ਲੰਬੇ ਸਮੇਂ ਬਾਅਦ ਵੱਡੇ ਪਰਦੇ ''ਤੇ ਜੇਨੇਲੀਆ ਡਿਸੂਜ਼ਾ ਤੇ ਰਿਤੇਸ਼ ਦੇਸ਼ਮੁਖ ਦੀ ਵਾਪਸੀ, ਨਿਭਾਉਣਗੇ ਅਤਰੰਗੀ ਕਿਰਦਾਰ
02/04/2022 5:24:10 PM
ਮੁੰਬਈ (ਬਿਊਰੋ) : ਬਾਲੀਵੁੱਡ ਅਦਾਕਾਰਾ ਜੇਨੇਲੀਆ ਡਿਸੂਜ਼ਾ ਲੰਬੇ ਸਮੇਂ ਬਾਅਦ ਅਦਾਕਾਰੀ ਦੀ ਦੁਨੀਆ 'ਚ ਵਾਪਸੀ ਕਰਨ ਜਾ ਰਹੀ ਹੈ। ਜੇਨੇਲੀਆ ਡਿਸੂਜ਼ਾ ਕਰੀਬ 10 ਸਾਲਾਂ ਬਾਅਦ ਐਕਟਿੰਗ ਦੀ ਦੁਨੀਆ 'ਚ ਕਦਮ ਰੱਖਣ ਜਾ ਰਹੀ ਹੈ। ਉਹ ਆਖਰੀ ਵਾਰ ਰਿਤੇਸ਼ ਦੇਸ਼ਮੁਖ ਨਾਲ ਫ਼ਿਲਮ 'ਤੇਰੇ ਨਾਲ ਲਵ ਹੋ ਗਿਆ' 'ਚ ਨਜ਼ਰ ਆਈ ਸੀ। ਇਸ ਤੋਂ ਬਾਅਦ ਉਸ ਨੇ ਕੁਝ ਫ਼ਿਲਮਾਂ 'ਚ ਕੰਮ ਕੀਤਾ ਸੀ ਪਰ ਇਸ 'ਚ ਉਨ੍ਹਾਂ ਦਾ ਕੈਮਿਓ ਸੀ। ਹੁਣ ਜੇਨੇਲੀਆ ਇਕ ਵਾਰ ਫਿਰ ਰਿਤੇਸ਼ ਨਾਲ ਫ਼ਿਲਮ 'ਚ ਨਜ਼ਰ ਆਉਣ ਵਾਲੀ ਹੈ। ਉਨ੍ਹਾਂ ਨੇ ਆਪਣੀ ਆਉਣ ਵਾਲੀ ਫ਼ਿਲਮ 'ਮਿਸਟਰ ਮੰਮੀ' ਦਾ ਫਰਸਟ ਲੁੱਕ ਸ਼ੇਅਰ ਕੀਤਾ ਹੈ। ਇਸ ਫ਼ਿਲਮ 'ਚ ਰਿਤੇਸ਼ ਤੇ ਜੇਨੇਲੀਆ ਦੋਵੇਂ ਗਰਭਵਤੀ ਨਜ਼ਰ ਆਉਣ ਵਾਲੇ ਹਨ। ਇਹ ਇੱਕ ਕਾਮੇਡੀ ਡਰਾਮਾ ਫ਼ਿਲਮ ਹੈ।
ਜੇਨੇਲੀਆ ਡਿਸੂਜ਼ਾ ਨੇ ਸੋਸ਼ਲ ਮੀਡੀਆ 'ਤੇ ਸਾਂਝੀ ਕੀਤੀ ਪਹਿਲੀ ਲੁੱਕ
ਜੇਨੇਲੀਆ ਡਿਸੂਜ਼ਾ ਨੇ ਫ਼ਿਲਮ ਦੀ ਫਰਸਟ ਲੁੱਕ ਸੋਸ਼ਲ ਮੀਡੀਆ 'ਤੇ ਸ਼ੇਅਰ ਕੀਤੀ ਹੈ, ਜਿਸ 'ਚ ਰਿਤੇਸ਼ ਅਤੇ ਜੇਨੇਲੀਆ ਦੋਵੇਂ ਪ੍ਰੈਗਨੈਂਟ ਨਜ਼ਰ ਆ ਰਹੇ ਹਨ। ਜੇਨੇਲੀਆ ਹੱਸ ਰਹੀ ਹੈ ਅਤੇ ਰਿਤੇਸ਼ ਦੇਸ਼ਮੁਖ ਪਰੇਸ਼ਾਨ ਨਜ਼ਰ ਆ ਰਹੇ ਹਨ। ਇਸ ਪੋਸਟਰ ਨੂੰ ਸਾਂਝਾ ਕਰਦਿਆਂ ਜੇਨੇਲੀਆ ਨੇ ਲਿਖਿਆ, ''ਇੱਕ ਟਵਿਸਟਡ ਹਾਸੇ ਦੀ ਰਾਈਡ ਅਤੇ ਕਹਾਣੀ ਜੋ ਤੁਸੀਂ ਪਹਿਲਾਂ ਕਦੇ ਨਹੀਂ ਦੇਖੀ ਹੋਵੇਗੀ। ਤੁਸੀਂ ਦਿਲ ਨਾਲ ਹੱਸਣ ਲਈ ਤਿਆਰ ਹੋ ਜਾਓ, ਤੁਹਾਡਾ ਢਿੱਡ ਦੁਖਣ ਵਾਲਾ ਹੈ।''
