹਨ।

ਬਚਾਅ ਦੇ ਤਰੀਕੇ
ਖੋਜ ਦੌਰਾਨ ਸਿਰਫ਼ ਦੋ ਅਜਿਹੇ ਉਤਪਾਦ ਮਿਲੇ ਜੋ ਸੁਰੱਖਿਅਤ ਸਨ, ਪਰ ਉਹ ਕਾਫੀ ਮਹਿੰਗੇ ਹਨ। ਕੁਝ ਲੋਕ ਐਕਸਟੈਂਸ਼ਨਾਂ ਨੂੰ ਵਰਤਣ ਤੋਂ ਪਹਿਲਾਂ ਐਪਲ ਸਾਈਡਰ ਵਿਨੇਗਰ (ਸੇਬ ਦਾ ਸਿਰਕਾ) ਨਾਲ ਧੋਣ ਦੀ ਸਲਾਹ ਦਿੰਦੇ ਹਨ, ਪਰ ਮਾਹਿਰਾਂ ਅਨੁਸਾਰ ਇਹ ਪੂਰੀ ਸੁਰੱਖਿਆ ਦੀ ਗਰੰਟੀ ਨਹੀਂ ਹੈ। 

ਮਾਹਿਰਾਂ ਦੀ ਸਲਾਹ 
ਬਹੁਤ ਜ਼ਿਆਦਾ ਕੈਮੀਕਲ ਉਤਪਾਦਾਂ ਦੀ ਵਰਤੋਂ ਤੋਂ ਬਚੋ, ਉਤਪਾਦ ਖਰੀਦਣ ਤੋਂ ਪਹਿਲਾਂ ਉਸ ਦੀ ਜਾਣਕਾਰੀ ਜ਼ਰੂਰ ਪੜ੍ਹੋ ਅਤੇ ਕੰਪਨੀਆਂ ਤੋਂ ਕੈਮੀਕਲਾਂ ਦੀ ਪੂਰੀ ਜਾਣਕਾਰੀ ਮੰਗੋ।