ਪ੍ਰਧਾਨ ਚਾਹਲ ਨੇ ਸਕੱਤਰ ਦਿਲਸ਼ੇਰ ਖੰਨਾ ਨੂੰ ਮੀਟਿੰਗ ਮਿਨਟਸ ਅਤੇ ਏਜੰਡੇ ’ਤੇ ਦਿੱਤਾ ਜਵਾਬ

ਜਲੰਧਰ (ਅਨਿਲ ਪਾਹਵਾ) : ਪੰਜਾਬ ਕ੍ਰਿਕਟ ਐਸੋਸੀਏਸ਼ਨ (ਪੀ.ਸੀ.ਏ.) ਦੇ ਸਕੱਤਰ ਦਿਲਸ਼ੇਰ ਖੰਨਾ ਵੱਲੋਂ ਅਪੈਕਸ ਕਮੇਟੀ ’ਤੇ ਏਜੰਡੇ ਤੇ ਮੀਟਿੰਗ ਮਿਨਟਸ ਸਬੰਧੀ ਉਠਾਏ ਗਏ ਸਵਾਲਾਂ ’ਤੇ ਐਸੋਸੀਏਸ਼ਨ ਨੇ ਸਖ਼ਤ ਰੁਖ਼ ਅਪਣਾਇਆ ਹੈ ਅਤੇ ਸਕੱਤਰ ਦੇ ਰਵੱਈਏ ਦੀ ਨਿੰਦਾ ਕੀਤੀ ਹੈ। ਚੇਅਰਮੈਨ, ਡਿਪਟੀ ਚੇਅਰਮੈਨ, ਸੰਯੁਕਤ ਸਕੱਤਰ ਤੇ ਖਜ਼ਾਨਚੀ ਵਿਚਕਾਰ ਇਕ ਕਾਨਫਰੰਸ ਕਾਲ ਕੀਤੀ ਗਈ ਅਤੇ ਸਰਬਸੰਮਤੀ ਨਾਲ ਰਾਏ ਬਣੀ ਕਿ ਸਕੱਤਰ ਦੀ ਮੇਲ ਵਿਚ ਕੀਤੀਆਂ ਗਈਆਂ ਟਿੱਪਣੀਆਂ ਸੱਚਾਈ ਤੋਂ ਕੋਹਾਂ ਦੂਰ ਹਨ।ਚੇਅਰਮੈਨ, ਡਿਪਟੀ ਚੇਅਰਮੈਨ, ਸੰਯੁਕਤ ਸਕੱਤਰ ਤੇ ਖਜ਼ਾਨਚੀ ਨੇ ਸਪਸ਼ਟ ਤੌਰ ’ਤੇ ਵਿਸਤ੍ਰਿਤ ਜਵਾਬ ਦੇਣ ਦਾ ਫੈਸਲਾ ਕੀਤਾ ਤਾਂ ਜੋ ਜਨਰਲ ਬਾਡੀ ਦੇ ਮੈਂਬਰਾਂ ਨਾਲ ਅਸਲ ਤਸਵੀਰ ਸਾਂਝੀ ਕੀਤੀ ਜਾ ਸਕੇ। ਉਨ੍ਹਾਂ ਸੀ. ਈ. ਓ. ਨੂੰ ਸਕੱਤਰ ਨੂੰ ਕਾਪੀ ਸਮੇਤ ਜਵਾਬ ਦੇਣ ਦੇ ਹੁਕਮ ਦਿੱਤੇ। ਇਸ ਸਬੰਧੀ ਪੱਤਰ ਜਾਰੀ ਕਰ ਕੇ ਐਸੋਸੀਏਸ਼ਨ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਨੇ ਸਮੁੱਚੇ ਮਾਮਲੇ ’ਚ ਉੱਠੇ ਸਵਾਲਾਂ ਦੇ ਜਵਾਬ ਦਿੱਤੇ ਹਨ ਅਤੇ ਸਕੱਤਰ ਦੇ ਦੋਸ਼ਾਂ ਨੂੰ ਸਿਰੇ ਤੋਂ ਨਕਾਰ ਦਿੱਤਾ ਹੈ।

