ਸਟਾਰਬਕਸ ਨੂੰ ਮਾੜੀ ਵਿਕਰੀ ਤੇ ਬਾਈਕਾਟ ਕਾਰਨ 11 ਅਰਬ ਅਮਰੀਕੀ ਡਾਲਰ ਦਾ ਹੋਇਆ ਨੁਕਸਾਨ
12/07/2023 11:03:32 AM
ਹਿਊਸਟਨ (ਅਮਰੀਕਾ) - (ਭਾਸ਼ਾ) - ਸੀਏਟਲ-ਅਧਾਰਤ ਸਟਾਰਬਕਸ ਕਾਰਪੋਰੇਸ਼ਨ ਨੂੰ ਇਸਦੇ ਉਤਪਾਦਾਂ ਦੀ ਮਾੜੀ ਵਿਕਰੀ ਅਤੇ ਬਾਈਕਾਟ ਤੋਂ ਬਾਅਦ ਲਗਭਗ 11 ਅਰਬ ਡਾਲਰ ਦਾ ਨੁਕਸਾਨ ਹੋਇਆ, ਜਿਸ ਨਾਲ ਕੰਪਨੀ ਦੀ ਕੁੱਲ ਕੀਮਤ 9.4 ਫ਼ੀਸਦੀ ਘਟ ਗਈ। ਸਟਾਰਬਕਸ ਦੇ ਸ਼ੇਅਰਾਂ 'ਚ 8.96 ਫ਼ੀਸਦੀ ਦੀ ਗਿਰਾਵਟ ਆਈ, ਜੋ ਕਰੀਬ 11 ਅਰਬ ਅਮਰੀਕੀ ਡਾਲਰ ਦੇ ਨੁਕਸਾਨ ਦੇ ਬਰਾਬਰ ਹੈ।
ਸਟਾਰਬਕਸ ਵਰਕਰਜ਼ ਯੂਨਾਈਟਿਡ ਦੁਆਰਾ ਕੀਤੇ ਗਏ ਇੱਕ ਟਵੀਟ ਤੋਂ ਬਾਅਦ ਕੰਪਨੀ ਮੁਸੀਬਤ ਵਿੱਚ ਆ ਗਈ, ਜਿਸ ਨੇ ਇਸਦੇ ਉਤਪਾਦਾਂ ਦਾ ਬਾਈਕਾਟ ਕੀਤਾ। ਲੇਬਰ ਯੂਨੀਅਨ ਆਪਣੇ ਬਹੁਤ ਸਾਰੇ ਬੈਰੀਸਟਾਂ ਦੀ ਨੁਮਾਇੰਦਗੀ ਕਰਦੀ ਹੈ ਅਤੇ ਗਾਜ਼ਾ ਵਿੱਚ ਚੱਲ ਰਹੇ ਹਿੰਸਕ ਸੰਘਰਸ਼ ਵਿੱਚ ਫਲਸਤੀਨੀਆਂ ਨਾਲ ਇੱਕਮੁੱਠਤਾ ਪ੍ਰਗਟਾਈ ਹੈ।
ਇੱਕ ਉਦਯੋਗ ਵਿਸ਼ਲੇਸ਼ਕ ਨੇ ਕਿਹਾ, "ਗਾਜ਼ਾ ਪੱਟੀ 'ਤੇ ਇਜ਼ਰਾਈਲ ਦੇ ਹਮਲੇ ਦੇ ਵਿਚਕਾਰ ਚੱਲ ਰਹੇ ਬਾਈਕਾਟ ਨਾਲ ਅਸੰਤੁਸ਼ਟੀ ਦੀ ਲਹਿਰ ਕੰਪਨੀ ਦੇ ਭਵਿੱਖ ਲਈ ਇੱਕ ਚੁਣੌਤੀਪੂਰਨ ਸੰਕੇਤ ਹੈ।" ਸਟਾਰਬਕਸ ਦੇ ਸ਼ੇਅਰ ਲਗਾਤਾਰ 12 ਵਪਾਰਕ ਸੈਸ਼ਨਾਂ ਵਿੱਚ ਡਿੱਗੇ ਹਨ। 