ਆਸਕਰ ਲਈ RRR ਦੀ ਟੀਮ ਨੇ ਖਰਚੇ 80 ਕਰੋੜ ਰੁਪਏ, ਰਾਜਾਮੌਲੀ ਦੇ ਪੁੱਤ ਨੇ ਦੱਸਿਆ ਸੱਚ

ਮੁੰਬਈ (ਬਿਊਰੋ)– ‘ਆਰ. ਆਰ. ਆਰ.’ ਨੇ ਆਸਕਰ ਜਿੱਤ ਕੇ ਇਤਿਹਾਸ ਰਚ ਦਿੱਤਾ ਹੈ। ਇਸ ਫ਼ਿਲਮ ਦੇ ਗੀਤ ‘ਨਾਟੂ ਨਾਟੂ’ ਨੇ ਸਰਵੋਤਮ ਮੂਲ ਗੀਤ ਦਾ ਅਕੈਡਮੀ ਐਵਾਰਡ ਜਿੱਤਿਆ। ਇਸ ਜਿੱਤ ਦੇ ਤੁਰੰਤ ਬਾਅਦ ਕਈ ਤਰ੍ਹਾਂ ਦੀਆਂ ਅਫਵਾਹਾਂ ਫੈਲਣੀਆਂ ਸ਼ੁਰੂ ਹੋ ਗਈਆਂ। ਕੁਝ ਨੇ ਦਾਅਵਾ ਕੀਤਾ ਕਿ ‘ਆਰ. ਆਰ. ਆਰ.’ ਦੀ ਟੀਮ ਨੇ ਆਸਕਰ ਮੁਹਿੰਮ ਲਈ 80 ਕਰੋੜ ਰੁਪਏ ਖਰਚ ਕੀਤੇ ਸਨ। ਹੋਰਾਂ ਨੇ ਕਿਹਾ ਕਿ ਟੀਮ ਨੇ ਆਸਕਰ ’ਚ ਸ਼ਾਮਲ ਹੋਣ ਲਈ ਲੱਖਾਂ ਖਰਚ ਕੀਤੇ। ਹੁਣ ਐੱਸ. ਐੱਸ. ਰਾਜਾਮੌਲੀ ਦੇ ਪੁੱਤਰ ਐੱਸ. ਐੱਸ. ਕਾਰਤਿਕੇਆ ਨੇ ਇਨ੍ਹਾਂ ਅਫਵਾਹਾਂ ’ਤੇ ਪ੍ਰਤੀਕਿਰਿਆ ਦਿੱਤੀ ਹੈ।

‘ਆਰ. ਆਰ. ਆਰ.’ ਦੇ ਨਿਰਦੇਸ਼ਕ ਐੱਸ. ਐੱਸ. ਰਾਜਮੌਲੀ ਦੇ ਪੁੱਤਰ ਐੱਸ. ਐੱਸ. ਕਾਰਤਿਕੇਆ ਨੇ ਆਖਰਕਾਰ ਫ਼ਿਲਮ ਦੇ ਆਸਕਰ ਮੁਹਿੰਮ ਲਈ ਖਰਚੇ ਗਏ ਪੈਸੇ ਬਾਰੇ ਸਾਰੀਆਂ ਅਫਵਾਹਾਂ ਦਾ ਖੰਡਨ ਕਰ ਦਿੱਤਾ ਹੈ। ਹਿੰਦੁਸਤਾਨ ਟਾਈਮਜ਼ ਦੀ ਰਿਪੋਰਟ ਮੁਤਾਬਕ ਕਾਰਤਿਕੇਆ ਨੇ ਖ਼ੁਲਾਸਾ ਕੀਤਾ ਹੈ, ‘‘ਮੈਨੂੰ ਨਹੀਂ ਪਤਾ ਕਿ ਅਜਿਹੀ ਅਫਵਾਹ ਕਿਉਂ ਹੈ ਕਿ ‘ਆਰ. ਆਰ. ਆਰ.’ ਟੀਮ ਨੇ ਆਸਕਰ ਮੁਹਿੰਮ ਲਈ ਬਹੁਤ ਸਾਰਾ ਪੈਸਾ ਖਰਚ ਕੀਤਾ ਹੈ। ਅਸੀਂ ਯਕੀਨੀ ਤੌਰ ’ਤੇ ਆਸਕਰ ਦਾ ਪ੍ਰਚਾਰ ਕਰਨਾ ਚਾਹੁੰਦੇ ਸੀ ਕਿਉਂਕਿ ਦਰਸ਼ਕ ਫ਼ਿਲਮ ਨੂੰ ਪਸੰਦ ਕਰਦੇ ਸਨ। ਅਸੀਂ ਪ੍ਰਚਾਰ ਬਜਟ ਅਨੁਸਾਰ ਖਰਚ ਕੀਤਾ। ਅਸੀਂ ਯੋਜਨਾ ਅਨੁਸਾਰ ਸਭ ਕੁਝ ਕੀਤਾ।’’

