ਈਂਧਨ ਬਚਾਉਣ ਦੇ ਕੰਮ ਆਉਣਗੇ ਇਹ ਟਿਪਸ

ਜਲੰਧਰ- ਹਮੇਸ਼ਾ ਲੋਕ ਕਾਰ ਖਰੀਦਣ ਤੋਂ ਪਹਿਲਾਂ ਉਸ ਦੀ ਲੁੱਕ ਦੇ ਨਾਲ-ਨਾਲ ਮਾਈਲੇਜ ''ਤੇ ਵੀ ਧਿਆਨ ਦਿੰਦੇ ਹਨ ਅਤੇ ਕਾਰ ਨਿਰਮਾਤਾ ਕੰਪਨੀਆਂ ਵੀ ਇਸ ਪਾਸੇ ਆਪਣਾ ਖਾਸ ਫੋਕਸ ਰੱਖਦੀਆਂ ਹਨ। ਪੈਟਰੋਲ ਅਤੇ ਡੀਜ਼ਲ ਦੀਆਂ ਲਗਾਤਾਰ ਵੱਧ ਰਹੀਆਂ ਕੀਮਤਾਂ ਕਾਰਨ ਜ਼ਿਆਦਾ ਮਾਈਲੇਜ ਦੇਣ ਵਾਲੇ ਵ੍ਹੀਕਲ ਲੋਕਾਂ ਦੀ ਪਹਿਲੀ ਪਸੰਦ ਬਣਦੇ ਜਾ ਰਹੇ ਹਨ। ਇਸੇ ਗੱਲ ਨੂੰ ਧਿਆਨ ''ਚ ਰੱਖਦੇ ਹੋਏ ਅੱਜ ਅਸੀਂ ਤੁਹਾਨੂੰ ਕੁਝ ਅਜਿਹੇ ਟਿਪਸ ਦੱਸਣ ਜਾ ਰਹੇ ਹਾਂ ਜਿਨ੍ਹਾਂ ਦੀ ਮਦਦ ਨਾਲ ਤੁਸੀਂ ਆਪਣੇ ਵ੍ਹੀਕਲ ਦੀ ਮਾਈਲੇਜ ਵਧਾ ਸਕਦੇ ਹੋ। 

 

ਟਾਇਰ ਦੇ ਉਚਿਤ ਪ੍ਰੈਸ਼ਰ ''ਤੇ ਧਿਆਨ ਦੇਣ ਨਾਲ ਨਾ ਸਿਰਫ ਤੁਸੀਂ ਫਿਊਲ ਦੀ ਬਚਤ ਕਰ ਸਕਦੇ ਹੋ ਸਗੋਂ ਵ੍ਹੀਕਲ ਦੀ ਸੁਰੱਖਿਆ ਦਾ ਵੀ ਧਿਆਨ ਰੱਖ ਸਕਦੇ ਹੋ। ਜੇਕਰ ਤੁਸੀਂ ਵ੍ਹੀਕਲ ''ਤੇ ਜ਼ਿਆਦਾ ਲੋਡ ਜਾਂ ਭਾਰ ਕੈਰੀ ਕਰਨਾ ਚਾਹੁੰਦੇ ਹੋ ਤਾਂ ਵ੍ਹੀਕਲ ਹੈਂਡਬੁੱਕ ਨੂੰ ਪੜ੍ਹ ਕੇ ਉਸ ਮੁਤਾਬਕ ਟਾਇਰ ਪ੍ਰੈਸ਼ਰ ''ਚ ਸੁਧਾਰ ਕਰੋ। 

 

ਵ੍ਹੀਕਲ ਦੀ ਸਮੇਂ ਸਿਰ ਸਰਵਿਸ ਅਤੇ ਸਹੀ ਰੱਖ-ਰਖਾਅ ਨਾਲ ਇਸ ਦੀ ਮਾਈਲੇਜ ਨੂੰ ਵਧਾਉਣ ''ਚ ਮਦਦ ਮਿਲਦੀ ਹੈ ਕਿਉਂਕਿ ਗੱਡੀਆਂ ਦੇ ਘੁੰਮਣ ਵਾਲੇ ਹਿੱਸੇ, ਜਿਵੇਂ ਇੰਜਨ ਅਤੇ ਗਿਅਰਬਾਕਸ ਨੂੰ ਲੁਬਰੀਕੇਸ਼ਨ ਦੀ ਲੋੜ ਹੁੰਦੀ ਹੈ। ਅਜਿਹਾ ਨਾ ਕਰਨ ''ਤੇ ਇਸ ਦਾ ਅਸਰ ਕਾਰ ਦੀ ਮਾਈਲੇਜ ''ਤੇ ਪੈਂਦਾ ਹੈ। 

 

