‘ਜਟਾਧਰਾ’ ਦਾ ਬਾਕਸ ਆਫਿਸ ''ਤੇ ਬੁਰਾ ਹਾਲ, ਸੋਨਾਕਸ਼ੀ ਤੇ ਸੁਧੀਰ ਦੀ ਜੋੜੀ ਨਹੀਂ ਚਲਾ ਪਾਈ ਜਾਦੂ

ਨਵੀਂ ਦਿੱਲੀ- ਤੇਲਗੂ ਸਿਨੇਮਾ ਦੇ ਪਾਵਰਹਾਊਸ ਸੁਧੀਰ ਬਾਬੂ ਅਤੇ ਬਾਲੀਵੁੱਡ ਅਦਾਕਾਰਾ ਸੋਨਾਕਸ਼ੀ ਸਿਨਹਾ ਦੀ ਬਹੁ-ਪ੍ਰਤੀਤ ਫਿਲਮ 'ਜਟਾਧਰਾ' ਸ਼ੁੱਕਰਵਾਰ ਨੂੰ ਸਿਨੇਮਾਘਰਾਂ ਵਿੱਚ ਰਿਲੀਜ਼ ਹੋ ਗਈ ਹੈ। ਫਿਲਮ ਨੇ ਦਰਸ਼ਕਾਂ ਵਿੱਚ ਕੁਝ ਦਿਲਚਸਪ ਚਰਚਾ ਤਾਂ ਜ਼ਰੂਰ ਬਟੋਰੀ, ਪਰ ਬਾਕਸ ਆਫਿਸ 'ਤੇ ਇਸ ਦਾ ਪ੍ਰਦਰਸ਼ਨ ਉਮੀਦਾਂ ਮੁਤਾਬਕ ਨਹੀਂ ਰਿਹਾ। ਟਰੇਡ ਵੈੱਬਸਾਈਟ ‘ਸੈਕਨਿਲਕ’ ਦੇ ਸ਼ੁਰੂਆਤੀ ਅੰਕੜਿਆਂ ਅਨੁਸਾਰ 'ਜਟਾਧਰਾ' ਨੇ ਪਹਿਲੇ ਦਿਨ ਸਿਰਫ਼ 37 ਲੱਖ ਰੁਪਏ ਦੀ ਕਮਾਈ ਕੀਤੀ ਹੈ। ਫਿਲਮ ਦੇ ਨਿਰਦੇਸ਼ਕ ਅਭਿਸ਼ੇਕ ਜੈਸਵਾਲ ਹਨ।
ਕਮਜ਼ੋਰ ਰਹੀ ਹਿੰਦੀ ਵਰਜ਼ਨ ਦੀ ਸ਼ੁਰੂਆਤ
ਪਹਿਲੇ ਦਿਨ ਫਿਲਮ ਦੀ ਕਾਰਗੁਜ਼ਾਰੀ ਔਸਤ ਰਹੀ, ਪਰ ਤੇਲਗੂ ਮਾਰਕੀਟ ਵਿੱਚ ਦਰਸ਼ਕਾਂ ਵੱਲੋਂ ਚੰਗੀ ਪ੍ਰਤੀਕਿਰਿਆ ਦੇਖਣ ਨੂੰ ਮਿਲੀ। ਤੇਲਗੂ ਰਾਜਾਂ ਵਿੱਚ ਫਿਲਮ ਦੀ ਔਸਤ ਓਕਿਊਪੈਂਸੀ 16.41% ਦਰਜ ਕੀਤੀ ਗਈ। ਸਵੇਰ ਦੇ ਸ਼ੋਅਜ਼ ਵਿੱਚ ਦਰਸ਼ਕਾਂ ਦੀ ਗਿਣਤੀ ਘੱਟ ਸੀ, ਪਰ ਦੁਪਹਿਰ ਅਤੇ ਸ਼ਾਮ ਨੂੰ ਇਹ ਵੱਧਦੀ ਦਿਖਾਈ ਦਿੱਤੀ।
ਹਾਲਾਂਕਿ ਹਿੰਦੀ ਵਰਜ਼ਨ ਦੀ ਸ਼ੁਰੂਆਤ ਕਾਫੀ ਕਮਜ਼ੋਰ ਰਹੀ, ਜਿਸ ਦੀ ਦੇਸ਼ ਭਰ ਵਿੱਚ ਓਕਿਊਪੈਂਸੀ ਸਿਰਫ਼ 5.28% ਦਰਜ ਕੀਤੀ ਗਈ। ਮੁੰਬਈ, ਦਿੱਲੀ-ਐਨਸੀਆਰ ਅਤੇ ਪੁਣੇ ਵਰਗੇ ਵੱਡੇ ਸ਼ਹਿਰਾਂ ਵਿੱਚ ਫਿਲਮ ਦਾ ਕਲੈਕਸ਼ਨ ਕਮਜ਼ੋਰ ਰਿਹਾ, ਜਦਕਿ ਅਹਿਮਦਾਬਾਦ ਅਤੇ ਬੈਂਗਲੁਰੂ ਵਰਗੇ ਸਰਕਟਾਂ ਨੇ ਤੁਲਨਾਤਮਕ ਤੌਰ 'ਤੇ ਬਿਹਤਰ ਪ੍ਰਦਰਸ਼ਨ ਕੀਤਾ।