ਮੀਟਿੰਗ ਮਿਨਟਸ ’ਤੇ ਪੀ. ਸੀ. ਏ. ਦਾ ਜਵਾਬ
ਅਪੈਕਸ ਕਮੇਟੀ ਦੀ ਮੀਟਿੰਗ ਦੇ ਏਜੰਡੇ ਸਬੰਧੀ ਪੁੱਛੇ ਸਵਾਲ ਦੇ ਜਵਾਬ ’ਚ ਸੀ. ਈ. ਓ. ਨੇ ਕਿਹਾ ਕਿ ਸਾਲਾਨਾ ਜਨਰਲ ਬਾਡੀ ਦੀ ਮੀਟਿੰਗ ਦੌਰਾਨ ਡਿਪਟੀ ਚੇਅਰਮੈਨ ਗਗਨ ਖੰਨਾ ਨੇ ਤਜਵੀਜ਼ ਕੀਤੀ ਕਿ ਮੀਟਿੰਗ ਦੇ ਮਿਨਟਸ ਨੂੰ ਤੁਰੰਤ ਅੰਤਿਮ ਰੂਪ ਦਿੱਤਾ ਜਾਵੇ ਤਾਂ ਜੋ ਮੀਟਿੰਗ ਵਿਚ ਲਏ ਗਏ ਫੈਸਲਿਆਂ ਦੀ ਸਹੀ ਭਾਵਨਾ ਬਣੀ ਰਹੇ। ਇਹ ਦਫਤਰ ਨੂੰ ਬਿਨਾਂ ਕਿਸੇ ਦੇਰੀ ਦੇ ਮੀਟਿੰਗ ਦੇ ਫੈਸਲਿਆਂ ਨੂੰ ਲਾਗੂ ਕਰਨ ਦੇ ਯੋਗ ਬਣਾਏਗਾ। ਸਦਨ ਨੇ ਮਿਨਟਸ ਨੂੰ ਤੁਰੰਤ ਅੰਤਿਮ ਰੂਪ ਦੇਣ ਦੀ ਤਜਵੀਜ਼ ਨੂੰ ਸਰਬਸੰਮਤੀ ਨਾਲ ਮਨਜ਼ੂਰੀ ਦੇ ਦਿੱਤੀ।
ਮਿਨਟਸ ਦਾ ਖਰੜਾ ਤਿਆਰ ਕੀਤਾ ਗਿਆ ਅਤੇ ਸੀ. ਈ. ਓ. ਵੱਲੋਂ ਚੇਅਰਮੈਨ ਤੇ ਸਕੱਤਰ ਦੇ ਸਾਹਮਣੇ ਰੱਖਿਆ ਗਿਆ। ਚੇਅਰਮੈਨ ਨੇ ਸੀ. ਈ. ਓ. ਨੂੰ ਬੇਨਤੀ ਕੀਤੀ ਕਿ ਉਹ ਆਪਣੀ ਮਨਜ਼ੂਰੀ ਤੋਂ ਪਹਿਲਾਂ ਸਕੱਤਰ ਨੂੰ ਮਿਨਟਸ ਦਿਖਾਉਣ। ਸਕੱਤਰ ਨੇ ਮਿਨਟਸ ਨੂੰ ਲਗਭਗ 40-45 ਮਿੰਟ ਤਕ ਪੜ੍ਹਿਆ ਅਤੇ ਕੁਝ ਬਦਲਾਅ ਕਰਨ ਲਈ ਕਿਹਾ। ਇਹ ਬਦਲਾਅ ਚੇਅਰਮੈਨ ਅਤੇ ਅਪੈਕਸ ਕੌਂਸਲ ਦੇ ਹੋਰ ਮੈਂਬਰਾਂ ਦੇ ਧਿਆਨ ਵਿਚ ਲਿਆਂਦੇ ਗਏ।

