ਗੋਵਿੰਦਾ ਦੀ ਪਤਨੀ ਸੁਨੀਤਾ ਆਹੂਜਾ ਨੇ ਦਿੱਤੀ ਹੈਲਥ ਅਪਡੇਟ, ਕਿਹਾ- ਅਦਾਕਾਰ ਬਿਲਕੁਲ ''ਫਿੱਟ'' ਹਨ

ਮੁੰਬਈ (ਏਜੰਸੀ)- ਬਾਲੀਵੁੱਡ ਦੇ ਪ੍ਰਸਿੱਧ ਅਦਾਕਾਰ ਗੋਵਿੰਦਾ ਦੀ ਪਤਨੀ ਸੁਨੀਤਾ ਆਹੂਜਾ ਨੇ ਉਨ੍ਹਾਂ ਦੀ ਸਿਹਤ ਬਾਰੇ ਅਪਡੇਟ ਦਿੱਤੀ ਹੈ ਅਤੇ ਪੁਸ਼ਟੀ ਕੀਤੀ ਹੈ ਕਿ 'ਪਾਰਟਨਰ' ਅਦਾਕਾਰ ਹੁਣ ਬਿਲਕੁਲ 'ਫਿੱਟ' ਹਨ। ਸੁਨੀਤਾ ਆਹੂਜਾ ਨੇ ਆਪਣੇ ਤਾਜ਼ਾ ਯੂਟਿਊਬ ਵਲੌਗ ਦੌਰਾਨ ਗੋਵਿੰਦਾ ਦੀ ਸਿਹਤ ਸੰਬੰਧੀ ਸਵਾਲ ਦਾ ਜਵਾਬ ਦਿੱਤਾ। ਉਨ੍ਹਾਂ ਨੇ ਦੱਸਿਆ ਕਿ ਗੋਵਿੰਦਾ ਆਪਣੀ ਨਵੀਂ ਫਿਲਮ 'ਦੁਨੀਆਦਾਰੀ' ਦੀ ਤਿਆਰੀ ਲਈ ਬਹੁਤ ਜ਼ਿਆਦਾ ਮਿਹਨਤ ਕਰ ਰਹੇ ਸਨ, ਜਦੋਂ ਉਹ ਬੇਹੋਸ਼ ਹੋ ਗਏ।

ਸੁਨੀਤਾ ਨੇ ਦੱਸਿਆ ਕਿ ਉਨ੍ਹਾਂ ਨੂੰ  ਗੋਵਿੰਦਾ ਦੇ ਹਸਪਤਾਲ ਜਾਣ ਸਬੰਧੀ ਜਾਣਕਾਰੀ ਮੀਡੀਆ ਰਾਹੀਂ ਪਤਾ ਲੱਗੀ। ਸੁਨੀਤਾ ਨੇ ਅੱਗੇ ਕਿਹਾ ਕਿ ਉਨ੍ਹਾਂ ਨੇ ਇੱਕ ਇੰਟਰਵਿਊ ਦੇਖਿਆ ਜਿੱਥੇ ਇਹ ਦੱਸਿਆ ਗਿਆ ਸੀ ਕਿ ਗੋਵਿੰਦਾ ਜ਼ਿਆਦਾ ਕਸਰਤ ਕਾਰਨ ਥਕਾਵਟ ਹੋ ਗਈ ਸੀ। ਉਨ੍ਹਾਂ ਨੇ ਪ੍ਰਸ਼ੰਸਕਾਂ ਨੂੰ ਭਰੋਸਾ ਦਿੱਤਾ, "ਉਹ ਹੁਣ ਠੀਕ ਹਨ। ਚਿੰਤਾ ਕਰਨ ਦੀ ਕੋਈ ਲੋੜ ਨਹੀਂ ਹੈ"।

ਹਸਪਤਾਲ ਵਿੱਚ ਭਰਤੀ:

ਹਾਲ ਹੀ ਵਿੱਚ, ਗੋਵਿੰਦਾ ਨੂੰ ਆਪਣੇ ਮੁੰਬਈ ਸਥਿਤ ਘਰ ਵਿੱਚ ਕਥਿਤ ਤੌਰ 'ਤੇ ਬੇਹੋਸ਼ ਹੋਣ ਤੋਂ ਬਾਅਦ ਤੁਰੰਤ ਹਸਪਤਾਲ ਲਿਜਾਇਆ ਗਿਆ ਸੀ। ਉਨ੍ਹਾਂ ਦੇ ਦੋਸਤ ਅਤੇ ਕਾਨੂੰਨੀ ਸਲਾਹਕਾਰ, ਲਲਿਤ ਬਿੰਦਲ, ਨੇ ਪੁਸ਼ਟੀ ਕੀਤੀ ਕਿ ਡਾਕਟਰ ਨਾਲ ਫੋਨ 'ਤੇ ਸਲਾਹ-ਮਸ਼ਵਰੇ ਤੋਂ ਬਾਅਦ ਗੋਵਿੰਦਾ ਨੂੰ ਜ਼ਰੂਰੀ ਦਵਾਈ ਦਿੱਤੀ ਗਈ ਸੀ। ਹਾਲਾਂਕਿ, ਬਾਅਦ ਵਿੱਚ ਉਨ੍ਹਾਂ ਨੂੰ ਐਮਰਜੈਂਸੀ ਦੇਖਭਾਲ ਲਈ ਲਗਭਗ ਰਾਤ 1:00 ਵਜੇ ਹਸਪਤਾਲ ਲਿਜਾਇਆ ਗਿਆ।

