ਮਸ਼ਹੂਰ ਅਦਾਕਾਰਾ ਟਾਇਲਟ ਹੇਠ ਦੱਬੀ ਬੈਠੀ ਸੀ ਸੋਨਾ-ਚਾਂਦੀ, ਪੈਸਾ ਐਨਾ ਕਿ ਲਿਆਉਣੀਆਂ ਪਈਆਂ 'ਮਸ਼ੀਨਾਂ'

ਐਂਟਰਟੇਨਮੈਂਟ ਡੈਸਕ : ਬੰਗਾਲੀ ਫਿਲਮਾਂ ਦੀ ਅਦਾਕਾਰਾ ਅਰਪਿਤਾ ਮੁਖਰਜੀ ਦਾ ਨਾਂ ਉਸ ਸਮੇਂ ਦੇਸ਼ ਭਰ ਵਿੱਚ ਸੁਰਖੀਆਂ ਵਿੱਚ ਆ ਗਿਆ ਜਦੋਂ ਕੇਂਦਰੀ ਏਜੰਸੀਆਂ ਨੇ ਉਨ੍ਹਾਂ ਦੇ ਘਰ ਛਾਪਾ ਮਾਰਿਆ ਅਤੇ ਵੱਡੀ ਮਾਤਰਾ ਵਿੱਚ ਨਕਦੀ ਅਤੇ ਜਾਇਦਾਦ ਬਰਾਮਦ ਕੀਤੀ। ਇਸ ਛਾਪੇਮਾਰੀ ਨੇ ਦੇਸ਼ ਦੇ ਸੁਰੱਖਿਆ ਅਦਾਰਿਆਂ ਨੂੰ ਵੀ ਹੈਰਾਨ ਕਰ ਦਿੱਤਾ ਹੈ।
ਇਹ ਕਾਰਵਾਈ ਸਿੱਖਿਆ ਭਰਤੀ ਘੁਟਾਲੇ ਦੀ ਜਾਂਚ ਦੌਰਾਨ ਕੀਤੀ ਗਈ ਸੀ, ਜਿਸ ਵਿੱਚ ਅਰਪਿਤਾ ਦੀ ਕਥਿਤ ਸ਼ਮੂਲੀਅਤ ਸਾਹਮਣੇ ਆਈ ਸੀ।
52 ਕਰੋੜ ਤੋਂ ਵੱਧ ਨਕਦੀ ਅਤੇ 103 ਕਰੋੜ ਦੀ ਜਾਇਦਾਦ ਬਰਾਮਦ
ਪ੍ਰਾਪਤ ਜਾਣਕਾਰੀ ਅਨੁਸਾਰ ਐਨਫੋਰਸਮੈਂਟ ਡਾਇਰੈਕਟੋਰੇਟ (ED) ਦੇ ਅਧਿਕਾਰੀਆਂ ਨੇ ਅਰਪਿਤਾ ਮੁਖਰਜੀ ਦੇ ਟਾਲੀਗੰਜ ਸਥਿਤ ਘਰ 'ਤੇ ਛਾਪਾ ਮਾਰਿਆ। ਇਸ ਦੌਰਾਨ ਈ.ਡੀ. ਦੇ ਅਧਿਕਾਰੀਆਂ ਨੇ ਅਦਾਕਾਰਾ ਦੇ ਫਲੈਟ ਤੋਂ 52 ਕਰੋੜ ਰੁਪਏ ਤੋਂ ਵੱਧ ਨਕਦ ਅਤੇ ਸੋਨਾ-ਚਾਂਦੀ ਬਰਾਮਦ ਕੀਤਾ। ਰਿਪੋਰਟਾਂ ਅਨੁਸਾਰ ਇਹ ਪੈਸਾ ਕਥਿਤ ਤੌਰ 'ਤੇ ਟਾਇਲਟ ਵਿੱਚ ਗੱਡਿਆ ਹੋਇਆ ਸੀ। ਇਸ ਤੋਂ ਇਲਾਵਾ ਏਜੰਸੀਆਂ ਨੇ ਲਗਭਗ ₹103 ਕਰੋੜ ਦੀ ਜਾਇਦਾਦ ਨਾਲ ਸਬੰਧਤ ਦਸਤਾਵੇਜ਼ ਵੀ ਜ਼ਬਤ ਕੀਤੇ ਹਨ। ਬਰਾਮਦ ਹੋਏ ਨੋਟਾਂ ਦੀ ਮਾਤਰਾ ਇੰਨੀ ਜ਼ਿਆਦਾ ਸੀ ਕਿ ਈਡੀ ਅਧਿਕਾਰੀਆਂ ਨੂੰ ਨਕਦੀ ਗਿਣਨ ਲਈ ਕਾਊਂਟਿੰਗ ਮਸ਼ੀਨ ਦੀ ਵਰਤੋਂ ਕਰਨੀ ਪਈ। ਛਾਪੇਮਾਰੀ ਦੌਰਾਨ 20 ਤੋਂ ਵੱਧ ਮੋਬਾਈਲ ਫ਼ੋਨ ਵੀ ਜ਼ਬਤ ਕੀਤੇ ਗਏ।