ਸੀ. ਈ. ਓ. ਨੇ ਲਿਖਿਆ ਹੈ ਕਿ ਸਕੱਤਰ ਵੱਲੋਂ ਪੇਸ਼ ਕੀਤੇ ਗਏ ਬਦਲਾਵਾਂ ਨੂੰ ਦੇਖ ਕੇ ਅਪੈਕਸ ਕੌਂਸਲ ਦੇ ਕੁਝ ਹੋਰ ਮੈਂਬਰਾਂ ਨੇ ਨਾਲ ਬੈਠੇ ਚੇਅਰਮੈਨ ਨੂੰ ਸਵਾਲ ਕੀਤਾ ਕਿ ਜੋ ਬਦਲਾਅ ਦੱਸੇ ਜਾ ਰਹੇ ਹਨ, ਉਹ ਮੀਟਿੰਗ ਦਾ ਹਿੱਸਾ ਨਹੀਂ ਸਨ। ਸਕੱਤਰ ਨੇ ਜਵਾਬ ਦਿੱਤਾ ਕਿ ਭਾਵੇਂ ਉਹ ਸਦਨ ਦੀ ਕਾਰਵਾਈ ਦੇ ਅਨੁਕੂਲ ਨਹੀਂ ਹਨ ਪਰ ਇਹ ਬਦਲਾਅ ਕੀਤੇ ਜਾਣੇ ਚਾਹੀਦੇ ਹਨ। ਇਸ ਮਾਮਲੇ ਵਿਚ ਚੇਅਰਮੈਨ ਨੇ ਫਿਰ ਸਕੱਤਰ ਦੀ ਹਾਜ਼ਰੀ ਵਿਚ ਸੀ. ਈ. ਓ. ਨੂੰ ਬੁਲਾਇਆ ਅਤੇ ਅਪੈਕਸ ਕੌਂਸਲ ਦੇ ਕੁਝ ਹੋਰ ਮੈਂਬਰਾਂ ਨੇ ਸਕੱਤਰ ਵੱਲੋਂ ਸੁਝਾਈਆਂ ਗਈਆਂ ਗੱਲਾਂ ਨੂੰ ਹਟਾਉਣ ਲਈ ਕਿਹਾ ਕਿਉਂਕਿ ਉਹ ਮੀਟਿੰਗ ਵਿਚ ਲਏ ਗਏ ਫੈਸਲਿਆਂ ਦੇ ਅਨੁਸਾਰ ਨਹੀਂ ਸਨ। ਇਸ ਤੋਂ ਬਾਅਦ ਨਿਯਮਾਂ ਅਨੁਸਾਰ ਸਪੀਕਰ ਤੇ ਹੋਰਨਾਂ ਨੇ ਮਿਨਟਸ ’ਤੇ ਹਸਤਾਖਰ ਕਰ ਕੇ ਇਸ ਨੂੰ ਅੰਤਿਮ ਰੂਪ ਦੇ ਦਿੱਤਾ।ਸੀ. ਈ. ਓ. ਵੱਲੋਂ ਲਿਖੀ ਗਈ ਚਿੱਠੀ ਵਿਚ ਕਿਹਾ ਗਿਆ ਹੈ ਕਿ ਇਸ ਤੋਂ ਇਲਾਵਾ ਸਕੱਤਰ ਨੂੰ ਯਾਦ ਹੋਵੇਗਾ ਕਿ 3 ਜੂਨ, 2022 ਨੂੰ ਉਨ੍ਹਾਂ ਨਾਲ ਪੀ. ਸੀ. ਏ. ਦੇ ਸੰਚਾਲਨ ਲਈ ਬੈਂਕ ਅਟਾਰਨੀ ਪੱਤਰਾਂ ’ਤੇ ਹਸਤਾਖਰ ਨਹੀਂ ਕੀਤੇ ਗਏ, ਜੋ ਕਿ ਪੀ. ਸੀ. ਏ. ਦੇ ਬੈਂਕ ਖਾਤਿਆਂ ਲਈ ਬਹੁਤ ਜ਼ਰੂਰੀ ਹਨ। ਹਾਲਾਂਕਿ ਉਹ ਅਜੇ ਵੀ ਸਕੱਤਰ ਵੱਲੋਂ ਪੈਂਡਿੰਗ ਹਨ ਅਤੇ ਉਨ੍ਹਾਂ ਨੂੰ ਸਮਾਂ ਕੱਢਣਾ ਚਾਹੀਦਾ ਹੈ। ਨਾਲ ਹੀ ਜਨਰਲ ਬਾਡੀ ਦੇ ਫੈਸਲੇ ਨੂੰ ਪੂਰਾ ਕਰਨ ਲਈ ਬੈਂਕ ਦੇ ਕਾਗਜ਼ਾਤਾਂ ’ਤੇ ਹਸਤਾਖਰ ਕਰਨੇ ਚਾਹੀਦੇ ਹਨ।

ਏਜੰਡੇ ’ਤੇ ਪੀ. ਸੀ. ਏ. ਨੇ ਸਕੱਤਰ ਨੂੰ ਘੇਰਿਆ
ਸਕੱਤਰ ਦਿਲਸ਼ੇਰ ਖੰਨਾ ਨੇ ਪੀ. ਸੀ. ਏ. ਦੀ ਮੀਟਿੰਗ ਵਿਚ ਏਜੰਡੇ ’ਤੇ ਸਵਾਲ ਉਠਾਏ ਸਨ। ਉਨ੍ਹਾਂ ਕਿਹਾ ਕਿ ਮੀਟਿੰਗ ਤੋਂ ਪਹਿਲਾਂ ਏਜੰਡਾ ਨਹੀਂ ਦਿੱਤਾ ਗਿਆ, ਜਿਸ ਕਾਰਨ ਮੈਂਬਰਾਂ ਨੂੰ ਮੀਟਿੰਗ ਵਿਚ ਆਪਣੀ ਗੱਲ ਰੱਖਣ ’ਚ ਮੁਸ਼ਕਲ ਦਾ ਸਾਹਮਣਾ ਕਰਨਾ ਪਿਆ। ਜਵਾਬ ਵਿਚ ਸੀ. ਈ. ਓ. ਨੇ ਕਿਹਾ ਹੈ ਕਿ ਅਪੈਕਸ ਕੌਂਸਲ ਦੀ ਮੀਟਿੰਗ ਲਈ ਏਜੰਡੇ ਨੂੰ ਅੰਤਿਮ ਰੂਪ ਦੇਣ ਤੋਂ ਪਹਿਲਾਂ ਚੇਅਰਮੈਨ ਵੱਲੋਂ ਸਕੱਤਰ ਨਾਲ ਚਰਚਾ ਕੀਤੀ ਗਈ ਸੀ। ਚੇਅਰਮੈਨ ਨੇ ਸਕੱਤਰ ਨੂੰ ਬੇਨਤੀ ਕੀਤੀ ਕਿ ਉਹ ਸੀ. ਈ. ਓ. ਨਾਲ ਕਿਸੇ ਵੀ ਵਾਧੂ ਪੁੱਛਗਿੱਛ ਬਾਰੇ ਚਰਚਾ ਕਰਨ। ਇਸ ਦੌਰਾਨ ਸਕੱਤਰ ਨੇ ਚੇਅਰਮੈਨ ਨੂੰ ਫੋਨ ’ਤੇ ਕੁਝ ਖਾਸ ਗੱਲਾਂ ’ਤੇ ਚਰਚਾ ਕਰਨ ਲਈ ਕਿਹਾ। ਸਕੱਤਰ ਨੇ ਕਿਹਾ ਕਿ ਪਿਛਲੀ ਅਪੈਕਸ ਕੌਂਸਲ ਦੀ ਮੀਟਿੰਗ ਵਿਚ ਏਜੰਡੇ ’ਤੇ ਨਾਰਾਜ਼ਗੀ ਪ੍ਰਗਟਾਈ ਗਈ ਸੀ। ਏਜੰਡੇ ਨੂੰ ਲੈ ਕੇ ਫੋਰੈਂਸਿਕ ਆਡਿਟ ’ਤੇ ਖਾਸ ਤੌਰ ’ਤੇ ਇਤਰਾਜ਼ ਕੀਤਾ ਗਿਆ ਹੈ।ਚੇਅਰਮੈਨ ਨੇ ਸਕੱਤਰ ਨੂੰ ਸਲਾਹ ਦਿੱਤੀ ਕਿ ਫੋਰੈਂਸਿਕ ਆਡਿਟ ਤੋਂ ਭਾਵ ਸਿਰਫ ਸੁਧਾਰਾਤਮਕ ਉਪਾਵਾਂ ਲਈ ਹੈ ਤਾਂ ਜੋ ਬੀਤੇ ਸਮੇਂ ’ਚ ਕੀਤੇ ਗਏ ਚੰਗੇ ਕੰਮਾਂ ਨੂੰ ਅੱਗੇ ਵਧਾਇਆ ਜਾ ਸਕੇ ਅਤੇ ਪੀ. ਸੀ. ਏ. ਦੇ ਸੰਚਾਲਨ ਵਿਚ ਜਿੱਥੇ ਵੀ ਸੁਧਾਰ ਕੀਤਾ ਜਾਣਾ ਹੈ, ਉਸ ਨੂੰ ਕੀਤਾ ਜਾਵੇ। ਸਕੱਤਰ ਨੇ ਕਿਹਾ ਕਿ ਇਹ ਪਿਛਲੀ ਵਿਵਸਥਾ ਨਾਲ ਬਹੁਤ ਚੰਗਾ ਨਹੀਂ ਹੋਵੇਗਾ ਅਤੇ ਉਹ ਇਸ ਏਜੰਡੇ ਨੂੰ ਅੱਗੇ ਨਹੀਂ ਭੇਜ ਸਕਣਗੇ।

ਸਾਬਕਾ ਸਪੀਕਰ ਤਕ ਕਿਵੇਂ ਪਹੁੰਚ ਗਿਆ ਏਜੰਡਾ?
ਇਸ ਦੌਰਾਨ ਸੰਯੁਕਤ ਸਕੱਤਰ ਨੇ ਸਪੀਕਰ ਨੂੰ ਦੱਸਿਆ ਕਿ ਸਾਬਕਾ ਚੇਅਰਮੈਨ ਨੇ ਉਨ੍ਹਾਂ ਨਾਲ ਏਜੰਡੇ ’ਤੇ ਚਰਚਾ ਕੀਤੀ ਹੈ ਅਤੇ ਖਾਸ ਤੌਰ ’ਤੇ ਫੋਰੈਂਸਿਕ ਆਡਿਟ ’ਤੇ ਆਪਣੀ ਗੱਲ ਰੱਖੀ ਹੈ। ਉਨ੍ਹਾਂ ਇਹ ਵੀ ਕਿਹਾ ਕਿ ਸਕੱਤਰ ਆਪਣੇ ਅਹੁਦੇ ਤੋਂ ਅਸਤੀਫਾ ਦੇ ਸਕਦੇ ਹਨ। ਜਦੋਂ ਸਾਬਕਾ ਸਪੀਕਰ ਨੂੰ ਪੁੱਛਿਆ ਗਿਆ ਕਿ ਉਨ੍ਹਾਂ ਕੋਲ ਏਜੰਡਾ ਕਿੱਥੋਂ ਆਇਆ ਕਿਉਂਕਿ ਉਸ ਵੇਲੇ ਤਕ ਤਾਂ ਸੰਯੁਕਤ ਸਕੱਤਰ ਕੋਲ ਵੀ ਏਜੰਡਾ ਨਹੀਂ ਸੀ। ਸੰਯੁਕਤ ਸਕੱਤਰ ਨੇ ਫਿਰ ਸਾਬਕਾ ਚੇਅਰਮੈਨ ਨੂੰ ਕਿਹਾ ਕਿ ਇਸ ਨਾਲ ਇਹ ਖਦਸ਼ਾ ਸਾਬਤ ਹੁੰਦਾ ਹੈ ਕਿ ਮੌਜੂਦਾ ਸਕੱਤਰ ਸਾਬਕਾ ਸਪੀਕਰ ਦੇ ਇਸ਼ਾਰੇ ’ਤੇ ਕੰਮ ਕਰ ਰਹੇ ਸਨ। ਮਾਮਲਾ ਸਾਹਮਣੇ ਆਉਣ ਤੋਂ ਬਾਅਦ ਸਪੀਕਰ ਨੇ ਦੁਬਾਰਾ ਸਕੱਤਰ ਨੂੰ ਫੋਨ ਕੀਤਾ ਅਤੇ ਉਨ੍ਹਾਂ ਨੂੰ ਅਪੀਲ ਕੀਤੀ ਕਿ ਉਹ ਏਜੰਡਾ ਅਪੈਕਸ ਕੌਂਸਲ ਦੇ ਮੈਂਬਰਾਂ ਤੋਂ ਇਲਾਵਾ ਕਿਸੇ ਹੋਰ ਨਾਲ ਸਾਂਝਾ ਨਾ ਕਰਨ ਕਿਉਂਕਿ ਇਹ ਵਿਸ਼ਵਾਸ ਦੀ ਉਲੰਘਣਾ ਹੈ। ਚੇਅਰਮੈਨ ਨੇ ਮੁੜ ਭਰੋਸਾ ਦਿੱਤਾ ਕਿ ਫੋਰੈਂਸਿਕ ਆਡਿਟ ਸਿਰਫ ਪੀ. ਸੀ. ਏ. ਦੇ ਕੰਮਕਾਜ ਵਿਚ ਸੁਧਾਰ ਲਈ ਹੈ। ਹਾਲਾਂਕਿ ਸਕੱਤਰ ਨੇ ਸਪੀਕਰ ਨੂੰ ਸੂਚਿਤ ਕੀਤਾ ਕਿ ਉਹ ਸਾਬਕਾ ਸਪੀਕਰ ਨਾਲ ਕੋਈ ਵੀ ਗੱਲ ਕਰ ਸਕਦੇ ਹਨ ਕਿਉਂਕਿ ਇਹ ਉਨ੍ਹਾਂ ਅਤੇ ਸਾਬਕਾ ਸਪੀਕਰ ਦੇ ਵਿਚਕਾਰ ਹੈ। ਸਕੱਤਰ ਨੇ ਏਜੰਡੇ ’ਤੇ ਹਸਤਾਖਰ ਕਰਨ ਤੋਂ ਅਸਮਰੱਥਾ ਪ੍ਰਗਟ ਕਰਦਿਆਂ ਕਿਹਾ ਕਿ ਸਾਬਕਾ ਸਪੀਕਰ ਦੇ ਮੁਤਾਬਕ ਇਹ ਉਨ੍ਹਾਂ ਦੇ ਹਿੱਤ ਵਿਚ ਨਹੀਂ ਹੈ।

ਮੀਟਿੰਗ ’ਚ ਪਹਿਲੀ ਵਾਰ ਹੋਈ ‘ਓਨਲੀ ਕ੍ਰਿਕਟ’ ਏਜੰਡੇ ’ਤੇ ਚਰਚਾ
