ਵਿਆਹ ਦੀ 25ਵੀਂ ਵਰ੍ਹੇਗੰਢ ''ਤੇ ਅਕਸ਼ੈ ਨੇ ਸ਼ੇਅਰ ਕੀਤੀ ਟਵਿੰਕਲ ਦੀ ਮਜ਼ਾਕੀਆ ਵੀਡੀਓ

ਮੁੰਬਈ- ਬਾਲੀਵੁੱਡ ਦੇ 'ਪਾਵਰ ਕਪਲ' ਅਕਸ਼ੈ ਕੁਮਾਰ ਅਤੇ ਟਵਿੰਕਲ ਖੰਨਾ ਅੱਜ ਆਪਣੇ ਵਿਆਹ ਦੀ 25ਵੀਂ ਸਾਲਗਿਰਾ ਮਨਾ ਰਹੇ ਹਨ। ਇਸ ਖ਼ਾਸ ਮੌਕੇ 'ਤੇ ਅਕਸ਼ੈ ਕੁਮਾਰ ਨੇ ਹਮੇਸ਼ਾ ਵਾਂਗ ਆਪਣੇ ਮਜ਼ਾਕੀਆ ਅੰਦਾਜ਼ ਵਿੱਚ ਪਤਨੀ ਟਵਿੰਕਲ ਨੂੰ ਵਿਸ਼ ਕੀਤਾ ਹੈ। ਅਕਸ਼ੈ ਨੇ ਸੋਸ਼ਲ ਮੀਡੀਆ 'ਤੇ ਟਵਿੰਕਲ ਦੀ ਇੱਕ ਅਜੀਬੋ-ਗਰੀਬ ਵੀਡੀਓ ਸਾਂਝੀ ਕੀਤੀ ਹੈ, ਜਿਸ ਨੂੰ ਦੇਖ ਕੇ ਪ੍ਰਸ਼ੰਸਕ ਆਪਣਾ ਹਾਸਾ ਨਹੀਂ ਰੋਕ ਪਾ ਰਹੇ।
ਸੱਸ ਡਿੰਪਲ ਕਪਾੜੀਆ ਦੀ ਭਵਿੱਖਬਾਣੀ ਹੋਈ ਸੱਚ
ਵੀਡੀਓ ਸਾਂਝੀ ਕਰਦਿਆਂ ਅਕਸ਼ੈ ਕੁਮਾਰ ਨੇ ਆਪਣੀ ਸੱਸ ਅਤੇ ਦਿੱਗਜ ਅਦਾਕਾਰਾ ਡਿੰਪਲ ਕਪਾੜੀਆ ਨੂੰ ਯਾਦ ਕੀਤਾ ਹੈ। ਅਕਸ਼ੈ ਨੇ ਦੱਸਿਆ ਕਿ ਸਾਲ 2001 ਵਿੱਚ ਵਿਆਹ ਦੇ ਦਿਨ ਡਿੰਪਲ ਜੀ ਨੇ ਉਨ੍ਹਾਂ ਨੂੰ ਇੱਕ ਸਲਾਹ ਦਿੱਤੀ ਸੀ। ਉਨ੍ਹਾਂ ਕਿਹਾ ਸੀ, "ਬੇਟਾ, ਅਜੀਬੋ-ਗਰੀਬ ਸਥਿਤੀਆਂ ਵਿੱਚ ਵੀ ਹੱਸਣ ਲਈ ਤਿਆਰ ਰਹਿਣਾ, ਕਿਉਂਕਿ ਉਹ (ਟਵਿੰਕਲ) ਬਿਲਕੁਲ ਅਜਿਹਾ ਹੀ ਕਰੇਗੀ"। ਅਕਸ਼ੈ ਨੇ ਲਿਖਿਆ ਕਿ ਅੱਜ 25 ਸਾਲਾਂ ਬਾਅਦ ਉਹ ਜਾਣਦੇ ਹਨ ਕਿ ਉਨ੍ਹਾਂ ਦੀ ਸੱਸ ਨੇ ਕਦੇ ਝੂਠ ਨਹੀਂ ਬੋਲਿਆ ਸੀ।