1992 ਵਿੱਚ ਕੰਪਨੀ ਦੇ ਜਨਤਕ ਹੋਣ ਤੋਂ ਬਾਅਦ ਕੰਪਨੀ ਨੇ ਇੰਨੇ ਲਗਾਤਾਰ ਦਿਨਾਂ ਵਿੱਚ ਕਦੇ ਵੀ ਆਪਣੇ ਸ਼ੇਅਰਾਂ ਵਿੱਚ ਗਿਰਾਵਟ ਦਾ ਸਾਹਮਣਾ ਨਹੀਂ ਕੀਤਾ। ਸ਼ੇਅਰ ਵਰਤਮਾਨ ਵਿੱਚ 115 ਅਮਰੀਕੀ ਡਾਲਰ ਦੇ ਆਪਣੇ ਸਾਲਾਨਾ ਉੱਚ ਪੱਧਰ ਤੋਂ ਹੇਠਾਂ ਲਗਭਗ 95.80 ਪ੍ਰਤੀ ਡਾਲਰ 'ਤੇ ਪਹੁੰਚ ਗਿਆ।
ਕੰਪਨੀ ਗਲੋਬਲ ਮੁੱਦਿਆਂ ਦੇ ਵਿਚਕਾਰ ਆਪਣੀ ਬ੍ਰਾਂਡ ਦੀ ਸਾਖ ਨੂੰ ਬਣਾਈ ਰੱਖਣ ਦੀ ਚੁਣੌਤੀ ਦਾ ਸਾਹਮਣਾ ਕਰ ਰਹੀ ਹੈ। ਵਿਸ਼ਲੇਸ਼ਕਾਂ ਦੇ ਨਾਲ ਇੱਕ ਤਾਜ਼ਾ ਕਾਲ ਵਿੱਚ, ਸਟਾਰਬਕਸ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ (ਸੀ.ਈ.ਓ.) ਲਕਸ਼ਮਣ ਨਰਸਿਮਹਨ ਨੇ ਕਿਹਾ ਸੀ ਕਿ ਉਹ ਕੰਪਨੀ ਦੇ ਵਿਭਿੰਨ ਚੈਨਲਾਂ ਅਤੇ ਵਿਸ਼ਾਲ ਆਰਥਿਕ ਚੁਣੌਤੀਆਂ ਅਤੇ ਬਦਲਦੇ ਉਪਭੋਗਤਾ ਵਿਵਹਾਰ ਦੇ ਬਾਵਜੂਦ ਗਾਹਕਾਂ ਨੂੰ ਬਰਕਰਾਰ ਰੱਖਣ ਦੀ ਸਮਰੱਥਾ ਬਾਰੇ ਆਸ਼ਾਵਾਦੀ ਹਨ। ਮਿਸਰ ਵਿੱਚ ਸਟਾਰਬਕਸ ਨੇ ਕਥਿਤ ਤੌਰ 'ਤੇ ਬਾਈਕਾਟ ਦੁਆਰਾ ਵਿੱਤੀ ਤੌਰ 'ਤੇ ਪ੍ਰਭਾਵਿਤ ਹੋਣ ਤੋਂ ਬਾਅਦ ਨਵੰਬਰ ਦੇ ਅਖੀਰ ਵਿੱਚ ਕਈ ਕਰਮਚਾਰੀਆਂ ਨੂੰ ਨੌਕਰੀ ਤੋਂ ਕੱਢ ਦਿੱਤਾ, ਕਿਉਂਕਿ ਉਹ ਖ਼ਰਚਿਆਂ ਵਿੱਚ ਕਟੌਤੀ ਕਰਨ ਲਈ ਮਜਬੂਰ ਹੈ।
