ਬੀ ਪਰਾਕ ਤੇ ਜਾਨੀ ਦੇ ਗਾਣੇ ’ਚ ਨਵਾਜ਼ੂਦੀਨ ਸਿੱਦੀਕੀ ਤੇ ਸੁਨੰਦਾ ਸ਼ਰਮਾ ਦਾ ਧਮਾਕਾ (ਵੀਡੀਓ)

ਚੰਡੀਗੜ੍ਹ (ਬਿਊਰੋ)– ਪੰਜਾਬੀ ਗਾਇਕ ਬੀ ਪਰਾਕ ਦਾ ਕਾਫੀ ਦਿਨਾਂ ਤੋਂ ਉਡੀਕਿਆ ਜਾਣ ਵਾਲਾ ਗੀਤ ‘ਬਾਰਿਸ਼ ਕੀ ਜਾਏ’ ਅੱਜ ਰਿਲੀਜ਼ ਹੋ ਗਿਆ ਹੈ। ਗੀਤ ਦੀ ਉਡੀਕ ਇਸ ਲਈ ਵੀ ਕੀਤੀ ਜਾ ਰਹੀ ਸੀ ਕਿਉਂਕਿ ਇਸ ’ਚ ਨਵਾਜ਼ੂਦੀਨ ਸਿੱਦੀਕੀ ਨਜ਼ਰ ਆਉਣ ਵਾਲੇ ਸਨ। ਨਵਾਜ਼ੂਦੀਨ ਸਿੱਦੀਕੀ ਦਾ ਇਹ ਪਹਿਲਾ ਗੀਤ ਹੈ, ਜਿਸ ’ਚ ਉਹ ਅਦਾਕਾਰੀ ਕਰਦੇ ਨਜ਼ਰ ਆ ਰਹੇ ਹਨ।

ਗੀਤ ਨੂੰ ਆਵਾਜ਼ ਬੀ ਪਰਾਕ ਨੇ ਦਿੱਤੀ ਹੈ ਤੇ ਹਮੇਸ਼ਾ ਵਾਂਗ ਗੀਤ ਸੁਣ ਤੁਸੀਂ ਮੰਤਰਮੁਗਧ ਹੋ ਜਾਓਗੇ। ਗੀਤ ਦੇ ਬੋਲ ਜਾਨੀ ਨੇ ਲਿਖੇ ਹਨ ਤੇ ਵੀਡੀਓ ਅਰਵਿੰਦਰ ਖਹਿਰਾ ਨੇ ਬਣਾਈ ਹੈ।

ਗੀਤ ’ਚ ਸੁਨੰਦਾ ਸ਼ਰਮਾ ਵੀ ਨਵਾਜ਼ੂਦੀਨ ਨਾਲ ਨਜ਼ਰ ਆ ਰਹੀ ਹੈ। ਸੁਨੰਦਾ ਸ਼ਰਮਾ ਤੇ ਨਵਾਜ਼ੂਦੀਨ ਸਿੱਦੀਕੀ ਦੀ ਅਦਾਕਾਰੀ ਗੀਤ ’ਚ ਸ਼ਾਨਦਾਰ ਹੈ। ਗੀਤ ਨੂੰ ਯੂਟਿਊਬ ’ਤੇ ਦੇਸੀ ਮੈਲੋਡੀਜ਼ ਦੇ ਚੈਨਲ ’ਤੇ ਰਿਲੀਜ਼ ਕੀਤਾ ਗਿਆ ਹੈ। ਖ਼ਬਰ ਲਿਖੇ ਜਾਣ ਤਕ ਇਸ ਗੀਤ ਨੂੰ 3 ਲੱਖ ਤੋਂ ਵੱਧ ਵਾਰ ਦੇਖਿਆ ਜਾ ਚੁੱਕਾ ਸੀ।

ਦੱਸਣਯੋਗ ਹੈ ਕਿ ਬੀ ਪਰਾਕ ਤੇ ਜਾਨੀ ਇਕੱਠੇ ਮਿਲ ਕੇ ਕਈ ਸੁਪਰਹਿੱਟ ਗੀਤ ਸੰਗੀਤ ਜਗਤ ਨੂੰ ਦੇ ਚੁੱਕੇ ਹਨ। ਸਿਰਫ ਪੰਜਾਬ ਹੀ ਨਹੀਂ, ਸਗੋਂ ਹੁਣ ਪੂਰੇ ਭਾਰਤ ਤੇ ਦੁਨੀਆ ਭਰ ’ਚ ਬੀ ਪਰਾਕ ਤੇ ਜਾਨੀ ਦੇ ਲੋਕ ਦੀਵਾਨੇ ਹਨ।

ਬੀ ਪਰਾਕ ਦਾ ਸ਼ੁਰੂਆਤੀ ਸਮਾਂ ਵੀ ਕਾਫੀ ਮਿਹਨਤ ਭਰਿਆ ਰਿਹਾ ਹੈ। ਇਕ ਸਮਾਂ ਅਜਿਹਾ ਸੀ, ਜਦੋਂ ਬੀ ਪਰਾਕ ਦਾ ਇੰਡਸਟਰੀ ’ਚ ਨਾਂ ਬਣਨਾ ਮੁਸ਼ਕਿਲ ਹੋ ਰਿਹਾ ਸੀ ਪਰ ਜਦੋਂ ਉਹ ਜਾਨੀ ਨੂੰ ਮਿਲੇ ਤੇ ਦੋਵਾਂ ਨੇ ਇਕੱਠਿਆਂ ਗੀਤ ਕਰਨੇ ਸ਼ੁਰੂ ਕੀਤੇ ਤਾਂ ਦੋਵਾਂ ਦੀ ਕਿਸਮਤ ਬਦਲ ਗਈ। ਉਦੋਂ ਤੋਂ ਲੈ ਕੇ ਹੁਣ ਤਕ ਬੀ ਪਰਾਕ ਤੇ ਜਾਨੀ ਇਕੱਠੇ ਗੀਤ ਕਰ ਰਹੇ ਹਨ ਤੇ ਹਰ ਵਾਰ ਉਨ੍ਹਾਂ ਦੇ ਗੀਤ ਸੁਪਰਹਿੱਟ ਹੁੰਦੇ ਹਨ।

ਨੋਟ– ‘ਬਾਰਿਸ਼ ਕੀ ਜਾਏ’ ਗੀਤ ਤੁਹਾਨੂੰ ਕਿਵੇਂ ਦਾ ਲੱਗਾ? ਕੁਮੈਂਟ ਕਰਕੇ ਜ਼ਰੂਰ ਦੱਸੋ।