4 ਸਾਲਾਂ ਬੱਚੀ ਨੇ ਤੋੜਿਆ ਸੁਪਰਸਟਾਰ ਦਾ ਰਿਕਾਰਡ, ਹਾਸਲ ਕੀਤੀ ਵੱਡੀ ਉਪਲੱਬਧੀ

ਐਂਟਰਟੇਨਮੈਂਟ ਡੈਸਕ- ਛੋਟੀ ਅਦਾਕਾਰਾ ਤ੍ਰਿਸ਼ਾ ਥੋਸਰ ਨੂੰ ਹਾਲ ਹੀ ਵਿੱਚ ਦਿੱਲੀ ਵਿੱਚ ਹੋਏ 71ਵੇਂ ਰਾਸ਼ਟਰੀ ਫਿਲਮ ਪੁਰਸਕਾਰ ਸਮਾਰੋਹ ਵਿੱਚ ਰਾਸ਼ਟਰੀ ਫਿਲਮ ਪੁਰਸਕਾਰ ਨਾਲ ਸਨਮਾਨਿਤ ਕੀਤਾ ਗਿਆ। ਦਿੱਗਜ ਅਦਾਕਾਰ ਕਮਲ ਹਾਸਨ ਨੇ ਹਾਲ ਹੀ ਵਿੱਚ ਬਾਲ ਕਲਾਕਾਰ ਦੀ ਜਿੱਤ 'ਤੇ ਆਪਣੀ ਖੁਸ਼ੀ ਜ਼ਾਹਰ ਕੀਤੀ। ਅਦਾਕਾਰ ਨੇ ਤ੍ਰਿਸ਼ਾ ਨੂੰ ਸ਼ਾਬਾਸ਼ੀ ਦਿੱਤੀ ਹੈ ਕਿ ਨੰਨ੍ਹੀ ਅਦਾਕਾਰਾ ਨੇ ਉਨ੍ਹਾਂ ਦਾ ਰਿਕਾਰਡ ਤੋੜ ਦਿੱਤਾ ਹੈ।

ਆਪਣੇ ਇੰਸਟਾਗ੍ਰਾਮ ਅਕਾਊਂਟ ਤੋਂ ਇੱਕ ਪੋਸਟ ਸਾਂਝੀ ਕਰਦੇ ਹੋਏ ਕਮਲ ਹਾਸਨ ਨੇ ਲਿਖਿਆ, "ਪਿਆਰੀ ਤ੍ਰਿਸ਼ਾ ਥੋਸਰ ਤੁਹਾਨੂੰ ਮੇਰੇ ਵਲੋਂ ਖੂਬ ਸਾਰੀਆਂ ਵਧਾਈਆਂ। ਤੁਸੀਂ ਮੇਰਾ ਰਿਕਾਰਡ ਤੋੜ ਦਿੱਤਾ ਹੈ, ਕਿਉਂਕਿ ਜਦੋਂ ਮੈਨੂੰ ਆਪਣਾ ਪਹਿਲਾ ਪੁਰਸਕਾਰ ਮਿਲਿਆ ਸੀ ਤਾਂ ਮੈਂ ਛੇ ਸਾਲ ਦਾ ਸੀ। ਬਹੁਤ ਵਧੀਆ, ਮੈਡਮ। ਆਪਣੀ ਸ਼ਾਨਦਾਰ ਪ੍ਰਤਿਭਾ 'ਤੇ ਕੰਮ ਕਰਦੇ ਰਹੋ। ਘਰ ਦੇ ਵੱਡਿਆਂ ਨੂੰ ਮੇਰੀਆਂ ਦਿਲੋਂ ਵਧਾਈਆਂ।"

ਇਸ ਤੋਂ ਇਲਾਵਾ ਇੱਕ ਵੀਡੀਓ ਵਿੱਚ ਕਮਲ ਹਾਸਨ ਨੰਨ੍ਹੀ ਤ੍ਰਿਸ਼ਾ ਨੂੰ ਉਨ੍ਹਾਂ ਦੀ ਸਫਲਤਾ 'ਤੇ ਵਧਾਈ ਦਿੰਦੇ ਹਨ ਅਤੇ ਉਨ੍ਹਾਂ ਨੂੰ ਉਸਦੇ ਆਉਣ ਵਾਲੇ ਪ੍ਰੋਜੈਕਟਾਂ ਬਾਰੇ ਪੁੱਛਦੇ ਹਨ। ਤ੍ਰਿਸ਼ਾ ਮਾਸੂਮੀਅਤ ਨਾਲ ਜਵਾਬ ਦਿੰਦੀ ਹੈ ਅਤੇ ਸ਼ੁਭਕਾਮਨਾਵਾਂ ਲਈ ਧੰਨਵਾਦ ਪ੍ਰਗਟ ਕਰਦੀ ਹੈ।

ਪੋਸਟ ਦੇ ਨਾਲ ਕੈਪਸ਼ਨ ਵਿੱਚ ਲਿਖਿਆ ਹੈ, "ਕਮਲ ਹਾਸਨ ਨੇ ਛੇ ਸਾਲ ਦੀ ਉਮਰ ਵਿੱਚ ਆਪਣਾ ਪਹਿਲਾ ਰਾਸ਼ਟਰੀ ਪੁਰਸਕਾਰ ਜਿੱਤਿਆ।" ਤ੍ਰਿਸ਼ਾ ਥੋਸਰ ਨੇ ਚਾਰ ਸਾਲ ਦੀ ਉਮਰ ਵਿੱਚ ਇਹ ਵੱਕਾਰੀ ਪੁਰਸਕਾਰ ਜਿੱਤਿਆ। ਤ੍ਰਿਸ਼ਾ ਥੋਸਰ ਨੇ 2023 ਦੀ ਫਿਲਮ 'ਨਾਲ 2' ਵਿੱਚ ਆਪਣੀ ਭੂਮਿਕਾ ਲਈ ਰਾਸ਼ਟਰੀ ਪੁਰਸਕਾਰ ਜਿੱਤਿਆ। 'ਨਾਲ 2' ਇੱਕ ਮਰਾਠੀ ਫਿਲਮ ਹੈ।