ਪ੍ਰਸ਼ੰਸਕ ਫੈਨਜ਼ ਜੇਨੇਲੀਆ ਦੀ ਇਸ ਪੋਸਟ 'ਤੇ ਕੁਮੈਂਟ ਕਰਕੇ ਉਨ੍ਹਾਂ ਨੂੰ ਵਧਾਈ ਦੇ ਰਹੇ ਹਨ। ਉਹ ਪੋਸਟ 'ਤੇ ਟਿੱਪਣੀ ਕਰਕੇ ਰਿਲੀਜ਼ਿੰਗ ਡੇਟ ਬਾਰੇ ਪੁੱਛ ਰਹੇ ਹਨ। ਇੰਨਾ ਹੀ ਨਹੀਂ ਪ੍ਰਸ਼ੰਸਕ ਜੇਨੇਲੀਆ ਅਤੇ ਰਿਤੇਸ਼ ਨੂੰ ਇੱਕ ਵਾਰ ਫਿਰ ਇਕੱਠੇ ਦੇਖ ਕੇ ਕਾਫ਼ੀ ਖੁਸ਼ ਹਨ। ਇਸ ਫ਼ਿਲਮ ਨੂੰ ਭੂਸ਼ਣ ਕੁਮਾਰ ਪ੍ਰੋਡਿਊਸ ਕਰ ਰਹੇ ਹਨ।
ਇਹ ਹੋਵੇਗੀ ਫ਼ਿਲਮ ਦੀ ਕਹਾਣੀ
'ਮਿਸਟਰ ਮੰਮੀ' ਕਾਮੇਡੀ ਡਰਾਮੇ ਦੀ ਪੰਚ ਲਾਈਨ ਲੋਕਾਂ ਨੂੰ ਹਸਾਵੇਗੀ ਅਤੇ ਇਸ ਦਾ ਕਾਮਿਕ ਟਾਈਮਿੰਗ ਦੇਖਣਯੋਗ ਹੋਵੇਗਾ। ਇਸ ਫ਼ਿਲਮ ਦੀ ਕਹਾਣੀ ਇੱਕ ਅਜਿਹੇ ਜੋੜੇ ਦੇ ਆਲੇ-ਦੁਆਲੇ ਘੁੰਮਦੀ ਹੈ, ਜਿਨ੍ਹਾਂ ਦੀ ਵਿਚਾਰਧਾਰਾ ਬੱਚਿਆਂ ਨੂੰ ਲੈ ਕੇ ਇੱਕ ਦੂਜੇ ਤੋਂ ਬਿਲਕੁਲ ਵੱਖਰੀ ਹੈ ਪਰ ਕਿਸਮਤ ਨੇ ਇਨ੍ਹਾਂ ਚਾਇਲਡਹੁਡ ਸਵੀਟਹਾਰਟ ਲਈ ਕਾਮੇਡੀ, ਡਰਾਮੇ, ਖੁਲਾਸੇ ਅਤੇ ਅਹਿਸਾਸਾਂ ਦੀ ਇੱਕ ਉਚੀ-ਨੀਵੀਂ ਸਵਾਰੀ ਨਾਲ ਕੁਝ ਹੋਰ ਯੋਜਨਾ ਬਣਾਈ ਹੈ!
ਮਰਾਠੀ ਫ਼ਿਲਮ 'ਚ ਵੀ ਆਵੇਗੀ ਨਜ਼ਰ
ਦੱਸਣਯੋਗ ਹੈ ਕਿ ਜੇਨੇਲੀਆ ਮਰਾਠੀ ਫ਼ਿਲਮ 'ਵੇਦ' 'ਚ ਵੀ ਨਜ਼ਰ ਆਉਣ ਵਾਲੀ ਹੈ। ਉਨ੍ਹਾਂ ਨੇ ਕੁਝ ਸਮਾਂ ਪਹਿਲਾਂ ਸੋਸ਼ਲ ਮੀਡੀਆ 'ਤੇ ਇੱਕ ਪੋਸਟ ਸ਼ੇਅਰ ਕਰਕੇ ਇਸ ਫ਼ਿਲਮ ਬਾਰੇ ਜਾਣਕਾਰੀ ਦਿੱਤੀ ਸੀ। ਇਸ ਫ਼ਿਲਮ ਦੀ ਖਾਸ ਗੱਲ ਇਹ ਹੈ ਕਿ ਇਸ ਦਾ ਨਿਰਦੇਸ਼ਨ ਰਿਤੇਸ਼ ਦੇਸ਼ਮੁਖ ਕਰ ਰਹੇ ਹਨ। ਜੇਨੇਲੀਆ ਦੀ ਵਾਪਸੀ ਦੇ ਨਾਲ ਇਹ ਵੀ ਹੈ ਕਿ ਰਿਤੇਸ਼ ਦਾ ਨਿਰਦੇਸ਼ਨ 'ਚ ਡੈਬਿਊ ਹੋ ਰਿਹਾ ਹੈ।
ਨੋਟ - ਇਸ ਖ਼ਬਰ ਸਬੰਧੀ ਤੁਹਾਡੀ ਕੀ ਹੈ ਪ੍ਰਤੀਕਿਰਿਆ, ਕੁਮੈਂਟ ਰਾਹੀਂ ਸਾਡੇ ਨਾਲ ਜ਼ਰੂਰ ਸਾਂਝੀ ਕਰੋ।
