ਸੈਮਸੰਗ ਨੇ ਸੁਧਾਰੀ ਆਪਣੀ ਗਲਤੀ, ਗਾਹਕਾਂ ਨੂੰ ਦੇਵੇਗੀ ਨਵਾਂ ਫੋਨ

ਜਲੰਧਰ- ਸਮਾਰਟਫੋਨ ਬਣਾਉਣ ਵਾਲੀ ਦੁਨੀਆ ਦੀ ਮਸ਼ਹੂਰ ਕੰਪਨੀ ਸੈਮਸੰਗ ਨੇ ''ਗਲੈਕਸੀ ਨੋਟ 7'' ''ਚ ਬੈਟਰੀ ਦੀ ਸਮੱਸਿਆ ਦੇ ਮੱਦੇਨਜ਼ਰ ਇਸ ਦੀ ਵਿਕਰੀ ਫਿਲਹਾਲ ਰੋਕ ਦਿੱਤੀ ਹੈ ਅਤੇ ਕਿਹਾ ਹੈ ਕਿ ਵੇਚੇ ਜਾ ਚੁੱਕੇ ਗਲੈਕਸੀ ਨੋਟ 7 ਦੀ ਥਾਂ ਉਹ ਗਾਹਕਾਂ ਨੂੰ ਨਵਾਂ ਫੋਨ ਦੇਵੇਗੀ। ਨੋਟ 7 ''ਚ ਬੈਟਰੀ ਦੀ ਸਮੱਸਿਆ ਕਾਰਨ ਫੋਨ ''ਚ ਅੱਗ ਲੱਗਣ ਦੀਆਂ ਖਬਰਾਂ ਆਉਣ ਤੋਂ ਬਾਅਦ ਕੰਪਨੀ ਨੇ ਇਹ ਕਦਮ ਚੁਕਿਆ ਹੈ। 

ਜਾਣਕਾਰੀ ਮੁਤਾਬਕ, ਕੁਝ ਦਿਨ ਪਹਿਲਾਂ ਹੀ ਖਬਰ ਆਈ ਸੀ ਕਿ ਸੈਮਸੰਗ ਦੇ ਗਲੈਕਸੀ ਨੋਟ 7 ਨੂੰ ਚਾਰਜਿੰਗ ਦੌਰਾਨ ਅੱਗ ਲੱਗ ਗਈ ਸੀ। ਬਿਜ਼ਨੈੱਸ ਕੋਰੀਆ ਦੀ ਰਿਪੋਰਟ ਮੁਤਾਬਕ, ਫੈਬਲੇਟ ''ਚ ਅੱਗ ਲੱਗਣ ਦਾ ਕਾਰਨ ਯੂਜ਼ਰ ਵੱਲੋਂ ਥਰਡ ਪਾਰਟੀ ਚਾਰਜਰ ਦੀ ਵਰਤੋਂ ਕਰਨਾ ਸੀ। ਹੁਣ ਇਕ ਹਫਤੇ ਬਾਅਦ ਦੂਜੀ ਰਿਪੋਰਟ ''ਚ ਅਜਿਹੇ ਹੀ ਇਕ ਮੁੱਦੇ ਨੂੰ ਹਾਈਲਾਈਟ ਕੀਤਾ ਗਿਆ ਹੈ। 

ਮੀਡੀਆ ਰਿਪੋਰਟਾਂ ਮੁਤਾਬਕ, ਗਲੈਕਸੀ ਨੋਟ 7 ਦੀ ਬੈਟਰੀ ਦੀ ਖਰਾਬੀ ਨੂੰ ਲੈ ਕੇ ਦੱਖਣ ਕੋਰੀਆ ''ਚ ਇਕ ਹੋਰ ਮਾਮਲਾ ਸਾਹਮਣੇ ਆਇਆ ਹੈ। ਜਿਸ ਨੂੰ ਲੈ ਕੇ ਕੰਪਨੀ ਹੈਰਾਨ ਹੋ ਗਈ ਹੈ। ਜ਼ਾਹਿਰ ਤੌਰ ''ਤੇ ਸੈਮਸੰਗ ਨਹੀਂ ਚਾਹੁੰਦੀ ਕਿ ਉਸ ਦੇ ਪ੍ਰੀਮੀਅਮ ਡਿਵਾਈਸ ਨੂੰ ਕਿਸੇ ਤਰ੍ਹਾਂ ਦੀ ਸਮੱਸਿਆ ਦਾ ਸਾਹਮਣਾ ਕਰਨਾ ਪਵੇ। ਕੰਪਨੀ ਇਸ ਸਮੱਸਿਆ ਦਾ ਹੱਲ ਕੱਢਣ ਲਈ ਡਿਵਾਈਸ ਦੀ ਕੁਆਲਿਟੀ ਦੀ ਟੈਸਟਿੰਗ ਕਰ ਰਹੀ ਹੈ ਜਿਸ ਲਈ ਗਾਹਕਾਂ ਨੂੰ ਗਲੈਕਸੀ ਨੋਟ 7 ਲਈ ਥੋੜ੍ਹਾ ਇੰਤਜ਼ਾਰ ਕਰਨਾ ਪੈ ਸਕਦਾ ਹੈ। ਖਬਰ ਹੈ ਕਿ ਦੱਖਣ ਕੋਰੀਆ ''ਚ ਨਵੇਂ ਸਮਾਰਟਫੋਨ ਦੀ ਸ਼ਿਪਮੈਂਟ ਨੂੰ ਡਿਲੇ ਕਰ ਦਿੱਤਾ ਹੈ।