ਰਿਤਿਕ ਰੋਸ਼ਨ ਨੇ ਜੈਕੀ ਚੈਨ ਨਾਲ ਕੀਤੀ ਮੁਲਾਕਾਤ, ਇੰਸਟਾਗ੍ਰਾਮ ''ਤੇ ਤਸਵੀਰਾਂ ਕੀਤੀਆਂ ਸਾਂਝੀਆਂ

ਨਵੀਂ ਦਿੱਲੀ (ਭਾਸ਼ਾ) - ਅਦਾਕਾਰ ਰਿਤਿਕ ਰੋਸ਼ਨ ਨੇ ਐਕਸ਼ਨ ਆਈਕਨ ਜੈਕੀ ਚੈਨ ਨਾਲ ਇੱਕ ਫੋਟੋ ਸਾਂਝੀ ਕਰਕੇ ਆਪਣੇ ਪ੍ਰਸ਼ੰਸਕਾਂ ਨੂੰ ਹੈਰਾਨ ਕਰ ਦਿੱਤਾ। ਸੋਮਵਾਰ ਨੂੰ ਰੋਸ਼ਨ ਨੇ ਆਪਣੇ ਇੰਸਟਾਗ੍ਰਾਮ ਹੈਂਡਲ 'ਤੇ 2 ਫੋਟੋਆਂ ਅਪਲੋਡ ਕੀਤੀਆਂ। ਇਨ੍ਹਾਂ ਵਿੱਚ, ਉਹ ਅਮਰੀਕਾ ਦੇ ਬੇਵਰਲੀ ਹਿਲਜ਼ ਵਿੱਚ ਇੱਕ ਹੋਟਲ ਦੇ ਬਾਹਰ ਚੈਨ ਨਾਲ ਪੋਜ਼ ਦਿੰਦੇ ਹੋਏ ਦਿਖਾਈ ਦੇ ਰਹੇ ਹਨ। ਉਨ੍ਹਾਂ ਕੈਪਸ਼ਨ ਵਿੱਚ ਲਿਖਿਆ, "ਇੱਥੇ ਤੁਹਾਨੂੰ ਮਿਲ ਕੇ ਬਹੁਤ ਵਧੀਆ ਲੱਗਿਆ, ਸਰ।" "ਦਿ ਫੀਅਰਲੈੱਸ ਹਾਇਨਾ" (1979), "ਹੂ ਐਮ ਆਈ?" (1998), ਅਤੇ "ਪੁਲਸ ਸਟੋਰੀ" (1985) ਵਰਗੀਆਂ ਫਿਲਮਾਂ ਵਿੱਚ ਆਪਣੇ ਮਹੱਤਵਪੂਰਨ ਕੰਮ ਲਈ ਜਾਣੇ ਜਾਂਦੇ ਚੈਨ ਨੇ ਗੂੜ੍ਹੇ ਨੀਲੇ ਰੰਗ ਦਾ ਟਰੈਕਸੂਟ ਪਾਇਆ ਹਇਆ ਸੀ। ਰੋਸ਼ਨ ਨੇ ਸਫੇਦ ਡੈਨਿਮ ਅਤੇ ਇਕ ਜੈਕੇਟ ਨਾਲ ਉਸੇ ਰੰਗ ਦੇ ਬੂਟ ਪਾਏ ਹੋਏ ਸਨ। ਦੋਵਾਂ ਨੇ ਹੀ ਟੋਪੀਆਂ ਪਾਈਆਂ ਸਨ। ਰੋਸ਼ਨ ਦੀ ਹਾਲੀਆ ਫਿਲਮ, "ਵਾਰ 2", ਅਗਸਤ ਵਿੱਚ ਰਿਲੀਜ਼ ਹੋਈ ਸੀ।

ਅਯਾਨ ਮੁਖਰਜੀ ਦੁਆਰਾ ਨਿਰਦੇਸ਼ਤ, ਇਸ ਫਿਲਮ ਵਿੱਚ ਰੋਸ਼ਨ ਨੇ ਜੂਨੀਅਰ ਐਨਟੀਆਰ ਅਤੇ ਕਿਆਰਾ ਅਡਵਾਨੀ ਦੇ ਨਾਲ ਵੀ ਅਭਿਨੈ ਕੀਤਾ ਸੀ। ਇਹ ਰੋਸ਼ਨ ਅਤੇ ਟਾਈਗਰ ਸ਼ਰਾਫ ਅਭਿਨੀਤ 2019 ਦੀ ਫਿਲਮ "ਵਾਰ" ਦਾ ਸੀਕਵਲ ਸੀ। ਜੋਨਾਥਨ ਐਂਟਵਿਸਲ ਦੀ ਮਾਰਸ਼ਲ ਆਰਟਸ ਫਿਲਮ "ਕਰਾਟੇ ਕਿਡ: ਲੈਜੇਂਡਸ" ਵਿੱਚ ਜੈਕੀ ਚੈਨ ਨੇ ਮੁੱਖ ਭੂਮਿਕਾ ਨਿਭਾਈ ਸੀ। ਇਹ ਫਿਲਮ ਮਈ ਵਿੱਚ ਰਿਲੀਜ਼ ਹੋਈ ਸੀ।