ਇਲਾਜ ਦੇ ਨਾਮ ''ਤੇ ਲੱਖਾਂ ਰੁਪਏ ਦੀ ਠੱਗੀ, ਥਾਣਾ ਸਾਈਬਰ ਕਰਾਈਮ ਵਿਚ ਮਾਮਲਾ ਦਰਜ

ਸ੍ਰੀ ਮੁਕਤਸਰ ਸਾਹਿਬ (ਪਵਨ ਤਨੇਜਾ, ਖੁਰਾਣਾ) : ਸੋਸ਼ਲ ਮੀਡੀਆ ਤੇ ਆਯੁਰਵੈਦਿਕ ਇਲਾਜ ਦੇ ਨਾਮ 'ਤੇ ਇਕ ਮਹਿਲਾ ਨਾਲ ਕਰੀਬ 5 ਲੱਖ 78 ਹਜ਼ਾਰ 442 ਰੁਪਏ ਦੀ ਠੱਗੀ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇਸ ਮਾਮਲੇ ਵਿਚ ਸਾਈਬਰ ਕਰਾਈਮ ਵਿਭਾਗ ਵਿਚ ਕੇਸ ਦਰਜ ਹੋਇਆ ਹੈ। ਸ਼ਿਕਾਇਤਕਰਤਾ ਦੀਪਿਕਾ ਕੁੰਬਾ ਦੁਆਰਾ ਦਰਜ ਕਰਵਾਈ ਸ਼ਿਕਾਇਤ ਵਿਚ ਦੱਸਿਆ ਕਿ ਉਸ ਨੂੰ ਸੋਸ਼ਲ ਮੀਡੀਆ ਤੇ ਆਏ ਇੱਕ ਲਿੰਕ ਤੇ ਭਰੋਸਾ ਕਰਨਾ ਇੰਨਾ ਭਾਰੀ ਪਿਆ ਕਿ ਆਯੁਰਵੈਦਿਕ ਇਲਾਜ ਦੇ ਨਾਮ ਤੇ ਠੱਗਾਂ ਨੇ ਉਸ ਤੋਂ ਲੱਖਾਂ ਰੁਪਏ ਠੱਗ ਲਏ। ਸ਼ਿਕਾਇਤਕਰਤਾ ਦੀਪਿਕਾ ਅਨੁਸਾਰ ਉਨ੍ਹਾਂ ਦੇ ਪਿਤਾ ਗੋਡਿਆਂ ਦੇ ਦਰਦ ਨਾਲ ਆਪਰੇਸ਼ਾਨ ਸਨ ਅਤੇ ਇਲਾਜ ਦੀ ਤਲਾਸ਼ ਕਰ ਰਹੇ ਸਨ। 

2 ਅਪ੍ਰੈਲ 2026 ਨੂੰ ਉਨ੍ਹਾਂ ਦੀ ਮਾਂ ਨੂੰ ਫੇਸਬੁੱਕ ਤੇ ਪਤੰਜਲੀ ਨਾਲ ਜੁੜਿਆ ਇਕ ਲਿੰਕ ਦਿਖਾਈ ਦਿੱਤਾ, ਜਿਸ 'ਤੇ ਕਲਿੱਕ ਕਰ ਉਨ੍ਹਾਂ ਨੇ ਬਿਮਾਰੀ ਨਾਲ ਸੰਬੰਧਤ ਫਾਰਮ ਭਰ ਦਿੱਤਾ। ਇਸ ਤੋਂ ਬਾਅਦ ਅਲੱਗ-ਅਲੱਗ ਨੰਬਰਾਂ ਤੋਂ ਕਾਲ ਆਉਣ ਲੱਗੀ। ਕਾਲ ਕਰਨ ਵਾਲਿਆਂ ਨੇ ਇਲਾਜ ਅਤੇ ਰਹਿਣ ਦੀ ਵਿਵਸਥਾ ਦੇ ਨਾਮ 'ਤੇ ਪੈਸੇ ਮੰਗਣੇ ਸ਼ੁਰੂ ਕਰ ਦਿੱਤੇ। ਠੱਗਾਂ ਦੇ ਕਹਿਣ 'ਤੇ ਦੀਪਿਕਾ ਕੁੰਬਾ ਨੇ ਗੂਗਲ-ਪੇ ਦੇ ਜ਼ਰੀਏ ਅਲੱਗ-ਅਲੱਗ ਕਿਸ਼ਤਾਂ ਵਿਚ ਕਰੀਬ 5 ਲੱਖ 78 ਹਜ਼ਾਰ 442 ਰੁਪਏ ਟਰਾਂਸਫਰ ਕਰ ਦਿੱਤੇ। ਮੁਲਜ਼ਮਾਂ ਨੇ ਬਾਅਦ ਵਿਚ ਉਨ੍ਹਾਂ ਨੂੰ ਰਿਸ਼ੀਕੇਸ਼ ਬੁਲਾਇਆ ਅਤੇ ਗੱਡੀ ਭੇਜਣ ਦਾ ਬਹਾਨਾ ਬਣਾਕੇ ਸਰਕਾਰੀ ਐਨਓਸੀ ਦੇ ਨਾਮ ਤੇ ਹੋਰ ਪੈਸੇ ਮੰਗ ਲਏ। ਸ਼ੱਕ ਹੋਣ ’ਤੇ ਜਦੋਂ ਦੀਪਿਕਾ ਨੇ ਪਤੰਜਲੀ ਦੀ ਅਧਿਕਾਰਿਕ ਵੈਬਸਾਈਟ ਤੇ ਸੰਪਰਕ ਕੀਤਾ ਤਾਂ ਉਨ੍ਹਾਂ ਨੂੰ ਠੱਗੀ ਦਾ ਪਤਾ ਲੱਗਿਆ। ਪੁਲਸ ਨੇ ਮਾਮਲੇ ਵਿਚ ਅਣਪਛਾਤੇ ਵਿਅਕਤੀਆਂ ਖਿਲਾਫ ਥਾਣਾ ਸਾਇਬਰ ਕਰਾਈਮ ਵਿਚ ਮਾਮਲਾ ਦਰਜ ਕਰ ਅਗਲੇਰੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।