ਦੇਸ਼ 'ਚ ਨਿੱਜੀ ਕੰਪਿਊਟਰਾਂ ਦੀ ਵਿਕਰੀ ਰਿਕਾਰਡ 44.9 ਲੱਖ ਯੂਨਿਟ ਰਹੀ

ਨਵੀਂ ਦਿੱਲੀ — ਜੁਲਾਈ-ਸਤੰਬਰ 'ਚ ਦੇਸ਼ 'ਚ ਨਿੱਜੀ ਕੰਪਿਊਟਰਾਂ (ਪੀ.ਸੀ.) ਦੀ ਵਿਕਰੀ ਮਾਮੂਲੀ ਵਧ ਕੇ 44.9 ਲੱਖ ਯੂਨਿਟ ਹੋ ਗਈ। ਇਹ ਕਿਸੇ ਇੱਕ ਤਿਮਾਹੀ ਵਿੱਚ ਹੁਣ ਤੱਕ ਦੀ ਸਭ ਤੋਂ ਵੱਧ ਵਿਕਰੀ ਹੈ। ਮਾਰਕੀਟ ਰਿਸਰਚ ਕੰਪਨੀ ਇੰਟਰਨੈਸ਼ਨਲ ਡਾਟਾ ਕਾਰਪੋਰੇਸ਼ਨ ਨੇ ਮੰਗਲਵਾਰ ਨੂੰ ਇਕ ਰਿਪੋਰਟ 'ਚ ਇਹ ਜਾਣਕਾਰੀ ਦਿੱਤੀ। ਰਿਪੋਰਟ ਅਨੁਸਾਰ, ਐਚਪੀ 29 ਪ੍ਰਤੀਸ਼ਤ ਮਾਰਕੀਟ ਹਿੱਸੇਦਾਰੀ ਦੇ ਨਾਲ ਪਰਸਨਲ ਕੰਪਿਊਟਰ ਮਾਰਕੀਟ ਵਿੱਚ ਮੋਹਰੀ ਸੀ। ਹਾਲਾਂਕਿ, ਇਸਦੀ ਵਿਕਰੀ ਸਾਲਾਨਾ ਆਧਾਰ 'ਤੇ 1.5 ਫੀਸਦੀ ਘੱਟ ਕੇ 13 ਲੱਖ ਯੂਨਿਟ ਰਹੀ ਹੈ।

ਨਿੱਜੀ ਕੰਪਿਊਟਿੰਗ ਉਪਕਰਣ 'ਤੇ ਨਜ਼ਰ ਰੱਖਣ ਵਾਲੀ ਇੰਟਰਨੈਸ਼ਨਲ ਡਾਟਾ ਕਾਰਪੋਰੇਸ਼ਨ (ਆਈਡੀਸੀ) ਦੀ ਇੱਕ ਤਿਮਾਹੀ ਰਿਪੋਰਟ ਵਿੱਚ ਕਿਹਾ ਗਿਆ ਹੈ, "ਭਾਰਤ ਦਾ ਰਵਾਇਤੀ ਨਿੱਜੀ ਕੰਪਿਊਟਰ (ਪੀਸੀ) ਮਾਰਕੀਟ (ਡੈਸਕਟਾਪ, ਨੋਟਬੁੱਕ ਅਤੇ ਵਰਕਸਟੇਸ਼ਨਾਂ ਸਮੇਤ) 'ਚ 2024 ਦੀ ਤੀਜੀ ਤਿਮਾਹੀ ਵਿੱਚ 44.9 ਲੱਖ ਇਕਾਈਆਂ ਦੀ ਵਿਕਰੀ ਹੋਈ । ਇਹ ਸਾਲਾਨਾ ਆਧਾਰ 'ਤੇ 0.1 ਫੀਸਦੀ ਜ਼ਿਆਦਾ ਹੈ। ਡੈਸਕਟਾਪ ਸ਼੍ਰੇਣੀ 'ਚ ਸਾਲਾਨਾ ਆਧਾਰ 'ਤੇ 8.1 ਫੀਸਦੀ ਦੀ ਗਿਰਾਵਟ ਆਈ ਹੈ। ਜਦੋਂ ਕਿ ਨੋਟਬੁੱਕ ਅਤੇ ਵਰਕਸਟੇਸ਼ਨ ਸ਼੍ਰੇਣੀਆਂ ਵਿੱਚ ਕ੍ਰਮਵਾਰ 2.8 ਪ੍ਰਤੀਸ਼ਤ ਅਤੇ 2.4 ਪ੍ਰਤੀਸ਼ਤ ਦਾ ਮਾਮੂਲੀ ਵਾਧਾ ਦਰਜ ਕੀਤਾ ਗਿਆ।