"ਨੱਚਦੇ-ਨੱਚਦੇ ਜ਼ਿੰਦਗੀ ਜਿਉਣਾ ਪਸੰਦ ਕਰਦੀ ਹੈ ਟੀਨਾ"
ਅਕਸ਼ੈ ਨੇ ਆਪਣੀ ਪਤਨੀ ਦੀ ਤਾਰੀਫ਼ ਕਰਦਿਆਂ ਲਿਖਿਆ ਕਿ ਟਵਿੰਕਲ ਸਿੱਧਾ ਚੱਲਣਾ ਪਸੰਦ ਨਹੀਂ ਕਰਦੀ, ਸਗੋਂ ਉਹ ਜ਼ਿੰਦਗੀ ਨੂੰ ਨੱਚਦੇ ਹੋਏ ਜਿਉਣਾ ਚਾਹੁੰਦੀ ਹੈ। ਉਨ੍ਹਾਂ ਅੱਗੇ ਲਿਖਿਆ, "ਪਹਿਲੇ ਦਿਨ ਤੋਂ ਲੈ ਕੇ 25ਵੇਂ ਸਾਲ ਤੱਕ, ਮੇਰੀ ਇਸ ਪਿਆਰੀ ਪਤਨੀ ਨੂੰ ਸਲਾਮ, ਜੋ ਮੈਨੂੰ ਹਸਾਉਂਦੀ ਰਹਿੰਦੀ ਹੈ, ਸੋਚਣ 'ਤੇ ਮਜਬੂਰ ਕਰਦੀ ਹੈ ਅਤੇ ਕਦੇ-ਕਦੇ ਪ੍ਰੇਸ਼ਾਨ ਵੀ ਕਰ ਦਿੰਦੀ ਹੈ!"।
ਫਿਲਮ 'ਮੇਲਾ' ਦੇ ਫਲਾਪ ਹੋਣ 'ਤੇ ਟਿਕਿਆ ਸੀ ਵਿਆਹ
ਇਸ ਮੌਕੇ ਦੋਵਾਂ ਦੀ ਦਿਲਚਸਪ ਲਵ ਸਟੋਰੀ ਵੀ ਚਰਚਾ ਵਿੱਚ ਹੈ। ਦੋਵਾਂ ਦੀ ਪਹਿਲੀ ਮੁਲਾਕਾਤ ਇੱਕ ਮੈਗਜ਼ੀਨ ਸ਼ੂਟ ਦੌਰਾਨ ਹੋਈ ਸੀ। ਵਿਆਹ ਲਈ ਟਵਿੰਕਲ ਨੇ ਇੱਕ ਸ਼ਰਤ ਰੱਖੀ ਸੀ ਕਿ ਜੇਕਰ ਉਨ੍ਹਾਂ ਦੀ ਫਿਲਮ 'ਮੇਲਾ' ਫਲਾਪ ਹੋ ਗਈ, ਤਾਂ ਹੀ ਉਹ ਵਿਆਹ ਕਰਨਗੇ। ਫਿਲਮ ਫਲਾਪ ਹੋ ਗਈ ਅਤੇ 17 ਜਨਵਰੀ ਨੂੰ ਦੋਵੇਂ ਵਿਆਹ ਦੇ ਬੰਧਨ ਵਿੱਚ ਬੱਝ ਗਏ। ਅੱਜ ਅਕਸ਼ੈ ਫਿਲਮਾਂ ਵਿੱਚ ਸਰਗਰਮ ਹਨ, ਜਦਕਿ ਟਵਿੰਕਲ ਇੱਕ ਸਫਲ ਲੇਖਿਕਾ ਬਣ ਚੁੱਕੀ ਹੈ।