ਐੱਸ. ਐੱਸ. ਕਾਰਤਿਕੇਆ ਨੇ ਇਹ ਵੀ ਕਿਹਾ, ‘‘ਇਹ ਬਹੁਤ ਵੱਡਾ ਮਜ਼ਾਕ ਹੈ ਕਿ ਜੇਕਰ ਅਸੀਂ ਭੁਗਤਾਨ ਕਰਦੇ ਹਾਂ ਤਾਂ ਅਸੀਂ ਆਸਕਰ ਖਰੀਦ ਸਕਦੇ ਹਾਂ। 95 ਸਾਲਾਂ ਦੇ ਲੰਬੇ ਇਤਿਹਾਸ ਦੇ ਨਾਲ ਇਹ ਇਕ ਸੰਸਥਾ ਹੈ। ਉਥੇ ਸਭ ਕੁਝ ਇਕ ਪ੍ਰਕਿਰਿਆ ਅਧੀਨ ਹੁੰਦਾ ਹੈ। ਮੈਂ ਸਿਰਫ ਇਕ ਗੱਲ ਕਹਿ ਸਕਦਾ ਹਾਂ ਕਿ ਅਸੀਂ ਪ੍ਰਸ਼ੰਸਕਾਂ ਦਾ ਪਿਆਰ ਖਰੀਦ ਸਕਦੇ ਹਾਂ। ਅਸੀਂ ਫ਼ਿਲਮ ਬਾਰੇ ਸਟੀਵਨ ਸਪੀਲਬਰਗ ਤੇ ਜੇਮਸ ਕੈਮਰਨ ਦੇ ਸ਼ਬਦਾਂ ਨੂੰ ਨਹੀਂ ਖਰੀਦ ਸਕਦੇ। ਪ੍ਰਸ਼ੰਸਕਾਂ ਨੇ ਸਾਨੂੰ ਬਹੁਤ ਪਬਲੀਸਿਟੀ ਦਿੱਤੀ ਹੈ।’’

ਇਹ ਖ਼ਬਰ ਵੀ ਪੜ੍ਹੋ : ਫ਼ਿਲਮ 'ਪਠਾਨ' ਦੀ ਸਫ਼ਲਤਾ ਤੋਂ ਬਾਅਦ ਸ਼ਾਹਰੁਖ ਖ਼ਾਨ ਨੇ ਖਰੀਦੀ 8.20 ਕਰੋੜ ਦੀ ਲਗਜ਼ਰੀ ਕਾਰ

ਕਾਰਤਿਕੇਆ ਨੇ ‘ਆਰ. ਆਰ. ਆਰ.’ ਦੀ ਮੁਹਿੰਮ ’ਤੇ ਖਰਚ ਕੀਤੀ ਗਈ ਸਹੀ ਰਕਮ ਦਾ ਵੀ ਖ਼ੁਲਾਸਾ ਕੀਤਾ। ਉਸ ਨੇ ਖ਼ੁਲਾਸਾ ਕੀਤਾ, ‘‘ਪੱਛਮ ’ਚ ਹਾਲੀਵੁੱਡ ਫ਼ਿਲਮ ਨਿਰਮਾਤਾ ਆਸਕਰ ਮੁਹਿੰਮਾਂ ਲਈ ਕਈ ਸਟੂਡੀਓਜ਼ ਤੱਕ ਪਹੁੰਚ ਕਰਦੇ ਹਨ। ਸਾਡੇ ਕੋਲ ਇਹ ਮੌਕਾ ਨਹੀਂ ਸੀ। ਮੁਹਿੰਮ ਲਈ ਯੋਜਨਾਬੱਧ ਬਜਟ 5 ਕਰੋੜ ਰੁਪਏ ਹੈ। ਇਹ ਸਾਨੂੰ ਬਹੁਤ ਜ਼ਿਆਦਾ ਲੱਗ ਰਿਹਾ ਸੀ। ਅਸੀਂ ਜਿੰਨਾ ਹੋ ਸਕੇ ਲਾਗਤ ਘਟਾਉਣ ਦੀ ਕੋਸ਼ਿਸ਼ ਕੀਤੀ। ਅਸੀਂ ਇਸ ਨੂੰ ਤਿੰਨ ਪੜਾਵਾਂ ’ਚ ਖਰਚ ਕਰਨਾ ਚਾਹੁੰਦੇ ਸੀ। ਪਹਿਲੇ ਪੜਾਅ ’ਚ ਅਸੀਂ 3 ਕਰੋੜ ਰੁਪਏ ਖਰਚ ਕੀਤੇ। ਨਾਮਜ਼ਦਗੀ ਤੋਂ ਬਾਅਦ ਅਸੀਂ ਬਜਟ ’ਚ ਵਾਧਾ ਕੀਤਾ। ਅਸੀਂ ਸੋਚਿਆ ਕਿ ਇਸ ਪੂਰੀ ਮੁਹਿੰਮ ਲਈ 5-6 ਕਰੋੜ ਰੁਪਏ ਹੋਵੇਗਾ। ਮੁਹਿੰਮ ਸ਼ੁਰੂ ਕੀਤੀ ਸੀ ਪਰ ਅੰਤ ’ਚ ਇਹ 8.5 ਕਰੋੜ ਰੁਪਏ ਸੀ। ਨਿਊਯਾਰਕ ਤੇ ਲਾਸ ਏਂਜਲਸ ’ਚ ਹੋਰ ਸਕ੍ਰੀਨਿੰਗ ਕੀਤੀ ਜਾਣੀ ਸੀ।’’