ਹਸਪਤਾਲ ਤੋਂ ਛੁੱਟੀ ਤੋਂ ਬਾਅਦ ਗੋਵਿੰਦਾ ਦਾ ਸੰਦੇਸ਼:

ਹਸਪਤਾਲ ਤੋਂ ਛੁੱਟੀ ਮਿਲਣ ਤੋਂ ਬਾਅਦ ਗੋਵਿੰਦਾ ਨੇ ਮੀਡੀਆ ਨਾਲ ਗੱਲਬਾਤ ਕੀਤੀ। ਉਹ ਕਾਫੀ ਤੰਦਰੁਸਤ ਦਿਖਾਈ ਦੇ ਰਹੇ ਸਨ, ਉਨ੍ਹਾਂ ਨੇ ਟੀ-ਸ਼ਰਟ, ਬਲੇਜ਼ਰ ਅਤੇ ਟਰਾਊਜ਼ਰ ਪਾਇਆ ਹੋਇਆ ਸੀ ਅਤੇ ਐਨਕਾਂ ਲਗਾਈਆਂ ਹੋਈਆਂ ਸਨ। ਉਨ੍ਹਾਂ ਨੇ ਖੁਦ ਮੰਨਿਆ ਕਿ ਉਨ੍ਹਾਂ ਨੇ ਜ਼ਰੂਰਤ ਤੋਂ ਜ਼ਿਆਦਾ ਵਰਕਆਊਟ ਕਰ ਲਿਆ ਸੀ, ਜਿਸ ਕਾਰਨ ਉਹ ਬੇਹੋਸ਼ ਹੋ ਗਏ। ਗੋਵਿੰਦਾ ਨੇ ਲੋਕਾਂ ਨੂੰ ਸਲਾਹ ਦਿੱਤੀ, "ਕਿਰਪਾ ਕਰਕੇ ਯੋਗਾ ਅਤੇ ਪ੍ਰਾਣਾਯਾਮ ਕਰੋ। ਯੋਗਾ ਤੇ ਪ੍ਰਾਣਾਯਾਮ ਵਧੀਆ ਹੁੰਦੇ ਹਨ, ਭਾਰੀ ਐਕਸਰਸਾਈਜ਼ ਥੋੜੀ ਮੁਸ਼ਕਲ ਹੁੰਦੀ ਹੈ।”

ਨਵੀਂ ਫਿਲਮ 'ਦੁਨੀਆਦਾਰੀ' ਨਾਲ ਵਾਪਸੀ:

'ਦੁਨੀਆਦਾਰੀ' ਪ੍ਰੋਜੈਕਟ ਨਾਲ ਗੋਵਿੰਦਾ ਲੰਬੇ ਸਮੇਂ ਬਾਅਦ ਪਰਦੇ 'ਤੇ ਵਾਪਸੀ ਕਰ ਰਹੇ ਹਨ। ਫਿਲਹਾਲ ਪ੍ਰੋਜੈਕਟ ਬਾਰੇ ਜ਼ਿਆਦਾ ਜਾਣਕਾਰੀ ਨਹੀਂ ਹੈ, ਪਰ ਇਸ ਡਰਾਮਾ ਫਿਲਮ ਨੇ ਪਹਿਲਾਂ ਹੀ ਦਰਸ਼ਕਾਂ ਵਿੱਚ ਉਤਸ਼ਾਹ ਪੈਦਾ ਕਰ ਦਿੱਤਾ ਹੈ। ਗੋਵਿੰਦਾ ਨੂੰ ਆਖਰੀ ਵਾਰ 2019 ਵਿੱਚ ਫਿਲਮ 'ਰੰਗੀਲਾ ਰਾਜਾ' ਵਿੱਚ ਸ਼ਕਤੀ ਕਪੂਰ, ਦਿਗੰਗਨਾ ਸੂਰਿਆਵੰਸ਼ੀ ਅਤੇ ਪ੍ਰੇਮ ਚੋਪੜਾ ਨਾਲ ਦੇਖਿਆ ਗਿਆ ਸੀ।