ਪਾਵਰ ਬੈਂਕ ਖਰੀਦਣ ਬਾਰੇ ਸੋਚ ਰਹੇ ਹੋ ਤਾਂ ਧਿਆਨ ’ਚ ਰੱਖੋ ਇਹ ਗੱਲਾਂ

ਗੈਜੇਟ ਡੈਸਕ– ਅੱਜ ਦੇ ਸਮੇਂ ਵਿਚ ਸਮਾਰਟਫੋਨ ਯੂਜ਼ਰਜ਼ ਨੂੰ ਸਿਰਫ ਇਕੋ ਮੁੱਦਾ ਸਭ ਤੋਂ ਜ਼ਿਆਦਾ ਸਤਾਉਣ ਲੱਗਾ ਹੈ, ਉਹ ਹੈ ਫੋਨ ਦੇ ਪੁਰਾਣੇ ਹੁੰਦਿਆਂ ਹੀ ਇਸ ਦੀ ਬੈਟਰੀ ਦਾ ਸਮੇਂ ਤੋਂ ਪਹਿਲਾਂ ਹੀ ਘੱਟ ਹੋਣਾ ਜਾਂ ਖਤਮ ਹੋ ਜਾਣਾ। ਦੱਸ ਦੇਈਏ ਕਿ ਫੋਨ ਜਦੋਂ ਪੁਰਾਣਾ ਹੋ ਜਾਂਦਾ ਹੈ ਤਾਂ ਉਸ ਦਾ ਬੈਟਰੀ ਬੈਕਅਪ ਵੀ ਘਟ ਜਾਂਦਾ ਹੈ। ਇਸ ਸਮੱਸਿਆ ਦਾ ਉਪਾਅ ਯੂਜ਼ਰਜ਼ ਪਾਵਰ ਬੈਂਕ ਰਾਹੀਂ ਕੱਢਦੇ ਹਨ।
ਸਫਰ ਦੌਰਾਨ ਵੀ ਪਾਵਰ ਬੈਂਕ ਕਾਫੀ ਕੰਮ ਆਉਂਦੇ ਹਨ ਪਰ ਇਨ੍ਹਾਂ ਨੂੰ ਖਰੀਦਣ ਵੇਲੇ ਯੂਜ਼ਰਜ਼ ਨੂੰ ਇਹ ਗੱਲ ਸਤਾਉਂਦੀ ਹੈ ਕਿ ਪਾਵਰ ਬੈਂਕ ਕਿਹੜਾ ਖਰੀਦਿਆ ਜਾਵੇ। ਅੱਜ ਅਸੀਂ ਤੁਹਾਨੂੰ ਦੱਸਾਂਗੇ ਕਿ ਪਾਵਰ ਬੈਂਕ ਖਰੀਦਣ ਵੇਲੇ ਕਿਨ੍ਹਾਂ ਗੱਲਾਂ ਦਾ ਖਾਸ ਧਿਆਨ ਰੱਖਣਾ ਚਾਹੀਦਾ ਹੈ—

ਪਾਵਰ ਬੈਂਕ ਦੀ ਸਮਰੱਥਾ
ਪਾਵਰ ਬੈਂਕ ਖਰੀਦਣ ਵੇਲੇ ਸਭ ਤੋਂ ਪਹਿਲਾਂ ਦੇਖੋ ਕਿ ਜਿਹੜਾ ਪਾਵਰ ਬੈਂਕ ਤੁਸੀਂ ਪਸੰਦ ਕੀਤਾ ਹੈ, ਉਸ ਦੀ ਬੈਟਰੀ ਸਮਰੱਥਾ ਫੋਨ ਦੀ ਬੈਟਰੀ ਸਮਰੱਥਾ ਤੋਂ ਘੱਟੋ-ਘੱਟ ਤਿੰਨ ਗੁਣਾ ਜ਼ਿਆਦਾ ਹੋਵੇ। ਉਦਾਹਰਣ ਵਜੋਂ ਜੇ ਤੁਹਾਡੇ ਕੋਲ 3,500 ਤੋਂ 4,000 ਐੱਮ. ਏ. ਐੱਚ. ਦੀ ਬੈਟਰੀ ਵਾਲਾ ਸਮਾਰਟਫੋਨ ਹੈ ਤਾਂ ਤੁਹਾਨੂੰ 10,000 ਐੱਮ. ਏ. ਐੱਚ. ਸਮਰੱਥਾ ਵਾਲਾ ਪਾਵਰ ਬੈਂਕ ਖਰੀਦਣਾ ਚਾਹੀਦਾ ਹੈ ਤਾਂ ਜੋ ਤੁਸੀਂ ਲੋੜ ਪੈਣ 'ਤੇ 2-3 ਵਾਰ ਫੋਨ ਚਾਰਜ ਕਰ ਸਕੋ।

