ਪਿਤਾ ਦੀ ਕੌੜੀ ਗੱਲ ਬਣੀ ਪ੍ਰੇਰਨਾ: ਜੈਕੀ ਭਗਨਾਨੀ ਨੇ ਦੱਸਿਆ ਕਿਵੇਂ 150 ਕਿਲੋ ਤੋਂ ਖ਼ੁਦ ਨੂੰ ਕੀਤਾ ਫਿੱਟ

ਮੁੰਬਈ (ਏਜੰਸੀ)- ਅਦਾਕਾਰ ਅਤੇ ਨਿਰਮਾਤਾ ਜੈਕੀ ਭਗਨਾਨੀ ਨੇ ਨੇਹਾ ਧੂਪੀਆ ਅਤੇ ਅੰਗਦ ਬੇਦੀ ਦੇ ਚੈਟ ਸ਼ੋਅ 'ਡਬਲ ਡੇਟ' ਵਿੱਚ ਆਪਣੀ ਨਿੱਜੀ ਜ਼ਿੰਦਗੀ ਨਾਲ ਜੁੜੀਆਂ ਭਾਵੁਕ ਗੱਲਾਂ ਸਾਂਝੀਆਂ ਕੀਤੀਆਂ ਹਨ। ਸ਼ੋਅ ਵਿੱਚ ਆਪਣੀ ਪਤਨੀ ਰਕੁਲ ਪ੍ਰੀਤ ਸਿੰਘ ਨਾਲ ਪਹੁੰਚੇ ਜੈਕੀ ਨੇ ਦੱਸਿਆ ਕਿ ਬਚਪਨ ਵਿੱਚ ਉਨ੍ਹਾਂ ਦਾ ਵਜ਼ਨ ਲਗਭਗ 150 ਕਿਲੋ ਸੀ, ਜਿਸ ਕਾਰਨ ਉਨ੍ਹਾਂ ਨੂੰ ਲਗਾਤਾਰ ਬੌਡੀ ਸ਼ੇਮਿੰਗ (ਸਰੀਰਕ ਦਿੱਖ ਦਾ ਮਜ਼ਾਕ ਉਡਾਉਣਾ) ਅਤੇ ਲੋਕਾਂ ਦੇ ਤਾਹਨਿਆਂ ਦਾ ਸਾਹਮਣਾ ਕਰਨਾ ਪਿਆ।

ਇੱਕ ਪੁਰਾਣੀ ਘਟਨਾ ਨੂੰ ਯਾਦ ਕਰਦਿਆਂ ਉਨ੍ਹਾਂ ਦੱਸਿਆ ਕਿ ਇੱਕ ਗੱਲਬਾਤ ਦੌਰਾਨ ਉਨ੍ਹਾਂ ਦੀ ਤੁਲਨਾ ਮਸ਼ਹੂਰ ਰੈਸਲਰ 'ਯੋਕੋਜ਼ੂਨਾ' ਨਾਲ ਕੀਤੀ ਗਈ ਸੀ, ਜੋ ਉਨ੍ਹਾਂ ਲਈ ਬਹੁਤ ਦੁਖਦਾਈ ਸੀ। ਜੈਕੀ ਨੇ ਕਿਹਾ ਕਿ ਅਜਿਹੀਆਂ ਟਿੱਪਣੀਆਂ ਭਾਵੇਂ ਲੋਕ ਮਜ਼ਾਕ ਵਿੱਚ ਕਰਦੇ ਹੋਣ, ਪਰ ਇਨ੍ਹਾਂ ਦਾ ਮਾਨਸਿਕ ਅਸਰ ਲੰਬੇ ਸਮੇਂ ਤੱਕ ਰਹਿੰਦਾ ਹੈ। ਉਨ੍ਹਾਂ ਇਹ ਵੀ ਸਾਂਝਾ ਕੀਤਾ ਕਿ, "ਮੇਰੇ ਪਿਤਾ ਨੇ ਮੈਨੂੰ ਉਸੇ ਸਰੀਰਕ ਸਥਿਤੀ ਵਿੱਚ ਇੱਕ ਅਦਾਕਾਰ ਵਜੋਂ ਲਾਂਚ ਕਰਨ ਤੋਂ ਸਾਫ਼ ਮਨ੍ਹਾ ਕਰ ਦਿੱਤਾ ਸੀ। ਸ਼ੁਰੂ ਵਿੱਚ ਮੈਨੂੰ ਇਹ ਗੱਲ ਬਹੁਤ ਕੌੜੀ ਤੇ ਮੁਸ਼ਕਿਲ ਲੱਗੀ, ਪਰ ਬਾਅਦ ਵਿੱਚ ਮੈਂ ਇਸਨੂੰ ਆਪਣੇ ਬਦਲਾਅ ਦੀ ਪ੍ਰੇਰਨਾ ਬਣਾ ਲਿਆ।"

ਇਸ ਤੋਂ ਬਾਅਦ ਜੈਕੀ ਨੇ ਆਪਣੀ ਫਿਟਨੈਸ 'ਤੇ ਸਖ਼ਤ ਮਿਹਨਤ ਕੀਤੀ ਅਤੇ ਖ਼ੁਦ ਨੂੰ ਪੂਰੀ ਤਰ੍ਹਾਂ ਬਦਲ ਲਿਆ। ਸ਼ੋਅ ਵਿੱਚ ਉਨ੍ਹਾਂ ਦੀ ਇਸ ਇਮਾਨਦਾਰ ਗੱਲਬਾਤ ਨੂੰ ਦਰਸ਼ਕਾਂ ਵੱਲੋਂ ਕਾਫੀ ਪਸੰਦ ਕੀਤਾ ਜਾ ਰਿਹਾ ਹੈ ਅਤੇ ਸੋਸ਼ਲ ਮੀਡੀਆ 'ਤੇ ਉਨ੍ਹਾਂ ਦੇ ਇਸ ਬੇਬਾਕ ਅੰਦਾਜ਼ ਦੀ ਖੂਬ ਤਾਰੀਫ਼ ਹੋ ਰਹੀ ਹੈ।