ਸੀ. ਈ. ਓ. ਨੇ ਚਿੱਠੀ ਵਿਚ ਲਿਖਿਆ ਹੈ ਕਿ ਅਪੈਕਸ ਕੌਂਸਲ ਦੀ ਮੀਟਿੰਗ 19 ਜੂਨ, 2022 ਨੂੰ ਹੋਈ ਸੀ। ਸਕੱਤਰ ਮੀਟਿੰਗ ਵਿਚ ਸ਼ਾਮਲ ਨਹੀਂ ਹੋਏ। ਇਸ ਮੀਟਿੰਗ ਦੇ ਮਿਨਟਸ ਦਾ ਖਰੜਾ ਤੁਰੰਤ ਤਿਆਰ ਕੀਤਾ ਗਿਆ, ਜਿਸ ਨੂੰ ਅਪੈਕਸ ਕੌਂਸਲ ਦੇ ਕੁਝ ਮੈਂਬਰਾਂ ਦੀਆਂ ਟਿੱਪਣੀਆਂ ਮੁਤਾਬਕ ਠੀਕ ਕੀਤਾ ਗਿਆ ਅਤੇ ਮਾਣਯੋਗ ਅਧਿਕਾਰੀ ਦੇ ਸਾਹਮਣੇ ਰੱਖਿਆ ਗਿਆ। ਮੈਂਬਰਾਂ ਨੇ ਸਰਬਸੰਮਤੀ ਨਾਲ ਇਸ ਮੀਟਿੰਗ ਦੀ ਸ਼ਲਾਘਾ ਕੀਤੀ ਅਤੇ ਕਿਹਾ ਕਿ ਮੀਟਿੰਗ ਵਿਚ ਇੰਨੇ ਸਾਲਾਂ ਬਾਅਦ ‘ਕ੍ਰਿਕਟ ਓਨਲੀ’ ਏਜੰਡੇ ’ਤੇ ਚਰਚਾ ਕੀਤੀ ਗਈ। ਪੰਜਾਬ ਸੂਬੇ ’ਚ ਕ੍ਰਿਕਟ ਦੀ ਖੇਡ ਦੇ ਪ੍ਰਚਾਰ ਤੇ ਵਿਕਾਸ ਲਈ ਚੰਗਾ ਹੈ। ਪਹਿਲਾਂ ਅਪੈਕਸ ਕੌਂਸਲ ਦੀਆਂ ਮੀਟਿੰਗਾਂ ’ਚ ਸਿਆਸਤ ਇੰਨੀ ਭਾਰੀ ਸੀ ਕਿ ਸਿਰਫ ਮਨਮੁਟਾਅ ਤੇ ਬਹਿਸ ਹੁੰਦੀ ਸੀ ਅਤੇ ਕੋਈ ਸਾਰਥਕ ਏਜੰਡਾ ਅੱਗੇ ਨਹੀਂ ਵਧਾਇਆ ਜਾਂਦਾ ਸੀ। ਇਸ ਤੋਂ ਇਲਾਵਾ ਸੀ. ਈ. ਓ. ਨੇ ਕਮੇਟੀਆਂ ਦੀ ਸੂਚੀ ਵੀ ਜਾਰੀ ਕੀਤੀ ਹੈ, ਜਿਸ ਵਿਚ ਸਕੱਤਰ ਦਿਲਸ਼ੇਰ ਖੰਨਾ ਨੂੰ ਮੈਂਬਰ ਨਿਯੁਕਤ ਕੀਤਾ ਗਿਆ ਹੈ। ਇਸ ਤੋਂ ਸਾਬਤ ਹੁੰਦਾ ਹੈ ਕਿ ਅਪੈਕਸ ਕੌਂਸਲ ’ਚ ਸਕੱਤਰ ਨੂੰ ਪੂਰੀ ਅਹਿਮੀਅਤ ਦਿੱਤੀ ਜਾ ਰਹੀ ਸੀ।