ਆਊਟਪੁਟ ਵੋਲਟੇਜ ਦਾ ਰੱਖੋ ਧਿਆਨ
ਹਮੇਸ਼ਾ ਧਿਆਨ ਰੱਖੋ ਕਿ ਪਾਵਰ ਬੈਂਕ ਦਾ ਆਊਟਪੁਟ ਵੋਲਟੇਜ ਤੁਹਾਡੇ ਫੋਨ ਦੇ ਬਰਾਬਰ ਹੀ ਹੋਵੇ। ਜ਼ਿਆਦਾਤਰ ਪਾਵਰ ਬੈਂਕਸ ਵਿਚ 2 ਆਊਟਪੁਟ ਪੋਰਟਸ ਹੁੰਦੇ ਹਨ, ਜਿਨ੍ਹਾਂ ਵਿਚੋਂ ਇਕ ਫੋਨ ਤੇ ਦੂਜਾ ਟੈਬਲੇਟ ਲਈ ਹੁੰਦਾ ਹੈ।
ਜ਼ਿਆਦਾ ਆਊਟਪੁਟ ਵਾਲੇ ਪੋਰਟ ਤੋਂ ਫੋਨ ਚਾਰਜ ਕਰਨ 'ਤੇ ਫੋਨ ਦੀ ਬੈਟਰੀ 'ਤੇ ਮਾੜਾ ਅਸਰ ਪੈ ਸਕਦਾ ਹੈ। ਇਸੇ ਲਈ ਇਸ ਗੱਲ ਦਾ ਹਮੇਸ਼ਾ ਧਿਆਨ ਰੱਖੋ।

ਫਾਸਟ ਚਾਰਜਿੰਗ ਦੀ ਸੁਪੋਰਟ ਵਾਲਾ ਪਾਵਰਬੈਂਕ
ਜੇ ਤੁਹਾਡਾ ਫੋਨ ਫਾਸਟ ਚਾਰਜਿੰਗ ਨੂੰ ਸੁਪੋਰਟ ਕਰਦਾ ਹੈ ਤਾਂ ਤੁਸੀਂ ਇਸ ਨਵੀਂ ਫਾਸਟ ਚਾਰਜਿੰਗ ਤਕਨੀਕ ਨੂੰ ਸੁਪੋਰਟ ਕਰਨ ਵਾਲੇ ਪਾਵਰ ਬੈਂਕ ਦੀ ਵੀ ਵਰਤੋਂ ਕਰ ਸਕਦੇ ਹੋ ਪਰ ਜੇ ਤੁਹਾਡਾ ਫੋਨ ਪੁਰਾਣਾ ਹੈ ਅਤੇ ਫਾਸਟ ਚਾਰਜਿੰਗ ਨੂੰ ਸੁਪੋਰਟ ਨਹੀਂ ਕਰਦਾ ਤਾਂ ਆਮ ਪਾਵਰ ਬੈਂਕ ਖਰੀਦਣਾ ਹੀ ਸਹੀ ਰਹੇਗਾ।