ਕਹਾਣੀ ਅਤੇ ਮੁਕਾਬਲੇ ਦੀ ਚੁਣੌਤੀ
'ਜਟਾਧਰਾ' ਦੀ ਕਹਾਣੀ ਮਿਥਿਹਾਸ, ਐਕਸ਼ਨ ਅਤੇ ਜਜ਼ਬਾਤ ਦਾ ਅਨੋਖਾ ਸੁਮੇਲ ਪੇਸ਼ ਕਰਦੀ ਹੈ। ਫਿਲਮ ਦਾ ਪਲਾਟ ਇੱਕ ਰਹੱਸਮਈ ਕਿਰਦਾਰ 'ਜਟਾਧਰਾ' ਦੀ ਯਾਤਰਾ 'ਤੇ ਆਧਾਰਿਤ ਹੈ, ਜੋ ਚੰਗਿਆਈ ਅਤੇ ਬੁਰਾਈ ਦੇ ਸੰਘਰਸ਼ ਵਿਚਕਾਰ ਸੰਤੁਲਨ ਬਣਾਉਂਦਾ ਹੈ। ਫਿਲਮ ਵਿੱਚ ਸੁਧੀਰ ਬਾਬੂ ਅਤੇ ਸੋਨਾਕਸ਼ੀ ਸਿਨਹਾ ਤੋਂ ਇਲਾਵਾ ਸ਼ਿਲਪਾ ਸ਼ਿਰੋਡਕਰ, ਇੰਦਰਾ ਕ੍ਰਿਸ਼ਨਨ, ਰਵੀ ਪ੍ਰਕਾਸ਼, ਰਾਜੀਵ ਕਨਕਲਾ ਅਤੇ ਸੁਭਲੇਖਾ ਸੁਧਾਕਰ ਵਰਗੇ ਕਲਾਕਾਰਾਂ ਨੇ ਵੀ ਅਹਿਮ ਭੂਮਿਕਾ ਨਿਭਾਈ ਹੈ। ਇਸ ਵੇਲੇ ਸਿਨੇਮਾਘਰਾਂ ਵਿੱਚ ਚੱਲ ਰਹੀਆਂ ਹੋਰ ਵੱਡੀਆਂ ਫਿਲਮਾਂ ਨਾਲ ਸਖ਼ਤ ਮੁਕਾਬਲਾ 'ਜਟਾਧਰਾ' ਲਈ ਸਭ ਤੋਂ ਵੱਡੀ ਚੁਣੌਤੀ ਬਣਿਆ ਹੋਇਆ ਹੈ।
ਹਾਲਾਂਕਿ, ਟਰੇਡ ਪੰਡਤਾਂ ਵੱਲੋਂ ਵੀਕੈਂਡ (ਸ਼ਨੀਵਾਰ ਅਤੇ ਐਤਵਾਰ) 'ਤੇ ਫਿਲਮ ਦੀ ਕਮਾਈ ਵਿੱਚ ਮਾਮੂਲੀ ਵਾਧੇ ਦੀ ਸੰਭਾਵਨਾ ਜਤਾਈ ਜਾ ਰਹੀ ਹੈ। ਜੇਕਰ 'ਵਰਡ ਆਫ ਮਾਊਥ' (ਸਕਾਰਾਤਮਕ ਪ੍ਰਤੀਕਿਰਿਆ) ਮਿਲਦਾ ਹੈ, ਤਾਂ ਆਉਣ ਵਾਲੇ ਦਿਨਾਂ ਵਿੱਚ ਫਿਲਮ ਦੀ ਰਫ਼ਤਾਰ ਬਿਹਤਰ ਹੋ ਸਕਦੀ ਹੈ। ਸੁਧੀਰ ਬਾਬੂ ਦੀ ਸਟਾਰ ਪਾਵਰ ਅਤੇ ਸੋਨਾਕਸ਼ੀ ਸਿਨਹਾ ਦੇ ਪ੍ਰਸ਼ੰਸਕਾਂ ਦਾ ਸਮਰਥਨ ਫਿਲਮ ਲਈ ਰਾਹਤ ਦੀ ਗੱਲ ਹੋ ਸਕਦਾ ਹੈ। ਫਿਲਹਾਲ, ਪਹਿਲੇ ਦਿਨ ਦੇ ਅੰਕੜੇ ਫਿਲਮ ਦੀ ਧੀਮੀ, ਪਰ ਸੰਭਾਵਨਾਵਾਂ ਨਾਲ ਭਰੀ ਸ਼ੁਰੂਆਤ ਦਾ ਸੰਕੇਤ ਦਿੰਦੇ ਹਨ।