ਰਿਪੋਰਟ 'ਚ ਕਿਹਾ ਗਿਆ ਹੈ ਕਿ ਤਿਉਹਾਰਾਂ ਦੌਰਾਨ ਆਨਲਾਈਨ ਵਿਕਰੀ ਕਾਰਨ ਪ੍ਰੀਮੀਅਮ ਨੋਟਬੁੱਕਾਂ ਦੀ ਮੰਗ (1,000 ਡਾਲਰ ਜਾਂ ਲਗਭਗ 83,000 ਰੁਪਏ ਪ੍ਰਤੀ ਯੂਨਿਟ) ਵਧੀ ਹੈ। ਸਾਲਾਨਾ ਆਧਾਰ 'ਤੇ 7.6 ਫੀਸਦੀ ਦਾ ਵਾਧਾ ਹੋਇਆ ਹੈ। IDC ਇੰਡੀਆ ਅਤੇ ਸਾਊਥ ਏਸ਼ੀਆ ਦੇ ਰਿਸਰਚ ਮੈਨੇਜਰ, ਭਰਤ ਸ਼ੇਨੋਏ ਨੇ ਕਿਹਾ ਕਿ ਕੰਪਨੀਆਂ ਨੂੰ ਈ-ਕਾਮਰਸ ਪਲੇਟਫਾਰਮ ਰਾਹੀਂ ਵੱਧ ਵਿਕਰੀ ਦਾ ਫਾਇਦਾ ਹੋਇਆ ਹੈ। ਭਾਰੀ ਛੋਟਾਂ, 'ਕੈਸ਼ਬੈਕ' ਪੇਸ਼ਕਸ਼ਾਂ ਆਦਿ ਕਾਰਨ ਈ-ਕਾਮਰਸ ਪਲੇਟਫਾਰਮਾਂ 'ਤੇ ਵਿਕਰੀ ਵਧੀ ਹੈ।

ਰਿਪੋਰਟ ਦੇ ਅਨੁਸਾਰ, "ਐਚਪੀ ਨੇ ਤੀਜੀ ਤਿਮਾਹੀ ਵਿੱਚ ਨਿੱਜੀ ਕੰਪਿਊਟਰਾਂ ਦੀ ਵਿਕਰੀ ਵਿੱਚ 29 ਪ੍ਰਤੀਸ਼ਤ ਮਾਰਕੀਟ ਹਿੱਸੇਦਾਰੀ ਦੇ ਨਾਲ ਵਪਾਰਕ ਅਤੇ ਖਪਤਕਾਰ ਦੋਵਾਂ ਹਿੱਸਿਆਂ ਦੀ ਅਗਵਾਈ ਕੀਤੀ...." ਲੇਨੋਵੋ 7,78,000 ਯੂਨਿਟਾਂ ਦੇ ਨਾਲ ਦੂਜੇ ਸਥਾਨ 'ਤੇ ਆਈ। ਕੰਪਨੀ ਦੀ ਬਾਜ਼ਾਰ ਹਿੱਸੇਦਾਰੀ 17.3 ਫੀਸਦੀ ਰਹੀ। ਡੈਲ ਟੈਕਨਾਲੋਜੀਜ਼ ਅਤੇ ਏਸਰ ਗਰੁੱਪ 14.6 ਫੀਸਦੀ ਬਾਜ਼ਾਰ ਹਿੱਸੇਦਾਰੀ ਨਾਲ ਤੀਜੇ ਸਥਾਨ 'ਤੇ ਰਹੇ। ਸਮੀਖਿਆ ਅਧੀਨ ਤਿਮਾਹੀ ਦੌਰਾਨ, ਏਸਰ ਨੇ ਆਪਣੇ ਮੁਕਾਬਲੇਬਾਜ਼ਾਂ ਵਿੱਚ ਪੀਸੀ ਦੀ ਵਿਕਰੀ ਵਿੱਚ 26.2 ਪ੍ਰਤੀਸ਼ਤ ਦੀ ਸਭ ਤੋਂ ਵੱਧ ਵਾਧਾ ਦਰਜ ਕੀਤਾ। ਰਿਪੋਰਟ 'ਚ ਕਿਹਾ ਗਿਆ ਹੈ ਕਿ ਤੀਜੀ ਤਿਮਾਹੀ 'ਚ ਆਸੁਸ ਦੀ ਵਿਕਰੀ ਸਾਲਾਨਾ ਆਧਾਰ 'ਤੇ 22.3 ਫ਼ੀਸਦੀ ਘੱਟ ਕੇ 4,35,000 ਇਕਾਈ ਰਹੀ।