ਹਮੇਸ਼ਾ ਦੇਖਿਆ ਜਾਂਦਾ ਹੈ ਕਿ ਅਸੀਂ ਟ੍ਰੈਫਿਕਸ ''ਚ ਫਸ ਜਾਂਦੇ ਹਾਂ। ਅਜਿਹੇ ''ਚ ਜੇਕਰ 10 ਸੈਕਿੰਡ ਤੋਂ ਜ਼ਿਆਦਾ ਰੁਕਣਾ ਪਵੇ ਤਾਂ ਕਾਰ ਦਾ ਇਗਨੀਸ਼ਨ ਬੰਦ ਕਰ ਦਿਓ, ਇਸ ਨਾਲ ਫਿਊਲ ਬਚੇਗਾ। ਇਸ ਭੁਲੇਖੇ ''ਚ ਨਾ ਰਹੋ ਕਿ ਫਿਰ ਤੋਂ ਇੰਜਨ ਚਾਲੂ ਕਰਨ ''ਤੇ ਜ਼ਿਆਦਾ ਫਿਊਲ ਖਰਚ ਹੋਵੇਗਾ। 

 

ਇਨ੍ਹੀਂ-ਦਿਨੀਂ ਜੀ. ਪੀ. ਐੱਸ. ਗੈਜੇਟਸ ''ਤੇ ਬਿਜ਼ੀ ਇੰਟਰਸੈਕਸ਼ੰਸ, ਟ੍ਰੈਫਿਕ ਅਪਡੇਟਸ ਅਤੇ ਕਿਸੇ ਰੂਟ ''ਤੇ ਡਾਈਵਰਜ਼ਨ ਦੀ ਸੂਚਨਾ ਮਿਲ ਜਾਂਦੀ ਹੈ। ਜਿਸ ਰੂਟ ''ਤੇ ਟ੍ਰੈਫਿਕ ਹੈ, ਉਸ ਤੋਂ ਬਚਣ ਅਤੇ ਛੋਟੇ ਰੂਟ ਦਾ ਪਤਾ ਲਾਉਣ ਲਈ ਜੀ. ਪੀ. ਐੱਸ. ਦਾ ਇਸਤੇਮਾਲ ਕਰਨਾ ਚਾਹੀਦਾ ਹੈ। 

 

ਜਿੱਥੇ ਕਲੱਚ ਦੀ ਲੋੜ ਨਾ ਹੋਵੇ ਉਥੇ ਇਸ ਦੀ ਵਰਤੋਂ ਨਹੀਂ ਕਰਨੀ ਚਾਹੀਦੀ। ਨਵੇਂ ਵ੍ਹੀਕਲ ਚਲਾਉਣ ਵਾਲੇ ਹਮੇਸ਼ਾ ਕਲੱਚ ''ਤੇ ਜ਼ਿਆਦਾ ਜ਼ੋਰ ਦਿੰਦੇ ਹਨ। ਇਸ ਨਾਲ ਫਿਊਲ ਜ਼ਿਆਦਾ ਖਰਚ ਹੁੰਦਾ ਹੈ ਅਤੇ ਤੁਹਾਡੇ ਵ੍ਹੀਕਲ ਦੀ ਕਲੱਚ ਪਲੇਟ ਖਰਾਬ ਵੀ ਹੋ ਸਕਦੀ ਹੈ। ਇੰਜਨ ''ਤੇ ਜ਼ਿਆਦਾ ਜ਼ੋਰ ਨਾ ਪਵੇ, ਇਸ ਲਈ ਗੱਡੀ ਚਲਾਉਂਦੇ ਸਮੇਂ ਲੋਅਰ ਗਿਅਰ ਦੀ ਵਰਤੋਂ ਕਰੋ ਅਤੇ ਹੌਲੀ-ਹੌਲੀ ਇਸ ਨੂੰ ਵਧਾਓ। ਉਦਾਹਰਣ ਦੇ ਤੌਰ ''ਤੇ ਜੇਕਰ 150ਸੀਸੀ ਇੰਜਨ ਵਾਲੇ ਵ੍ਹੀਕਲ ਨੂੰ 55 ਕਿ. ਮੀ. ਪ੍ਰਤੀ ਘੰਟਾ ਦੀ ਰਫਤਾਰ ਨਾਲ ਤੀਜੇ ਗਿਅਰ ''ਚ ਚਲਾਉਂਦੇ ਹੋ ਤਾਂ ਠੀਕ ਹੈ, ਇਸ ਤੋਂ ਉੱਪਰ ਜਾਣ ''ਤੇ ਇੰਜਨ ''ਤੇ ਜ਼ੋਰ ਪਵੇਗਾ ਅਤੇ ਇਸ ਨਾਲ ਮਾਈਲੇਜ ''ਤੇ ਅਸਰ ਪਵੇਗਾ।