ਅਰਪਿਤਾ ਮੁਖਰਜੀ ਦਾ ਨਾਂ ਪੱਛਮੀ ਬੰਗਾਲ ਦੀ ਰਾਜਨੀਤੀ ਵਿੱਚ ਸੱਤਾਧਾਰੀ ਤ੍ਰਿਣਮੂਲ ਕਾਂਗਰਸ ਦੇ ਕੱਦਾਵਰ ਨੇਤਾ ਅਤੇ ਮਮਤਾ ਬੈਨਰਜੀ ਸਰਕਾਰ ਦੇ ਸਾਬਕਾ ਸਿੱਖਿਆ ਮੰਤਰੀ ਪਾਰਥ ਚੈਟਰਜੀ ਨਾਲ ਜੋੜਿਆ ਗਿਆ ਹੈ। ਉਨ੍ਹਾਂ ਨੂੰ ਪਾਰਥ ਚੈਟਰਜੀ ਦੀ ਕਰੀਬੀ ਦੱਸਿਆ ਜਾਂਦਾ ਹੈ। ਅਰਪਿਤਾ ਮੁਖਰਜੀ ਦੱਖਣੀ ਕੋਲਕਾਤਾ ਦੀ ਪ੍ਰਸਿੱਧ ਦੁਰਗਾ ਪੂਜਾ ਕਮੇਟੀ ਨਕਟਲਾ ਉਦਯਨ ਦਾ 2019 ਅਤੇ 2020 ਵਿੱਚ ਮੁੱਖ ਚਿਹਰਾ ਵੀ ਰਹਿ ਚੁੱਕੀ ਹੈ, ਜਿਸ ਦਾ ਸੰਚਾਲਨ ਪਾਰਥ ਚੈਟਰਜੀ ਕਰਦੇ ਹਨ। ਅਰਪਿਤਾ ਨੇ ਬੰਗਲਾ ਫਿਲਮਾਂ ਵਿੱਚ, ਖਾਸ ਤੌਰ 'ਤੇ ਸੁਪਰਸਟਾਰ ਪ੍ਰੋਸੇਨਜੀਤ ਅਤੇ ਜੀਤ ਦੀਆਂ ਫਿਲਮਾਂ ਵਿੱਚ, ਕੁਝ ਸਾਈਡ ਰੋਲ ਕੀਤੇ ਸਨ।
ਪਾਰਥ ਚੈਟਰਜੀ ਨੇ ਸਾਜ਼ਿਸ਼ ਦਾ ਸ਼ਿਕਾਰ ਹੋਣ ਦਾ ਕੀਤਾ ਦਾਅਵਾ
ਇਸ ਘਟਨਾਕ੍ਰਮ ਦੇ ਵਿਚਕਾਰ, ਈਡੀ ਨੇ ਦਾਅਵਾ ਕੀਤਾ ਹੈ ਕਿ ਇਹ ਵੱਡੀ ਮਾਤਰਾ ਵਿੱਚ ਨਾਜਾਇਜ਼ ਨਕਦੀ ਅਤੇ ਜਾਇਦਾਦਾਂ ਪਾਰਥ ਚੈਟਰਜੀ ਅਤੇ ਅਰਪਿਤਾ ਮੁਖਰਜੀ ਦੇ ਕੋਲੋਂ ਬਰਾਮਦ ਕੀਤੀਆਂ ਗਈਆਂ ਹਨ। ਦੂਜੇ ਪਾਸੇ, ਸੀਬੀਆਈ ਦੀ ਹਿਰਾਸਤ ਵਿੱਚ ਰਹਿੰਦਿਆਂ ਸਾਬਕਾ ਸਿੱਖਿਆ ਮੰਤਰੀ ਪਾਰਥ ਚੈਟਰਜੀ ਨੇ ਆਪਣੇ ਆਪ ਨੂੰ ਇਸ ਪੈਸੇ ਤੋਂ ਵੱਖ ਕਰ ਲਿਆ ਸੀ। ਉਨ੍ਹਾਂ ਨੇ ਦਾਅਵਾ ਕੀਤਾ ਸੀ ਕਿ ਉਹ ਇੱਕ ਸਾਜ਼ਿਸ਼ ਦਾ ਸ਼ਿਕਾਰ ਹੋਏ ਹਨ ਅਤੇ ਬਰਾਮਦ ਹੋਇਆ ਪੈਸਾ ਉਨ੍ਹਾਂ ਦਾ ਨਹੀਂ ਹੈ।