ਇਹ ਦਾਅਵਾ ਵੀ ਕੀਤਾ ਗਿਆ ਸੀ ਕਿ ‘ਆਰ. ਆਰ. ਆਰ.’ ਦੀ ਟੀਮ ਨੂੰ ਆਸਕਰ ’ਚ ਸ਼ਾਮਲ ਹੋਣ ਲਈ 25,000 ਡਾਲਰ ਤੋਂ ਵੱਧ ਦਾ ਭੁਗਤਾਨ ਕਰਨਾ ਪਿਆ ਸੀ। ਇਨ੍ਹਾਂ ਅਫਵਾਹਾਂ ’ਤੇ ਪ੍ਰਤੀਕਿਰਿਆ ਦਿੰਦਿਆਂ ਕਾਰਤਿਕੇਆ ਨੇ ਕਿਹਾ, ‘‘ਜੂਨੀਅਰ ਐੱਨ. ਟੀ. ਆਰ., ਰਾਮ ਚਰਨ, ਪ੍ਰੇਮ ਰਕਸ਼ਿਤ, ਰਾਹੁਲ ਸਿਪਲੀਗੰਜ ਤੇ ਕਾਲ ਭੈਰਵ ਨੂੰ ਆਸਕਰ ਕਮੇਟੀ ਨੇ ਸੱਦਾ ਦਿੱਤਾ ਸੀ। ਨਾਮਜ਼ਦਗੀਆਂ ’ਚ ਐੱਮ. ਐੱਮ. ਕੀਰਵਾਨੀ ਤੇ ਚੰਦਰ ਬੋਸ ਸਨ। ਇਸ ਤੋਂ ਇਲਾਵਾ ਜਿਨ੍ਹਾਂ ਨੂੰ ਕਮੇਟੀ ਵਲੋਂ ਨਾਮਜ਼ਦ ਜਾਂ ਸੱਦਾ ਦਿੱਤਾ ਗਿਆ ਹੈ, ਉਨ੍ਹਾਂ ਨੂੰ ਆਸਕਰ ਦੀਆਂ ਟਿਕਟਾਂ ਖਰੀਦਣੀਆਂ ਪੈਣਗੀਆਂ। ਇਸ ਦੇ ਲਈ ਨਾਮਜ਼ਦ ਵਿਅਕਤੀ ਨੂੰ ਆਸਕਰ ਕਮੇਟੀ ਨੂੰ ਈ-ਮੇਲ ਭੇਜਣੀ ਹੋਵੇਗੀ। ਇਸ ਤੋਂ ਇਲਾਵਾ ਕਈ ਤਰ੍ਹਾਂ ਦੀਆਂ ਕਲਾਸਾਂ ਹਨ। ਕਿਰਵਾਨੀ ਨੇ ਸਾਡੇ ਪਰਿਵਾਰ ਲਈ ਆਸਕਰ ਨੂੰ ਈ-ਮੇਲ ਕੀਤੀ ਤੇ ਹਰ ਚੀਜ਼ ਦੀ ਜਾਂਚ ਕਰਨ ਤੋਂ ਬਾਅਦ ਉਸ ਨੇ ਮੇਲ ਦਾ ਜਵਾਬ ਦਿੱਤਾ ਤੇ ਇਕ ਲਿੰਕ ਭੇਜਿਆ। ਇਸ ਲਈ ਅਸੀਂ ਹਰੇਕ ਟਿਕਟ 1500 ਡਾਲਰ ਲਈ ਖਰੀਦੀ। ਇਹ ਨੀਵਾਂ ਪੱਧਰ ਹੈ। ਅਸੀਂ ਚਾਰ ਲੋਕਾਂ ਨੇ ਸਿਖਰ ’ਤੇ ਬੈਠਣ ਤੇ ਦੇਖਣ ਲਈ ਹੋਰ 750 ਡਾਲਰ ਖਰਚ ਕੀਤੇ। ਅਸੀਂ ਟਿਕਟਾਂ ਖਰੀਦੀਆਂ ਹਨ। ਇਹ ਸਭ ਅਧਿਕਾਰਤ ਤੌਰ ’ਤੇ ਕੀਤਾ ਗਿਆ ਹੈ।’’

ਨੋਟ– ਇਸ ਖ਼ਬਰ ’ਤੇ ਆਪਣੀ ਪ੍ਰਤੀਕਿਰਿਆ ਕੁਮੈਂਟ ਕਰਕੇ ਸਾਂਝੀ ਕਰੋ।